Rɔmu Siè 11

Dɔfĩn ɛ́ yí tɛ́viɛní Yizarayɛɛle nìɛ wɛ̀

1Ɛ́ ń den ɛ́ dìe nɛ làa: Ɛ́ bòo ɛ́ Dɔfĩn iè wìe pɛ̃́ mí nìɛ ɛ́ tɛ́viɛniɛ? Ńɓùé lò! Iè hɔ̀ lɛ ɛ́ ńpe kùusɔ iè Yizarayɛɛle nùún dɔ̀, nin Abarahaamu hũn yɛ̀nù dɔ̀, ń lɔ́ Bɛ̃nzamɛn zũnù nìɛ hũn. 2Dɔfĩn ɛ́ yí pĩ́ mí nìɛ lɛ ɛ́ Hɔ́ sɛ̃̀nɛ́hã̀ munɛ ɛ̀ tɛ́viɛní wɛ̀. Mí lò wo dũ hɔ bòo lɛ wɛ̃́ lé Dɔfĩn bienù vɛ̃hṹ hũn à Dɔfĩn bɔ̀háanírɔ Elii bòo hũn. Àpe Elii ɛ́ hàarí ɛ́ ɓɛ̀ Yizarayɛɛle nìɛ ńwenkenù bòo ɛ̀ bie àá Dɔfĩn ɛ́ nɛ làa: 3«Ɲunsɔ, ɓɛ̀ ɓɔ́ kɔ́ bɔ̀háaníriè, ɛ̀ ɓɛ̀ wúa kɔ̀ miyiɛ́ leǹlén dúekénìɛ, ɛ́ hɔ́ wo kɛ́ ńpe niǹ dòonún, ɛ́ ɓɛ́ lò ɛ́ cɛ̀ ɛ̀ ɓɛ̀ ɓé mi.» 4Kɛ́ Dɔfĩn ɛ́ den zɔn kɔ̃́niɛ ɔ̀ nɛ wɛrɛ̀? Hɔ̀ nɛ làa: «Ń lerɛ báa muasíe hùuɲu (7 000) ɛ́ bɔ̀sí, lɛ yí síɛ hùensí lé wɔ̃̀hṹ lɛ ɛ́ ɓɛ́ wóò ve nɛ Baale híɛhɔ́, ɛ̀ bie nɛ ɓɛ ɛ̀ ɓàaní lè ǹ wɛ̀.» 5Ɛ́ sí iè pe ɛ́ hɔ́ ɓiɛ̀ ɛ́ dɛ̃̀ kɛ̀amu hɔ̀pe zoòní wihĩ́ lɛ hũn: ɓɛ̀ Yizarayɛɛle nìɛ bìɛ yiɛní dɔ̀ ɛ́ pɛ́wi kɛ́ wi yán, ɓɛ̀pe lɛ ɛ́ Dɔfĩn àá mí hiì ɛ́ munɛ ɛ́ bɔ̀sí. 6Dɔfĩn ɛ́ wɔ́ mí hiì àá ɓɛ́ ɛ́ dàa munɛ ɓɛ̀, kɛ́ hɔ́ yí peɓɛ̀ bɔ̀werà bòo hũn wɛ̀. Kɛ́ dàa bòo mí ɛ́ lepe Dɔfĩn hiì ɛ́ hṹn yá wé hiì àá bɔ̀bín wɛ̀.

7Ɛ́ ké wo ɛ́ bie nɛ wɛrɛ̀? Ɓɛ̀ Yizarayɛɛle nìɛ bòo lɛ ɛ́ ɓɛ́ hṹn cɛ̀ ɛ́ ɓɛ́ yí yí wɛ̀. Kɛ́ peɓɛ̀ tĩ́ihṹ, ɛ́ ɓɛ́lɛ ɛ́ Dɔfĩn ɛ́ munɛ ɛ́ pe te hɔ ɛ́ yú. Ɛ̀ ɓɛ̀pe lɛ kɛ́ ɛ́ pe dĩìniɛ ɓɛ́ ɲɛkɛ̃̀a. 8Kɛ̀a bòo lɛ ɛ́ hɔ́ dàa wɛ̃́ lé Dɔfĩn bienù vɛ̃hṹ hũn ɛ́ nɛ làa: «Dɔfĩn ɛ́ lɛ́ ɛ́ peɓɛ̀ hɛciri ɛ́ vũnun, ɛ̀ Hɔ̀ lɛ́ ɛ́ peɓɛ̀ yìe ɛ́ yá bòo ɛ̀ mi, ɛ̀ peɓɛ̀ ɲɛkɛ̃̀a ɛ́ lò yá bòo ɛ̀ ɲí, fúu ɛ̀ ɓen dɛ̃ zoòni.» 9Á bɛ́zuú Daviide ɛ́ ɓiɛ̀ hàarí bie ɛ́ nɛ làa:

«Nɛ peɓɛ̀ sɛ́hĩ́ díe ɛ̀ wé kɛ̀a ie hurɔ́ tàá kɛ̀a ie tàarí lɛ ɛ́ mii pɛ ɓɛ,

Bòo lɛ ɛ́ wé ɛ̀ ɓɛ̀ kùenkɛ, ɛ̀ ɓɛ̀ dàa yí hɔ́ bòo lɛ ɛ́ fɔ́ɓán àá ɓɛ́.

10 Nɛ peɓɛ̀ yìe ɛ̀ muì, ɛ̀ ɓɛ̀ bí mi bòo wɛ̀.

Lɛ́ nɛ peɓɛ̀ máahɛ̃ ɛ̀ kũnkɛ dìń fúu!»

11Ɛ́ ń den wo ɛ́ diè nɛ làa: Hɔ̀ lɛ ɛ́ ɓɛ́ Zuifuɓɛ ɛ́ kenkeniɛ, ɛ́ ɓɛ́ iè bìe wo kuerɛ hùúu yée? Ńɓùé lò! Kɛ́ hɔ́ iè peɓɛ̀ bɔ̀koohɛ̃ ɛ́ temu lɛ́ ɛ́ ɓɛ́ nìnbirìe lɛ yí ɓɛ́ Zuifuɓɛ ɛ́ dàa yú hɔ́ fuerɛ̀, ɛ̀ dàá lɛ́ ɛ̀ ɓɛ̀pe Zuifuɓɛ dí lé yanlienú àá ɓɛ́. 12Kɛ́ ɓɛ́ Zuifuɓɛ ńwénkhemù ɛ́ ɓen ɓɛrɛ àá bòo lɛ sãa lè dímíɲɛ́ hũn, ɛ̀ peɓɛ̀ kùenlɔ́ ɛ́ lò lɛ́ bòo lɛ sãa ɓɛ̀ nìnbirìe lɛ ɛ́ yí ɓɛ́ Zuifuɓɛ ǹ, ɛ́ pɛ̃̀hṹ lɛ kɛ́ Dɔfĩn ɛ́ ɓen khũà fueniɛ ɓà ǹ vieniɛ, ɛ́ hɔ́ wo ɓén wé bɔ̀tente bɔ̀bɛhɔ́.

Ɓɛ̀lɛ yí ɓɛ́ Zuifuɓɛ àá ɓɛ́pe Zuifuɓɛ fuerɛ̀ bòo

13Hɔ̀ iè mìpe lɛ yí ɓɛ́ Zuifuɓɛ ɛ́ ń dàa ɛ́ bie kɛ̀a sáalɛ: Ǹpe iè Dɔfĩn tɔnkɛrɔ lɛ ɛ́ Hɔ́ tɔrɛ nɛ n vɛ ɓɛ nìnbirìe lɛ yí ɓɛ́ Zuifuɓɛ viì. Ɛ́ hɔ́pe sí bòo hũn ɛ́ ń hɛ̀ wɛ niǹte hɔ̀ tɔnlɔ́ lɛ ɛ́ hɔ́pe Dɔfĩn ɛ́ dɔ́ niǹ núnú hũn bòo hũn. 14Nín cànkɛ nɛ kɛ́ hɔ́ ɓen dɛ̀ ɛ́ wé yínin, ɛ̀ ǹ hóoní lé yanlienú kiè dàa nìɛ tĩ́ihṹ, bòo lɛ ɛ́ wé ɛ̀ niǹ tɔnlɔ́ ɛ̀ lɛ́ ɛ̀ ɓɛ̀dɔ̀ ɛ̀ yí fuen. 15Ɛ́ hɔ́ lɛ ɛ́ Dɔfĩn ɛ́ fuɛ̀rɛ̀sí ɓɛ́ zuifuɓɛ ǹ, ɛ́ ɓɛ́ dímíɲɛ́ nìɛ ɛ́ wo khũ̀a khie ɛ́ ɲí ɓán àá hɔ́pe Dɔfĩn. Ɛ́ hɔ́ wo ɓén dìń kɛ wiɛ pɛ̃̀hṹ lɛ kɛ́ hɔ́pe Dɔfĩn ɛ́ khũ̀a tɛ̀ ɓɛ̀pe Zuifuɓɛ bòo? Hɔ̀ ɓén wé kɛ̀a ie nìnbirìe lɛ ɛ́ lɔ́ hɔ́ húmú hũn ɛ́ khie zɔn lè mɛkɛ̃nì hũn.

16Kɛ́ hɔ́ bɔ̀mìiriè hán bòo ɛ́ ɓen lɛ́ Dɔfĩn, ɛ̀ hɔ̀pe lɛ kɛ́ míkùi ɛ́ bòo sɛ̃̀ Hɔ̀ ǹ. Ɛ̀ hɔ̀ vɛ̃̀hṹ nɛhĩ́ ɛ́ ɓen lɛ́ Dɔfĩn, ɛ̀ pehɔ̀ ńnɛhɛ̃ bòo ɛ́ sɛ̃̀ Hɔ̀ ǹ. 17Yizarayɛɛle ɛ́ dɛ̃̀ kɛ̀a ie le Olive vɛ̃̀hṹ lɛ ɛ́ wi le mún hũn, lɛ ńnɛ́hɛ̃ dɔ̀ ɛ́ Dɔfĩn ɛ́ ɓúukɛa. Ɛ̀ kɔ̀pe lɛ yí-e Zuifu ɛ́ dɛ̃̀ kɛ̀a ie le Olive vɛ̃̀hṹ lɛ wi le ńɲiì hũn ńnɛ́hṹ dɔ̀ lɛ ɛ́ hɔ́pe Dɔfĩn ɛ́ mɔ̀ yòó ciɛniɛ lèpe lɛ wi hɔ mún hũn ńnɛ́hɛ̃ lɛ kɛ́ tĩ́ihṹ. Ɛ́ kɔ́ wo wóò yí kɔ́ hɔ́n ɲumu lɛ wóò síɛ lé àá lépe Olive vɛ̃̀hṹ sɔ nɛhĩ́ hũn ɛ̀ dàá yóò. 18Ɛ́ sí iè hɔ̀pe ɛ́ kɔ́ dàa yí fɔ́ɓán ɛ̀ kɔ̀ wóo húi wɛ̀ hɔ̀pe ńnɛ́hɛ̃́ lɛ ɓúukɛa lɔ̀n wɛ̀. Ɛ́ kɔ́ wo wiɛ dàa ɛ́ lè yèrè ɛ̀ cɛ̀? Hɔ̀ yí kɔ́pe ńnɛ́hṹ te hɔ́ nɛhĩ́ tìe, kɛ́ hɔ́ iè hɔ̀pe nɛhĩ́ ɛ́ te kɔ tìe dàa dɛ̃̀.

19Ɛ́ wɔ́ khɔn ɛ́ kɔ́ zɔ́ bie nɛ: «Dɔfĩn den ɓúukɛa hɔ̀pe ńnɛ́hɛ̃ sɔ ɛ́ lɔ́ yán ɛ̀ ǹpe iè pe ɛ́ Hɔ́ mɔ̀ yòó ciɛniɛ dĩ̀niɛ lò!» 20Hɔ̀ pe wo bɔn kɛ́ hɔ́pe ńnɛ́hɛ̃ sɔ ɛ́ ɓɛ́ ɓúukɛa lɔ́ yán iè hɔ̀ lɛ ɛ́ hɔ́ yí dɛsĩ̀-ɛ Kirisa ǹ, ɛ̀ kɔ̀pe ɛ́ zɔn wi pehɔ̀ kṹun hũn iè hɔ̀ lɛ ɛ́ kɔ́ dũmuasɛ̃̀. Ɛ́ kɔ́ bí cɛ̀ yèrè, kɛ́ kɔ́ den zán zánlɔ́. 21Iè hɔ̀ lɛ kɛ́ Dɔfĩn ɛ́ ɓen yí fùansí lépe vɛ̃̀hṹ lɛ wi le mún hũn ńnɛhɛ̃ ǹ, kɛ́ Hɔ́ den ɓúukɛa hɔ̀, ɛ̀ kɔ̀pe lɛ iè lè vɛ̃̀hṹ lɛ wi le ńńɲiì hũn ńnɛ́hṹ ɛ́ Hɔ́ ɓiɛ̀ yá ɓén fùansínin lò! 22Ɛ́ kɔ́ húi bòo lɛ ɛ́ Dɔfĩn dàa ɛ́ mí sãamu àá mí hiɛ̀ ɛ̀ zɛ̃́ní: Hɔ̀ ɛ́ mí hiɛ̀ ɛ̀ lɛ̀ àá ɓɛ́ nìnbirìe lɛ yá pehɔ̀ bòo ɲí, ɛ̀ Hɔ̀ ɛ́ mí sãamu ɛ̀ wé àá kɔ́pe. Kɛ́ kɔ́ den fɔ́ɓán ɛ̀ kɔ̀ kań pehɔ̀ sãamu sɔ hũn; kɛ́ dàa bòo mí ɛ́ Hɔ́ ɓiɛ̀ ɓén ɓúu kɔ ɛ́ tɛ́viɛní kɛ̀a hɔpe ńnɛ́hɛ̃ bòo sí. 23Kɛ́ ɓɛ́pe Zuifuɓɛ ɛ́ fùɛrɛ̀sí ɓɛ́ ńbídɛsĩ̀nlɔ́ ǹ ɛ̀ ɓɛ̀ khũ̀a khie tɛ̀ Dɔfĩn bòo, ɛ́ Dɔfĩn ɛ́ bĩní khũ̀a yòó ciɛní ɓɛ́ lèpe vɛ̃̀hṹ lɛ ɛ́ ɓɛ́ hṹn wi lɔ̀n. Iè hɔ̀ lɛ ɛ́ Dɔfĩn dàa pànkɛ́ lɛ ɛ́ dɛ̀ ɓɛ̀ ɛ́ bĩní yòó ciɛní ɛ́ dĩ̀ní. 24Ɛ́ kɔ́pe lɛ iè lè ńnɛ́hṹ lɛ ɛ́ Dɔfĩn ɛ́ ɓúo lè Olive vɛ̃hṹ lɛ wi le ńɲiì hũn lɔ̀n, lèpe lɛ ɛ́ kɔ́ bòo ɛ́ sɛ̃̀nin, ɛ́ khie van ciɛniɛ lè Olivie vɛ̃̀hṹ lɛ ɛ́ wi le mún hũn kɛ́ kɔ́ lò bòo ɛ́ yí sĩ̀ lè ǹ, hɔ́rɔsí ɛ̀ ɓɛ̀pe Zuifuɓɛ lɛ pe iè lè Olivie vɛ̃̀hṹ lɛ ɛ́ wi le mún hũn ńnɛ́hɛ̃ ɛ́ Dɔfĩn ɛ́ wo ɓén khui ɛ́ khũ̀á yòó ciɛní àá nàanáa lèpe Olive vɛ̃̀hṹ lɛ ɛ́ peɓɛ̀ bòo sɛ̃̀ nin lò!

25Kìe zɛ̀ɓɛ̀, ń wɛ nɛ mi dũń Dɔfĩn bòo lɛ ɛ́ Hɔ́ sɛ́sɛ́a kɛ́ hɔ́ tànkɔ̀niɛ, bòo lɛ ɛ́ wé ɛ̀ mì bí mìí míte àá bɔ̀dũnliè wɛ̀. Ɓɛ̀ Yizarayɛɛle nìɛ dɔ̀ ɛ́ dĩìniɛ ɓɛ́ ɲɛkɛ̃̀a àá Dɔfĩn; ɛ́ hɔ́pe sí ɛ́ ɓén míi fúu ɛ́ hɔ́pe dàa lɛ kɛ́ míkùi ɛ́ khũ̀a tɛ̀ hɔ̀pe Dɔfĩn bòo. 26Ɛ́ sí iè pe ɛ́ ɓɛ́ Yizarayɛɛle nìɛ ɓɛ́kùi ɛ́ ɓén fuen kɛ̀amu, kɛ̀a bòo lɛ ɛ́ Dɔfĩn dàa khɛ́ hɔ́ mí bienù vɛ̃hṹ hũn ɛ́ nɛ làa:

«À fuenírɔ ɛ́ ɓén lé àá Siyɔn, # 11.26 Siyɔn ɛ́ iè Zerizalɛɛmu

À leń ɔ́ Zakɔɔbu hũn nìɛ ɛ́ lé peɓɛ̀ Dɔfĩn pĩ́nlɔ́ hũn,

27 Ɛ́ sí iè lè ɲɛbíi lɛ ɛ́ ń ɓén dí àá ɓɛ́,

Pɛ̃̀hṹ lɛ kɛ́ ń dɔ́ sɛ́wɛ́rí ɛ́ lɛ́ ɓà ǹ peɓɛ̀ bɔ̀koohɛ̃ bòo hũn.»

28Hɔ̀ lɛ ɛ́ ɓɛ́ pɛ̃́ lè Dɔfĩn Bentĩnu bòo, ɛ́ ɓɛ́ wo wɔ́ hɔ́pe Dɔfĩn ɓà ńbíyanliè, ɛ́ hɔ́pe sí ɛ́ wo wɔ́ bòo sãa àá miɛ. Hɔ́rɔsí kɛ́ Dɔfĩn ɛ́ lò den munɛ miɛ ɛ́ wɔ́ àá mí nìɛ, ɛ́ Hɔ́ wo wɛ ɓɛ ɓà zĩkĩ́nɓɛ̀ bòo hũn. 29Ɛ́ Dɔfĩn ɛ́ wo yáà bĩní khũ̀á fé bòo lɛ ɛ́ Hɔ́ lɛ́, ɛ̀ Hɔ̀ lò yáà pĩ́ ɓɛ nìnbirìe lɛ ɛ́ Hɔ́ ɛ́ vɔn wɛ̀. 30Hṹn àá híɛhɔ́, ɛ́ mí pɛ̃́ Dɔfĩn bòo, ɛ́ kɛ̀a sàalɛ ɛ́ hɔ́pe Dɔfĩn ɛ́ mɔn mì miinɛ, iè hɔ̀ lɛ ɛ́ ɓɛ́ Zuifuɓɛ ɛ́ pɛ̃́ hɔ́pe Dɔfĩn bòo. 31Ɛ́ sí iè pe ɛ́ hɔ́ ɓiɛ̀ dɛ̃̀ kɛ̀amu ɓɛ̀pe Zuifuɓɛ viì. Ɓɛ̀ yí tɛ̀ Dɔfĩn bòo, ɛ́ Hɔ́ dàa mɔn mìpe mì miinɛ̀, bòo lɛ ɛ́ wé ɛ̀ kɛ̀a sáalɛ ɛ́ Hɔ́ ɓiɛ̀ mi peɓɛ̀ miinɛ̀. 32Ɛ́ Dɔfĩn ɛ́ fùɛrɛ̀sí ɛ́ ɓɛ́ nìnbirìe ɓɛ́kùi ɛ́ pɛ̃́ mí bòo, ɛ́ Hɔ́ dàa mɔn ɓɛ̀pe ɓɛ́kùi peɓɛ̀ miinɛ̀.

Dɔfĩn ɛ́ ɓàń ɛ́ pɔ̀ bòo míkùi

33Dɔfĩn ɛ́ hɛ̀ ɓàń àá bɔ̀bín! Pehɔ̀ bɔ̀tente wénlɔ́ àá pehɔ̀ bɔ̀dũmunù ɛ́ hɛ̀ ɲunù mí wɛ̀! Nìnbírɔ ɛ́ yí dɛ̀ pehɔ̀ nùnlé ɛ́ yá dũń wɛ̀! Ɛ̀ pehɔ̀ bòo lɛ ɛ́ Hɔ́ wóò dàa wé mí bòo ɛ́ nìnbírɔ ɛ́ lò yí dɛ̀ yá dũń wɛ̀! 34Kɛ̀a bòo lɛ ɛ́ hɔ́ dàa wɛ̃́ pehɔ̀ bienù vɛ̃hṹ hũn ɛ́ nɛ làa:

«À iè wieni temu dɛ̀ à Ɲunsɔ bɔ̀lieníkɛà ɛ́ dũń?

Ɛ̀ wieni temu dɛ̀ bérɛ́ ɛ́ lɛ́ à ǹ?

35 Ɛ̀ wieni ɛ́ temu ɲɛùn lɛ́ bòo dɔ̀ ɔ̀ ǹ ɛ́ mɔn,

Lɛ ɛ́ ɓàasɔ dàá ɛ́ bie nɛ a ɓiɛ̀ khũ̀á lɛ́ bòo dɔ̀ mí ń?»

36Iè hɔ̀ lɛ ɛ́ hɔ́ bòo míkùi ɛ́ lé àá piè viì, àpe temu lɛ́ ɛ́ hɔ́ bòo míkùi ɛ́ dàa wi, ɛ̀ hɔ̀ bòo míkùi ɛ́ lò bòo sɛ̃̀ à ǹ. Nɛ hɔ ɓàarɔ́ ɛ̀ bòo sĩ̀-ɛ ǹ pɛ̃̀hṹ lɛ yá vé hũn! Amiina.

Currently Selected:

Rɔmu Siè 11: bwj

Highlight

Compare

Copy