དང་པ་ཐེ་ས་ལོ་ནི་ཀི། 2
2
ཐེ་ས་ལོ་ནི་ཀི༌ག་གནང༌ཁཱན་ པ༌ཝལ༌ག་ཕྱག༌ལཱ།
1ཨ་ཧ་ཡུང་ཟི་བ་ ཨའི་ན་ཧ་པོང་ཀ་ ཨུ་ཁཱན་ཁེ་པ་ བ་ཏོང་མ་དིན་ཤི་ཨ་ཉི་ ནའི་ནའི་ཏེན་གི་སེན༌ཅ། 2དག་པ་ཀབ་ཉི་ ན་ཤི་སེན་ཅ་ ཨའི་ཐེ་ས་ལོ་ནི་ཀི་ག་ མང་ཕེ་གོ་མ་ ཕི་ལིབ་པི་ག་ གནམ་མེད་ས་མེད་ མ་ལེག་པ་ཨ་ཉི་ ངི་ནང་ཁུ་ལེ་ག༌ཝ། ཉི་ལེ་ལ་ག་ ཨ་ཧ་ཏཱན་ གནམ་མེད་ས་མེད་ མ་ལེག་པ་ ཨན་ཐཱན་རང་གི་ནེ་བུ་ དཀོན་མཆོག་གེ་ ཨུ་ཁཱན་འཐེན་ལེག་པུ་ ན་ཧ་བཤད་པེ་དེན་གེ་ དཀོན་མཆོག་གི་ ཨ་ཧ་སེམས་ དོ་རི་རི་ཅོད་གནང༌མ། 3ཨ་ཤི་ ན་ཧ་འཐེན་ལེག་པུ་ག་ ཐུང་ཀེ་ཨ་ཉི་ བསླབ་བྱ་བིན༌ཅ། ངཱད་ཉི་ ཡང་ན་ལ་ སེམས་མ་ཙང་མ་ཨ་ཉི་ ན་ཧ་མགུ་སྐོར་ཕི་ལེ་དེན་གེ་མང་གི། 4ལག་ཏང་ ཨ་ཤི་དཀོན་མཆོག་ག་ ཐུགས་བཞེད་དང་ཏུ་ཉི་ཨ༌ཝ། ཧང་ཡ་དག་ནེ་ལ་ དཀོན་མཆོག་གི་ ཨའི་ཤོ་ འཐེན་ལེག་པུ་ བཤད་པེ་རུང་པ་ག་ཙི་ཁཱན་ སོ་ངོ་བ་གི༌ལ། སོ་ངོ་བ་ ཤོ་ནང་ཕེ་ལེ་ བི་ལེ་དེན་གེ་མང་གི་ཝ་ ཨ་ཧ་སེམས་མཁྱེན་ཁཱན་ དཀོན་མཆོག་ ཐུགས་ཀ་ཚུད་པེ་དེན་གེ་ ཙ་དྲེག་ཅ་གི༌ལ། 5ན་ཤི་སེ་ཝ་གེ་ལག་ཏང་མཱན་ཅ་ ཨའི་ན་ཧ་པོང་ཀ་ མང་གི་ཝ་ཆཱས་ག་ བསྟོད་པ་ཕི་ཉི་མང་ཆི། ཉི་ཉོང་པེ་ག་རེ་ཆ་ཨ་ཉི་བུ་ ན་ཧ་ཇ་རོ་ད་བུ་ཐུར་ཅོད་ཉི་ ཀྲེམ་ཙོང་ཉི་མ་ཨུན་ཤི། དཀོན་མཆོག་ཤོ་ འཛོམས་དཔང་གི༌ལ།
6ཨའི་ཨི་བི་གེ་རང་ བསྟོད་པ་ཉོང་པེ་ གོད་པུ་མཱན༌ཅ། ན་ཧ་བ་ཀེ་བུ་མཱན༌ཅ། ཉི་བཱརའ་གེ་བུ་མཱན༌ཅ། 7མ་པ་ཏ་ ཁིརིས་ག་ སྐུ་ཚབ་གི་ཝ་ཨ་དེན་གེ་ ཨ་ཤི་ན་ཧ་བ་ཀེ་ གེ་ཨ་ཉི་ ཡེག་པེ་རེ་བེ་ཆོ༌ཝ། དག་པ་ཀབ་ཉི་ ཨའི་ན་ཧ་པོང་ཀ་ཆོ་ལ་ཀབ་ཉི་ ཨ་མ་གི་ཝག་ཙ་ གོད་པ་པུརུས་ཀིན་ ཇམ་པུ་ཨ་ཉི་ཆོ༌ཝ། 8ཨ་ཤི་ ནའི་ཕང་པ་ཨ་དེན་གེ་ དཀོན་མཆོག་ག་ འཐེན་ལེག་པུ་ཐུར་ཤ་ བཤད་པེ་ག་ གྲ་སྒྲིག་ཆོ་ཝ་མ་ཚཱད་པ་ ཚེ་ཆང་བི་ལེ་ག་ གྲ་སྒྲིག་ཆོ༌ཝ། ཧང་ཡ་དག་ནེ་ལ་ ཨ་ཤི་ ནའི་གནམ་མེད་ས་མེད་ ཕང་ཆོ༌ཝ། 9ཨ་ཧ་ཡུང་ཟི་བ་ ཨ་ཤི་ ཧང་ཏེན་ལའི་ཨ་ཉི་ དཀའ་ཝ་ཅཱད་པ་གི་ལ་སྨོ་ ཐེ་རི་བ་རི་རང་ ན་ཤི་ཡིད་ཀ་ཨན༌ཅ། ཨ་ཤི་ དཀོན་མཆོག་ག་ འཐེན་ལེག་པུ་བཤད་ཅ་ཨ་ཉི་ ན་ཧ་ཐུང་ཀ་ རོང་མ་ཀེ་བེ་དེན་གེ་ ངམ་བི་ནང་མ་ཝ་ལའི་ཨ༌ཝ།
10ཨ་ཤི་ ན་ཧ་ཏཱན་ཨ་ཁཱན་ ཨ་ཧ་ཨ་ཐང་ ནའི་དད་པ་ཨ་ཁཱན་བ་ཀ་པོང་ཀ་ ཙང་མ་ ཐྲང་ཏང་ཏང་དང་ ཅོན་ཏག་པེ་མར་བ་ཨ་ཉི་ཆོ༌ཝ། ནའི་ཤོ་ འཛོམས་དཔང་དཔང་བཞག་གི༌ལ། ཉི་དཀོན་མཆོག་བུ་ འཛོམས་དཔང་གི༌ལ། 11ན་ཤི་སེན་ཅ་ ཨ་ཤི་ན་ཧ་ ཨ་པ་གི་ཝག་ཙ་ག་ ཨ་ཝ་པུརུས་ཀིན་ཨ་ཉི་ཨ༌ཝ། 12ཨ་ཤི་ ན་ཧ་ནོ་ཝང་ཨ༌ཝ། སེམས་གསོ་ཨ༌ཝ། ཉི་ཡེག་ཉི་རང་ཐ༌ཝ། ན་ཧ་ཚེ་ག་ དཀོན་མཆོག་ག་ ཐུགས་ཀ་ཚུད་པ་ག་ལའི་ ཨ་ལེ་ཁེ་ལེ་དག༌ཉི། ཧང་ཡ་དག་ནེ་ལ་ དཀོན་མཆོག་གི་ ནའི་རོག་ཏེན་ག་ རྒྱལ་སྲིད་ག་གཟི་བརྗིད་ བོང་མེ་དེན་གེ་རཱན་ཅ་གི༌ལ༎
རོག་ཏེ་བ་ ཡི༌ཤུ༌པ་རི༌ཝ་ཀོར་གེ།
13ཨོ་ཉི་ཨ་དེན་གེ་ ཨ་ཤི་བཀའ་དྲིན་བསམ་ཉི་རང་ ཆོ་ལེ་ཁེ་ཝ་ག་ དེན་ཐ་བཱརའ་བུ༌ཅ། ཉི་ཨ་ཤི་ ན་ཧ་དཀོན་མཆོག་གེ་ འཐེན་ཕཱན་ཅ་ཨ་ཉི་ ན་ཤི་ཨ་ཧེ་མང་གི་ཝ་ དཀོན་མཆོག་གེ་རང་གི་ལ་དག་ཉི་ མི་ཉི་ཞུ༌ཝ། ཧང་ཡ་དག་ནེ་ལ་ གི་ལུ་བུ་ དཀོན་མཆོག་གེ་རང་གི༌ལ། ནའི་དད་པ་ཨ་ཁཱན་བ་ཀ་པོང་ཀ་ དཀོན་མཆོག་གི་ ཕྱག་ལཱ་གནང༌ལ། 14ཕང་ཁཱན་ ཁིརིས་ཡི་ཤུ་ག་སོ་ངོ་བ་ ཡ་ཧུ་དི་ཡ་ག་ དཀོན་མཆོག་ག་ ཆོས་ཚོགས་ཁོན་བུ་ ན་ཧ་ཐུང་ཀ་ ཇུང་མ་པུརུས་ཀིན་ཨ་ཉི་རང་ ཇུང༌མ། ཡུང་ཟི་བ་ ཁིརིས་ཡི་ཤུ་ག་ སོ་ངོ་བ་ ནའི་བུ་ ཡ་ཧུ་དི་ཡ་ག་ཆོ་ཁཱན་ དཀོན་མཆོག་ག་ ཆོས་ཚོགས་བ་ ད་བུ་རང་རི༌ཝ། རོག་ཏེ་བ་ ཡ་ཧུ་དི་པ་བ་ཀེ་ དཀའ་ཝ་ཅཱད་པེ་ཁེ་ཝ་ པུརུས་ཀིན་ཨ་ཉི་ ནའི་བུ་ ནའི་ཏེན་ག་ སོ་ངོ་བ་ཀེ་ དཀའ་ཝ་ཅཱད་པེ་ཁེ༌ཝ། 15ཡ་ཧུ་དི་པ་བ་ཀི་ གཙོ་བོ་ཡི་ཤུ་དང་ ལུང་བསྟན་པ་བ་བཀྲོངས༌མ། ཉི་ཨ་ཧ་བུ་ མ་ལེག་པ་ཨ༌ཝ། རོག་ཏེ་བ་ཀི་ དཀོན་མཆོག་ག་ ཐུགས་ཀ་མ་ཚུད་པ་ལའི་ ཧང་ཏེན་ཨ་ན་ཡ། ཉི་སོ་ངོ་བ་ཀ་བུ་ ཧང་ཏེན་མ་ལེག་པ་ཨ་ན་ཡ། 16ཧང་ཡ་དག་ནེ་ལ་ དད་པ་མ་ཨ་ཁཱན་བ་ཀ་ ཐར་པ་ཉོང་ཁཱན་ གསུང་བཤད་པེ་ག་བུ་ རོག་ཏེ་བ་ཀི་ ཨ་ཧ་མ་གཱན་ཤི། ཨོ་ཉི་ཨ་དེན་གེ་ རོག་ཏེ་བ་ཀི་ གོ་མ་གེ་རང་ཨ་ཁཱན་སྡིག་པ་ ཐམས་ཅན་རང་ཨ་ཉི་ཆུ༌མ། ཉི་ཨོམ་ ཇུ་ཀ་དག་པ་ཀབ་ཉི་ དཀོན་མཆོག་གི་ ཆདཔ་ཕོག་ཉི་ རོག་ཏེ་བ་ཀ་ཐུང་ཀ་ ཤེག་པ༌ཅ༎
པ་ཝལ་ལོག་ཉི་ རོག་ཏེ༌བ་ཆོ༌ས༌ག་བྱོན༌མེ༌ག་ སེམས་ཨ༌ཝ༌ལ།
17ཉི་ཡུང་ཟི་བ་ ཨའི་ན་ཧ་བ་ཀེ་ རེབ་ཀིན་ཐུར་ག་དེན་གེ་ བེརེ་བ༌ཅ། དག་པ་ཀབ་ཉི་ སེམས་ཀ་མང་གི་ཝ་ ལུས་པུ་ག་ཤ་གི༌ལ། ཉི་ནའི་ལོག་ཉི་རུ་མེ་ག་ སེམས་ཨ་ཉི་ ཨ་ཤི་ ནའི་རུ་མེ་ག་དེན་གེ་ ཐ་ས་ཙ་དྲེག་པ་མང་གི། 18ཨའི་ནའི་ཆོ་ས་ག་ཏཱན་ ལོག་པེ་ལ་མ་ཆོ༌ཝ། ཉི་ཇང་ཇང་ཏེན་གི་ ལོག་ཉི་དི་ལེ་ག་ ལོག་ཉི་ལོག་ཉི་རང་ ཙ་དྲེག་ཉི་གོད༌པ། དག་པ་ཀབ་ཉི་ སེ་ཏཱན་གི་ ཨ་ཧ་ལམ་ཏོག༌པ། 19ཨ་ཧ་གཙོ་བོ་ཡི་ཤུ་ ལོག་ཉི་བྱོན་མ་ཀབ་ཉི་ རོ་ཀ་སྐུན་མདུན་ག་ ཨ་ཧ་རེ་ཆ་དང་ ཨ་ཧ་བ་ཤོ་ནང་ཕེ་ཝ་ཅོད་ཁཱན་ ཉི་ཨུ་ཉུ་མ་ཚཱད་པ་ ཨའི་ངལ་རངས་པེ་རིག་ཁཱན་ ཨི་བི་གི་ལ་ཡ། ཧང་ ནའི་མང་གི་སྨོ། 20གི་ལ་ ན་ཧ་ཡོར་ཀེ་ཨ་ཉི་ ཨའི་ངལ་རངས་ཉི་ སྐྱིད་པུ་ཉོང་པ༌ཅ༎
Currently Selected:
དང་པ་ཐེ་ས་ལོ་ནི་ཀི། 2: TNTB
Highlight
Share
Copy
Want to have your highlights saved across all your devices? Sign up or sign in
Tshangla New Testament
© 2023, The Bible Society of India
all rights reserved
