Rɔmu Siè 3

1Ɛ́ ɓɛ́ Zuifuɓɛ ɛ́ sũǹ bòo ɛ́ tṹ ɓɛ́ lɛ yí ɓɛ́ Zuifuɓɛ? Ɛ̀ hɔ̀ fĩ̀nlɔ́ tũ̀nú ɛ́ iè hɔ̀ hɔ́sɔ́? 2Hɔ̀pe sí tũ̀nú ɛ́ ɓàń cɛ̃̀un bòo míkùi hũn. Hɔ̀ bòo míkùi híɛhɔ́, ɛ́ ɓɛ́ iè ɓɛ̀ Zuifuɓɛ ɛ́ Dɔfĩn ɛ́ lɛ́ mí bienù nin. 3Hɔ̀ ɛ́ bɔn kɛ́ peɓɛ̀ tĩ́ihṹ ɛ́ ɓɛ́dɔ̀ ɛ́ yí cã̀aní ɓɛ́ ɲún wɛ̀. Ɛ́ bòo ɛ́ hɔ́ lɛ ɛ́ ɓɛ́dɔ̀ ɛ́ yí cã̀aní ɓɛ́ ɲún ɛ́ temu mii lɛ́ ɛ̀ Dɔfĩn ɓiɛ̀ khũ̀á pĩ́ mí cã̀anírɔ́? 4Ńɓùé lò! Hɛ̀rí kɛ́ nìnbirìe ɓɛ́kùi ɛ́ iè ɓɔ́ɓúukɛriè, ɛ̀ Dɔfĩn pe iè bɔ̀berà ɓàasɔ kɛ̀a bòo lɛ ɛ́ hɔ́ dàa wɛ̃́ pehɔ̀ bienù vɛ̃hṹ hũn ɛ́ nɛ làa:

Kɔ̀pe Dɔfĩn ɓen ɛ́ bie, ɛ́ ɓɛ́ nìnbirìe ɛ́ dũń kɛ́ hɔ́ lɛ ɛ́ kɔ́ ɛ́ bie ɛ́ bɔn,

Ɛ̀ ɓɛ̀ ɓen ɛ́ kɔ̀ wũ̀aní, ɛ́ kɔ́ bòo ɛ́ tĩìní.

5Kɛ́ hɔ́ lɛ ɛ́ ké yá cã̀aní ɛ́ ɓen ɛ́ zɛ̃́ní kɛ́ Dɔfĩn pe ɛ́ cã̀aní, ɛ́ ké wo ɛ́ bie nɛ wɛrɛ̀? Nɛ Dɔfĩn ɛ́ yá cã̀aní iè hɔ̀ lɛ ɛ́ pehɔ̀ tĩì ɛ́ kiè cĩ̀ nin? — Hɔ̀ iè nìnbí-yáamu biehĩ́ ɛ́ nín khɛ́ hũ̀nún — 6Ńɓùé lo! Kɛ́ Dɔfĩn hṹn yá cã̀aní, ɛ́ Hɔ́ wo hṹn ɓén wé wiɛ ɛ́ dàá dàń ɓɛ́ nìnbirìe lìe ɛ́ lè?

7Kɛ́ niǹ ɓúo ɛ́ ɓen lɛ́ ɛ́ Dɔfĩn bɔ̀berà ɛ́ loo wìée, ɛ̀ hɔ̀ ɛ́ pehɔ̀ yèrè ɛ̀ ɓàanínin, ɛ̀ hɔ̀ iè ńɓùo ɛ́ ɓɛ́ dàa ɛ́ niǹ lìe ɛ̀ lè kɛ̀a ie bɔ̀konwé? 8Ɛ́ hɔ́ iè ńɓuò ɛ́ ké wo dàa tan yá bie nɛ: «Mì lɛ́ nɛ ke wé hɔ́ bɔ̀koohɔ́, bòo lɛ ɛ́ wé ɛ̀ hɔ̀ bɔ̀tente ɛ̀ den wé?» Ńɓùé lò! Kɛ́ ɓɛ́ yèn-yaarè nìɛ dɔ̀ ɛ́ den wóò yaa nin yèrè ɛ̀ bie nɛ npe ɛ́ temu wóò bie kɛ̀amu. Ɓàasiè ɛ́ ɓɛ́ ɓén lè lìe ɛ́ biení lɔ̀n, ɛ́ hɔ́ den fɔ́ɓán àá ɓɛ́.

Nìnbírɔ dɔ̀ lɛ kɛ́ ɛ́ yí bɔ̀konwé ɛ́ mí wɛ̀

9Ɛ́ wɛrɛ̀? Kèpe Zuifuɓɛ iè bìe ɛ́ pɔ ɓɛpe nìnbirìe lɛ kɛ́? Ńɓùé lò! Ń sɛ̃̀nɛ́hã̀ zɛ̃́niɛ hɔ̀ nɛ ɓɛ́pe Zuifuɓɛ àá ɓɛ́lɛ ɛ́ yí ɓɛ́ zuifuɓɛ ɓɛ́kùi ɛ́ hɔ́ bɔ̀koohɔ́ pànkɛ́ ɛ́ pɔ, 10kɛ̀a bòo lɛ ɛ́ hɔ́ dàa wɛ̃́ lé Dɔfĩn bienù vɛ̃hṹ hũn ɛ́ nɛ làa:

Nìnbírɔ lɛ ɛ́ cã̀aní ɛ́ mí wɛ̀,

Hɛ̀rí nìnbí-cóoní lɛ ɛ́ cã̀aní mínɛ wɛ̀.

11 Nìnbírɔ lɛ ɛ́ bɔ̀dũmunù wi ɛ́ mí wɛ̀,

Nìnbírɔ dɔ̀ lɛ ɛ́ Dɔfĩn ɛ̀ cɛ̀ ɛ́ mínɛ wɛ̀.

12 Ɓɛ̀pe ɓɛ́kùi ɛ́ lɔ́ Dɔfĩn wṹn lɔ̀n, ɛ́ páaníɛ van vĩ́iniɛ ɓɛ́te. Ɛ́ nìnbí-cóoní dɔ̀ lɛ ɛ́ bɔ̀tente ɛ̀ wé ɛ́ mí wɛ̀. Hɛ̀rí nìnbí-cóoní ɛ́ mí wɛ̀.

13 Peɓɛ̀ vũ̀uhĩ́ ɛ́ dɛ̃̀ kɛ̀a ie búo lɛ ɲihĩɛ́ hánkɛa,

Ɛ̀ peɓɛ̀ diɛhĩ́ ɛ́ te ɓɛ nìnbirìe ɛ́ wóò khɛ̃̀níkɛ ɛ̀ vĩ́iní,

Ɛ̀ hɔ̀ biehĩ́ lɛ ɛ́ wóò lé àá peɓɛ̀ ɲihĩ́ɛ ɛ́ dɛ̃̀ kɛ̀a ie hóonú túurɔ́.

14 Peɓɛ̀ ɲihĩ́ɛ ɛ́ tú àá dánkɛ́ní biehĩ́ àá hɔ̀ hiɛ̀.

15 Peɓɛ̀ zehĩ́ ɛ́ dɛ̀ hɔ̀ khã̀a ɛ́ wóò ze ɛ̀ dàá vɛ ɓé ɓɛ́ nìnbirìe,

16 Ɓɛ̀ wóò yáakɛ hɔ bòo míkùi ɓɛ́ khíilén, ɛ̀ ɓɛ̀ dé lé ɲinwiè lè viì míkùi.

17 Ɓɛ̀ yí dũń lé hũn-wiɛ̀ wṹn yí mi wɛ̀.

18 Ɛ̀ ɓɛ̀ yáà zán Dɔfĩn ɛ̀ mɛ̀ndɛ̃ Hɔ wɛ̀.

19Ké lò wo dũ kɛ́ hɔ́ bòo lɛ ɛ́ hɔ́ làndɛ́ ɛ́ khɛ́ míkùi, ɛ́ hɔ́ ɛ́ bie ɛ̀ lɛ́ ɓɛ́ nìnbirìe lɛ ɛ́ wi hɔpe làndɛ́ núnú hũn; ɛ́ kɛ̀amu, ɛ́ hɛ̀rí nìnbírɔ dɔ̀ ɛ́ wo yí dɛ̀ mí ɲunù ɛ́ yá haà ɛ́ bie nɛ mí cɛ̀ bɔ̀tĩɛ̀ wɛ̀; ɛ́ nìnbirìe ɓɛ́kùi ɛ́ wo ɛ́ dũń kɛ́ peɓɛ̀ bòo ɛ́ yaa Dɔfĩn híɛhɔ́. 20Iè hɔ̀ lɛ ɛ́ nìnbírɔ dɔ̀ lɛ bòo ɛ́ dɛ̀ ɓén tĩìní Dɔfĩn híɛhɔ́ iè hɔ̀ lɛ á dɛ̀ ɛ́ bie nɛ mí wɔ́ hɔ́ làndɛ́ bòo míkùi ɛ́ mí wɛ̀. Hɔ̀ làndɛ́ bòo lɛ ɛ́ hɔ́ dɛ̀ ɛ́ wóò wé, iè hɔ̀ lɛ ɛ́ hɔ́ wóò lɛ́ ɛ̀ kè dàa dũń hɔ́ bɔ̀koohɔ́.

Bòo lɛ ɛ́ Dɔfĩn dàa wɔ́ ɓɛ́ nìnbirìe àá nì-cã̀aníriè

21Kɛ́ kɛ̀a sáalɛ ɛ́ Dɔfĩn ɛ́ zɛ̃́niɛ bòo lɛ ɛ́ Hɔ́ dàa wɔ́ ɓɛ́ nìnbirìe àá nìcã̀aníriè mí híɛhɔ́, kɛ́ á Moyiize làndɛ́ ɛ́ yɛ̀rɛ́ bòo mí wɛ̀. Hɔ̀pe làndɛ́ vɛ̃hɛ̃ àá ɓɛ́ Dɔfĩn bɔ̀háaníriè ɛ́ den hàarí zɛ̃́niɛ hɔ̀. 22Dɔfĩn ɛ́ wóo wé ɓɛ́ nìnbirìe àá nìcã̀aníriè iè hɔ̀ lɛ ɛ́ ɓɛ́ dũmuasɛ̃̀ Yiezu Kirisa ǹ. Hɔ̀ wóò wé hɔ́ ɓɛ̀ nìnbirìe lɛ dũmuasɛ̃̀ àpe Kirisa ɓɛ́kùi bòo hũn, iè hɔ̀ lɛ ɛ́ Dɔfĩn ɛ́ yáà wiekɛ nìnbirìe wɛ̀; 23ɛ́ ɓɛ́ nìnbirìe ɓɛ́kùi ɛ́ wɔ́ bɔ̀koohɔ́, ɛ́ ɓɛ́ wo khɔn Dɔfĩn ɓàarɔ́ ǹ. 24Kɛ́ Dɔfĩn àá mí hiì ɛ́ lɛ́ ɛ́ ɓɛ́ wɔ́ nìcã̀aníriè kɛ́ ɓɛ́ lò yí sàaní bòo dɔ̀ wɛ̀; Hɔ̀ wɔ́ hɔ́ kɛ̀a bòo lɛ ɛ́ Hɔ́ dàa lɛ́ á Yiezu Kirisa ɛ́ ɓɛrɛ fueniɛ ɓà ǹ ɛ́ lɔ́ hɔ́ bɔ̀koohɔ́ núnú hũn. 25Dɔfĩn tɔrɛ àpe Kirisa nɛ a ɓen hí ɛ̀ piè cãani ɛ̀ kóosí ɛ̀ wé lé miyiɛ́ ɛ̀ dàá leń ɓɛ́ nìnbirìe lɛ dũmuasɛ̃̀ à ǹ bɔ̀koohɛ̃ ɛ̀ lé peɓɛ̀ lɔ̀n. Dɔfĩn ɛ́ wɔ́ hɔ́pe sí ɛ́ dàa ɛ́ zɛ̃́ní kɛ́ mí iè Dɔfĩn lɛ ɛ́ cã̀aní. Hṹn àá híɛhɔ́, ɛ́ hɔ̀ bɔ̀koohɛ̃ lɛ ɛ́ ɓɛ́ nìnbirìe ɛ́ pɛ̃̀hṹ ɛ́ wé, ɛ́ hɔ́pe Dɔfĩn ɛ́ hàarí yí biení peɓɛ̀ lɔ̀n pehɔ̀ bòo hũn wɛ̀; 26Hɔ̀ den hàarí hɛ̃̀ mí hũn àá ɓɛ́. Kɛ́ kɛ̀a sáalɛ ɛ́ Hɔ́ den ɛ́ mí cã̀anírɔ́ ɛ̀ zɛ̃́ní. Ɛ́ kɛ̀amu, ɛ́ Hɔ́ wo ɛ́ cã̀aní, ɛ̀ ɓɛ̀ nìnbirìe lɛ ɛ́ dũmuasɛ̃̀ à Yiezu Kirisa ǹ ɛ́ Hɔ́ lò wɔ́ àá nìcã̀aníriè mí híɛhɔ́.

27Ɛ́ hɔ́ te ɓàarɔ́ ɛ́ wo ɲún ɛ́ wi àá yí? Pe hɔ̀ ɲún ɛ́ mí lò! Ɛ́ hɔ́ iè ńɓùo ɛ́ hɔ́ dàa ɲún mí? Pehɔ̀ ɛ́ ɲún ɛ́ mí iè hɔ̀ lɛ ɛ́ hɔ́ yí hɔ́ làndɛ́ mɛ̀ndɛ̃rɔ́ ɛ́ temu wóò lɛ́ ɛ̀ nìnbírɔ́ dàá cã̀aní Dɔfĩn híɛhɔ́, kɛ́ hɔ́ iè hɔ̀ ńdɛsĩnlɔ́. 28Ké wóò nɛ Dɔfĩn ɛ́ wóò wé nìnbírɔ àá nìcã̀anírɔ mí híɛhɔ́ iè hɔ̀ lɛ ɛ́ ɓàasɔ ɛ́ dũmuasɛ̃̀ Yiezu Kirisa ǹ, kɛ́ hɔ́ yí hɔ́ lɛ á wóò wé hɔ́ làndɛ́ bòo lɛ ɛ́ hɔ́ khɛ́ wɛ̀. 29Iée kɛ́ Dɔfĩn iè wìe iè ɓɛ̀ Zuifuɓɛ ɓɛ́ dòonún Dɔfĩn? Hɔ̀ sũǹ ɓiɛ̀ yí ɓɛ́ nìnbirìe lɛ ɛ́ yí ɓɛ́ Zuifuɓɛ Dɔfĩn? Ũun Hɔ̀ ɓìɛ iè peɓɛ̀ Dɔfĩn, 30iè hɔ̀ lɛ ɛ́ Dɔfĩn ɛ́ iè dìcóoní. Hɔ̀ ɓén lɛ́ ɛ́ ɓɛ́ Zuifuɓɛ ɛ́ cã̀aní mí híɛhɔ́ peɓɛ̀ ńdɛsĩ̀nlɔ́ bòo hũn, ɛ̀ Hɔ̀ lò ɓiɛ̀ ɓén lɛ́ ɛ́ ɓɛ́lɛ yí ɓɛ́ Zuifuɓɛ ɛ́ cã̀aní mí híɛhɔ́ peɓɛ̀ ńdɛsĩ̀nlɔ́ bòo hũn. 31Ɛ́ hɔ́pe sí iè bòo sũǹ ɛ́ zɛ̃́ní kɛ́ hɔ́ ńdɛsĩ̀nlɔ́ bòo hũn ɛ́ ké nɛ hɔ làndɛ́ ɛ́ wo bĩníɛ ɲún mi? Ńɓùé lo! Hɔ̀ yí dɛ̃̀ kɛ̀amu wɛ̀. Hɔ̀ iè bòo ɛ́ ké den wookɛa bɔ̀ pehɔ̀ bòo ɛ́ hièniɛ.

Currently Selected:

Rɔmu Siè 3: bwj

Highlight

Compare

Copy