Filiipu Siè 4
4
Pooli bérɛ bienù
1Ɛ́ kɛ̀amu, mìpe kìe zɛ̀ɓɛ̀ lɛ ɛ́ ń wɛ, mì pɔnù ɛ́ hɛ̀ ɛ́ nìn ɓé cɛ̃̀un. Mí iè niǹ tĩwiɛ̀ ɛ̀ mì ɛ́ te le yèrè ɛ́ dé mi ǹ. Mìpe lɛ ɛ́ ń hɛ̀ wɛ, ɛ́ sí iè hɔ̀pe ɛ́ ǹ dàa nɛ mi cɛ dìń ɔ́ Ɲunsɔ ǹ sãàní.
2Nín ɔ̀ Evodi àá ɔ́ Sɛ̃ntiisi ɛ̀ hɛ̃nnin nɛ ɓɛ wé ɓɛ́ ɲunù àá dìcóoní à Ɲunsɔ hũn. 3Ɛ̀ kɔ̀pe kìe ńkɔnù ńtɛ́ɓánlɔ̀n nùún hɛ̀lɛ̀lɛ̀, nín kɔ̀ hɛ̃nnin nɛ kɔ yíiní ɓɛ́pe hã́a sɔ. Ɓɛ̀ páa niǹ lɔ̀n ɛ́ dàa san hɔ̀ sɛrɔ́ lè Bentĩnu buierɔ́ hũn, ɛ̀ khíi páa ɔ́ Keleman àá ɓɛ́pe kìe ńtɛ́ɓánlɔ̀n nìɛ lɛ kɛ́ ɓɛ́kùi, ɓɛ̀pe lɛ yèhĩ́ ɛ́ wɛ̃́ wi lé mɛkɛ̃nì vɛ̃hṹ hũn.
4Ɛ́ mí wóo wɛní míte fúu mì ńcɛɓánlɔ́ àá ɔ́ Ɲunsɔ bòo hũn, ɛ́ nin bĩní tĩ̀iní hɔ́, mì wóo wɛní míte.
5Ɛ́ mí lɛ́ nɛ mi sãamu ɛ́ ɓɛ́ nìnbirìe ɓɛ́kùi ɛ̀ mi. Ɲunsɔ ɓenlɔ́ ɛ́ lúwi. 6Ɛ́ mí bí lɛ́ nɛ mi kuò ɛ̀ hè bòo dɔ̀ hũn wɛ̀. Kɛ́ bòo míkùi hũn, ɛ́ mí wóò hɛ̃un Dɔfĩn ɛ̀ ɓɔ́nɓɔ́ní Hɔ̀ ǹ. Kɛ́ mí ɛ́ dòo dɔ̀ ɛ̀ cɛ̀, ɛ̀ mì lɛ́ nɛ Dɔfĩn dũń hɔ́ hũn, ɛ̀ mì wóo dé pehɔ̀ bɛrikɛ. 7Ɛ́ Dɔfĩn hũn-wiɛ̀ lɛ ɛ́ pɔ nìnbírɔ bɔ̀dũmunù míkùi ɛ́ ɓén lɛ́ ɛ́ mí tĩɛ̀ àá mí nùnlé ɛ́ cɛ dìń ɔ́ Yiezu Kirisa ǹ.
8Kìe zɛ̀ɓɛ̀, ɛ̀ dàá víeníkɛ, ɛ́ bòo míkùi lɛ ɛ́ iè hɔ̀ bɔ̀berà, àá bòo míkùi lɛ ɛ́ fɔ́ɓán àá mɛ̀ndɛ̃rɔ́, àá bòo míkùi lɛ ɛ́ cã̀aní, àá bòo míkùi lɛ ɛ́ ce, àá bòo míkùi lɛ ɛ́ ɓɛ́ nìnbirìe ɛ́ dɛ̀ ɛ́ wɛní, àá bòo míkùi lɛ ɛ́ ɓɛ́ nìnbirìe ɛ́ wóò tɛ̀ bòo, lɛ iè bòo lɛ ɛ́ sãa ɛ̀ hɔ̀ lò fɔ́ɓán àá ɓàanírɔ́ iè pe ɛ́ mí wóo nùún bòo. 9Ɛ̀ hɔ́ bòo lɛ ɛ́ mí kerɛnin niǹ viì àá hɔ́lɛ ɛ́ mí yú niǹ viì, hɔ̀ bòo lɛ ɛ́ mí ɲɛ́ niǹ viì àá hɔ́lɛ ɛ́ mí mɔn kɛ́ nìń wé iè pe ɛ́ mí wóo vɛ bè nin. Ɛ́ Dɔfĩn lɛ te le hũn-wiɛ̀ ɛ́ wóò lɛ́ ɛ́ ɓén kań àá miɛ.
Pooli Filiipu siè bɛrikɛ ɛ̀ dé peɓɛ̀ ńsĩinín bòo hũn
10Ń hɛ̀ wɛ niǹte cɛ̃̀un à Ɲunsɔ hũn iè hɔ̀ lɛ ɛ́ ń loo kɛ́ mí bĩniɛ ɛ́ bɔ̀ niǹ bòo hièniɛ. Ń dũ kɛ́ mí wóò bè niǹ bòo hièní fúu, kɛ́ mí temu hṹn ɲɛùn yí bĩní yí wṹn lɛ ɛ́ zɛ̃́ní hɔ́ ɛ̀ lɛ́ mi ǹ wɛ̀. 11Hɔ̀ yí bòo ɛ́ bòo ɛ́ pɔ mi ɛ́ ń dàa ɛ́ bie kɛ̀amu wɛ̀; iè hɔ̀ lɛ ɛ́ hɔ́ bòo lɛ ɛ́ ń kerɛ nin iè hɔ̀ lɛ ɛ́ hɔ́ bòo lɛ ɛ́ ń dàa ɛ́ wóò yí mi. 12Ń dũ bòo lɛ ɛ́ ɓɛ́ wóo nɛ bòo ɛ́ yèrɛ nìnbírɔ ǹ, ɛ̀ lò dũ bòo lɛ ɛ́ ɓɛ́ wóo nɛ nìnbírɔ ɛ́ dàa yírɛ́ bɔ̀kuì. Ɛ́ viì míkùi àá bòo míkùi hũn, ɛ́ ń dũ bòo lɛ ɛ́ ń dàa sãawi ɛ̀ ǹ wóo dí, lɛ kɛ́ díe bɔ̀kuì ɛ́ dàa ɓen wi, ɛ̀ ǹ lò dũ bòo lɛ ɛ́ ń dàa sãawi ɛ̀ ǹ hĩ̀ niǹ hũn, lɛ kɛ́ hɔ́ dàa ɓen iè hĩni ɛ́ temu wi. Ɛ́ ń ɓen ɛ́ dàa bòo bɔ̀kuì, ɛ̀ ǹ dũ niǹte dàarɔ́, ɛ̀ ǹ lò ɓen bòo dɔ̀ mí, ɛ̀ ń lò dũ niǹte dàarɔ́. 13Ɛ́ ń dɛ̀ hɔ̀pe sí míkùi ɛ́ wóò wé, à Kirisa lɛ ɛ́ te hɔ pànkɛ́ ɛ́ wóò lɛ́ mi ǹ bòo hũn. 14Kɛ́ hɔ́pe lɛ ɛ́ mí ɛ́ sĩiniɛ mi niǹ sɛ̃́ɲíi hũn ɛ́ lò den iè bɔ̀tente ɛ́ mí ɛ́ wɔ́.
15Mìpe Filiipu siè, mí lò wo dũ kɛ́ pɛ̃̀hṹ lɛ ɛ́ ń dàa ɛ́ lɔ́ hɔ́ Maseduanɛ pɛ̃̀hɛ̃ hũn lè yìi lɛ ɛ́ ń dàa hàarí ɛ́ ɓɛ́ lé Bentĩnu buierɔ́ fìi, ɛ́ Dɔfĩn zũnù nìɛ dɔ̀ lɛ ɛ́ sĩiniɛ mi ɛ́ yí wé kɛ́ mípe ɛ́ ɓen bòo ɛ́ mí. Mìpe mì dòonún àá ńpe te bòo ɛ́ lɛ́kɛ́ ɓán. 16Hɔ̀ lɛ ɛ́ ń dàa hàarí wi hɔ Tesaloniike lóo hũn, ɛ́ mí zĩ̀níkɛa tɔniɛ hɔ̀ bòo yìe hĩ̀ yiɛní ɛ́ ɓɛrɛ lɛ́ mi ǹ ɛ́ dàa sĩiniɛ mi. 17Ɛ́ hɔ́ bòo lɛ ɛ́ nín cɛ̀ ɛ́ yí bòo ɛ́ ń nɛ mi lɛ́ hɛ̃mù bòo mi ǹ wɛ̀. Kɛ́ hɔ́ lɛ ɛ́ nín cɛ̀ iè bòo ɛ́ nɛ Dɔfĩn ɛ̀ dúɓɛ́ miɛ ǹ mì bùuɲɛ́ bòo hũn. 18Hɔ̀ bòo lɛ ɛ́ mí ɛ́ tɔniɛ lɛ́ mi ǹ míkùi ɛ́ ɓɛrɛ dɛ̃un mi. Ɛ́ hɔ́ den yɛ̀rɛ́ hɛ̀ ɛ́ buòniɛ cɛ̃̀un. À Epaforodiite ɛ́ dàa hɔ̀pe bòo lɛ ɛ́ mí ɛ́ tɔniɛ àá ɔ́ míkùi ɛ́ ɓɛrɛ lɛ́ mi ǹ, ɛ́ bòo míkùi ɛ́ hɛ̀ wo ɲɛ̀ mi. Ɛ́ mí ńsĩinín sɔ ɛ́ den dɛ̃̀ kɛ̀a ie yurɔ́ lɛ tũnù ɛ́ tĩ, kɛ̀a ie miyiɛ́ lɛ bòo tĩ Dɔfĩn, lɛ ɛ́ Hɔ́ ɛ́ tɛ̀ bòo. 19Ɛ́ ké Dɔfĩn lɛ te hɔ yírɛ́ bɔ̀kuì ɛ́ dàa ɛ́ lɛ́ hɔ́ bòo lɛ ɛ́ yèrɛ miɛ ǹ míkùi, mì ńcɛɓánlɔ́ àá Yiezu Kirisa bòo hũn. 20Nɛ hɔ ɓàarɔ́ bòo ɛ̀ sĩ̀ kìe Yàá Dɔfĩn pɛ̃̀hṹ lɛ ɛ́ yá vé hũn, Amiina.
Víeníkɛlán tìɛníkɛrɔ́
21Mì tìɛníkɛ ɓɛ nìɛ lɛ bòo sɛ̃̀ Dɔfĩn ɓɛ́kùi peɓɛ̀ ńcɛɓánlɔ́ àá Yiezu Kirisa bòo hũn. Ɓɛ̀ kìe zɛ̀ɓɛ̀ lɛ ɛ́ wi ɓánlɔ̀n àá mi ɛ́ mì tìɛníkɛnin. 22Ɓɛ̀ ńdɛsĩ̀rìe lɛ ɛ́ wi hũ̀nún ɓɛ́kùi ɛ́ mì tìɛníkɛnin, ɛ̀ ɓɛ̀pe lɛ ɛ́ tɛ́ á Rɔmu bɛ́zu-bɛhɔ́ dànkɔ̀ hũn ɛ́ hɛ̀ wóokɛa ɛ́ mì tìɛníkɛnin cɛ̃̀un.
23Nɛ Ɲunsɔ Yiezu Kirisa hiì ɛ̀ kań àá miɛ mìkùi.
Currently Selected:
Filiipu Siè 4: bwj
Highlight
Copy
Compare
Share
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation
