Rɔmu Siè 5

Lè hũn-wiɛ̀ lɛ ké dàa àá Dɔfĩn

1Ɛ́ hɔ́ lɛ ɛ́ Dɔfĩn ɛ́ wo wɔ́ kie àá nìcã̀aníriè iè hɔ̀ lɛ ɛ́ ké dũmuasɛ̃̀ hɔ̀ ǹ, ɛ́ ké wo yú hũn-wiɛ̀ àá hɔ́pe Dɔfĩn kè Ɲunsɔ Yiezu Kirisa bòo hũn. 2Ápe Yiezu ɛ́ temu lɛ́ ɛ́ ké dàa yú hɔ́ Dɔfĩn hiì iè hɔ̀ lɛ ɛ́ ké dũmuasɛ̃̀, lèpe hiì lɛ ɛ́ ké wo fɛ́sí dɛ̃̀ hũn kɛ̀a sáalɛ. Ɛ́ ké wo wɛ kete iè hɔ̀ lɛ ɛ́ ké dũ kɛ́ ké ɓén mi Dɔfĩn ɓàarɔ́. 3Kɛ́ hɔ́ lɛ ɛ́ pɔ hɔ míkùi, ké wɛ kete kè lɔ̀nbiè hũn iè hɔ̀ lɛ ɛ́ ké dũ kɛ́ lé lɔ̀nbiè ɛ́ ɓén lɛ́ ɛ́ ké ɛ́ wookɛ ɛ́ cɛ ke kuò. 4Ɛ́ hɔ́ kuò canlɔ́ ɛ́ wóò ɓen àá hɔ́ ɲún cã̀anírɔ́ lè lɔ̀nbiè hũn, ɛ̀ hɔ̀ ɲún cã̀anírɔ́ ɛ́ ɓiɛ̀ wóò lɛ́ ɛ̀ nìnbírɔ dũń kɛ́ á ɓén yí hɔ́ bòo lɛ á ɛ́ hìé àá ńdɛsĩ̀nlɔ́. 5Ɛ́ hɔ́pe bòo lɛ ɛ́ ké ɛ́ hìé àá ńdɛsĩ̀nlɔ́ ɛ́ yá ɓén dé lùwiè kie ǹ wɛ̀; iè hɔ̀ lɛ ɛ́ lé Mɛkɛ̃n-Sãanu lɛ ɛ́ Dɔfĩn ɛ́ lɛ́ kiè ǹ ɛ́ dɔ́ hɔ́pe Dɔfĩn wanminu kè tĩɛ̀ hũn cɛ̃̀un.

6Ɛ́ pɛ̃̀hṹ lɛ ɛ́ ké dàa pànkɛ́ ɛ́ hṹn ɲɛùn mí, á Kirisa ɛ́ húrun kèpe bɔ̀konwériè bòo hũn lè yìi lɛ ɛ́ Dɔfĩn nɛ hɔ fɔ́ɓán ɛ̀ hɔ̀ wé hũn. 7Hɔ̀ hɛ̀ hie ɛ̀ nìnbírɔ ɛ̀ tɛ̀ hí nìnbírɔ lɛ ɛ́ cã̀aní bòo hũn, kɛ́ wɔ́ khɔn, ɛ́ nìnbírɔ dɔ̀ ɛ́ tɛ̀ ɛ́ hí nìnbí-tente dɔ̀ bòo hũn. 8Kɛ́ lɛ iè hɔ̀ bòo lɛ ɛ́ Dɔfĩn dàa zɛ̃́niɛ kɛ́ hɔ́ hɛ̀ wɛ kie: pɛ̃̀hṹ lɛ ɛ́ ké dàa hṹn iè bɔ̀konwériè, á Kirisa ɛ́ húrun kè bòo hũn. 9Ɛ́ piè cãani lɛ ɛ́ koosí ké bòo hũn ɛ́ lɛ́ ɛ́ Dɔfĩn den wo wɔ́ kie àá nìcã̀aníriè; ɛ́ ké wo dũ sãàniɛ kɛ́ ápe Kirisa ɛ́ ɓén fuení kiè ǹ ɛ́ lé hɔ́ Dɔfĩn tĩcĩ̀nín hũn. 10Ké hṹn iè Dɔfĩn ɓà ńbíyanliè. Kɛ́ Hɔ́ den lɛ́ ɛ́ ké ɲunù ɛ́ khũ̀a wɔ́ dìcóoní àá Hɔ́ piè Zuú lɛ húrún bòo hũn. Ɛ́ hɔ́ lɛ ɛ́ hɔ́pe Dɔfĩn ɛ́ wo lɛ́ ɛ́ ké ɲunù khũ̀a wɔ́ dìcóoní àá Hɔ́, ɛ̀ piè Zuú ɛ́ lò wo yìe wi kɛ̀a sáalɛ, ɛ́ hɔ́ iè ńɓùo temu mii lɛ́ ɛ̀ Hɔ̀ dàá bí fuení kie ǹ? 11Ɛ̀ bĩní páa yán, ké wɛ kete cɛ̃̀un Dɔfĩn híɛhɔ́ àpe Yiezu Kirisa bòo hũn, àpe lɛ ɛ́ lɛ́ ɛ́ ké dàa khũ̀a ɛ́ ɲíɓán àá hɔ́pe Dɔfĩn.

Hɛdɛ̃mɛ àá Yiezu Kirisa bòo

12À iè nìnbí-cóoní te hɔ bɔ̀koohɔ́ ɛ́ hàarí wɔ́ ɛ́ hɔ́pe bɔ̀koohɔ́ ɛ́ dàa zɔn lè dímíɲɛ́, à hàarí iè Hɛdɛ̃mɛ; ɛ́ hɔ́pe bɔ̀koohɔ́ ɛ́ ɓɛrɛ àá hɔ́ húmú. Ɛ́ sí iè pe temu lɛ́ ɛ́ ɓɛ́ nìnbirìe ɓɛ́kùi dàa wóò hí iè hɔ̀ lɛ ɛ́ ɓɛ́pe ɓɛ́kùi ɛ́ wɔ́ hɔ́ bɔ̀koohɔ́. 13Pɛ̃̀hṹ lɛ ɛ́ Dɔfĩn dàa hàarí ɲɛùn yí zɛ̃́ní hɔ́ làndɛ́ ɛ̀ lɛ́ á Moyiize ǹ, ɛ̀ hɔ̀ bɔ̀koohɔ́ ɛ́ wi lè dímíɲɛ́ hũn, kɛ́ hɔ́ lɛ ɛ́ hɔ́ làndɛ́ ɛ́ hṹn ɲɛùn mí, ɛ́ Dɔfĩn ɛ́ hṹn yá hɔ̀ bɔ̀koohɔ́ bòo ɛ̀ líi wɛ̀. 14Kɛ́ dàá mìí ɔ́ Hɛdɛmɛ pɛ̃hṹ ǹ fúu ɛ̀ vɛ dɛ̃ a Moyiize pɛ̃̀hṹ, ɛ́ hɔ́ húmú ɛ́ zɛ̃́niɛ mí núnú ɓɛ̀ nìnbirìe ɓɛ́kùi ǹ, hɛ̀rí ɓɛ̀pe lɛ ɛ́ yí wí-e pe Hɛdɛ̃mɛ bɔ̀koohɔ́ lɛ́ á hàarí wɔ́, lɛ iè hɔ̀ lɛ á hàarí pɛ̃́ Dɔfĩn ɲunù tɛmu.

Ápe Hɛdɛ̃mɛ ɛ́ iè ɔ̀pe lɛ fɔ́ɓán à ɓen bòo á ɛ́ zɛ̃́ní. 15Kɛ́ ápe Hɛdɛ̃mɛ bɔ̀koohɔ́ lɛ á wɔ́ ɛ́ yí dɛ̀ ɛ́ yá mìí ɛ́ màaní àá Dɔfĩn hiì wɛ̀. Hɔ̀pe wo bɔn kɛ́ nìnbí-cóoní bɔ̀koohɔ́ lɛ á wɔ́ ɛ́ temu lɛ́ ɛ́ ɓɛ́ nìnbirìe bìkuì dàa húrunkɛ. Kɛ́ Dɔfĩn hiì ɛ́ pe ɓàń cɛ̃̀un, ɛ̀ pehɔ̀ hɛ̃mù bòo lɛ ɛ́ Hɔ́ lɛ́ ɓɛ́ nìnbí-kuì ǹ à nìnbí-cóoní lɛ iè ɔ̀ Yiezu Kirisa bòo hũn ɛ́ pe ɲún wi cɛ̃̀un. 16Ɛ́ Dɔfĩn hɛ̃mù bòo lɛ ɛ́ Hɔ́ wóò lɛ́ ɛ́ den wi mí dòonún àá ɔ́pe nìnbí-cóoní bɔ̀koohɔ́ lɛ á wɔ́; iè hɔ̀ lɛ ápe nìnbí-cóoní lɛ iè ɔ̀ Hɛdɛ̃mɛ bɔ̀koohɔ́, ɛ́ temu lɛ́ ɛ́ Dɔfĩn dàa lɔ̀ ɓɛ̀ nìnbirìe lìe ɛ́ mii biení lɔ̀n. Kɛ́ Dɔfĩn hiì lɛ ɛ́ Hɔ́ wɔ́ àá ɓɛ́ nìnbirìe lɛ lò wɔ́ bɔ̀koohɛ̃ bɔ̀kùi, ɛ́ te ɓɛ wɔ́ àá nì-cã̀aníriè. 17Hɔ̀ bɔn kɛ́ á iè nìnbí-cóoní ńwénkhemù temu lɛ́ ɛ́ hɔ́ húmú ɛ́ dàa ɛ́ mí núnú ɛ̀ zɛ̃́ní ɓɛ́ nìnbirìe ǹ, àpe nìnbí-cóoní sɔ bòo hũn. Kɛ́ hɔ́ lò ɓiɛ̀ iè nìnbí-cóoní bòo hũn, lɛ iè ɔ̀ Yiezu Kirisa, ɛ́ hɔ́ bòo lɛ ɛ́ ɓɛ́ nìnbirìe ɛ́ yú Dɔfĩn viì ɛ́ dàa buò cɛ̃̀un ɛ́ pɔ: Dɔfĩn ɛ́ wɔ́ mí hiì àá ɓɛ́, ɛ̀ Hɔ̀ lò wɔ́ ɓɛ́ àá nì-cã̀aníriè. Á Kirisa bòo hũn ɛ́ ɓɛ́ ɓén yí lé mɛkɛ̃nì ɛ̀ ɓɛ̀ lò ɓén dí lé bɛ́záanú àá ɔ́.

18Ɛ́ kɛ̀a bòo lɛ á iè nìnbí-cóoní ńwénkhemù ɛ́ temu lɛ ɛ́ ɓɛ́ nìnbirìe ɓɛ́kùi ɛ́ dàa lìe ɛ́ lɔ̀ ɛ́ ɓɛ ɛ̀ biení lɔ̀n, ɛ́ kɛ̀amu, ɛ́ nìnbí-cóoní lɛ ɛ́ cã̀aní bòo lɛ á wɔ́ ɛ́ ɓiɛ̀ te ɓɛ nìnbirìe ɓɛ́kùi ɛ́ wɔ́ àá nì-cã̀aníriè, ɛ̀ hɔ̀ lɛ́ lé mɛkɛ̃nì ɓà ǹ. 19Kɛ̀a bòo lɛ ɛ́ nìnbí-cóoní lɛ pɛ̃́ Dɔfĩn ɲunù tɛmu ɛ́ temu lɛ́ ɛ́ nìnbirìe bìkuì dàa wɔ́ bɔ̀konwériè, ɛ́ kɛ̀amu, ɛ́ nìnbí-cóoní lɛ tɛ̀ Dɔfĩn bòo ɛ́ ɓiɛ̀ temu lɛ́ ɛ́ Dɔfĩn ɛ́ dàa wɔ́ ɓɛ́ nìnbirìe bìkuì àá nì-cã̀aníriè.

20Ɛ́ hɔ́ làndɛ́ ɛ́ ɓɛrɛ, ɛ́ ɓɛ́ nìnbirìe bɔ̀koohɛ̃ ɛ́ ɓiɛ̀ wookɛa ɛ́ buòní buònírɔ́. Kɛ́ lé viì lɛ ɛ́ ɓɛ́ nìnbirìe bɔ̀koohɛ̃ ɛ́ buò hũn, ɛ́ hɔ́ Dɔfĩn hiì ɛ́ wóò wookɛ ɓàaní hũn cɛ̃̀un. 21Ɛ́ kɛ̀a bòo lɛ ɛ́ hɔ́ bɔ̀koohɔ́ ɛ́ dàa zɛ̃́niɛ mí pànkɛ́ hɔ̀ húmú hũn, ɛ́ kɛ̀amu, ɛ́ hɔ́ Dɔfĩn hiì ɛ́ ɓiɛ̀ dàa pànkɛ́ lɛ ɛ́ lɛ́ ɛ́ ɓɛ́ nìnbirìe ɛ́ dàa wɔ́ nìcã̀aníriè Dɔfĩn híɛhɔ́, ɛ̀ ɓɛ̀ lò yú lé mɛkɛ̃nì lɛ yá vé kè Ɲunsɔ Yiezu Kirisa bòo hũn.

Currently Selected:

Rɔmu Siè 5: bwj

Highlight

Compare

Copy