Bɔ̀zɛ̃́níriè 3

Lè vɛ̃hṹ lɛ ɛ́ wɛ̃́ ɛ́ lɛ́ Saride lóo Dɔfĩn zũnù nìɛ ǹ bòo

1Hɔ̀ Saride lóo Dɔfĩn zũnù mɛlɛkɛ ɛ́ kɔ́ wĩ́ lé vɛ̃hṹ ɛ̀ lɛ́ nin ɛ̀ bie nɛ làa:

«Lɛ iè hɔ̀ bòo lɛ ápe lɛ ɛ́ dàa hɔ̀ Dɔfĩn mɛkɛ̃nɛ̀a hùuɲu àá hɔ́ ńpĩ́inàwuò hùuɲu ɛ́ bie: Ń dũ kɔ bòo lɛ ɛ́ kɔ́ wóò wé. Ɓɛ̀ nìnbirìe ɛ́ wóò nɛ kɔ yìe ɛ́ wi, kɛ́ kɔ́ lò den ɛ́ húrun. 2Ɛ́ kɔ́ piɛní kɔ́ yìe ɛ̀ kɔ̀ pĩ̀iní kɔ́te, bòo lɛ ɛ́ wé ɛ̀ hɔ̀pe lɛ ɛ́ kɛ́ wi kɔ ǹ ɛ̀ bí hí hĩ́ɔɔn wɛ̀; iè hɔ̀ lɛ ɛ́ ń mɔn kɛ́ mí tɔnlɔ́ ɲunù ɛ́ yí vɛ tí ɛ̀ dɛ̃ mí dɛ̃ǹlén niǹ Dɔfĩn híɛhɔ́ wɛ̀. 3Síɛ liení lé Dɔfĩn bienù lɛ ɛ́ kɔ́ hàarí yú ǹ, àá bòo lɛ ɛ́ kɔ́ dàa hàarí ɲɛ́ lé; ɛ́ kɔ́ wo ɓɛ́ɓɛ́ lè ǹ, ɛ̀ kɔ̀ zɛ̀ní kɔ́ tĩì ɛ̀ kɔ̀ fùansí hɔ́ bɔ̀koohɛ̃ wénlɔ́ ǹ. Kɛ́ kɔ́ yí piɛ̀ní kɔ́ yìe ɛ́ ń ɓén ɓen yòokɛ kɔ lɔ̀n kɛ̀a ie kɛ̃̀múi bòo sí, ɛ́ kɔ́ wo yá dũń pɛ̃̀hṹ lɛ ɛ́ nin ɓen yòokɛ kɔ lɔ̀n hũn wɛ̀. 4Kɛ́ nìɛ ɓɛ̀ yìɛní dɔ̀ ɛ́ pe wo wi kɔ viì hɔ̀pe Saride lóo hũn lɛ pe ɛ́ yí liení ɓɛ́ pɔnkɔ̀nìɛ wɛ̀. Ɛ́ ɓɛ́ wo ɛ́ ɓén páaní vɛ àá mi kɛ́ ɓɛ́ ɛ́ zɔn hɔ̀ pɔnkɔ̀-può iè hɔ̀ lɛ ɛ́ ɓɛ́ fɔ́ɓán àá hɔ́.

5Ɛ́ kɛ̀amu, álɛ ɛ́ yú hɔ́ pànkɛ́ hɔ̀ bɔ̀koohɔ́ lɔ̀n ɛ́ ɓén zɔ hɔ pɔnkɔ̀-può; ɛ̀ piè yèrè ɛ́ ń yá ɓén sùukɛ ɛ́ yá mi lè mɛkɛ̃nì vɛ̃hṹ hũn wɛ̀; ɛ̀ ǹ ɓén tɛ̀ ɛ́ dũń kìe Yàá àá mí mɛlɛkɛɓɛ híɛhɔ́ kɛ́ ɓàasɔ bòo ɛ́ sɛ̃̀ mi ǹ.

6Nɛ alɛ ɛ́ dàa ɲɛkɛ̃̀a ɛ́ dàa wóò ɲí bòo ɛ̀ ɲí hɔ́ bòo lɛ ɛ́ lé Mɛkɛ̃n-Sãanu ɛ́ bie ɛ̀ lɛ́ hɔ́ Dɔfĩn zĩhĩɛ nìɛ ǹ!»

Lè vɛ̃hṹ lɛ ɛ́ wɛ̃́ ɛ́ lɛ́ Filadɛlifi Dɔfĩn zũnù nìɛ ǹ bòo

7Hɔ̀ Filadɛlifi lóo Dɔfĩn zũnù mɛlɛkɛ ɛ́ kɔ́ wĩ́ lé vɛ̃hṹ ɛ̀ lɛ́ nin ɛ̀ bie nɛ làa:

«Lɛ iè hɔ̀ bòo lɛ ápe lɛ ɛ́ ce à lò iè pe bɔ̀berà ɓàasɔ ɛ́ bie, àpe lɛ ɛ́ dàa ɔ bɛ́zuú Daviide bɛ́záanú zĩínù ɲunù hĩì, àpe lɛ ɛ́ ɓen hɛ́rɛ lè zĩínù ɲunù ɛ̀ nìnbírɔ dɔ̀ ɛ́ yí dɛ̀ lè yá híɛ, à ɓen híɛ lè ɛ̀ nìnbírɔ dɔ̀ ɛ́ yí dɛ̀ lè yá hán: 8Ń dũ kɔ bòo lɛ ɛ́ kɔ́ wóò wé; ń dũ kɛ́ kɔ́ pànkɛ́ ɛ́ mínɛ cɛ̃̀un wɛ̀, kɛ́ kɔ́ lò den pɛ́wi ɛ́ tɛ̀ niǹ bienù bòo ɛ̀ kɔ̀ ɛ́ yí pĩ́ mi wɛ̀. Ɛ́ kɔ́ húi, ń hɛ́rɛ lè zĩínù ɲunù dɔ̀ ɛ́ dĩ̀niɛ kɔ̀ híɛhɔ́ lɛ ɛ́ nìnbírɔ dɔ̀ ɛ́ yí dɛ̀ yá híɛ wɛ̀. 9Lɛ iè hɔ̀ bòo lɛ ɛ́ ń ɓén wé àá ɔ́ Sitũanɛ ńkóoɓánlɔ̀n nìɛ dɔ̀, ɓɛ̀pe lɛ ɛ́ wóò nɛ ɓɛ́ iè Zuifuɓɛ kɛ́ ɓɛ́ lò den yí ɓɛ́pe wɛ̀: ń ɓén lɛ́ ɛ́ ɓɛ́ ɛ́ ɓen hùensíkɛ kɔ híɛhɔ́, ɛ̀ ɓɛ̀ ɛ́ dũń kɛ́ ń wɛ kɔ. 10Ɛ́ hɔ́ lɛ ɛ́ kɔ́ can kɔ̀ kuò ɛ̀ kɔ̀ ɓɛ́ɓɛ́a niǹ bienù ǹ sãàniɛ, ɛ́ ńpe ɛ́ ɓiɛ̀ ɓén ɓɛ́ɓɛ́ kɔ ǹ pɛ̃̀hṹ lɛ ɛ́ lé sɛ̃́ɲíi ɛ́ mii dàá ɓen siɛ lé dímíɲɛ́ míkùi lɔ̀n, ɛ̀ dàa siɛ hàaní ɓɛ́ nìnbirìe lɛ ɛ́ wi le sṹsùnù lɔ̀n ɓɛ́kùi. 11Ń vaá-ɓen sáalɛ. Ɛ́ kɔ́ ɓɛ́ɓɛ́ hɔ́ bòo lɛ ɛ́ kɔ́ dàa ǹ sãàní, bòo lɛ ɛ́ wé ɛ̀ nìnbírɔ dɔ̀ ɛ̀ bí vúa kɔ́ pànkɛ́ yínlɔ́ sàanín wɛ̀. 12Álɛ ɛ́ yú hɔ́ pànkɛ́ hɔ̀ bɔ̀koohɔ́ lɔ̀n ɛ́ ń ɓén mìí ɛ́ wé àá lé zũnù kiɛ́ nin Dɔfin zũnù hũn, á wo ɛ́ kań yán fúu ɛ́ yá bĩní lé yá mi wɛ̀, ɛ́ ń wo ɓén wĩ́ niǹ Dɔfin yèrè piè lɔ̀n, ɛ̀ ǹ lò ɛ́ wĩ́ niǹ Dɔfĩn ɓà lóo yèrè piè lɔ̀n, lèpe lóo lɛ ɛ́ iè lè Zerizalɛɛmu dɛ̀fĩì lɛ yòó lɔ́ àá hɔ́ hóohũn hɔ̀pe niǹ Dɔfĩn viì ɛ́ dàa ɛ́ siɛ. Ɛ̀ ǹ lò ɛ́ wĩ́ niǹ yèrè dɛ̀fĩì piè lɔ̀n. 13Nɛ alɛ ɛ́ dàa ɲɛkɛ̃̀a ɛ́ dàa wóò ɲí bòo ɛ̀ ɲí hɔ́ bòo lɛ ɛ́ lé Mɛkɛ̃n-Sãanu ɛ́ bie ɛ̀ lɛ́ hɔ́ Dɔfĩn zĩhĩɛ nìɛ ǹ!»

Lè vɛ̃hṹ lɛ ɛ́ wɛ̃́ ɛ́ lɛ́ Laodiise lóo Dɔfĩn zũnù nìɛ ǹ bòo

14Hɔ̀ Laodiise lóo Dɔfĩn zũnù mɛlɛkɛ ɛ́ kɔ́ wĩ́ lé vɛ̃hṹ ɛ̀ lɛ́ nin ɛ̀ bie nɛ làa:

«Lɛ iè hɔ̀pe bòo lɛ ápe lɛ yèrè Amiina ɛ́ bie, àpe lɛ ɛ́ wóò bie hɔ bòo lɛ á mɔn bòo àá mí híɛhɔ́, àpe bɔ̀berà ɓàasɔ, àpe lɛ ɛ́ hɔ́ Dɔfĩn bɔ̀míriè míkùi ɛ́ lɔ́ viì: 15Ń dũ kɔ bòo lɛ ɛ́ kɔ́ wóò wé, ń dũ kɛ́ kɔ́ yí wɛ ɛ̀ kɔ̀ lò yí sɔ wɛ̀. Kɛ́ ń den hṹn cɛ̀ nɛ kɔ wɛ tàá ɛ̀ kɔ̀ soòní. 16Kɛ́ hɔ́ lɛ ɛ́ kɔ́ wo ɛ́ yí wɛ ɛ̀ kɔ̀ lò ɛ́ yí sɔ kɛ́ kɔ́ den wo dɛ̃̀ tɛ́kùtɛ́kù, ɛ́ ń wo ɓén sĩ́ kɔ ɛ́ líení niǹ ɲunù hũn. 17Kɔ́ den wóò bie nɛ kɔ́ iè bòo ɓàasɔ, nɛ kɔ́ yú bòo bɔ̀kuì, nɛ bòo dɔ̀ ɛ́ wo bĩniɛ ɛ́ yí yèń kɔ ǹ wɛ̀. Kɛ́ kɔ́ den yí dũ kɛ́ kɔ́ ɛ́ wi le ɲinwiè hũn, ɛ̀ kɔ̀ miinɛ̀ ɛ́ wi, ɛ̀ kɔ̀ bòo dɔ̀ ɛ́ mí, ɛ̀ kɔ̀ iè mui, ɛ̀ kɔ̀ dɛ̃̀ àá kɔ́ bùie kíemáà. 18Ɛ́ sí ie hɔ̀pe ɛ́ ń dàa nin lɛ́ lépe bérɛ́ lɛ kɔ ǹ nɛ kɔ ɓen niǹ viì, ɛ̀ ɓen yɛ̀ hɔ̀ sɛ̃́ní lɛ tɛ̃un hɔ̀ dṹn hũn ɛ̀ kɔ̀ dàá wé bòo ɓàasɔ àá bɔ̀bín, ɛ̀ kɔ̀ yɛ̀ hɔ̀ pɔnkɔ̀-può ɛ̀ zɔ ɛ̀ kɔ̀ dàá bí dìń àá kɔ́ bùie kíemáa ɛ̀ lùwiè ɛ̀ dí kɔ wɛ̀, ɛ̀ kɔ̀ yɛ̀ hɔ̀ yìe tĩɛhɛ̃ ɛ̀ kóo kɔ́ yìe hũn ɛ̀ kɔ̀ dàá mi bòo. 19Ǹpe niǹ nìɛ lɛ ń wɛ ɓɛ́kùi ɛ́ ń wóò dàá fĩ ɛ̀ dàá zɛ̃́ní lé wṹn ɛ̀ lɛ́ ɓà ǹ. Ɛ́ kɔ́ pĩ̀iní kɔ́te ɛ̀ kɔ̀ zɛ̀ní kɔ́ tĩì ɛ̀ kɔ́ fùansí hɔ́ bɔ̀koohɛ̃ wénlɔ́ ǹ. 20Ɛ́ kɔ́ húi, ń lɛ ɛ́ ɓɛrɛ dɛ̃̀ lè zĩínù ɲunù ɛ̀ nìn lè ɓánɓɛ́. Kɛ́ nìnbírɔ dɔ̀ ɛ́ ɲɛ́ niǹ tɛmu ǹ à ɛ́ hɛ́rɛ lè zĩínù ɲunù, ɛ́ nín yòó zɔ ɓàasɔ viì, ɛ́ zɔ́ dí àá ɔ́, à ɓiɛ̀ ɛ́ dí àá mi. 21Álɛ ɛ́ yú hɔ́ pànkɛ́ hɔ̀ bɔ̀koohɔ́ lɔ̀n ɛ́ ń ɓén lɛ́ á ɛ́ páaní kansí àá mi niǹ bɛ́záanú wànlè lɔ̀n, kɛ̀a bòo lɛ ɛ́ ńpe ɛ́ ɓiɛ̀ yú hɔ́ pànkɛ́ ɛ́ ń dàa páaniɛ yòó kɛsí àá kìe Yàá piè bɛ́záanú wànlè lɔ̀n. 22Nɛ alɛ ɛ́ dàa ɲɛkɛ̃̀a ɛ́ dàa wóò ɲí bòo ɛ̀ ɲí hɔ́ bòo lɛ ɛ́ lé Mɛkɛ̃n-Sãanu ɛ́ bie ɛ̀ lɛ́ hɔ́ Dɔfĩn zĩhĩɛ nìɛ ǹ!»

Currently Selected:

Bɔ̀zɛ̃́níriè 3: bwj

Highlight

Copy

Compare