Filiipu Siè 3

Hɔ̀ bòo lɛ ɛ́ cã̀aní àá bɔ̀bín Dɔfĩn viì bòo

1Ɛ́ kɛ̀a sáalɛ kiè zɛ̀ɓɛ̀, ɛ́ mí wo wɛní míte mì ńcɛɓánlɔ́ àá ɔ́ Ɲunsɔ bòo hũn. Hɔ̀ yí bòo lɛ lɔ̀nbiè wi npe niǹ viì ɛ̀ ǹ bĩní tĩ̀iní hɔ́pe bòo lɛ ɛ́ ń bie khieniɛ ɛ̀ lɛ́ miɛ ǹ wɛ̀. Ɛ̀ mìpe mì viì, ɛ́ hɔ́ lò lɛ ɛ́ sĩiní miɛ. 2Mì pɛ mite bòo àá ɓɛ́pe nìɛ lɛ ɛ́ wóò wé hɔ́ bòo lɛ yí sãa. Ɓɛ̀pe bɔhĩ́ sɔ ɛ́ den wóò wé hɔ́ fũ̀arɔ́ lɛ wóò wé hɔ́ tɛ̀kɛ̀a hũn mí dòonún ɛ̀ ɓɛ̀ bè bòo ɛ̀ hièní. 3Hɔ̀pe fũ̀arɔ́ hɛ̀lɛ̀lɛ̀ ɛ́ den iè kèpe viì ɛ́ hɔ́ wi, iè hɔ̀ lɛ ɛ́ Dɔfĩn Mɛkɛ̃ni ɛ́ te hɔ pànkɛ́ wóò lɛ́ kiè ǹ ɛ̀ kè dàá ɓàaní hɔ̀pe Dɔfĩn. Ɛ́ kéte ɓàanílán bòo ɛ́ wo iè Yiezu Kirisa, ɛ́ ké wo yáà bè kè tĩɛ̀ ɓɛ̀ nìnbirìe làndɛ́a lɔ̀n wɛ̀. 4Hɔ́rɔsí kɛ́ ń lò den hṹn dɛ̀ niǹ tĩì ɛ́ bè ɓɛ̀pe nìnbirìe làndɛ́a lɔ̀n. Kɛ́ nìnbírɔ dɔ̀ ɛ́ lieníkɛ à nɛ bɔ̀tĩɛ̀ ɛ́ wi mípe viì ɛ̀ mí bè mí tĩì ɓɛ̀ nìnbirìe làndɛ́a lɔ̀n, ɛ̀ ǹpe ɛ́ dàa bɔ̀tĩɛ̀ pɔ́ ɓàasɔ. 5Hɔ̀ lɛ ɛ́ ń tɔn, ɛ́ pehɔ̀ wihĩ́ hùutĩlán zɔn ɛ́ ɓɛ́ fɛ̃̀ mi. Ń iè Yizarayɛɛle nùún, Bɛ̃nzamɛn zũnù nùún dɔ̀. Kiè zĩnkĩ́nɓɛ̀ iè Hebereɓɛ, ɛ́ n wo iè Hebere. Ɛ̀ ǹ lò hàarí iè Fariziɛ̃ lɛ ɛ́ ɔ̀ Moyiize làndɛ́ ɛ̀ mɛ̀ndɛ̃ àá mí híɛhɔ́. 6Ń den hɛ̀ hàarí bɔ̀ hɔ̀pe làndɛ́ bòo hièniɛ cɛ̃̀un fúu ɛ́ ń dàa hàarí ɛ́ hɔ̀ Dɔfĩn zũnù nìɛ ɲɛkɛ̃̀a ɛ̀ vɛ́. Ɛ̀ hɔ̀ lò ɓen iè pe cã̀anírɔ́ lɛ ɛ́ hɔ́pe làndɛ́ ɛ́ bie bòo, ɛ̀ ńwékhemù ɛ́ lò hàarí yá mi mi ǹ wɛ̀. 7Ń den hàarí ɛ́ hɔ̀pe bòo sɔ sí ɛ̀ líi àá bòo lɛ ɛ́ tũnù wi niǹ viì cɛ̃̀un. Kɛ́ zoòni ɛ́ ń ɓen ɛ́ hɔ̀ húi, ɛ̀ hɔ̀ iè ńtèmín niǹ viì à Kirisa bòo hũn. 8Ń den ɛ́ hɔ̀ bòo míkùi ɛ̀ líi àá ńtèmín iè hɔ̀ lɛ ɛ́ ń ɓen dũ ke Ɲunsɔ Yiezu Kirisa ɛ̀ hɔ̀ bòo ɛ́ tṹ bòo míkùi. Ɛ́ hɔ́ iè piè bòo hũn ɛ́ ń dàa pɛ̃́ hɔ́ bòo míkùi. Ń den wóo líi hɔ́pe sí míkùi àá bɔ̀cã̀ahɛ̃ bòo lɛ ɛ́ wé ɛ́ ǹ den yí-é Kirisa, 9ɛ̀ ǹ cɛ dìń ɔ̀ ǹ ɛ̀ sãàní. Ɛ́ ń wo yá bĩní bie nɛ nín cã̀aní Dɔfĩn híɛhɔ́ iè hɔ̀ lɛ ɛ́ nín hɔ̀ làndɛ́ ɛ̀ mɛ̀ndɛ̃ wɛ̀. Kɛ́ hɔ́ den iè hɔ̀ lɛ ɛ́ ń dũmuasɛ̃̀ à Kirisa ǹ ɛ́ ń dàa ɛ́ cã̀aní. Dɔfĩn ɛ́ te nin wɔ́ àá nìcã̀anírɔ iè hɔ̀ lɛ ɛ́ ń dũmuasɛ̃̀ Hɔ̀ ǹ. 10Ɛ́ hɔ́ bòo lɛ ɛ́ nín cɛ̀ ɛ́ pɔ bòo míkùi ɛ́ iè bòo ɛ́ ń nɛ ń dũń ɔ́ Kirisa, ɛ̀ ǹ lò dũń hɔ́pe pànkɛ́ lɛ ti-e ɛ́ vìeniɛ ɛ́ líeniɛ hɔ̀ húmú hũn, ɛ̀ ǹ tɛ̀ nɛ niǹ lɔ̀n ɛ̀ be kɛ̀a ɔpe, ɛ̀ ǹ lò hí kɛ̀a ɔ̀pe. 11Bòo lɛ ɛ́ wé ɛ̀ ǹ dàa tĩì bènlén nɛ Dɔfĩn ɛ́ ɓiɛ̀ ɓén vìení mi ɛ́ líení hɔ́ húmú hũn.

Mì cã̀aní zè kã́a hɔ́ bòo lɛ ɛ́ mí ɛ́ cɛ̀

12Hɔ̀ yí bòo ɛ́ ń zĩ̀níkɛa van dɛ̃un hɔ̀pe bòo lɛ ɛ́ nín zè kã́a wɛ̀. Ɛ̀ hɔ̀ lò yí bòo ɛ́ ń zĩ̀níkɛa van dɛ̃un pehɔ̀ ɲunù tínlén wɛ̀. Kɛ́ ń den ɛ́ pan niǹ híɛhɔ́ ɛ́ zè cɔ́, bòo lɛ ɛ́ wé ɛ̀ ǹ vɛ yí hɔ́pe bòo sɔ ɛ̀ sìí zɛ̃nkɛnin míkùi kɛ̀a bòo lɛ ápe Yiezu Kirisa ɛ́ dàa ɓiɛ̀ sìe mi ɛ́ zɛ̃nkɛanin míkùi. 13Kìe zɛ̀ɓɛ̀, hɔ̀ yí bòo ɛ́ ń nɛ ń zĩ̀níkɛa yú hɔ́pe bòo sɔ míkùi vɔ́ wɛ̀. Kɛ́ bɔ̀cóoní dɔ̀ iè pe ɛ́ ń den ɛ́ wé: hɔ̀ bòo lɛ ɛ́ wi àá niǹ máahṹ míkùi ɛ́ niǹ hũn ɛ́ ɓɔ́ nin, ɛ̀ ǹ can niǹ kuò ɛ́ zè cɔ́ ɛ́ nin vɛ dɛ̃ hɔpe lɛ ɛ́ wi àá niǹ híɛhɔ́. 14Ɛ́ ń wo ɛ́ zè cɔ́ ɛ́ kã́a hɔ̀pe bòo lɛ ɛ́ ń mɔ̀ niǹ yiì ɛ́ fɛ́ nin, bòo lɛ ɛ́ wé ɛ̀ ǹ vɛ yí hɔ́ sàanín lɛ ɛ́ Dɔfĩn ɛ́ vɔn kìe nɛ ke ɓen yí hɔ́ hóohũn kè ń cɛɓánlɔ́ àá Yiezu Kirisa bòo hũn.

15Ɛ́ képe lɛ kè kùi lɛ iè ɓɛ̀ nìɛ lɛ ɛ́ dɛ̃un hɔ̀ ńdɛsĩ̀nlɔ́ hũn, mì nɛ ke lɛ́ nɛ lepe nùnlé dìcóoní sɔ sí ɛ̀ temu kań ké hũn. Ɛ́ kɛ́ mí nùnlé ɛ́ wi mí dòonún bòo dɔ̀ hũn, ɛ́ Dɔfĩn ɛ́ zɛ̃́ní hɔ́ ɛ́ ciení ɛ́ lɛ́ miɛ ǹ. 16Ɛ̀ hɔ̀ yɛ̀rɛ́ dìń kɛwiɛ, ɛ̀ lèpe viì lɛ ɛ́ ké van dɛ̃un kɛ̀a níkɛàni, ɛ́ mí lɛ́ nɛ ke páaní bèɓán ɛ̀ dàá vɛ àá híɛhɔ́.

17Kìe zɛ̀ɓɛ̀, mìpe mìkùi ɛ̀ ken niǹ bɔ̀werà ǹ. Ɛ̀ ɓɛ̀ nìnbirìe lɛ wóò dàá ɓɛ́te kɛ̀a bòo lɛ ɛ́ mí mɔn kɛ́ képe ɛ́ dàa dàa kète iè pe ɛ́ mí wóò húi viì. 18Nìnbirìe bìkuì ɛ́ den wóò dàá ɓɛ́te kɛ̀a ie Kirisa lɛ húrun lè ɓáalén dãanù lɔ̀n ɓà ńbíyanliè. Ń hṹn wóò wé ɛ̀ ǹ bie hɔ ɛ̀ lɛ́ miɛ ǹ, ɛ́ kɛ̀a sáalɛ ɛ́ ń den bĩniɛ ɛ́ hɔ̀ bie ɛ̀ lɛ́ miɛ ǹ kɛ́ niǹ yìncuò ɛ́ síɛ. 19Ɛ́ ɓàasiè ɛ́ iè peɓɛ̀ yaalén ɛ́ ɓɛ́ ɛ́ zè kã́a iè hɔ̀ lɛ ɛ́ peɓɛ̀ vùkùo ɛ́ temu iè peɓɛ̀ dɔfĩn. Hɔ̀ bòo lɛ ɛ́ hṹn sãawi ɛ̀ hɔ̀ wé lùwiè bòo peɓɛ̀ viì ɛ́ temu wóò wé peɓɛ̀ te ɓàanílán bòo, ɛ̀ hɔ̀ bòo lɛ ɛ́ wi peɓɛ̀ tĩɛ̀ hũn mí dòonún ɛ́ iè lèpe dímíɲɛ́ lɛ bòo. 20Kɛ́ hɔ̀ ɓen kɛ́ képe, ɛ̀ kiè lóo ɛ́ yòó van wi àá hóohũn, ɛ́ ké wo ɛ́ kè fuenírɔ lɛ ɛ́ mii yòó vɛ lé yán ɛ̀ ɓen síɛ ɛ̀ hìé, àpe lɛ iè kè Ɲunsɔ Yiezu Kirisa. 21Á ɓén zɛ̀ní ké tɛkɛ̀a lɛ cũ̀kṹ mí ɛ́ hɔ́ ɛ́ léɓán àá piè kùrú tɛkɛ̀a lɛ ɛ́ hɔ́ pànkɛ́ àá hɔ́ ɓàarɔ́ ɛ́ wi nin. À ɓén wé hɔ́ àá mí pànkɛ́ lɛ ɛ́ wóò lɛ́ ɛ̀ hɔ̀ bòo míkùi ɛ̀ dàá ɲí piè bòo.

Currently Selected:

Filiipu Siè 3: bwj

Highlight

Copy

Compare