Hebereɓɛ 9

Lè wṹn lɛ ɛ́ Dɔfĩn ɛ̀ ɓàanínin àá bɔ̀bín bòo

1Lè hán ɲɛbíi ɛ́ hɔ́ làndɛ́a dɔ̀ ɛ́ hàarí wi hũn, hɔ̀pe lɛ ɛ́ ɓɛ́ nìnbirìe hàarí sãawi ɛ̀ ɓɛ̀ wóò vɛ bènin ɛ̀ dàá ɓàaní Dɔfĩn. Ɛ̀ lè dáanú dɔ̀ ɛ́ lò hàarí wi yán lɛ ɓɛ́ nìnbirìe ɛ́ te wɔ́ ɛ́ wóò zɔ ɓàaní hɔ́pe Dɔfĩn hũn. 2Ɛ́ lépe dáanú sɔ ɛ́ hàarí iè lè pɔnkɔ̀-zũnù lɛ ɓɛ́ hàarí tɔn ɛ́ zɔn cénkɛa tĩ́ihṹ àá fú-bɛhɔ́ ɛ́ wɔ́ àá vuò bɔ̀nbɔ̀ ɲu. Lè hán viì ɛ́ ɓɛ́ wóò ve nɛ viì lɛ ɛ́ ce. Hɔ̀ iè yán ɛ́ hɔ́ pɛ̃̀ntĩ́hĩ́ àá lé dúekéré lɛ ɛ́ ɓɛ́ wóò bìsí hɔ́ búrú lɔ̀n ɛ́ lɛ́ Dɔfĩn ɛ́ zɔn wi hũn. 3Ɛ̀ lè fú-bɛhɔ́ máahṹ ɛ́ iè lè ńɲuunín viì. Sí iè lè viì lɛ ɛ́ ɓɛ́ wóo ve nɛ viì lɛ ɛ́ ce cɛ̃̀un. 4Hɔ̀ iè yán ɛ́ lé miyiɛ́ lènlén dúekéré lɛ ɛ́ wɔ́ àá sɛ̃́ní, lèpe lɛ ɛ́ ɓɛ́ wóò cĩ̀ní hɔ́ bòo dɔ̀ lɛ tũnù tĩ lɔ̀n, ɛ̀ khíi páa lé Dɔfĩn ɲɛbíi wiè lɛ fɛ̃́ àá sɛ̃́ní míkùi ɛ́ zɔn wi hũn. Ɛ̀ lè sɛ̃́ní ɓùe lɛ hɔ́ maanɛ ɛ́ wi hũn àá ɔ́ Aarɔn lànlè lɛ hàarí sɛ̀ hɔ̀ ńmuunín àá hɔ̀ sɛ̃̀nlɛ̀a lɛ ɛ́ tan lɛ ɛ́ lépe Dɔfĩn ɲɛbíi biehĩ́ ɛ́ wɛ̃́ wi lɔ̀n ɛ́ hàarí zɔn wi lepe wiè sɔ hũn. 5Ɛ́ lépe wiè sɔ ɲún hũn, ɛ́ ɓɛ́ mɛlɛkɛɓɛ dɔ̀ lɛ ɛ́ ɓɛ́ mɛ́ lɛ hɔ̀ Dɔfĩn ɓàarɔ́ ɛ̀ zɛ̃́ní ɛ́ yóò wi nin. Peɓɛ̀ ńmáa ɛ́ hàarí híɛ lè viì lɛ ɛ́ ɓɛ́ wóò zɔ kóo hɔ́ cãani hũn ɛ̀ Dɔfĩn dàá dé sɛ́wɛ́rí ɛ̀ lɛ́ ɓɛ́ nìnbirìe ǹ peɓɛ̀ bɔ̀koohɛ̃ bòo hũn. Kɛ́ ń den ɲɛùn yá cɛ̀ ɛ̀ ǹ munkɛ hɔ́pe sí àá mí bɔ̀cíini míkùi wɛ̀.

6Ɛ́ hɔ́ bòo míkùi ɛ́ wo hàarí bɔ̀kɛsí kɛ̀a hɔpe sí. Ɛ́ ɓɛ́ khɛ̃́ndàariè ɛ́ wo hàarí wóò zɔ le hán zũ-híɛhɔ́ hũn àá sítĩnlɔ́, ɛ̀ zɔ tɛ́ ɓɛ́ tɔnlɔ́ yán. 7Kɛ́ lé ńɲuunín zũ-híɛhɔ́ á khɛ̃́ndàarɔ wì-bɛhɔ́ mí dòonún ɛ́ temu wóo vɛ zɔ hũn sí-cóonín lɔ́lɔ́-kùi hũn. À yí dɛ̀ yán ɛ́ yá zɔ kɛ́ á yí dàá wìlaàsɔ cãani wɛ̀. À wóò dàá ɔ́ wìlaàsɔ cãani ɛ̀ vɛ zɔ lɛ́ Dɔfĩn mí kùrú bɔ̀koohɛ̃ bòo hũn àá ɓá dàa nìɛ bɔ̀koohɛ̃ bòo hũn. 8Ɛ́ lé Mɛkɛ̃n-Sãanu iè pe wo ɛ́ zɛ̃́ní kɛ̀amu kɛ́ lépe viì lɛ ɛ́ ce cɛ̃̀un zɔnlén wṹn ɛ́ ɲɛ̀un yí hán, lɛ kɛ́ lépe hán pɔnkɔ̀-zunù ɛ́ dàa pɛ́wi ɓen wi yán. 9Ɛ́ hɔ́pe sí ɛ́ iè bòo lɛ ɛ́ hɔ̀pe zoòni lɛ bòo ɛ̀ zɛ̃́ní. Hɔ̀ iè bòo lɛ ɛ́ zɛ̃́ní kɛ́ hɔ́ hɛ̃mù bòo àá ɓɛ́ bìlaàsiè lɛ ɓɛ́ nìnbirìe ɛ́ wóo wé àá miyiɛ́ ɛ̀ lɛ́ Dɔfĩn ɛ́ yí dɛ̀ yá lɛ́ ápe nìnbírɔ lɛ ɛ́ wóò ɓàaní Dɔfĩn kɛ̀a hɔpe sí ɛ́ yí hũn nùnlé lɛ ɲunù tú wɛ̀. 10Hɔ̀ iè hɔ̀ díe àá hɔ́ bɔ̀ɲuriè àá hɔ́ te tiɛrɔ wṹuhɛ̃ cɛ̀rìɛɛ mí dòonún ɛ́ ń nɛ̀ hũ̀nún. Hɔ̀ iè hɔ̀ sṹsùnù lɔ̀n bòo lɛ ɛ́ hṹn te mí yìe fúu ɛ́ van dɛ̃un lè pɛ̃̀hṹ lɛ ɛ́ Dɔfĩn dàa zɛ̀niɛ hɔ̀ bòo míkùi ɛ́ wookɛa wɔ́.

11Kɛ́ á Kirisa ɛ́ pe ɓɛrɛ wɔ́ á khɛ̃́ndàarɔ wì-bɛhɔ́ lɛ te hɔ zoòni bɔ̀tente lɛ ɛ́ dàa ɓɛrɛ lɛ́ kiè ǹ. Lè viì lɛ á mí tɔnlɔ́ ɛ̀ tɛ́ hũn ɛ́ ɲún wi cɛ̃̀un, ɛ̀ lè lò sãa ɛ́ pɔ lè hàarí pɔnkɔ̀-zũnù. Lè viì sɔ ɛ́ ɓɛ́ nìnbirìe ɛ́ yí teń yí te, ɛ̀ lè lò bòo ɛ́ yí sĩ̀ lèpe dímíɲɛ́ sɔ lɛ ǹ wɛ̀. 12Ápe Kirisa ɛ́ yòó zɔn lèpe viì lɛ ɛ́ ce cɛ̃un hũn sí-cóoní ɛ́ hɔ́ wo vɔ́. Ɓɛ̀ yí ńɓɔ́nkɛ́a tàá nɛ̀bɛ́-zàani cãani á dàa ɛ́ dàa van zɔn lèpe viì sɔ hũn, kɛ́ hɔ́ iè piè kùrú cãani á zɔn lɛ́ ɛ́ dàa lerɛ kè ɲún, ɛ́ ké wo yú kéte pɛ̃̀hṹ lɛ yá vé hũn. 13Kɛ́ ɓɛ́ ńɓɔ́nkɛ́a àá ɓɛ́ nɛ̀báaɓɛ́ cãani àá ɔ́ nɛ̀zṹnlé lɛ ɛ́ ɓɛ́ cĩ̀niɛ sãani ɛ́ ɓɛ́ ɓen wóo kóo ɓɛ́ nìnbirìe lɛ wɔ́ khɔn lɔ̀n ɛ̀ peɓɛ̀ bɔ̀lìɛhɛ̃ ɛ̀ dàá tiɛ lé peɓɛ̀ lɔ̀n ɛ̀ ɓáaníɓán àá hɔ́pe peɓɛ̀ làndɛ́, 14hɔ́rɔsí, àpe Kirisa cãani ɛ́ pe lò wookɛa pànkɛ́ wi cɛ̃̀un! Lè Mɛkɛ̃n-Sãanu lɛ wi yán fúu ɛ́ lɛ́ ápe Kirisa ɛ́ wɔ́ míte àá miyiɛ́ lɛ ɲunù tú ɛ́ lɛ́ Dɔfĩn. Ɛ́ piè cãani ɛ́ ɓén tiɛ kie ɛ́ lé ké bɔ̀koohɛ̃ lɛ wóò vɛ́ kie ɛ̀ dàá vɛ hɔ húmú hũn, ɛ̀ kè hũn nùnlé ɛ̀ wo ce, ɛ̀ ké wo dàń lé mɛkɛ̃nì ɓàasɔ Dɔfĩn tɔnlɔ́ ɛ́ tɛ́.

15Ɛ́ sí iè hɔ̀pe á Kirisa ɛ́ dàa iè ɔ̀ yankɛrɔ Dɔfĩn àá ɓɛ́ nìnbirìe tĩ́ihṹ lèpe ɲɛbíi dɛ̀fĩì lɛ hɔ́pe Dɔfĩn ɛ́ dú àá ɓɛ́ hũn, bòo lɛ ɛ́ wé ɛ̀ ɓɛ̀ nìnbirìe lɛ ɛ́ hɔ́pe Dɔfĩn ɛ́ vɔn ɛ̀ dàá yí hɔ́ bɔ̀sãanù lɛ yá vé, hɔ̀pe lɛ ɛ́ hɔ́pe Dɔfĩn ɛ́ hàarí lɛ́ mí ɲunù nɛ mí ɓén lɛ́ mí nìɛ ǹ. Ɛ́ ɓɛ́ dɛ̀ hɔ̀ ɛ́ yí iè hɔ̀ lɛ á Kirisa ɛ́ húrun ɛ́ dàa yɛ̀ ɓɛ̀ nìnbirìe ɲún, ɛ́ lerɛ ɓɛ̀ lɔ́ hɔ́ bɔ̀koohɛ̃ lɛ ɛ́ ɓɛ́ hṹn wé hũn, pɛ̃̀hṹ lɛ ɛ́ ɓɛ́ dàa hṹn wi lèpe ɲɛbíi dɛ̀kĩ́i hũn.

16Kɛ́ nìnbírɔ ɛ́ wɛ̃́ bòo lɛ ɛ́ mí yírɛ́ dàa sãawi ɛ̀ hɔ̀ sankɛ lɛ kɛ́ mí ɓen van húrun, ɛ́ pɛ̃̀hṹ lɛ kɛ́ á van húrun ɛ́ ɓɛ́ nìnbirìe dũnɛ, ɛ́ piè yírɛ́ sɔ ɛ́ den wo dɛ̀ ɛ́ sankɛ kɛ̀a bòo lɛ á dàa wɛ̃́ hɔ́. 17Kɛ́ ɓàasɔ ɛ́ ɓen ɲɛùn yí hí, ɛ̀ lèpe piè yírɛ́ sankɛrɔ́ vɛ̃hṹ sɔ ɛ́ yí dɛ̀ bòo dɔ̀ ɛ́ yá wé wɛ̀. Kɛ́ pɛ̃̀hṹ lɛ kɛ́ á den van húrun vɔ́, ɛ́ lépe vɛ̃hṹ sɔ ɛ́ den wóò ɛ́ tɛ́ mí tɔnlɔ́. 18Ɛ́ sí iè hɔ̀pe ɛ́ pɛ̃̀hṹ lɛ ɛ́ Dɔfĩn dàa hàarí dú lé hán ɲɛbíi àá ɓɛ́ nìnbirìe, ɛ́ cãani ɛ́ ɓiɛ̀ hàarí kóosí vɔ́ ɛ́ lépe hán ɲɛbíi sɔ ɛ́ dàa ɓɛ́ mí tɔnlɔ́ tánlɔ fìi. 19À Moyiize ɛ́ hàarí buie hɔ̀ bòo lɛ ɛ́ Dɔfĩn nɛ ɓɛ nìnbirìe ɛ́ fɔ́ɓán ɛ̀ ɓɛ̀ wé míkùi ɛ́ lɛ́ ɓɛ́pe nìzã̀amáa ɓɛ́kùi ǹ, kɛ̀a bòo lɛ ɛ́ hɔ́ làndɛ́ ɛ́ dàa khɛ́ hɔ́, à khie ɛ́ mɔ̀ ɓɛ̀ nɛ̀bɛ́-zàani àá ɓɛ́ ńɓɔ́nkɛ́a cãani ɛ́ kánkɛa àá hɔ́ ɲumu, à khie mɔ lè lànlè dɔ̀ lɛ ɛ́ lɔ́ lé vɛ̃̀n-cíi dɔ̀ lɛ ɛ́ ɓɛ́ wóò ve nɛ Yizɔɔpe ǹ ɛ́ yòó can hɔ̀ ńpíɛ dũini bɔ̀miɛ̀ dɔ̀ lè ǹ, à siɛ dũ̀nɛ lè hɔ̀ cãani hũn ɛ́ yòó hɔ̀rɛ koo lè làndɛ́ vɛ̃hṹ lɔ̀n àá ɓɛ́ nìzã̀amáa ɓɛ́kùi lɔ̀n. 20À zɔn bie nɛ làa: «Lɛ iè hɔ̀ cãani lɛ ɛ́ lè ɲɛbíi lɛ ɛ́ Dɔfĩn dú àá miɛ bòo ɛ̀ zɛ̃́ní, ɛ́ mí wóo mɛ̀ndɛ̃ le.» 21À Moyiize ɛ́ bĩniɛ khíe hɔ̀nkɛa hɔ̀ cãani ɛ́ koo lè pɔnkɔ̀-zũnù lɔ̀n àá hɔ́ tĩ̀ɛ lɛ ɛ́ zɔn wi le hũn míkùi lɔ̀n, hɔ̀pe lɛ ɛ́ ɓɛ́ wóò dàa ɓàaní Dɔfĩn. 22Hɔ̀ làndɛ́ wṹn lɔ̀n, ɛ́ hɔ́ tan iè hɔ̀ bòo míkùi ɛ́ hɔ́ cãani ɛ́ te wóò tiɛ, ɛ̀ cãani ɛ́ ɓen yí koosí ɛ̀ bɔ̀koohɛ̃ sɛ́wɛ́rí ɛ́ yì dɛ̀ yá dé wɛ̀.

Kirisa cãani ɛ́ wóò tiɛ ɓɛ nìnbirìe bɔ̀koohɛ̃

23Kɛ́ hɔ́ bòo lɛ ɛ́ iè hɔ̀ hóohũn bòo ɛ́ hɔ́ zɛ̃́ní ɛ́ ɓen sãawi ɛ́ hɔ̀ wóò tiɛ kɛ̀amu ɛ̀ hɔ̀ dàá ce, ɛ̀ hɔ̀pe hóohũn bòo kùusɔ ɛ́ den mɛ̀kóo wi hɔ miyiɛ́ lɛ ɛ́ ɓàń pɔ́ hɔpe sí. 24Iè hɔ̀ lɛ ɛ́ lépe viì lɛ ɛ́ ce cɛ̃̀un lɛ á Kirisa ɛ́ van zɔn hũn ɛ́ yí dìɛ lɛ ɛ́ nìnbirìe ɛ́ te tɔn wɛ̀; ɓɛ̀ nìnbirìe dìɛ lɛ ɛ́ ɓɛ́ ɛ́ tɔn ɛ́ den iè pe lè ńdínlɔ́. Kɛ́ á yòó van zɔn hɔ̀ hóohũn ɛ́ kɛ̀a sáalɛ á wi Dɔfĩn híɛhɔ́ ɛ́ Hɔ̀ hɛ̃nnin kè bòo hũn. 25Hɔ̀ yí bòo ápe Kirisa ɛ́ mii lɛ́ míte ɛ̀ wé àá miyiɛ́ yìe cɛ̀rìɛɛ kɛ̀a bòo lɛ á khɛ̃́ndàarɔ wì-bɛhɔ́ dàa wóò vɛ zɔ le pɔ̀nkɔ̀-zunù viì lɛ ɛ́ ce cɛ̃̀un hũn àá lɔ́líe àá hɔ́ cãani lɛ yí piè kùrú cãani wɛ̀. 26Kɛ́ dàa bòo mí, á lɔ̀n ɛ́ hṹn ɓén be yìe cɛ̀rìɛɛ àá bòo lɛ ɛ́ lé dímíɲɛ́ ɛ́ dàa mɛ́. Kɛ́ kɛ̀a sáalɛ, hɔ̀pe mɛ́n wihĩ́ lɛ hũn, á Kirisa ɛ́ ɓɛrɛ sí-cóoní ɛ́ hɔ́ wo vɔ́. Ɛ́ kɛ̀amu, á wo lɛ́ míte ɛ́ ɓɛ́ wɔ́ àá miyiɛ́ ɛ́ dàa ɓɔ́ hɔ́ bɔ̀koohɔ́ ɲún. 27Hɔ́rɔn nìnbírɔ ɛ́ wóò hí sí-cóoní kɛ́ pehɔ̀ máahṹ ɛ̀ Dɔfĩn den vɛ lè piè lìe. 28Ɛ́ sí ɓiɛ̀ iè hɔ̀pe á Kirisa ɛ́ dàa lɛ́ míte sí-cóoní ɛ́ dàa ɛ́ lerɛ ɓɛ̀ nìnbirìe bìkuì bɔ̀koohɛ̃ ɛ́ lɔ́ peɓɛ̀ lɔ̀n. Á mii bĩní khũ̀á ɓen kɛ̀a yìe hɛ̃̀ ɲulán, kɛ́ hɔ́ yí ɓɛ́ nìnbirìe bɔ̀koohɛ̃ á mii ɓen leń, kɛ́ ɓɛ́ iè ɓɛ̀lɛ ɛ́ piè ɓenlɔ́ ɛ̀ hìé á mii ɓen fuenínin.

Currently Selected:

Hebereɓɛ 9: bwj

Highlight

Copy

Compare