Rɔmu Siè 7

À ńdɛsĩ̀rɔ ɛ́ yú míte hɔ̀ làndɛ́ núnú hũn

1Kìe zɛ̀ɓɛ̀, mí dũ hɔ bòo lɛ ɛ́ nín bie àá miɛ iè hɔ̀ lɛ ɛ́ mí dũ hɔ làndɛ́. Nìnbírɔ ɓen yìe wi, ɛ̀ hɔ̀ làndɛ́ den dàa pànkɛ́ piè lɔ̀n. 2Ɛ́ mí húi lò, hṹnu lɛ yan ɛ́ can ɓán àá ɓá bɛ́rɔ hɔ̀ làndɛ́ hũn, lɛ kɛ́ á bɛ́rɔ ɛ́ yìe wi. Kɛ́ á bɛ́rɔ ɛ́ ɓen húrun, à hṹnu ɛ́ ɲún lɔ́ hɔ́ làndɛ́ hũn, hɔ̀pe làndɛ́ lɛ ɛ́ hṹn can ɔ̀pe àá ɓá bɛ́rɔ. 3Kɛ́ á khie van wɔ́ bɛ́-ɓuɛ̀ ɓà hṹnu kɛ́ ɓà bɛ́rɔ ɛ́ lò yìe wi, ɛ̀ ɓɛ̀ wóò líi ɔ́ àá bɛ́fé. Kɛ́ ɓà bɛ́rɔ ɛ́ húrun, ɛ̀ hɔ̀ làndɛ́ wṹn lɔ̀n á te míte; à dɛ̀ ɛ́ vɛ wé bɛ́-ɓuɛ̀ ɓà hũnù kɛ́ ɓɛ́ yá líi ɔ́ àá bɛ́fé wɛ̀. 4Ɛ́ mípe kiè zɛ̀ɓɛ̀, ɛ́ sí iè pe ɛ́ hɔ́ ɓiɛ̀ dɛ̃̀ kɛ̀amu àá miɛ. À Moyiize làndɛ́ wṹn lɔ̀n, ɛ́ mí dɛ̃̀ kɛ̀a nìɛ lɛ húrun iè hɔ̀ lɛ ɛ́ mí páaniɛ húrún àá ɔ́ Kirisa. Ɛ́ kɛ̀a sáalɛ, ɛ́ mí wo bòo ɛ́ khie sɛ̃̀ nì-ɓuɛ̀ ǹ lɛ iè ɔ̀pe Kirisa lɛ vìé lɔ́ húmú, bòo lɛ ɛ́ wé ɛ̀ kè dàá wé hɔ́ bòo lɛ ɛ́ Dɔfĩn ɛ́ wɛ. 5Hɔ̀ bɔn kɛ́ pɛ̃̀hṹ lɛ ɛ́ ké dàa hṹn wóò wé hɔ́ bòo lɛ ɛ́ tĩ kiè ǹ, ɛ̀ kè tɛkɛ̀a bòo lɛ ɛ́ hɔ wɛ lɛ ɛ́ yí sãa, lɛ ɛ́ hɔ́ làndɛ́ ɛ́ te siɛ hooniɛ kè hũn, ɛ́ hṹn wóò súuní kie ɛ̀ kè wé hɔ́ bòo lɛ ɛ́ yí te mí yìe; ɛ́ hɔ́ bòo lɛ ɛ́ wóò ɓen pehɔ̀ máahṹ ɛ́ iè hɔ̀ húmú. 6Ɛ́ kɛ̀a sáalɛ ɛ́ ké wo yú kéte hɔ̀ làndɛ́ núnú hũn, iè hɔ̀ lɛ ɛ́ ké tan iè nìɛ lɛ hṹn húrun hɔ̀pe làndɛ́ lɛ hṹn wɔ́ kie àá mí wɔhĩ́ núnú hũn. Ɛ́ ké wo dɛ̀ Dɔfĩn tɔnlɔ́ ɛ́ tɛ́ àá tánlɔ́ bɔ̀fĩɛ̀ ɛ́ ɓáaní ɓán àá bòo lɛ ɛ́ pehɔ̀ Mɛkɛ̃ni ɛ́ zɛ̃́ní kiè ǹ, kɛ́ ké yá tɛ́ hɔ́ àá tánlɔ́ bɔ̀kĩ́ɛ lɛ ɛ́ wɛ̃́ wi hɔ làndɛ́ hũn wɛ̀.

Hɔ̀ làndɛ́ bòo lɛ ɛ́ hɔ́ wóò wé

7Ɛ́ ké wo ɛ́ zɔ́ bie nɛ wɛrɛ̀? Nɛ hɔ làndɛ́ ɛ́ iè bɔ̀koohɔ́? Ńɓùé lò! Kɛ́ hɔ́ làndɛ́ temu lɛ́ ɛ́ ń dàa dũ hɔ bòo lɛ ɛ́ iè hɔ̀ bɔ̀koohɔ́. Iè hɔ̀ lɛ kɛ́ hɔ́ làndɛ́ ɛ́ hṹn yí bie nɛ: Bí nɛ kɔ yìi ɛ̀ lé nìnbírɔ́ bòo ǹ, ɛ́ ń hṹn yáa ɓen dũń hɔ́ bòo lɛ ɛ́ ɓɛ́ wóò nɛ yìi ńlé bòo ǹ wɛ̀. 8Ɛ́ hɔ́ bɔ̀koohɔ́ ɛ́ wo khie bɔ̀ hɔ̀pe làndɛ́ ǹ ɛ́ dàa lɛ́ ɛ́ niǹ yìi dàa wóò lé hɔ́ bòo ǹ àá mí ɲúuhɛ̃ ɲúuhɛ̃. Iè hɔ̀ lɛ kɛ́ hɔ́ làndɛ́ ɛ́ hṹn mí, nɛ hɔ̀ bɔ̀koohɔ́ ɛ́ tan iè bòo lɛ ɛ́ húrun. 9Hṹn àá híɛhɔ́ lɛ ɛ́ ń hṹn ɲɛùn yí dũ hɔ làndɛ́, ɛ̀ niǹ mɛkɛ̃nì ɛ́ hṹn wi. Kɛ́ hɔ́ lɛ ɛ́ ń dũnɛ hɔ̀ làndɛ́ ɛ́ hɔ́ bɔ̀koohɔ́ ɛ́ den wo yú hɔ́ pànkɛ́ ɛ́ mí tɔnlɔ́ ɛ̀ tɛ́ nìn lɔ̀n, 10ɛ̀ ǹpe ɛ́ húrun. Ɛ́ kɛ̀amu, ɛ́ hɔ́ làndɛ́ bòo lɛ hɔ́ bie nɛ a nìnbírɔ fɔ́ɓán à wé, lɛ hṹn sãawi ɛ̀ hɔ̀ dàá mi ɛ̀ dàá vɛ le mɛkɛ̃nì hũn, ɛ́ den wo wɔ́ hɔ́ húmú ɛ́ hɔ́ dàa mi ɛ́ dàa van hũn. 11Ɛ́ hɔ́ bɔ̀koohɔ́ ɛ́ wo khie bɔ̀ hɔ̀ làndɛ́ ǹ ɛ́ dàa fĩiniɛ mi, ɛ̀ hɔ̀ bɔ̀ hɔ̀ ǹ ɛ́ dàa ɓɔ́ mi.

12Ɛ́ hɔ́ làndɛ́ ɛ́ pe wo ɛ́ ce, ɛ̀ pehɔ̀ bòo lɛ ɛ́ hɔ́ bie nɛ a nìnbírɔ fɔ́ɓán à wé ɛ́ lò ɛ́ ce; hɔ̀ iè bòo lɛ ɛ́ cã̀aní ɛ̀ hɔ̀ lò ɛ́ sãa. 13Ɛ́ bòo ɛ́ hɔ́ bɔ̀tente ɛ́ temu bĩniɛ lɛ́ ɛ́ ń dàa ɛ́ húrun? Ńɓùé lò! Hɔ̀ iè hɔ̀ bɔ̀koohɔ́ ɛ́ temu wɔ́. Ɛ́ hɔ́ iè pe hɛ̀ wo zɛ̃́niɛ mí bɔ̀koómú kɛ̀amu. Hɔ̀ bɔ̀koohɔ́ ɛ́ bɔ̀ hɔ̀ bɔ̀tente ǹ ɛ́ dàa lɛ́ ɛ́ ń húrun. Ɛ́ kɛ̀amu, ɛ́ hɔ́ làndɛ́ ɛ́ temu lɛ́ ɛ́ ké dàa dũ kɛ́ hɔ́ bɔ̀koohɔ́ ɛ́ hɛ̀ yí sãa hùúu ɛ́ pɔ hɔ bòo míkùi.

À nìnbírɔ ɛ́ hɔ́ bɔ̀koohɔ́ pànkɛ́ ɛ́ pɔ

14Ké dũ kɛ́ hɔ́ làndɛ́ ɛ́ iè Dɔfĩn bòo; ɛ̀ ǹpe ɛ́ iè nìnbírɔ lɛ cũ̀kṹ mí, lɛ ɛ́ ɓɛ́ yìɛniɛ kɛ̀a ie wɔnù hɔ̀ bɔ̀koohɔ́ ǹ. 15Ɛ́ ń hɛ̀ wo yí dũ hɔ bòo lɛ ɛ́ ń wóò wé ɲún, iè hɔ̀ lɛ ɛ́ hɔ́ bòo lɛ ɛ́ ń wɛ nín wé ɛ́ ń yáà wé, kɛ́ hɔ́ bòo lɛ ɛ́ ń hɛ́rɛ iè pe ɛ́ ń wóò wé. 16Kɛ́ hɔ́ ɓen iè hɔ̀ bòo lɛ ɛ́ ń yí wɛ iè pe ɛ́ ń wóò wé, hɔ́rɔsí ɛ̀ nin pe wo tɛ̀ kɛ̀amu nɛ hɔ làndɛ́ ɛ́ iè bòo lɛ sãa. 17Ɛ́ hɔ́ wo bĩniɛ ɛ́ yí ńpe niǹte ǹ ɛ́ temu ɛ́ wé kɛ̀amu, kɛ́ hɔ́ iè hɔ̀ bɔ̀koohɔ́ lɛ wi mi ǹ te hɔ ɛ́ wé. 18Ɛ́ ń wo dũ kɛ́ hɔ́ bɔ̀tente wénlɔ́ ɛ́ hɛ̀ mínɛ mi ǹ wɛ̀; iè bòo ɛ́ ń nɛ npe lɛ ɛ́ iè ɔ̀ nìnbírɔ lɛ cũ̀kṹ mí. Hɔ̀ bɔn kɛ́ ń wɛ ɛ́ wóo nin wé bɔ̀tente, kɛ́ ń den yí dàa hɔ pànkɛ́ lɛ ɛ́ wé hɔ́ wɛ̀. 19Ɛ́ ń wo yáà wé hɔ́ bɔ̀tente lɛ ɛ́ ń wɛ nin wé, kɛ́ hɔ́ bɔ̀koohɔ́ lɛ ɛ́ ń yí wɛ iè pe ɛ́ ń wóò wé. 20Kɛ́ ń ɓen wóò wé hɔ́ bòo lɛ ɛ́ ń yí wɛ, hɔ́rɔsí ɛ̀ hɔ̀ bĩniɛ yí ńpe ɛ́ te hɔ ɛ́ wé, kɛ́ hɔ́ iè hɔ̀ bɔ̀koohɔ́ lɛ ɛ́ wi mi ǹ ɛ́ te mu ɛ́ wé. 21Ɛ́ lɛ iè hɔ̀ bòo lɛ ɛ́ ń wo niɛ ɛ́ mɔn: ń wɛ wóo nin wé hɔ́ bɔ̀tente, kɛ́ hɔ́ bɔ̀koohɔ́ mí dòonún iè pe ɛ́ ń dɛ̀ wóò wé. 22Ǹpe niǹ tĩì hũn, ɛ̀ ǹ hɛ̀ wɛ hɔ Dɔfĩn làndɛ́ cɛ̃̀un. 23Kɛ́ ń den niɛ mɔn kɛ́ làndɛ́ dɛ̀ɓuɛ̀ dɔ̀ lɛ ɛ́ ń yí wɛ ɛ́ wi mi ǹ; lè ɛ́ fi àá hɔ́ làndɛ́ lɛ ɛ́ niǹ hɛciri ɛ́ wɛ, ɛ̀ lè wɔ́ mi àá hɔ́ bɔ̀koohɔ́ lɛ wi mi ǹ wɔnù. 24Hɔ̀ lɛ ɛ́ wo iè ńɓùo miinɛ kɛ̀amu! Á wo iè wieni ɛ́ te nin mii leń ɛ̀ lé hɔ́pe bɔ̀koohɔ́ lɛ wi mi ǹ núnú hũn, hɔ̀pe lɛ ɛ́ niǹ vɛ́ ɛ́ dàa kã́a hɔ̀ húmú? 25Nɛ Dɔfĩn yèrè ɓàaní, Hɔ̀ wɔ́ hɔ́ kè Ɲunsɔ Yiezu Kirisa yèrè lɔ̀n!

Ɛ́ kɛ̀amu, ɛ́ ńpe niǹ hɛciri hũn ɛ̀ ǹ tɛ̀ hɔ̀ Dɔfĩn làndɛ́ bòo, kɛ́ hɔ́ ɓen iè ńpe lɛ iè ɔ̀ nìnbírɔ lɛ cũ̀kṹ mí viì, ɛ̀ ǹ wi hɔ bɔ̀koohɔ́ wɔn-yáamu hũn.

Currently Selected:

Rɔmu Siè 7: bwj

Highlight

Compare

Copy