Rɔmu Siè 4

Bòo lɛ ɛ́ Dɔfĩn dàa hàarí wɔ́ Abarahaamu àá nìcã̀anírɔ

1Ɛ́ hɔ́ wo iè ńɓuò ɛ́ ké wo ke zɔ bie ɔ kìe zĩkĩ́n Abarahaamu bòo hũn? Hɔ̀ iè ńɓùo á pɛ̃̀hṹ dɛ̀rɛ yú àá mí kùrú pànkɛ́? 2Kɛ́ ɓɛ́ hṹn nɛ a Abarahaamu ɛ́ hàarí ɛ́ cã̀aní Dɔfĩn híɛhɔ́ piè bòo lɛ á wɔ́ bòo hũn, á hṹn dɛ̀ míte ɛ́ ɓàanínin. Kɛ́ á den yí dɛ̀ míte ɛ́ yá ɓàanínin Dɔfĩn híɛhɔ́ wɛ̀. 3Iè hɔ̀ lɛ ɛ́ hɔ́ wɛ̃́ lé Dɔfĩn bienù vɛ̃hṹ hũn ɛ́ nɛ: À Abarahaamu ɛ́ dũmuasɛ̃̀ Dɔfĩn, ɛ́ piè ńdɛsĩ̀nlɔ́ bòo hũn ɛ́ Dɔfĩn ɛ́ nɛ a iè nìnbírɔ lɛ ɛ́ cã̀aní. 4À nìnbírɔ lɛ ɛ́ hɔ̀ tɔnlɔ́ ɛ̀ tɛ́ ɛ́ wóò yí mí sàanín. Kɛ́ piè sàanín sɔ ɛ́ ɓɛ́ yáà líi kɛ̀a bùuɲɛ́ bòo lɛ ɛ́ ɓɛ́ dɔ́ àá ɔ́, kɛ́ hɔ́ iè bòo lɛ á sãawi à yí. 5Kɛ́ á nìnbírɔ lɛ pe yí tɛ́ tɔnlɔ́ dɔ̀ kɛ́ á den dũmuasɛ̃̀ hɔ̀pe Dɔfĩn lɛ temu wóò lɛ́ ɛ̀ ɓɛ̀ bɔ̀konwériè ɛ̀ dàá khũ̀á wé ɓɛ́ nì-cã̀aníriè, ɛ́ piè ńdɛsĩ̀nlɔ́ bòo hũn, ɛ́ Dɔfĩn ɛ́ wí é àá nìcã̀anírɔ. 6Ɛ́ sí iè pe á Daviide ɛ́ hàarí khɛ́ kɛ̀amu à nìnbírɔ lɛ ɲún tĩ bòo hũn, àpe lɛ ɛ́ Dɔfĩn ɛ́ wóò wé àá nìcã̀anírɔ kɛ́ piè bòo lɛ á wé ɛ́ bòo mí wɛ̀. À hàarí bie nɛ làa:

7 Ɓɛ̀ ɲúuhɛ̃ ɛ́ tĩ, ɓɛ̀pe nìnbirìe lɛ ɛ́ Dɔfĩn ɛ́ dɔ́ sɛ́wɛ́rí ɛ́ lɛ́ nin peɓɛ̀ bɔ̀koohɛ̃ bòo hũn,

Ɓɛ̀pe lɛ ɛ́ Hɔ́ lerɛ bɔ̀koohɛ̃ ɛ́ lɔ́ lɔ̀n!

8 À ɲún ɛ́ tĩ, àpe nìnbírɔ lɛ ɛ́ Dɔfĩn ɛ́ yáà líi bɔ̀koohɛ̃ bòo!

9Ɛ́ lépe ɲún-tĩnù ɛ́ sũǹ iè dìɛ lɛ bòo ɛ́ sɛ̃̀ ɓɛ̀pe nìnbirìe lɛ fũ̀a ǹ ɓɛ́ dòonún yée? Pelè bòo kùusɔ ɛ́ yí sĩ̀ ɓɛ̀pe lɛ ɛ́ yí fũ̀a ǹ? Ɛ́ ké lò wo bie sáalɛ nɛ a Abarahaamu ńdɛsĩ̀nlɔ́ ɛ́ lɛ́ ɛ́ Dɔfĩn wɔ́ á àá nìcã̀anírɔ. 10Ɛ́ hɔ́pe sí ɛ́ hàarí wɔ́ wuàwurù? Lɛ kɛ́ ápe Abarahaamu ɛ́ fɛ̃̀ vɔ́ yée kɛ́ á ɲɛùn yí fĩ̀? Hɔ̀ yí bòo lɛ wɔ́ kɛ́ á fɛ̃́ vɔ́ wɛ̀; kɛ́ hɔ́ den wɔ́ kɛ́ á ɲɛùn yí fĩ̀ wɛ̀. 11Ɛ́ pehɔ̀ máahṹ à den khie fɛ̃̀. Ɛ́ hɔ́ fĩ̀nlɔ́ ɛ́ bɔ̀ lè fɛ̃nlɔ́ ɔ̀ ǹ; lè fɛ̃nlɔ́ lɛ ɛ́ zɛ̃́ní kɛ́ Dɔfĩn ɛ́ wɔ́ á àá nìcã̀anírɔ piè ńdɛsĩ̀nlɔ́ bòo hũn, lɛ kɛ́ á dàa hṹn ɲɛùn yí fĩ̀ wɛ̀. Ɛ́ hɔ́ wɔ́ kɛ̀amu, ápe Abarahaamu ɛ́ dàa wɔ́ ɓɛ́ nìnbirìe lɛ dũmuasɛ̃̀ hɔ̀ Dɔfĩn ɓɛ́kùi lɛ kɛ́ ɓɛ́ lò yí fũ̀a ɓà zĩnkĩ́n, ɛ́ Dɔfĩn dàa wɔ́ ɓɛ́ àá nì-cã̀aníriè. 12Ápe Abarahaamu ɛ́ lò ɓiɛ̀ iè ɓɛ̀lɛ ɛ́ fũ̀a ɓà zĩnkĩ́n, ɓɛ̀pe lɛ ɛ́ yáà wé hɔ́ fĩ̀nlɔ́ mí dòonún ɛ̀ ɓɛ̀ dìń lɔ̀n, kɛ́ ɓɛ́ lò wóò wí-é pe kìe zĩnkĩ́n Abarahaamu ńdɛsĩ̀nlɔ́ bòo ɓà ńmàa lɛ kɛ́ á dàa hàarí ɲɛùn yí fĩ̀ wɛ̀.

Hɔ̀ bòo lɛ ɛ́ Dɔfĩn ɛ́ lɛ́ mí ɲunù nɛ mí ɓén lɛ́ ɓɛ́ ńdɛsĩ̀riè ǹ

13Dɔfĩn ɛ́ hàarí lɛ́ mí ɲunù ɔ̀ Abarahaamu ǹ àá ɓɛ́ hũn nìɛ lɛ á ɓén yí ǹ nɛ ɓɛ ɓén teń lé sṹsùnù. Hɔ̀ yí bòo lɛ ɛ́ ɓɛ́ nɛ hɔ iè hɔ̀ lɛ ápe Abarahaamu ɛ́ hàarí ɛ́ hɔ̀ làndɛ́ ɛ̀ mɛ̀ndɛ̃ ɛ́ Dɔfĩn dàa hàarí khɛ́ hɔ́pe sí ɛ́ lɛ́ à ǹ, kɛ́ hɔ́ iè hɔ̀ lɛ ɛ́ Hɔ́ hàarí wɔ́ á àá nìcã̀anírɔ piè ńdɛsĩ̀nlɔ́ bòo hũn. 14Kɛ́ ɓɛ́ hṹn iè ɓɛ̀lɛ ɛ́ hɔ̀ làndɛ́ ɛ̀ mɛ̀ndɛ̃ ɛ́ te hɔ bòo lɛ ɛ́ Dɔfĩn lɛ́ mí ɲunù nɛ mí ɓén lɛ́ ɛ́ ɓɛ ɛ̀ yí, hɔ́rɔsí ɛ̀ hɔ̀ ńdɛsĩ̀nlɔ́ ɲún ɛ́ mí, ɛ̀ lèpe Dɔfĩn ɲunù lɛ ɛ́ Hɔ́ lɛ́ ɛ́ lò iè kã́amáà. 15Hɔ̀ làndɛ́ pĩ́nlɔ́ ɛ́ wóò ɓen àá Dɔfĩn tĩ-cĩ̀níì. Ɛ̀ viì lɛ ɛ́ làndɛ́ ɛ́ mí hũn ɛ́ hɔ́ làndɛ́ pĩ́nlɔ́ ɛ́ ɓiɛ̀ mí hũn wɛ̀.

16Ɛ́ hɔ́ iè hɔ̀ ńdɛsĩ̀nlɔ́ bòo hũn ɛ́ Dɔfĩn dàa lɛ́ mí ɲunù ɓɛ̀ nìnbirìe ǹ, bòo lɛ ɛ́ wé ɛ̀ lèpe ɲunù lɛ ɛ́ Hɔ́ lɛ́ ɛ̀ dàá wé hiì, ɛ̀ pelè bòo ɛ̀ sĩ̀-ɛ Abarahaamu hũn nìɛ ǹ ɓɛ́kùi. Ɛ̀ lè bòo ɛ̀ bí sĩ̀ ɓɛ̀lɛ ɛ́ hɔ̀ làndɛ́ ɛ̀ mɛ̀ndɛ̃ ɓɛ́ dòonún, kɛ́ lé bòo ɛ̀ lò ɓiɛ̀ sĩ̀ ɓɛ̀lɛ ɛ́ dũmuasɛ̃̀ Dɔfĩn kɛ̀a ɔpe Abarahaamu, àpe lɛ ɛ́ iè kèpe kè kùi ɓà zĩkĩ́n, 17kɛ̀a bòo lɛ ɛ́ hɔ́ dàa wɛ̃́ lé Dɔfĩn bienù vɛ̃hṹ hũn ɛ́ nɛ làa: Ń wɔ́ kɔ àá hɔ́ dàa bìkuì nìɛ ɓà zĩkĩ́n. Ápe Abarahaamu ɛ́ iè kiè zĩkĩ́n hɔ̀ Dɔfĩn lɛ á dũmuasɛ̃̀ nin híɛhɔ́, hɔ̀pe Dɔfĩn lɛ ɛ́ wóò lɛ́ lé mɛkɛ̃nì ɓɛ̀ nìnbirìe lɛ ɛ́ húrunkɛ ǹ, hɔ̀pe Dɔfĩn lɛ ɛ́ wóò lɛ́ ɛ̀ hɔ̀ bòo lɛ ɛ́ hṹn mí ɛ̀ wé. 18Abarahaamu ɛ́ hàarí ɛ́ hìé nɛ hɔpe bòo lɛ ɛ́ mí ɛ́ hìé àá ńdɛsĩ̀nlɔ́ ɛ́ ɓén wé, hɔ́rɔsí kɛ́ bòo dɔ̀ lɛ ɛ́ lò ɛ́ zɛ̃́ní nɛ hɔ ɓén wé ɛ́ lò mí wɛ̀. À hàarí dũmuasɛ̃̀ Dɔfĩn ɛ́ sí iè pe temu lɛ́ á dàa wɔ́ hɔ́ dàa bìkuì nìɛ ɓà zĩkĩ́n, kɛ̀a bòo lɛ ɛ́ Dɔfĩn dàa hàarí bie hɔ̀ ɛ́ lɛ́ à ǹ nɛ: Sí iè pe ɛ́ kɔ́ hũn nìɛ ɛ́ ɓén buòní kɛ̀amu. 19Pɛ̃̀hṹ lɛ ɛ́ Dɔfĩn ɛ́ bie hɔ̀pe sí ɛ́ lɛ́ á Abarahaamu ǹ, ɛ̀ piè lɔ́líe ɛ́ hàarí ɛ́ dɛ̃ khĩminù. À hàarí dũ kɛ́ mí húmú ɛ́ tan dɛ̃un, ɛ̀ ɓà hṹnu Sara ɛ́ lò hàarí yá te wɛ̀. Kɛ́ piè ńdɛsĩ̀nlɔ́ ɛ́ den pɛ́wi hàarí fɛ́sí dɛ̃̀ cɛ̃̀un. 20À hàarí yí titikɛ ɛ̀ bie nɛ wɔ́ khɔn ɛ́ Dɔfĩn yá ɓén wé hɔ bòo lɛ ɛ́ Hɔ́ lɛ́ mí ɲunù nɛ mí ɓén wé wɛ̀, kɛ́ á den hàarí dũmuasɛ̃̀ cɛ̃̀un. Ɛ́ piè ńdɛsĩ̀nlɔ́ ɛ́ den hàarí lɛ́ hɔ́ pànkɛ́ ɔ̀ ǹ á dàa ɓàaniɛ hɔ́ Dɔfĩn. 21À hàarí dũmuasɛ̃̀ cɛ̃̀un kɛ́ Dɔfĩn ɛ́ dàa pànkɛ́ lɛ ɛ́ dàá wé hɔ́ bòo lɛ ɛ́ Hɔ́ lɛ́ mí ɲunù nɛ mí ɓén wé ɛ́ tíiní ɲunù. 22Ɛ́ sí iè pe temu lɛ́ ɛ́ piè ńdɛsĩ̀nlɔ́ bòo hũnƐ́ Dɔfĩn dàa lie ɔ̀ àá nìcã̀anírɔ. 23Kɛ́ hɔ́ bòo lɛ ɛ́ wɛ̃́ lé Dɔfĩn bienù vɛ̃hṹ hũn lɛ nɛ Ɛ́ Dɔfĩn dàa lie ɔ̀ á àá nìcã̀anírɔ ɛ́ yí wĩ́-ɛ pe Abarahaamu mí dòonún bòo hũn wɛ̀. 24Kɛ́ hɔ́ lò ɓiɛ̀ wɛ̃́ kèpe kè bòo hũn, kèpe lɛ ɛ́ hɔ́ Dɔfĩn ɛ́ ɓiɛ̀ ɓén líi àá nì-cã̀aníriè, kèpe lɛ ɛ́ dũmuasɛ̃̀ hɔ̀pe Dɔfĩn lɛ ɛ́ vìeniɛ kè Ɲunsɔ Yiezu ɛ́ líeniɛ hɔ̀ húmú hũn. 25Dɔfĩn ɛ́ lɛ́ á húrun kè bɔ̀koohɛ̃ bòo hũn, ɛ̀ hɔ̀ ɛ́ vìeniɛ ɔ̀, bòo lɛ ɛ́ wé à lɛ́ ɛ̀ kè wé nìcã̀aníriè hɔ́pe Dɔfĩn híɛhɔ́.

Currently Selected:

Rɔmu Siè 4: bwj

Highlight

Compare

Copy