Rɔmu Siè 2

Bòo lɛ ɛ́ Dɔfĩn dàa ɓén lè ɓɛ̀ nìnbirìe lìe

1Kɔ̀pe lɛ ɛ́ ɓɛ̀ nìnbirìe lɛ kɛ́ ɛ̀ wũ̀aní nɛ ɓɛ wɔ́ khɔn, hɛ̀rí ɛ̀ kɔ̀ yɛ̀rɛ́ hṹn iè ńwiè, ɛ̀ kɔ̀ bòo yí dɛ̀ yá ɓén tĩìní, iè hɔ̀ lɛ ɛ́ kɔ́ wóò nɛ ɓɛ nìnbirìe lɛ kɛ́ ɛ́ wé khe, kɛ́ kɔ́pe kùusɔ lò ɛ́ wé kɛ̀a ɓɛ. Ɛ́ kɔ́ iè wiè ɛ́ kɔ̀ ɲún ɛ̀ dé bòo hũn lò. 2Ké dũ kɛ́ ɓɛ́pe nìnbirìe lɛ wóò wé hɔ́pe bòo sɔ sí ɛ́ Dɔfĩn ɛ́ wóò lè lìe ɛ̀ ɓáaníɓán àá hɔ́ bɔ̀berà. 3Kɔ̀pe lɛ ɛ́ wóò wũ̀aní ɓɛ́pe nìnbirìe lɛ wóò wé hɔ́pe bòo sɔ́ sí, kɛ́ kɔ́pe kùusɔ ɛ́ lò ɓiɛ̀ wóo wé hɔ́; ɛ́ kɔ́ wiè tĩì ɛ̀ kɔ̀ nɛ Dɔfĩn ɓiɛ̀ ɛ́ yá ɓén lè kɔ̀ lìe? 4Yée kɛ́ kɔ́ wiè yìe ɛ́ yá Dɔfĩn sãamu bɔ̀bɛhɔ́ àá pehɔ̀ hũn hĩ̀nlɔ́ àá ɓɛ́ nìnbirìe ɛ̀ tí? Kɔ wìe yí dũ kɛ́ Dɔfĩn sãamu ɛ́ hṹn fɔ́ɓán ɛ̀ hɔ̀ lɛ́ ɛ̀ kɔ̀ zɛ̀ní ɛ̀ khũá kɔ́ bɔ̀koohɛ̃ wénlɔ́ máahũ? 5Kɛ́ kɔ́ ɲɛkɛ̃̀a ɛ́ yá bòo ɲí wɛ̀; kɔ́ yí tɛ̀ nɛ kɔ zɛ̀ní kɔ́ tĩì àá kɔ́ bɔ̀werà wɛ̀. Ɛ́ sí iè hɔ̀pe ɛ́ lé dàa iè lè dánkɛ́ní ɛ́ kɔ́ ɛ́ fé ɛ̀ bè kɔ̀ lɔ̀n kɛ́ Dɔfĩn tĩcĩ̀nín wurù ɛ́ dɛ̃, lè wurù lɛ ɛ́ Hɔ́ dàa ɓén lè ɓɛ̀ nìnbirìe lìe, 6lè yìi lɛ ɛ́ Hɔ́ dàa ɓén sàaní ɓɛ́ nìnbirìe ɛ́ ɓáaníɓán àá hɔ́rɔ bòo lɛ á wɔ́. 7Ɓɛ̀ nìnbirìe lɛ wóò cɛ ɓɛ́ kuò ɛ̀ wé hɔ́ bɔ̀tente, ɛ̀ cɛ̀ hɔ̀ ɓàarɔ́ àá hɔ́ mɛ̀ndɛ̃à àá lé mɛkɛ̃nì lɛ yá vé Dɔfĩn viì, ɓàasiè sɔ ɛ́ Dɔfĩn ɛ́ ɓén lɛ́ lé mɛkɛ̃nì lɛ yá vé nin. 8Kɛ́ ɓɛ́ nìnbirìe lɛ ɛ́ yí tɛ̀ hɔ̀pe Dɔfĩn bòo, ɛ̀ ɓɛ̀ pɛ̃́ hɔ́ bɔ̀berà bòo, ɛ̀ ɓɛ̀ wóò wé hɔ́ bɔ̀koohɛ̃ ɛ̀ ɓɛ̀ wé, ɓàasiè sɔ ɛ́ Dɔfĩn tĩì ɛ́ ɓén cĩ nin cɛ̃̀un, ɛ̀ Hɔ̀ ɛ́ lè peɓɛ̀ lìe. 9Ɓɛ̀ nìnbirìe lɛ wóò wé hɔ́ bɔ̀koohɛ̃ ɓɛ́kùi ɛ́ lɔ̀n ɓén be, ɛ̀ ɓɛ̀ lò yìi ɓén mi hɔ, ɛ̀ dàá ɓɛ́ hɔ́ fìi àá ɓɛ́ Zuifuɓɛ ɛ̀ vɛ víení àá ɓɛ́lɛ yí ɓɛ́ Zuifuɓɛ. 10Kɛ́ hɔ́ ɓàarɔ́ àá hɔ́ mɛ̀ndɛ̃à àá lé hũn-wiɛ̀ ɛ́ bòo ɓén sĩ̀ ɓɛ lɛ ɛ́ wóò wé hɔ́ bɔ̀tente ǹ, ɛ̀ dàá ɓɛ́ hɔ́ fìi àá ɓɛ́ Zuifuɓɛ, ɛ̀ vɛ víení àá ɓɛ́lɛ yí ɓɛ́ Zuifuɓɛ. 11Iè hɔ̀ lɛ ɛ́ Dɔfĩn yáà wiekɛ nìnbirìe wɛ̀.

12Ɓɛ̀ nìnbirìe lɛ wɔ́ hɔ́ bɔ̀koohɛ̃ ɓɛ́kùi kɛ́ ɓɛ́ yí dũń ɔ́ Moyiize làndɛ́ ɛ́ ɓén hí kɛ́ hɔ́ làndɛ́ ɛ́ bòo mí wɛ̀. Kɛ́ ɓɛ́ lɛ ɛ́ dũnɛ hɔ̀ làndɛ́ ɛ̀ ɓɛ̀ pɛ́wi ɛ́ wɔ́ hɔ́ bɔ̀koohɛ̃, ɛ́ hɔ́pe làndɛ́ ɛ́ te peɓɛ̀ lìe ɓén lè. 13Ɓɛ̀ yí ɓɛ́ nìnbirìe lɛ ɛ́ wóò ɲí hɔ́ làndɛ́ ɲínlɔ́ mí dòonún ɛ́ temu ɛ́ cã̀aní Dɔfĩn híɛhɔ́ wɛ̀; kɛ́ ɓɛ́ iè ɓɛ̀lɛ ɛ́ wóò bè hɔ̀ làndɛ́ bòo lɛ ɛ́ hɔ́ bie ǹ ɛ́ temu bòo ɓén tĩìní. 14Ɓɛ̀ nìnbirìe lɛ yí ɓɛ́ Zuifuɓɛ ɛ́ yí dũ a Moyiize làndɛ́ wɛ̀. Kɛ́ ɓɛ́ ɓen wóò wé hɔ́pe làndɛ́ bòo lɛ ɛ́ hɔ́ bie ɓɛ́te ǹ, ɛ̀ hɔ̀ tàn dɛ̃̀ kɛ̀a bòo ɛ́ hɔ́pe làndɛ́ ɛ́ wi peɓɛ̀ tĩɛ̀ hũn, kɛ́ ɓɛ́ lò den yí dũ hɔ wɛ̀. 15Ɛ́ ɓɛ́ iè bìe ɛ́ wo ɛ́ zɛ̃́ní kɛ̀amu kɛ́ hɔ́ làndɛ́ bòo lɛ ɛ́ hɔ́ nɛ a nìnbírɔ fɔ́ɓán à wé ɛ́ wi peɓɛ̀ tĩɛ̀ hũn. Peɓɛ̀ hũn vànminù àá peɓɛ̀ tĩɛ̀ nùnlé ɛ́ lò ɓiɛ̀ ɛ́ hɔ̀ zɛ̃́ní, iè hɔ̀ lɛ ɛ́ hɔ́ wóò wé yí ɛ̀ hɔ̀ pĩ́ peɓɛ̀ bòo, ɛ̀ hɔ̀ wé yí ɛ̀ hɔ̀ tɛ̀ peɓɛ̀ bòo. 16Ɛ́ sí iè pe bòo lɛ ɛ́ ɓén lé hɔ́ yíe, lè wurù lɛ ɛ́ Dɔfĩn dàa ɓén lɛ́ lé ɲunù ɔ̀ Yiezu Kirisa ǹ, á ɛ́ lè ɓɛ̀ nìnbirìe lìe, ɛ́ khán hɔ́ bòo lɛ ɛ́ ɓɛ́ tànkɔ̀níkɛa ɓɛ́ tĩɛ̀ hũn míkùi ɛ́ líení yíe, kɛ̀a bòo lɛ ɛ́ lé Bentĩnu lɛ ɛ́ nín buie ɛ́ dàa bie hɔ̀.

Ɓɛ̀ Zuifuɓɛ àá hɔ́ làndɛ́ bòo

17Kɔ̀pe lɛ ɛ́ nɛ kɔ́ iè Zuifu, kɔ́ síeniɛ kɔ̀ ɲún àá ɔ́ Moyiize làndɛ́, kɔ́ wóò ɓàaní kɔ́te ǹ ɛ̀ bie nɛ kɔ bòo ɛ́ sɛ̃̀ Dɔfĩn. 18Kɔ́ dũ Dɔfĩn tĩì bòo, ɛ̀ hɔ̀ làndɛ́ ɛ́ lò bɔ́ kɔ àá hɔ́ bɔ̀tente wénlɔ́. 19Kɔ́ wóò mìí kɔ́te àá nìnbírɔ lɛ dú ɓɛ́ muaɓɛ̀ híɛhɔ́, ɛ̀ kɔ̀ lò wóò mìí kɔ́te àá ɓɛ́ nìnbirìe lɛ wi hɔ síbínú hũn peɓɛ̀ ńpiemu, 20ɛ̀ kɔ̀ bĩní mìí kɔ́te àá ɓɛ́ bɛ̃́nbṹa bérɔ, àá ɓɛ́ zĩncãahɛ̃ kɛ̀ránlɔ, iè hɔ̀ lɛ ɛ́ kɔ́ dũmuasɛ̃̀ nɛ hɔ làndɛ́ ɛ́ lɛ́ hɔ́ bɔ̀dũmunù àá hɔ́ bɔ̀berà kɔ ǹ. 21Ɛ́ kɔ́pe lɛ ɛ́ wóò kɛ̀rán ɓɛ́ nìnbirìe lɛ kɛ́, ɛ́ hɔ́ iè ńɓùo ɛ́ kɔ́ dàa yá kɔ̀te ɛ̀ kɛ̀rán? Kɔ̀pe lɛ ɛ́ wóò bé ɓɛ́ nìnbirìe nɛ ɓɛ bí kɛ̃̀mɛ́kɛ, ɛ́ hɔ́ iè ńɓùo ɛ́ dàa ɛ́ kɛ̃̀mɛ́kɛ? 22Kɔ̀pe lɛ ɛ́ wóò nɛ ɓɛ bí fé ɓɛ́ hã́a tàá ɓɛ̀ bí fé ɓɛ́ báa, ɛ́ hɔ́ iè ńɓùo ɛ́ kɔ́pe kɔ̀te ǹ ɛ́ dàa wóo fé ɓɛ́ hã́a, tàá kɔ́ wóo fé ɓɛ́ báa? Kɔ̀pe lɛ ɛ́ hɛ́rɛ hɔ̀ wɛ̃̀hɛ̃, ɛ́ hɔ́ iè ńɓuò ɛ́ kɔ́ dàa wóò zɔ dí hɔ́pe wɛ̃̀hɛ̃ zĩhĩ́ɛ tĩ̀ɛ? 23Kɔ́ wóò ɓàaní kɔ́te ǹ nɛ kɔ́ dũ hɔ làndɛ́, kɛ́ kɔ́ lò den yáà wé hɔ́pe làndɛ́ bòo lɛ ɛ́ hɔ́ bie wɛ̀. Ɛ́ kɔ́ iè wiè lɛ ɛ́ lùwiè ɛ̀ dé Dɔfĩn lò. 24Iè hɔ̀ lɛ ɛ́ hɔ́ wɛ̃́ lé Dɔfĩn bienù vɛ̃hṹ hũn ɛ́ nɛ làa: Mí lɛ́ ɛ́ ɓɛ́ nìnbirìe lɛ yí ɓɛ́ Zuifuɓɛ ɛ́ wóò yáa Dɔfĩn yèrè.

25Ɛ́ kɔ́ ɓen ɛ́ ɔ̀ Moyiize làndɛ́ bòo lɛ ɛ́ hɔ́ bie ɛ̀ wé, ɛ̀ kɔ̀ fĩ̀nlɔ́ ɛ́ ɲún wi. Kɛ́ kɔ́ ɓen pɛ̃́ hɔ́ làndɛ́ bòo, ɛ̀ hɔ̀ dɛ̃̀ kɛ̀a bòo ɛ́ kɔ́ yí fĩ̀ wɛ̀. 26À nìnbírɔ lɛ yí fĩ̀, kɛ́ á wóò wé hɔ́ làndɛ́ bòo lɛ ɛ́ hɔ́ bie, ɛ́ Dɔfĩn ɛ́ sũǹ yá líi ɔ́ àá nìnbírɔ lɛ fɛ̃̀? 27Ɛ́ ɓɛ́pe dàa lɛ nìɛ ɛ́ yáà fũ̀a kɛ́ ádɔ̀ ɛ́ tɛ̀ ɛ́ hɔ̀ làndɛ́ bòo lɛ ɛ́ hɔ́ bie ɛ̀ wé, á ɓén lè kɔ̀ lìe, kɔ̀pe lɛ ɛ́ fɛ̃̀ ɛ̀ kɔ̀ lò dàa hɔ làndɛ́ kɛ́ kɔ́ den yá pehɔ̀ bòo lɛ ɛ́ hɔ́ bie wé wɛ̀. 28Àpe Zuifu àá bɔ̀bín ɛ́ yí é lɛ ɛ́ wóò wé ɓɛ́ Zuifuɓɛ bòo ɛ̀ ɓɛ̀ nìnbirìe ɛ̀ mi wɛ̀, àlɛ fɛ̃̀ àá bɔ̀bín ɛ́ yí é lɛ ɛ́ dàa hɔ̀ fĩ̀nlɔ́ fɛ̃́nlɔ́ mí tɛkɛ̀a lɔ̀n wɛ̀. 29Kɛ́ ápe Zuifu àá bɔ̀bín ɛ́ iè ɔ̀lɛ ɛ́ dàa mí Zuifu yáanú mí tĩì hũn, àlɛ ɛ́ fɛ̃̀ àá bɔ̀bín ɛ́ iè ɔ̀lɛ ɛ́ dàa mí fĩ̀nlɔ́ mí tĩì hũn, hɔ̀ fĩ̀nlɔ́ lɛ ɛ́ lé àá lé Mɛkɛ̃n-Sãanu viì kɛ́ hɔ́ yá lé àá hɔ́ làndɛ́ lɛ wɛ̃́ viì wɛ̀. Ápe nìnbírɔ sɔ sí ɛ́ Dɔfĩn ɛ́ te wóò ɓàanínin, kɛ́ ɓɛ́ yí ɓɛ́ nìnbirìe wɛ̀.

Currently Selected:

Rɔmu Siè 2: bwj

Highlight

Compare

Copy