Bɔ̀zɛ̃́níriè 2
2
Lè vɛ̃hṹ lɛ ɛ́ wɛ̃́ ɛ́ lɛ́ Efɛɛzi lóo Dɔfĩn zũnù nìɛ ǹ bòo
1Hɔ̀ Efɛɛzi lóo Dɔfĩn zũnù mɛlɛkɛ ɛ́ kɔ́ wĩ́ lé vɛ̃hṹ ɛ̀ lɛ́ nin ɛ̀ bie nɛ làa: «Lɛ iè hɔ̀ bòo lɛ ápe lɛ ɛ́ dàa hɔ̀ ńpĩ́inàwuò hùuɲu mí ńdóonín núnú hũn, àpe lɛ ɛ́ vɛ hɔ sɛ̃́ní pɛ̃̀ntĩ́hĩ́ hùuɲu tĩ́ihṹ bòo lɛ á ɛ́ bie: 2Ń dũ kɔ bòo lɛ ɛ́ kɔ́ wóò wé, kɔ̀ tɔnlɔ́ àá kɔ́ kuò canlɔ́. Ń dũ kɛ́ kɔ́ yí dɛ̀ kɔ̀ hũn ɛ́ yá hè àá ɓɛ́ mɛkɛ̃nɲiì ɓàasiè wɛ̀; kɔ́ hàaniɛ ɓɛ̀pe lɛ ɛ́ nɛ ɓɛ́ iè Dɔfĩn tɔnkɛriè kɛ́ ɓɛ́ lò den ɛ́ yí ɓɛ́pe wɛ̀; ɛ́ kɔ́ mɔn kɛ́ ɓɛ́ iè ɓɔ́ɓúukɛriè. 3Kɔ́ hɛ̀ can kɔ̀ kuò, ɛ̀ kɔ̀ lɔ̀n ɛ́ bɔn niǹ yènsénin kɛ́ kɔ́ yí tìení kɔ́ bàanì wɛ̀. 4Kɛ́ ń den ɛ́ kɔ̀ wũ̀aní àá bɔ̀cóoní dɔ̀: kɔ́ den ɛ́ fùɛrɛ̀sí kɔ́ hán wanminu lɛ ɛ́ kɔ́ hṹn dàa àá mi. 5Ɛ́ kɔ́ síɛ liení lé viì lɛ ɛ́ kɔ́ khìɛ kuerɛ nin, ɛ̀ kɔ̀ zɛ̀ní kɔ́ tĩì ɛ̀ kɔ̀ fùansí kɔ́ bɔ̀koohɛ̃ wénlɔ́ ǹ ɛ̀ kɔ̀ khũ̀á ɛ̀ khíi wé hɔ́ bòo lɛ ɛ́ kɔ́ hṹn sɛ̃̀nɛ́hã̀ ɛ́ wé. Kɛ́ kɔ́ pɛ̃́ ɛ́ nín khũ̀á ɛ́ ɓen kɔ ǹ ɛ́ ɓén leń kɔ́ pɛ̃̀ntĩ́ní mí bènlén ɛ́ khɛ̃̀ún ɛ́ viɛní sɔ́nsɔ́n. 6Kɛ́ kɔ́ den ɛ́ bɔ̀tente dɔ̀ ɛ̀ wé: à Nikola máahṹ nìɛ bòo lɛ ɛ́ ɓɛ́ ɛ́ wé ɛ́ kɔ́ yí wɛ kɛ̀a bòo lɛ ɛ́ ńpe ɛ́ ɓiɛ̀ dàa ɛ́ yí wɛ hɔ̀ wɛ̀.»
7Nɛ alɛ ɛ́ dàa ɲɛkɛ̃̀a ɛ́ dàa ɛ́ wóo ɲí bòo ɛ̀ ɲí hɔ́ bòo lɛ ɛ́ lé Mɛkɛ̃n-Sãanu ɛ́ bie ɛ̀ lɛ́ hɔ́ Dɔfĩn zĩhĩɛ nìɛ ǹ ɛ́ nɛ: «Àlɛ ɛ́ mii yí hɔ́ pànkɛ́ hɔ̀ bɔ̀koohɔ́ lɔ̀n ɛ́ ńpe Dɔfĩn ɛ́ nin lɛ́ lé mɛkɛ̃nì vɛ̃̀hṹ lɛ ɛ́ wi niǹ Hɛrɛcĩnɛ hũn biè ɔ̀ ǹ à ɛ̀ lɛ̀.»
Lè vɛ̃hṹ lɛ ɛ́ wɛ̃́ ɛ́ lɛ́ Simiinɛ lóo Dɔfĩn zũnù nìɛ ǹ bòo
8Hɔ̀ Simiinɛ lóo Dɔfĩn zũnù mɛlɛkɛ ɛ́ kɔ́ wĩ́ lé vɛ̃hṹ ɛ̀ lɛ́ nin ɛ̀ bie nɛ làa: «Lɛ iè hɔ̀ bòo lɛ ápe lɛ iè ɔ̀ hándí àá ɔ́ mɛ́ndí ɛ́ bie, àpe lɛ ɛ́ hṹn húrun kɛ́ á bĩniɛ khũ̀a yìe wi. 9Ń dũ kɔ tĩ-yaarè bòo àá kɔ́ munù bòo; kɛ́ kɔ́ lò den iè bòo ɓàasɔ. Ń dũ ɓɛpe ben-làahɛ̃ bieriè bòo, ɓɛ̀pe lɛ ɛ́ wóo nɛ ɓɛ́pe ɛ́ iè Zuifuɓɛ kɛ́ ɓɛ́ lò den ɛ́ yí ɓɛ́pe wɛ̀; ɓɛ̀ den iè Sitũanɛ ńkóoɓánlɔ̀n nìɛ. 10Bí zán lé lɔ̀nbiè lɛ ɛ́ mii yí kɔ wɛ̀. À Sitũanɛ ɛ́ mii lɛ́ ɛ̀ ɓɛ̀ ɓaakɛ ɓɛ nìɛ ɓɛ̀ yìɛní dɔ̀ mì tĩ́ihṹ ɛ̀ vɛ kóo lé kɛ̀sí hũn ɛ̀ dàá hàaní miɛ ɛ̀ húi. Ɓɛ̀ ɓén ɲínkɛ miɛ fúu wihĩ́ pírú. Ɛ́ kɔ́ cã̀aní kɔ́ ɲún fúu ɛ̀ vɛ dɛ̃ hɔ́ húmú, ɛ́ ń den ɛ́ lɛ́ kɔ́ pànkɛ́ yínlɔ́ sàanín kɔ̀ ǹ, lɛ ɛ́ iè lè mɛkɛ̃nì lɛ ɛ́ yá vé.»
11Nɛ alɛ ɛ́ dàa ɲɛkɛ̃̀a ɛ́ dàa wóò ɲí bòo ɛ̀ ɲí hɔ́ bòo lɛ ɛ́ lé Mɛkɛ̃n-Sãanu ɛ́ bie ɛ́ lɛ́ hɔ́ Dɔfĩn zĩhĩɛ nìɛ ǹ!
À nìnbírɔ lɛ ɛ́ mii yí hɔ́ pànkɛ́ hɔ̀ bɔ̀koohɔ́ lɔ̀n, ɛ́ hɔ́ ńɲunín húmú ɛ́ pe wo yá dɛ̃ wɛ̀.
Lè vɛ̃hṹ lɛ ɛ́ wɛ̃́ ɛ́ lɛ́ Pɛrɛkaamu lóo Dɔfĩn zũnù nìɛ ǹ bòo
12Hɔ̀ Pɛrɛkaamu lóo Dɔfĩn zũnù mɛlɛkɛ ɛ́ kɔ́ wĩ́ lé vɛ̃hṹ ɛ̀ lɛ́ nin ɛ̀ bie nɛ làa: «Lɛ ɛ́ iè hɔ̀ bòo lɛ ápe lɛ ɛ́ dàa le khɛ̃́n-tɔ́nú lɛ ɲihĩɛ́-hĩ̀ɲu ɛ́ liɛ ɛ́ bie:
13Ń dũ kɔ zɔǹlén: lè iè lè viì lɛ á Sitũanɛ bɛ́záanú wànlè ɛ́ wi hũn. Kɔ́ ɛ́ can dɛ̃̀ mi ǹ sãa sãa. Hɛ̀rí zɔn lɛ ɛ́ ɓɛ́ dàa ɓɔ́ á Antipaasi lɛ hàarí ɛ́ hɔ̀ bɔ̀berà ɛ̀ munkɛ niǹ bòo hũn mì viì, lèpe viì lɛ á Sitũanɛ ɛ́ zɔ hũn, ɛ́ kɔ́ pɛ́wi ɛ́ yí pĩ́ ɛ̀ bie nɛ kɔ́ yá dɛsĩ̀ mi ǹ wɛ̀. 14Kɛ́ ń den ɛ́ kɔ̀ wũ̀aní àá bɔ̀cíi dɔ̀: ɓɛ̀ nìnbirìe dɔ̀ ɛ́ wi kɔ viì kɛ́ ɓɛ́ ɛ́ dɔ́ ɓɛ́ ɲún à Baalamu kɛ̀ránlɔ́ ǹ. À Balaamu ɛ́ den hàarí ɛ́ kɛ̀rɛa ɔ̀ Balaake àá hɔ́ bòo lɛ ɛ́ lɛ́ ɛ́ ɓɛ́ Yizarayɛɛle nìɛ ɛ́ dàá wé hɔ́ bɔ̀koohɔ́. Ɛ́ kɛ̀amu, ápe Balaake ɛ́ wo hàarí fĩiniɛ ɓɛ̀ ɛ́ ɓɛ́ ɛ́ lɛ̀ hɔ̀ wɛ̃̀hɛ̃ taà ɛ̀ ɓɛ̀ lò ɛ́ dɔ́ ɓɛ́te hɔ̀ ńdaaníkɛɓánkũǹ hũn. 15Ɛ́ ɓɛ́ nìnbiriè dɔ̀ lò ɓiɛ̀ wi kɔ viì kɛ́ ɓɛ́ dɔ́ ɓɛ́ ɲún à Nikola máahṹ nìɛ kɛ̀ránlɔ́ ǹ. 16Ɛ́ kɔ́ zɛ̀ní kɔ́ tĩì ɛ̀ kɔ̀ fùansí kɔ́ bɔ̀koohɛ̃ wénlɔ́ ǹ, kɛ́ dàa bòo mí ɛ́ ń ɓén ɓen kɔ ǹ sáalɛ, ɛ́ ɓen sɛ àá ɓɛ́pe nìɛ sɔ àá lé khɛ̃́n-tɔ́nú lɛ ɛ́ lé àá niǹ ɲunù.
17Nɛ alɛ ɛ́ dàa ɲɛkɛ̃̀a ɛ́ dàa wóò ɲí bòo ɛ̀ ɲí hɔ́ bòo lɛ ɛ́ lé Mɛkɛ̃n-Sãanu ɛ́ bie ɛ́ lɛ́ hɔ́ Dɔfĩn zĩhĩɛ nìɛ ǹ!
Á nìnbírɔ lɛ ɛ́ mii yí hɔ́ pànkɛ́ hɔ̀ bɔ̀koohɔ́ lɔ̀n, ɛ́ nin lɛ́ hɔ́ dínlɔ́ lɛ ɛ́ tànkɔ̀niɛ nin lɛ yèrè maanɛ, àá lé sɛ̃̀nlè dɛ̀puiè dɔ̀ lɛ ɛ́ lé yèrè dɛ̀fĩì dɔ̀ ɛ́ wɛ̃́ wi lɔ̀n, lɛ ɛ́ nìnbírɔ dɔ̀ ɛ́ yí dũ kɛ́ ápe lɛ te le ɛ́ yú ɛ́ ɓen bòo mí.»
Lè vɛ̃hṹ lɛ ɛ́ wɛ̃́ ɛ́ lɛ́ Tiyatiire Dɔfĩn zũnù nìɛ ǹ bòo
18Hɔ̀ Tiyatiire lóo Dɔfĩn zũnù mɛlɛkɛ ɛ́ kɔ́ wĩ́ lé vɛ̃hṹ ɛ̀ lɛ́ nin ɛ̀ bie nɛ làa: «Lɛ iè hɔ̀ bòo lɛ ɛ́ Dɔfĩn Zuú ɛ́ bie, àpe lɛ yìe ɛ́ dɛ̃̀ kɛ̀a ie hɔ dṹn pɔnù ɛ̀ piè zehĩ́ ɛ́ dɛ̃̀ kɛ̀a ie hɔ̀ hɛ̃nlɛ̀a lɛ ɛ́ ɲiinikɛ bòo sí. 19Ń dũ kɔ bòo lɛ ɛ́ kɔ́ ɛ́ wé, kɔ̀ wanminu àá kɔ́ ńdɛsĩ̀nlɔ́ àá bòo lɛ ɛ́ kɔ́ dàa wóò sĩiní ɓɛ́ nìnbirìe, àá kɔ́ kùo canlɔ́. Ń dũ kɛ́ hɔ́ tɔnlɔ́ lɛ ɛ́ kɔ́ ɛ́ tɛ́ kɛ̀a laà lɛ lɔ̀n ɛ́ bùo ɛ́ pɔ hɔ hán bòo. 20Kɛ́ bòo dɔ̀ ɛ́ wi yán iè pe ɛ́ nin dàá wũ̀aní kɔ: Kɔ́ wóò fùansí-e Zezabɛɛle ǹ, àpe hṹnu lɛ ɛ́ wóo nɛ mípe iè Dɔfĩn bɔ̀háanírɔ à fĩiní niǹ tɔntɛ́riè àá mí kɛ̀ránlɔ́, ɛ̀ ɓɛ̀ wo khíi vɛ dé ɓɛ́te hɔ̀ ńdaaníkɛɓánkũ̀n hũn kɛ́ ɓɛ́ ɛ́ hɔ̀ wɛ̃̀hɛ̃ taà ɛ̀ lɛ̀. 21Ɛ́ ń lɛ́ lé pɛ̃̀hṹ ɔ̀ ǹ nɛ a zɛ̀ní mí tĩì à fùansí mí bɔ̀koohɛ̃ wénlɔ́ ǹ, kɛ́ á den yí tɛ̀ à fùansí mí ńdaaníkɛɓánkũǹ wɛ̀. 22Ɛ́ sí iè hɔ̀pe ɛ́ ń dàa ɛ́ nin mìí ɔ́ ɛ̀ tɛ́ síɛní lé dɛmu dìɛ dɔ̀ lɔ̀n lè lɔ̀nbe-bɛhɔ́ hũn, àpe àá ɓɛ́pe lɛ ɛ́ wóò páaní wé hɔ́ ńdaaníkɛɓánkũǹ àá ɔ́, kɛ́ yí bòo lɛ ɛ́ ɓɛ́ zɛ̀niɛ ɓɛ́ tĩɛ̀ ɛ̀ ɓɛ̀ ɛ́ fùɛrɛ̀sí hɔ́pe piè bòo lɛ á ɛ́ wé ǹ. 23Ɛ̀ pìe nìɛ ɛ́ ń lò ɛ́ ɓén lɛ́ ɛ́ ɓɛ́ ɛ́ hí. Ɛ́ kɛ̀amu, ɛ́ hɔ́ Dɔfĩn zĩhĩɛ nìɛ ɓɛ́kùi ɛ́ ɓén dũń kɛ́ ńpe ɛ́ iè ɔ̀pe lɛ ɛ́ dũ ɓɛ nìnbirìe hũn bòo àá peɓɛ̀ tĩɛ̀ bòo. Ɛ́ ń ɓén sàaní miɛ ɛ́ ɓáaníɓán àá hɔ́rɔ bòo lɛ á wɔ́.
24Kɛ́ hɔ́ ɓen kɛ́ mípe Tiyatiire lóo ńdɛsĩ̀rìe lɛ ɛ́ kɛ́, mìpe lɛ ɛ́ yí tɛ̀ ɛ̀ bè hɔ̀pe kɛ̀rán-koohɔ́ sɔ sí máahṹ, ɛ̀ mì lò ɛ́ yí tɛ̀ ɛ̀ dũń hɔ́pe bòo lɛ ɛ́ ɓɛ́pe nìɛ sɔ ɛ́ wóò ve nɛ “Sitũanɛ bòo lɛ ɛ́ tànkɔ̀niɛ”, ɛ̀ lɛ iè hɔ̀ bòo lɛ ɛ́ nín bie: Ń yí nin bĩní bè tìerɔ́ bɔ̀ɓuɛ̀ dɔ̀ mì lɔ̀n wɛ̀. 25Kɛ́ hɔ́ bòo lɛ ɛ́ mí dàa ɛ́ mí ɓɛ́ɓɛ́ nin dàá fúu ɛ̀ ǹ khũ̀á ɓen lɔ̀n. 26Álɛ ɛ́ yú hɔ́ pànkɛ́ hɔ̀ bɔ̀koohɔ́ lɔ̀n, àpe lɛ ɛ́ tɛ́ niǹ tɔnlɔ́ fúu ɛ́ van vieniɛ, ɛ́ ń ɓén lɛ́ hɔ́ pànkɛ́ nin hɔ̀ dàa míkùi nìɛ lɔ̀n. 27“Á wóo ɓén sie ɓɛ àá hɛ̃nlɔ́ lànlè, kɛ̀a bòo lɛ ɛ́ ɓɛ́ dàa wóò wua hɔ cɔ́rɔ́ tĩ̀ɛ bòo sí.” 28Ǹpe kùusɔ ɛ́ yú hɔ́pe pànkɛ́ sɔ kìe Yàá viì. Ɛ̀ ǹ lò wo ɓén lɛ́ lé ńpĩ́inàawiì lɛ ɛ́ wóo cĩ̀ hɔ̀ ɲɛǹbín dùdù ɔ̀ ǹ.
29Nɛ alɛ ɛ́ dàa ɲɛkɛ̃̀a ɛ́ dàa wóò ɲí bòo ɛ̀ ɲí hɔ́ bòo lɛ ɛ́ lé Mɛkɛ̃n-Sãanu ɛ́ bie ɛ̀ lɛ́ hɔ́ Dɔfĩn zĩhĩɛ nìɛ ǹ!»
Currently Selected:
Bɔ̀zɛ̃́níriè 2: bwj
Highlight
Copy
Compare
Share
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation
