Hebereɓɛ 8

Yiezu temu iè Dɔfĩn ɲɛbíi dɛ̀fĩì khɛ̃́ndàarɔ wì-bɛhɔ́

1Ɛ́ hɔ́pe bòo lɛ ɛ́ bòo hie pɔ hɔpe sí ɛ́ ké khɛ́ khieniɛ míkùi ɛ́ iè hɔ̀ lɛ: Ké den dàa khɛ̃́ndàarɔ wì-bɛhɔ́ lɛ ɛ́ hɛ̀ ɓàań cɛ̃̀un. Àpe lɛ yòó van kɛsí hɔ́ hóohũn, hɔ̀pe Dɔfĩn lɛ iè hɔ̀ pànkɛ́ míkùi ɓàasɔ bɛ́záanú wànlè ńdóonín. 2Á ɛ́ mí khɛ̃́ndàarɔ yáamu tɔnlɔ́ ɛ̀ tɛ́ lé viì lɛ ɛ́ ce cɛ̃̀un hũn, lɛ temu iè pe Dɔfĩn zũnù àá bɔ̀bín; lèpe lɛ ɛ́ Dɔfĩn te tɔn kɛ́ ɓɛ́ yí ɓɛ́ nìnbirìe wɛ̀.

3Ɛ́ hɔ́rɔń khɛ̃́ndàarɔ wì-bɛhɔ́ ɛ́ ɓɛ́ bɔ̀sí á te hɔ̀ hɛ̃mù bòo àá hɔ́ miyiɛ́ ɛ́ wóò lɛ́ hɔ́ Dɔfĩn. Ɛ́ hɔ́ te mí yìe àpe kè khɛ̃́ndàarɔ wì-bɛhɔ́ ɛ̀ ɓiɛ̀ dàá bòo dɔ̀ lɛ á mii lɛ́ hɔ́pe Dɔfĩn. 4Kɛ́ á hṹn wi le sṹsùnù lɔ̀n, á yɛ̀rɛ́ hṹn yá wé khɛ̃́ndàarɔ, iè hɔ̀ lɛ ɛ́ ɓɛ́ khɛ̃́ndàariè dɔ̀ ɛ́ wi yán ɛ́ te hɔ hɛ̃mù bòo ɛ́ wóò lɛ́ Dɔfĩn kɛ̀a bòo lɛ á Moyiize làndɛ́ ɛ́ dàa ɛ́ khɛ́ hɔ. 5Ɛ́ ɓɛ́pe khɛ̃́ndàariè sɔ tɔnlɔ́ lɛ ɛ́ ɓɛ́ ɛ́ tɛ́ ɛ́ den iè hɔ̀pe bòo lɛ ɛ́ wé hɔ́ hóohũn pehɔ̀ ńdídínlɔ́. Ɛ́ hɔ́pe sí ɛ́ dɛ̃̀ kɛ̀a bòo lɛ á Moyiize ɛ́ dàa hàarí mii te le pɔnkɔ̀-zũnù, ɛ́ Dɔfĩn ɛ́ bie ɛ́ lɛ́ à ǹ hìeniɛ ɛ́ nɛ làa: «Tɛ́ kɔ́ ɲɛkɛ̃à sãàní, vɛ te le kɛ̀a bòo lɛ ɛ́ ń dàa zɛ̃́niɛ lè ɛ́ lɛ́ kɔ̀ ǹ lè ɓúkiè lɔ̀n.» 6Kɛ́ kɛ̀a sáalɛ ɛ́ hɔ́ tɔnlɔ́ lɛ ɛ́ Dɔfĩn ɛ́ dɔ́ Yiezu núnún hũn ɛ́ den pɔ́ ɓɛ́pe khɛ̃́ndàariè sí kɛ́ tɔnlɔ́ cɛ̃̀un. Àpe ɛ́ temu iè ɔ́pe yankɛrɔ lɛ wi Dɔfin àá ɓɛ́ nìnbirìe tĩ́ihṹ, ɛ́ dàa lɛ́ ɛ́ lé ɲɛbíi lɛ ɛ́ Dɔfĩn ɛ́ dú àá ɓɛ́ ɛ́ dàa pɔ le hán dìɛ, ɛ̀ lè fìi ɛ́ ɲɛ̀ hɔ̀ bòo lɛ ɛ́ Dɔfĩn ɛ́ lɛ́ ɲunù hũn, lɛ lò ɓiɛ̀ sãa pɔ hɔpe hán bòo.

7Kɛ́ lépe hán ɲɛbíi lɛ ɛ́ Dɔfĩn hàarí dú àá ɓɛ́ nìnbirìe ɛ́ hṹn ɲunù tú, nɛ Hɔ̀ hṹn yá ɓén leń lé ɛ́ lé yán ɛ̀ Hɔ̀ ɛ́ zɔ́ dé dɛ̀ɓuɛ̀ dɔ̀ wɛ̀. 8Kɛ́ Dɔfĩn ɛ́ den iè wìe ɛ́ mí nìɛ ɛ̀ wũ̀aní nɛ ɓɛ wɔ́ khɔn pɛ̃̀hṹ lɛ ɛ́ Hɔ́ dàa bie ɛ́ nɛ làa:

«Ǹpe Ɲunsɔ ɛ́ bie nɛ hɔ wihĩ́ dɔ̀ ɛ́ vaá-ɓen,

Lɛ ɛ́ ń ɓén ɛ́ dí ɲɛbíi dɛ̀fĩì

Àá Yizarayɛɛle zũnù nìɛ, àá Zuda zũnù nìɛ.

9 Lè yá ɓén dìń kɛ̀a ie le lɛ ɛ́ ń hàarí dú àá ɓà zĩkĩ́nɓɛ̀,

Pɛ̃̀hṹ lɛ ɛ́ ń dàa hàarí zɛ̃nkɛa ɓà ǹ ɛ́ dàa zɔn lɔ́ hɔ́ Eziputi cɛ̃̀mɛ̀nɛ́ hũn wɛ̀.

Kɛ́ hɔ́ lɛ́ ɛ́ ɓɛ́ den hàarí ɛ́ yí cã̀aní ɓɛ́ ɲún lèpe ɲɛbíi sɔ hũn,

Ɛ́ sí iè hɔ̀pe ɛ́ ńpe ɛ́ ɓiɛ̀ dàa fùɛrɛ̀sí ɓà ǹ. Ǹpe Ɲunsɔ ɛ́ temu ɛ́ bie kɛ̀amu.

10 Kɛ́ lɛ iè lè ɲɛbíi lɛ ɛ́ ń ɓén dí àá ɓɛ́pe Yizarayɛɛle nìɛ hɔ̀pe wihĩ́ sɔ sí khíirɔ́ máahṹ,

Ńpe Ɲunsɔ ɛ́ temu ɛ́ bie kɛ̀amu:

Ń ɓén dé niǹ làndɛ́ peɓɛ̀ nùnlé hũn,

Ń ɓén wĩ́ hɔ́ peɓɛ̀ tĩɛ̀ hũn.

Ń ɓén wé peɓɛ̀ Dɔfĩn,

Ɛ̀ ɓɛ̀pe ɛ́ ɓiɛ̀ ɛ́ wé niǹ nìɛ.

11 Ɛ́ hɛ̀rí nìnbírɔ peɓɛ̀ tĩ́ihṹ,

Ɛ́ yá wóo ɓén bĩní bie nɛ mii kɛ̀rán ɓá ńkɔnù tàá ɓá zuú nɛ a dũń ńpe Ɲunsɔ wɛ̀.

Iè hɔ̀ lɛ ɛ́ ɓɛ́pe ɓɛ́kùi ɛ́ ɓén dũń mi,

Ɓɛ̀pe ɓɛ́kùi ɛ̀ dàá síɛ mìí àá ɓɛ́ zĩncãahɛ̃ ɛ̀ dàá yòó vɛ dɛ̃ ɓɛ nìkĩ́ihɛ̃.

12 Iè hɔ̀ lɛ ɛ́ ń ɓén dé sɛ́wɛ́rí ɛ́ lɛ́ ɓà ǹ peɓɛ̀ ńwékemù bòo hũn,

Ɛ̀ ǹ yá bĩní ɛ́ liení peɓɛ̀ bɔ̀koohɛ̃ bòo ɛ́ yá mi wɛ̀.»

13Ɛ́ Dɔfĩn ɛ́ ɓen ɛ́ ɲɛbíi dɛ̀fĩì bòo ɛ̀ bie, hɔ́rɔsí ɛ̀ Hɔ̀ wɔ́ lépe hàn ɲɛbíi àá dɛ̀kĩ́i lò. Ɛ́ hɔ́ bòo lɛ ɛ́ iè bɔ̀kĩ́ɛ ɛ́ pe kĩ́nɛ, ɛ̀ pehɔ̀ vĩ́nlɔ́ ɛ́ wo dɛ̃un.

Currently Selected:

Hebereɓɛ 8: bwj

Highlight

Copy

Compare