Hebereɓɛ 2

Mì bí nɛ ke zàaníkɛ le fuerɛ̀ lɛ ɛ́ ké yú ǹ wɛ̀

1Ɛ́ sí iè hɔ̀pe ɛ́ ké dàa fɔ́ɓán ɛ̀ kè ɓɛ́ɓɛ́ hɔ́ bòo lɛ ɛ́ ké ɲɛ́ ǹ ɛ̀ sãàní, bòo lɛ ɛ́ wé ɛ̀ kè dàa bí khe le Dɔfĩn wṹn lɛ ɛ́ ké bɔ̀ ǹ wɛ̀. 2Ké dũ kɛ́ lé bienù lɛ ɛ́ ɓɛ́ mɛlɛkɛɓɛ ɛ́ pɛ̃̀hṹ bie lɛ́ kìe zĩkĩ́nɓɛ̀ ǹ ɛ́ pɛ̃̀hṹ tɛ́ mí tɔnlɔ́. Ɛ́ ɓɛ́ nìnbirìe lɛ ɛ́ pɛ̃̀hṹ yí tɛ̀ ɛ̀ ɲí pelè bòo ɛ̀ ɓɛ̀ lò yí tɛ̀ ɛ̀ wé pelè bòo lɛ ɛ́ lé bie ɛ́ pɛ̃̀hṹ yú lé lɔ̀nbiè lɛ ɛ́ fɔ́ɓán àá ɓɛ́. 3Ɛ́ hɔ́ iè ńɓuò ɛ́ wo temu mii lɛ́ ɛ̀ kè ɲún ɛ̀ dàá lé lé lɔ̀nbiè hũn kɛ́ ké yìe ɛ́ dàa ɓen yá lè fuerɛ̀ sɔ sí ɓà ńmàa tí? Àpe Ɲunsɔ míte ǹ ɛ́ temu dú hɔ́ híɛhɔ́ ɛ́ bie lèpe fuerɛ̀ sɔ bòo. Ɛ́ ɓɛ́pe nìnbirìe lɛ ɛ́ ɲɛ́ á Ɲunsɔ bienù ɛ́ temu ɛ́ zɛ̃́niɛ kɛ́ hɔ́ ɛ́ bɔn. 4Ɛ́ Dɔfĩn ɛ́ wɔ́ hɔ́ bɔ̀zɛ̃̀níriè àá hɔ́ yéréké bòo àá hɔ́ bɔ̀bɛ̃hɛ̃ àá mí ɲúuhɛ̃ ɲúuhɛ̃ míkùi ɛ́ dàa dɔ́ pànkɛ́ peɓɛ̀ bienù ǹ, ɛ̀ Hɔ̀ lɛ́ ɛ́ ɓɛ́ yú lé Mɛkɛ̃n-Sãanu hɛ̃mù bòo àá mí ɲúuhɛ̃ ɲúuhɛ̃ kɛ̀a bòo lɛ ɛ́ Hɔ́ wɛ̀.

Yiezu ɛ́ te le fuerɛ ɛ́ dàa ɛ́ dàa ɓɛrɛ

5Ɛ́ ɓɛ́ den yí ɓɛ́ mɛlɛkɛɓɛ ɛ́ Dɔfĩn ɛ́ lɛ́ hɔ́ pànkɛ́ nin lèpe dímíɲɛ́ lɛ ɛ́ vaá-ɓen lɔ̀n, lèpe lɛ ké ɛ́ bòo ɛ̀ bie. 6Kɛ́ lé Dɔfĩn bienù vɛ̃hṹ hũn ɛ́ nìnbírɔ dɔ̀ ɛ́ den bie nɛ làa:

«Dɔfĩn, à nìnbírɔ ɛ́ den iè ńwìe ɛ́ kɔ́ dàa ɛ́ piè bòo ɛ̀ nùún?

À nìnbírɔ yɛ̀nù ɛ́ iè ńwìe ɛ́ kɔ́ dàa ɓɛ́ɓɛ́a ɔ̀ ǹ ɛ́ bòo ɛ̀ húi?

7 Kɔ́ lɛ́ ɛ́ ɓɛ́ mɛlɛkɛɓɛ ɛ́ pɔníɛ ɔ̀ pɛ̃̀hṹ dìkíndíɛ hũn,

Ɛ̀ kɔ́ lɛ́ hɔ́ ɓàarɔ́ bɔ̀bɛhɔ́ àá lé yèrè ɔ̀ ǹ,

8 Kɔ́ lɛ́ ɛ́ hɔ́ bòo míkùi á te ɛ́ dɛ̃̀ lɔ̀n.»

Kɛ́ Dɔfĩn ɛ́ ɓen lɛ́ hɔ́ pànkɛ́ à nìnbírɔ ǹ hɔ̀ bòo míkùi lɔ̀n, ɛ̀ hɔ̀ iè bòo lɛ ɛ́ zɛ̃́ní kɛ́ bòo dɔ̀ lɛ ɛ́ mí-ɛ pe nìnbírɔ́ pànkɛ́ fìi hũn ɛ́ mí wɛ̀. Kɛ́ laà lɛ lɔ̀n ɛ́ ké ɲɛùn yí loo kɛ́ á pe nìnbírɔ̀ ɛ́ dàa pànkɛ́ hɔ̀ bòo míkùi lɔ̀n wɛ̀. 9Kɛ́ lɛ iè hɔ̀ bòo lɛ ɛ́ ké loo: Dɔfĩn ɛ́ lɛ́ ɛ́ ɓɛ́ mɛlɛkɛɓɛ ɛ́ pɔniɛ Yiezu pɛ̃̀hṹ dìkíndíɛ hũn. Ɛ́ hɔ́pe Dɔfĩn àá mí hiì ɛ́ lɛ́ á húrun ɓɛ̀ nìnbirìe ɓɛ́kùi bòo hũn. Ɛ́ kɛ̀a laà lɛ lɔ̀n ɛ́ ké wo loo ɔpe Yiezu kɛ́ á wi mí ɓàarɔ́ bɔ̀bɛhɔ́ àá lé yèrè hũn iè hɔ̀ lɛ á tɛ̀ hɛ̃̀ mí hũn lè lɔ̀nbiè hũn fúu ɛ́ van húrun lɔ̀n. 10Hɔ̀ bɔn kɛ́ Dɔfĩn ɛ́ te hɔ bòo míkùi ɛ́ mɛ́ ɛ̀ hɔ̀ bòo míkùi ɛ́ bòo ɛ́ sɛ̃̀ Hɔ̀ ǹ. Ɛ́ hɔ́ tĩiniɛ hɔ̀pe Dɔfĩn ɛ̀ Yiezu ɛ̀ lɔ̀n be ɛ̀ dàá wé hɔ́ bòo míkùi ɛ̀ tíiní ɲunù, bòo lɛ ɛ́ wé ɛ̀ nìnbí-kuì ɛ́ dàá wé piè nìɛ, ɛ̀ ɓɛ̀ ɓen zɔ piè ɓàarɔ́ hũn, iè hɔ̀ lɛ ɛ́ Yiezu ɛ́ temu iè pe fuerɛ̀ wṹn. 11À iè Yiezu ɛ́ te ɓɛ nìnbirìe wóò tiɛ ɛ̀ ɓɛ̀ dàá ce. Ɛ́ ɓɛ́pe nìnbirìe lɛ á wóò tiɛ ɛ̀ ɓɛ̀ ce àá ɔ́pe ɛ́ páaniɛ lɔ̀ Yàá wi-cóoní ǹ. Ɛ́ sí iè hɔ̀pe ɛ́ Yiezu dàa yáà lùwi à ve ɓàasiè sɔ nɛ ɓá zɛ̀ɓɛ̀ wɛ̀. 12Á den pɛ̃̀hṹ bie nɛ làa:

«Dɔfĩn, ń ɓén bie kɔ bòo ɛ̀ lɛ́ kìe zɛ̀ɓɛ̀ ǹ,

Ń ɓén dìń ɓɛ́ nìnbirìe ɓɛ́kùi híɛhɔ́ ɛ̀ nin ɓàaní kɔ ǹ.»

13À bĩniɛ bie nɛ làa:

«Ń ɓén bè niǹ tĩì Dɔfĩn lɔ̀n.»

À bĩniɛ nɛ:

«Ń lɛ àá ɓɛ́ nìɛ lɛ ɛ́ Dɔfĩn ɛ́ lɛ́ mi ǹ.»

14Ɓɛ̀pe nìɛ lɛ á bòo bie hũ̀nún ɛ́ iè nìɛ lɛ ɛ́ wɔ́ àá tɛkɛ̀a àá mí cãani. Ɛ́ hɔ́pe sí bòo hũn ɛ́ Yiezu míte ǹ ɛ́ ɓiɛ̀ wɔ́ nìnbírɔ kɛ̀a ie ɓɛpe, à húrun ɛ́ dàa yáakɛa ɔ̀ Sĩtuanɛ pànkɛ́, àpe lɛ ɛ́ te hɔ́ húmú pànkɛ́ ɛ́ hṹn dàa. 15Yiezu ɛ́ wɔ́ hɔ́pe sí ɛ́ dàa fueniɛ ɓɛ̀ nìnbirìe lɛ hṹn dɛ̃̀ kɛ̀a ie ɓɛ wɔhĩ́ ɓɛ́ mɛkɛ̃ni míkùi hũn, iè hɔ̀ lɛ ɛ́ ɓɛ́ ɛ́ hɔ̀ húmú ɛ̀ zán. 16Ɛ́ hɔ́ bɔn kɛ́ ɓɛ́ yí ɓɛ́ mɛlɛkɛɓɛ á ɓɛrɛ ɛ́ mi ɓen sĩiní, kɛ́ ɓɛ́ ie ɔ̀ Abarahaamu hũn nìɛ iè pe á ɓɛrɛ ɛ́ mi ɓen sĩiní. 17Ɛ́ sí iè hɔ̀pe ɛ́ hɔ́ bòo míkùi hũn, á dàa hàarí sãawi à dìń kɛ̀a ɓá zɛ̀ɓɛ̀, bòo lɛ ɛ́ wé à dàa wé peɓɛ̀ khɛ̃́ndàarɔ wi-bɛhɔ́ lɛ ɛ́ wóò mi peɓɛ̀ miinɛ̀, à lò ɲún ɛ́ cã̀aní mí Dɔfĩn tɔnlɔ́ tánlɔ́ hũn, à dàá dàń ɓɛ́ nìnbirìe bɔ̀koohɛ̃ ɛ̀ leń lé peɓɛ̀ lɔ̀n. 18Ɛ́ kɛ̀a sáalɛ á dɛ̀ ɓɛ̀ nìnbirìe lɛ ɛ́ wi hɔ hàanírɔ hũn ɛ́ fé nin iè hɔ̀ lɛ ápe kùusɔ ɛ́ lɔ̀n bɔn ɛ̀ ɓɛ̀ lò ɓiɛ̀ ɛ́ hàaniɛ ɔ̀.

Currently Selected:

Hebereɓɛ 2: bwj

Highlight

Copy

Compare