Hebereɓɛ 1

Dɔfĩn ɛ́ bɔ̀ mí Zuú ǹ ɛ́ dàa bie àá kie

1Hṹn àá híɛhɔ́ ɛ̀ Dɔfĩn ɛ́ hàarí wóò bè mí bɔ̀háaníriè ǹ ɛ̀ dàá khɛ́ àá kìe zĩnkĩ́nɓɛ̀ yìe cɛ̀rìɛɛ hũn àá mí biehĩ́ bierɔ́ àá mí ɲúuhɛ̃ ɲúuhɛ̃ míkùi hũn. 2Kɛ́ hɔ́pe zoòní wĩhĩ́ lɛ hũn lɛ iè hɔ̀ mɛ́un wihĩ́, ɛ́ hɔ́pe Dɔfĩn ɛ́ bɔ̀ mí Zuú ǹ ɛ́ dàa ɛ́ bie àá kie. Á iè ɔ̀pe ɛ́ Dɔfĩn ɛ́ bɔ̀nin ɛ́ dàa mɛ́ hɔ́ bòo míkùi, à lò iè ɔ̀pe ɛ́ Hɔ́ bɔ̀sí nɛ a teń hɔ́ bòo míkùi. 3Ápe Zuú ɛ́ te hɔ Dɔfĩn ɓàarɔ́ lɛ ɛ́ yí dɛ̀ yá màaní àá bòo dɔ̀ ɛ́ zɛ̃́ní, ɛ̀ Dɔfĩn bòo lɛ ɛ́ Hɔ́ te dàa dɛ̃̀ iè pe á ɓiɛ̀ dɛ̃̀ kɛ̀amu, ɛ́ piè ɲunù bienù ɛ́ pànkɛ́ wi, ɛ̀ lè iè lèpe á dàa zɛ̃nkɛa hɔ̀ bòo míkùi ɛ́ dĩ̀niɛ. Á tiɛ ɓɛ̀ nìnbirìe ɛ́ líeniɛ peɓɛ̀ bɔ̀koohɛ̃ hṹn, ɛ́ pehɔ̀ máahṹ à yòó van hɔ̀ hóohũn, ɛ́ yòó van kɛsí Dɔfĩn ńdóonin, hɔ̀pe Dɔfĩn lɛ iè ɔ̀ bɛ́zuú lɛ van yòó wi hɔ hóohũn lɛ sɔ́n sɔ́n hũn.

Yiezu Kirisa ɛ́ ɲún lì ɛ́ pɔ ɓɛ mɛlɛkɛɓɛ

4Ɛ́ Dɔfĩn ɛ́ wo lɛ́ ɛ́ mí Zuú ɛ́ ɲún lì ɛ́ pɔ ɓɛ mɛlɛkɛɓɛ ɛ́ Hɔ́ dàa lɛ́ lé yèn-bɛhɔ́ ɔ̀ ǹ, lè yèrè lɛ ɛ́ pɔ ɓɛpe mɛlɛkɛɓɛ yèhĩ́. 5Iè hɔ̀ lɛ Dɔfĩn ɛ́ ɲɛùn yí bie yí mi ɛ̀ lɛ́ mí mɛlɛkɛ dɔ̀ ǹ nɛ làa:

«Kɔ́ iè niǹ Zuú,

Ɛ̀ wo dàá mìí zoòní ɛ́ ń iè mì Yàá.»

Ɛ̀ Dɔfĩn ɛ́ lò ɲɛùn yí bie yí mí mɛlɛkɛ dɔ̀ bòo hũn nɛ:

«Ń ɓén wé ɓà Yàá,

Àpe ɛ́ ɓiɛ̀ ɓén wé niǹ Zuú.»

6Kɛ́ pɛ̃̀hṹ lɛ ɛ́ Dɔfĩn ɛ́ mii tɔn mí hán Zúu à ɓen lè dímíɲɛ́ hũn ɛ́ Hɔ́ den bie ɛ́ nɛ làa:

«Nɛ npe Dɔfĩn mɛlɛkɛɓɛ ɓɛ́kùi ɛ̀ ɓàaní-ɛ̀ ǹ.» 7Ɛ̀ Hɔ̀ ɛ́ khɛ́ ɓɛ́ mɛlɛkɛɓɛ bòo hũn ɛ́ nɛ làa:

«Ǹpe Dɔfĩn ɛ́ lɛ́ ɛ́ niǹ mɛlɛkɛɓɛ ɛ́ dɛ̃̀ kɛ̀a pinpinù,

Ɛ̀ ǹ lɛ́ ɛ́ ɓɛ́ ɛ́ wɔ́ niǹ tɔntɛ́riè lɛ ɛ́ dɛ̃̀ kɛ̀a ie dṹn diɛhĩ́.»

8Kɛ́ hɔ́ ɓen kɛ́ piè Zuú, ɛ̀ Dɔfĩn den khɛ́ ɛ́ lɛ́ à ǹ ɛ́ nɛ làa:

«Kɔ́ iè Dɔfĩn, ɛ̀ kɔ̀ bɛ́záanú ɛ́ wi yán fúu ɛ́ yá vé yá mi wɛ̀,

Kɔ́ ɛ́ kɔ̀ bɛ́záanú dí àá cã̀anírɔ́.

9 Hɔ̀ bòo lɛ ɛ́ cã̀aní iè pe ɛ́ kɔ́ wɛ, ɛ̀ hɔ̀ bɔ̀koohɔ́ ɛ́ kɔ́ hɛ́rɛ́.

Ɛ́ kɔ́pe Dɔfĩn, ɛ́ sí iè pe ɛ́ ńpe mì Yàá Dɔfĩn dàa munɛ kɔ,

Ɛ́ kóo hɔ̀ tĩwiɛ̀ yurɔ́ kɔ̀ ɲún lɔ̀n ɛ́ dàa ɓàaniɛ kɔ̀ ǹ,

Ɛ̀ ǹ kɛ́ mì ńkɔhĩ́.»

10Ɛ̀ Dɔfĩn ɛ́ bĩniɛ bie nɛ làa:

«Kɔ̀pe Ɲunsɔ, hɔ̀ bòo míkùi fìi ɓánlén, ɛ́ kɔ́ te le sṹsùnù ɛ́ mɛ́,

Ɛ̀ hɔ̀ hóohũn ɛ́ kɔ́ níhĩ́ ɛ́ te wɔ́.

11 Ɛ́ hɔ́pe sí míkùi ɛ́ ɓén yaa, kɛ́ kɔ́pe ɛ́ wi yán fúu.

Lè sṹsùnù àá hɔ́ hóohũn ɛ́ ɓén vɛ́ tɛ kɛ̀a ie pɔnkɔ̀-kĩ́ɛ,

12 Ɛ́ kɔ́ wo ɛ́ khui ɛ́ bi kɛ̀a iè mùakúo ɛ́ kóosí,

Ɛ̀ kɔ̀ ɛ́ zɛ̀ní hɔ́ kɛ̀a bòo lɛ ɛ́ ɓɛ́ dàa wóò zɛ̀ní hɔ́ tĩ̀ɛ bòo sí.

Kɛ́ kɔ́pe ɛ́ kań yán fúu ɛ́ yá zɛ̀ní wɛ̀,

Ɛ̀ kɔ̀ mɛkɛ̃nì ɛ́ lò yá vé yá mi wɛ̀.»

13Ɛ́ Dɔfĩn ɛ́ ɲɛùn yí khɛ́ lɛ́ mí mɛlɛkɛ dɔ̀ ǹ ɛ̀ bie nɛ làa:

«Ɓen síɛ kansí niǹ ńdóonín,

Nin lɛ́ ɛ̀ mì ńbíyanliè ɛ̀ wé kɔ́ zehĩ́ bènlén wànlè.»

14Ɛ́ ɓɛ́ mɛlɛkɛɓɛ ɛ́ iè ńbiè? Ɓɛ̀pe ɓɛ́kùi ɛ́ iè mɛ̀nɛ́kɛ̃̀a lɛ ɛ́ Dɔfĩn tɔnlɔ́ ɛ̀ tɛ́. Ɛ́ Hɔ́ tɔrɛ ɓɛ̀ nɛ ɓɛ ɓen síɛ sĩiní ɓɛ́lɛ ɛ́ sãawi ɛ́ ɓɛ̀ yí lé fuerɛ̀.

Currently Selected:

Hebereɓɛ 1: bwj

Highlight

Copy

Compare