Rɔmu Siè 1

Tìɛníkɛrɔ́

1Hɔ̀ iè ǹpe Pooli lɛ iè Yiezu Kirisa tɔntɛ́ ɛ́ te lepe vɛ̃hṹ sɔ lɛ ɛ́ wĩ́. Dɔfĩn ɛ́ te nin vɔn nɛ n wé mí tɔnkɛrɔ, ɛ̀ Hɔ̀ munɛ mi nɛ n vɛ buie mí Bentĩnu. 2Dɔfĩn hàarí lɛ́ mí ɲunù nɛ mí ɓén lɛ́ lépe Bentĩnu sɔ ɓɛ̀ nìnbirìe ǹ. Ɛ́ Hɔ́ wo hàarí lɛ́ ɛ́ mí bɔ̀háaníriè ɛ́ wɛ̃́ lé mí bienù vɛ̃hṹ hũn. 3Lè Bentĩnu sɔ iè pehɔ̀ Zuú lɛ iè kè Ɲunsɔ Yiezu Kirisa bòo ɛ́ lé ɛ́ bie. Ɛ́ hɔ́ lɛ á ɓɛrɛ wɔ́ nìnbírɔ́, á iè ɔ̀ bɛ́zuú Daviide hũn yɛ̀nù. 4Kɛ́ lé Mɛkɛ̃n-Sãanu ɛ́ pe zɛ̃́niɛ hɔ̀ pànkɛ́ hũn kɛ́ á iè Dɔfĩn Zuú àá bòo lɛ á dàa vìé lɔ́ hɔ́ húmú hũn. 5Hɔ̀ iè piè bòo hũn ɛ́ Dɔfĩn dàa wɔ́ hiì àá mi, ɛ́ wɔ́ mi àá mí tɔnkɛrɔ bòo lɛ ɛ́ wé ɛ̀ ǹ dàá lɛ́ ɛ̀ hɔ̀ dàa míkùi nìɛ ɛ̀ dɛsĩ̀ hɔ̀pe Dɔfĩn, ɛ̀ ɓɛ̀ ɛ̀ ɲí pehɔ̀ bòo, àpe Kirisa yèrè ɓàarɔ́ bòo hũn. 6Ɛ́ mípe lɛ ɛ́ hɔ́ Dɔfĩn vɔn nɛ mi bòo sĩ̀-ɛ Yiezu Kirisa ǹ, mí lò ɓiɛ̀ bòo wi ɓɛpe nìɛ sɔ hũn. 7Ɛ́ nin wĩ́ lépe vɛ̃hṹ sɔ lɛ ɛ̀ lɛ́ miɛ ǹ mìpe lɛ ɛ́ wi hɔ Rɔmu lóo hũn, mìpe lɛ ɛ́ Dɔfĩn ɛ́ wɛ mikùi ɛ̀ Hɔ̀ vɔn miɛ nɛ mi bòo ɛ̀ sĩ̀ mí ǹ. Nɛ kìe Yàá Dɔfĩn àá ké Ɲunsɔ Yiezu Kirisa ɛ̀ wé hiì àá miɛ, ɛ̀ ɓɛ̀ lɛ́ hũn-wiɛ̀ miɛ ǹ.

Pooli ɛ́ cɛ̀ mii vɛ khí Rɔmu ńdɛsĩ̀riè ǹ

8Hɔ̀ bòo míkùi híɛhɔ́, ɛ́ nín Dɔfĩn bɛrikɛ ɛ̀ dé Yiezu Kirisa yèrè lɔ̀n mìpe mìkùi bòo hũn. Nín Dɔfĩn bɛrikɛ ɛ̀ dé iè hɔ̀ lɛ ɛ́ mí ńdɛsĩ̀nlɔ́ bòo ɛ́ bie dímíɲɛ́ míkùi hũn. 9Dɔfĩn lɛ ɛ́ nín tɔnlɔ́ ɛ̀ tɛ́ àá niǹ tĩì míkùi kɛ́ nín lè Bentĩnu lɛ ɛ́ piè Zuú bòo bie ɛ̀ buie ɛ́ dũ kɛ́ hɔ́ lɛ ɛ́ nín khɛ́ ɛ́ iè bòo lɛ bɔn. Hɔ̀ dũ kɛ́ ń wóò nùún mípe mì bòo fúu, 10niǹ hɛ̃nnɛ míkùi hũn. Ɛ́ nín hɔ̀pe Dɔfĩn ɛ̀ hɛ̃nnin nɛ kɛ́ hɔ́ ɓen iè pehɔ̀ tĩì bòo ɛ̀ hɔ̀ lɛ́ nɛ n hɛ̀ wo yí ɓen mì viì. 11Iè hɔ̀ lɛ ɛ́ ń hɛ̀ wɛ nin mi miɛ àá bɔ̀bín, ɛ̀ dàa hɔ́ hɛ̃mù bòo dɔ̀ lɛ ɛ́ lé Mɛkɛ̃n-Sãanu ɛ́ wóò lɛ́ ɛ̀ dàá dàá ɓen sĩiní mí pànkɛ́. 12Iè bòo ɛ́ ń den wɛ ɛ́ nin ɓen mì viì ɛ̀ ɓen kań àá miɛ ɛ̀ kè dàa páaní hĩ̀iníkɛ ɓán tĩɛ̀. Ɛ̀ mìpe mì ńdɛsĩ̀nlɔ́ ɛ̀ lɛ́ tĩhiè mì ǹ, ɛ̀ ǹpe niǹ ńdɛsĩ̀nlɔ́ ɛ̀ ɓiɛ̀ lɛ́ tĩhiè miɛ ǹ.

13Kìe zɛ̀ɓɛ̀, ń wɛ nɛ mi dũń kɛ́ yìe cɛ̀rìɛɛ ɛ́ ń wóò nɛ nín ɓen khí miɛ, kɛ́ fúu ɛ̀ ɓen dɛ̃ zoòni, ɛ́ bòo dɔ̀ ɛ́ sun mi, ɛ́ ń ɲɛùn yí dàń hɔ́ ɛ̀ wé wɛ̀. Ń wɛ wóo nɛ nín ɓen khí miɛ bòo lɛ ɛ́ wé ɛ̀ niǹ tɔnlɔ́ ɛ̀ dàá hɛ bie mì tĩ́ihṹ, kɛ̀a bòo lɛ ɛ́ hɔ́ dàa han bie ɓɛ̀ dàa dɔ̀ nìɛ tĩ́ihṹ. 14Ń fɔ́ɓán ɛ̀ ǹ vɛ bie le Bentĩnu ɛ̀ lɛ́ ɓɛ́ nìnbirìe ɓɛ́kùi ǹ: ɓɛ̀lɛ yìe hɛ́rɛ àá ɓɛ́ lɛ yìe yí hán, ɓɛ̀lɛ kɛ̀rɛ́a àá ɓɛ́ lɛ ɛ́ yí kɛ̀rán. 15Ɛ́ sí iè hɔ̀pe ɛ́ ń dàa ɛ́ cɛ̀ àá bɔ̀bín ɛ̀ ǹ ɓen mì viì, mìpe lɛ wi hɔ Rɔmu lóo hũn ɛ̀ ɓiɛ̀ ɓen bie le Bentĩnu ɛ̀ lɛ́ miɛ ǹ.

Lè Bentĩnu pànkɛ́ bòo

16Ń yá lùwi ɛ̀ ǹ bie le Bentĩnu wɛ̀; iè hɔ̀ lɛ ɛ́ lé iè Dɔfĩn pànkɛ́ lɛ te ɓɛ nìnbirìe lɛ dũmuasɛ̃̀ ɛ́ wóò fuenínin, ɛ̀ dàá ɓɛ́ pehɔ̀ fìi àá ɓɛ́ Zuifuɓɛ ɛ̀ vɛ víení àá ɓɛ́lɛ ɛ́ yí ɓɛ́ Zuifuɓɛ. 17Lè Bentĩnu sɔ ɛ́ temu wóò zɛ̃́ní bòo lɛ ɛ́ Dɔfĩn dàá wóò wé ɓɛ́ nìnbirìe àá nìcã̀aníriè mí híɛhɔ́. Hɔ̀pe sí fìi ɛ́ ɓɛ́ àá hɔ́ ńdɛsĩ̀nlɔ́ ɛ̀ hɔ̀ lò van vɔ́ àá hɔ́ ńdɛsĩ̀nlɔ́, kɛ̀a bòo lɛ ɛ́ hɔ́ dàa bie lè Dɔfĩn bienù vɛ̃hṹ hũn ɛ́ nɛ làa: À nìnbírɔ lɛ ɛ́ cã̀aní iè hɔ̀ lɛ á dũmuasɛ̃̀ Dɔfĩn, ɛ́ piè ńdɛsĩ̀nlɔ́ sɔ ɛ́ ɓén lɛ́ á wé mí mɛkɛ̃nì hũn.

Ɓɛ̀ nìnbirìe ɓɛ́kùi ɛ́ wɔ́ khɔn Dɔfĩn híɛhɔ́

18Dɔfĩn lɛ wi hɔ hóohũn ɛ́ zɛ̃́niɛ kɛ́ mí tĩì ɛ́ cɛ̃̀ ɓɛ̀ nìnbirìe ǹ, peɓɛ̀ bɔ̀koohɛ̃ wénlɔ́ àá peɓɛ̀ ńbícãànírɔ́ bòo hũn. Peɓɛ̀ bɔ̀koohɛ̃ ɛ́ wóò lɛ́ ɛ̀ ɓɛ̀ nìnbirìe ɛ̀ yá dũń hɔ bɔ̀berà wɛ̀. 19Hɔ́rɔsí ɛ̀ hɔ̀ bòo lɛ ɛ́ ɓɛ́ nìnbirìe lò dɛ̀ ɛ́ dũń Dɔfĩn bòo hũn míkùi ɛ́ lò den ɛ́ ce wìée, iè hɔ̀ lɛ ɛ́ hɔ́pe Dɔfĩn ɛ́ zɛ̃́niɛ hɔ̀ ɛ́ lɛ́ ɓà ǹ. 20Àá bòo lɛ ɛ́ Dɔfĩn dàa mɛ́ lé dímíɲɛ́, ɛ́ piè pànkɛ́ lɛ ɲunù mí àá piè Dɔfĩn yaamu ɛ́ iè bòo lɛ ɛ́ yí dɛ̀ yá mi àá yìe wɛ̀. Kɛ́ ɓɛ́ nìnbirìe ɛ́ dɛ̀ hɔ̀pe sí míkùi ɛ́ dũ̀ń, hɔ̀pe Dɔfĩn bòo lɛ ɛ́ hɔ́ wɔ́ bòo hũn. Ɛ́ peɓɛ̀ bòo wo yí dɛ̀ yá tĩìní iè hɔ̀ lɛ ɛ́ ɓɛ́ wo yí dɛ̀ yá bĩní bie nɛ ɓɛ́ yí dũ Dɔfĩn wɛ̀. 21Ɓɛ̀ dũ Dɔfĩn, kɛ́ ɓɛ́ yáà ɓàaní Hɔ̀ ǹ ɛ̀ ɓɛ̀ lò yáà dé pehɔ̀ bɛrikɛ kɛ̀a bòo lɛ ɛ́ hɔ́ dàa fɔ́ɓán ɛ̀ hɔ̀ wóo wé wɛ̀. Kɛ́ ɓɛ́ den vĩ́iniɛ ɓɛ́te ɓɛ́ nùnlé lɛ ɲún mí hũn, ɛ̀ hɔ̀ síbínú ɛ́ zɔn tú peɓɛ̀ tĩɛ̀, ɛ́ ɓɛ́ dàa hɛciri mi wɛ̀. Ɛ́ peɓɛ̀ bòo wo yí dɛ̀ yá tĩìní wɛ̀. 22Ɓɛ̀ ɛ́ ɓɛ́te ɛ̀ mìí àá bɔ̀dũmunù ɓàasiè kɛ́ ɓɛ́ lò den iè bɛ̃́nbṹà. 23Ɛ̀ ɓɛ̀ pɛ̃́ ɛ́ yáà ɓàaní hɔ́ Dɔfĩn lɛ yáà hí ǹ, ɛ̀ ɓɛ̀ wɔ́ á nìnbírɔ bòo lɛ à mɛ́ àá mí níhĩ́ lɛ iè ɓɛ̀ ńkɛ́siè lɛ ɛ́ lɔ́ɓán àá ɔ́pe nìnbírɔ́ lɛ wóò hí, àá ɓɛ́ ńɲíizàani àá ɓɛ́ bìlaàsiè àá ɓɛ́ bìe lɛ ɛ́ wóo vɛ́sí ɓɛ́ vùkùo lɔ̀n ɛ́ ɓɛ́ wóò ɓàanínin.

24Ɛ́ sí iè pe temu lɛ́ ɛ́ Dɔfĩn dàa fuɛ̀rɛ̀sí ɓà ǹ ɛ́ ɓɛ́ wóò wé hɔ́ nìlàámu bòo ɛ̀ liení ɓɛ́te kɛ̀a bòo lɛ ɛ́ peɓɛ̀ tĩɛ̀ ɛ́ wɛ, ɛ́ ɓɛ́ dàa wóò liení ɓɛ́ tɛkɛ̀a ɓán hũn àá hɔ́ lùwiè bòo wénlɔ́. 25Ɓɛ̀ zɛ̀niɛ hɔ̀ bɔ̀berà Dɔfĩn ɛ́ wɔ́ àá hɔ́ ɓúò, ɛ̀ ɓɛ̀ wóò fùansí hɔ́ Dɔfĩn lɛ iè ɔ̀ mírɔ, ɛ̀ ɓɛ̀ khíi wé hɔ́pe Dɔfĩn bɔ̀míriè ɛ̀ ɓɛ̀ ɓàanínin, ɛ̀ huí pehɔ́ bòo sãàní, kɛ́ hɔ́pe Dɔfĩn lò temu fɔ́ɓán àá ɓàarɔ́ pɛ̃̀hṹ lɛ yá vé hũn. Amiina.

26Ɛ́ sí iè pe temu lɛ́ ɛ́ Dɔfĩn dàa fùɛrɛ̀sí ɓà ǹ ɛ́ ɓɛ́ wóò wé hɔ́ lùwiè bòo lɛ ɓɛ́ ɛ́ wóò nùún ɓɛ́ tĩɛ̀ hũn. Ɛ́ ɓà hã́a ɛ́ wo zɛ̀niɛ ɛ́ yáà bĩní dɛ àá ɓá báa, kɛ́ ɓɛ́ den wóò khíi vɛ daaníkɛ ɓán ɓán hũn, kɛ́ hɔ́ lò yí fɔ́ɓán ɛ̀ hɔ̀ wé wɛ̀. 27Ɛ̀ ɓɛ̀ báa ɛ́ lò ɓiɛ̀ zɛ̀niɛ ɛ́ yáà bĩní dɛ àá ɓá hã́a kɛ́ peɓɛ̀ yìe ɛ́ wóo khíi lé ɓá ńkɔhĩ́ báa ǹ, ɛ̀ ɓɛ̀ wo daaníkɛ ɓán kɛ́ hɔ́ lò iè lùwiè bòo. Ɛ́ sí iè pe temu lɛ́ ɛ́ ɓɛ́ dàa wóò yí ɓɛ́ bɔ̀lìɛhɛ̃ sàanín lɛ iè ɓɛ̀ nìnbirìe lɛ vĩ́iniɛ ɓɛte sàanín lɛ ɛ́ ɓɛ́ wóò yí.

28Ɛ́ hɔ́ lɛ ɛ́ ɓɛ́ pɛ̃́ nɛ ɓɛ́ yá dũń Dɔfĩn, ɛ́ Dɔfĩn fuɛ̀rɛ̀sí ɓà ǹ peɓɛ̀ bɔ̀dũmunù lɛ ɲún mí hũn, ɛ́ ɓɛ́ dàa wóò wé hɔ́ bòo lɛ ɛ́ yí te mí yìe. 29Peɓɛ̀ tĩɛ̀ ɛ́ tú àá hɔ́ bòo lɛ ɛ́ yá cã̀aní míkùi wénlɔ́, àá hɔ́ bòo lɛ yí sãa wénlɔ́, ɛ̀ ɓɛ̀ yá ɲì àá bòo, ɛ̀ ɓɛ̀ iè mɛkɛ̃nɲiì ɓàasiè, ɛ̀ peɓɛ̀ tĩɛ̀ ɛ́ tú àá lé yanlienú, ɛ̀ ɓɛ̀ iè nìɓériè, ɛ̀ ɓɛ̀ wɛ hɔ fuò, ɛ̀ ɓɛ̀ iè nìkhɛ̃̀níkɛriè, ɛ̀ peɓɛ̀ hũn lɔn, ɛ̀ ɓɛ̀ wóò ɓúukɛ ɓɛ nìnbirìe ɲihĩ́ɛ. 30Ɛ̀ ɓɛ̀ wóò yaa ɓán yèhĩ́, ɛ̀ ɓɛ̀ iè Dɔfĩn ɓà bíyanliè, ɛ̀ ɓɛ̀ yáà kànɓi nìnbirìe, ɛ̀ ɓɛ̀ wɛ ɓɛte khóoníkɛ́rɔ́, ɛ̀ ɓɛ̀ iè yèncɛ̀riè, ɛ̀ ɓɛ̀ dɛ̀ hɔ̀ bɔ̀koohɛ̃ lɛ ɛ́ ɲɛùn yí wé yí mi ɛ́ wóò wé, ɛ̀ ɓɛ̀ wóò pĩ́ ɓá tenliè bòo. 31Ɓɛ̀ yí dàa bɔ̀dũmunù, ɛ̀ ɓɛ̀ yáà dĩń ben-cóoní lɔ̀n, ɛ̀ ɓɛ̀ yí dàa wanminu, ɛ̀ ɓɛ̀ yáà mi ɓán miinɛ̀ wɛ̀. 32Ɓɛ̀ lò dũ hɔ Dɔfĩn lìe lènlɔ́ bòo: ɓɛ̀ dũ kɛ́ ɓɛ́pe nìnbirìe lɛ ɛ́ wóò wé hɔ́pe bòo sí ɓà ńmaà ɛ́ fɔ́ɓán àá húmú. Kɛ́ hɔ́ lɛ ɛ́ ɓɛ́ lò dũ hɔ, ɛ̀ ɓɛ̀ den pɛ́wi yí fùansí hɔ́pe bòo sɔ wénlɔ́ ǹ, kɛ́ ɓɛ́ lò wóò bĩní tɛ̀ ɓɛ̀pe lɛ ɛ́ wóò wé hɔ́ bòo.

Currently Selected:

Rɔmu Siè 1: bwj

Highlight

Compare

Copy