Hebereɓɛ 10

1À Moyiize làndɛ́ ɛ́ iè hɔ̀ bɔ̀sãahĩ́ lɛ vaá-ɓen pehɔ̀ ńdídínlɔ́, kɛ́ hɔ́ yí hɔ́pe bɔ̀sãahĩ́ sɔ kùusɔ wɛ̀. Hɔ̀ iè hɔ̀pe làndɛ́ wṹn lɔ̀n ɛ́ ɓɛ́ nìnbirìe dàa wóo wé hɔ́ miyiɛ́ ɲún-cóoní dɔ̀ fúu àá lɔ́líe. Ɛ́ sí iè hɔ̀pe ɛ́ hɔ́pe làndɛ́ sɔ dàa yí dɛ̀ yá lɛ́ ɛ́ ɓɛ́ nìnbirìe lɛ wóò vɛ lúwiní Dɔfĩn kɛ̀amu ɛ́ wé nìnbirìe lɛ ɲunù tú wɛ̀. 2Kɛ́ hɔ́pe miyiɛ́ ɛ́ hṹn dɛ̀ ɓɛ̀ nìnbirìe ɛ́ tiɛ àá bɔ̀bín, nɛ níkɛàni ɛ́ hɔ́pe miyiɛ́ sɔ ɛ́ ɲún ɓɔ́ hàarí, iè hɔ̀ lɛ ɛ́ ɓɛ́pe nìnbirìe lɛ ɛ́ hɔ̀ wé ɛ́ hɔ́ hṹn ɓén tiɛ yìn-cóoní ɛ̀ hɔ̀ wo vɔ́, ɛ́ ɓɛ wo yá bĩní húi ɓɛ́te àá bɔ̀konwériè wɛ̀. 3Kɛ́ hɔ́ den wo yí dɛ̃̀ kɛ̀amu wɛ̀. hɔ̀pe miyiɛ́ sɔ iè bòo lɛ wóò lɛ́ ɛ́ ɓɛ̀ nìnbirìe ɛ̀ dàá liení ɓɛ́ bɔ̀koohɛ̃ bòo lɔ́líe àá lɔ́líe. 4Iè hɔ̀ lɛ ɛ́ nɛ̀báaɓɛ́ àá ńɓɔ́nkɛ́a cãani ɛ́ yí dɛ̀ nìnbirìe bɔ̀koohɛ̃ ɛ́ yá leń ɛ́ lé peɓɛ̀ lɔ̀n wɛ̀.

5Ɛ́ sí iè hɔ̀pe, ɛ́ pɛ̃̀hṹ lɛ á Kirisa ɛ́ dàa vaá-ɓen lè dímíɲɛ́ hũn á bie lɛ́ Dɔfĩn nɛ làa:

«Kɔ́ yí wɛní miyiɛ́ àá hɛ̃mù bòo wɛ̀,

Kɛ́ tɛkɛ̀a iè pe ɛ́ kɔ́ wɔ́ ɛ́ lɛ́ mi ǹ.

6 Kɔ́ yí wɛní ɓɛ́ bìlaàsiè lɛ wóò wòokɛ ɛ̀ cĩ̀ní lé miyiɛ́ leǹlén dúekéré lɔ̀n ɛ̀ lɛ́ kɔ̀ ǹ,

Ɛ̀ kɔ̀ lò yí wɛní hɔ́ bɔ̀koohɛ̃ sɛ́wɛ́rí dénlán miyiɛ́ wɛ̀.

7 Ɛ́ ń wo zɔn bie ɛ́ nɛ làa: “Dɔfĩn ń lɛ, nín ɓen wé hɔ́ bòo lɛ ɛ́ kɔ́ wɛ,

kɛ̀a bòo lɛ ɛ́ hɔ́ dàa ɛ́ wɛ̃́ nin bòo hũn hɔ̀ làndɛ́ vɛ̃hṹ hũn.”»

8Àpe Kirisa ɛ́ den sɛ̃̀nɛ́hã̀ zɔn bie ɛ́ nɛ làa:

«Kɔ́ yá miyiɛ́ dɔ̀ ɛ̀ cɛ̀, ɛ̀ kɔ̀ lò yá hɛ̃mu bòo dɔ̀ ɛ̀ cɛ̀ wɛ̀.

Kɔ́ yá ɓɛ̀ bìlaàsiè lɛ ɛ́ wóo cĩ̀ní lé miyiɛ́ lènlén dúekéré lɔ̀n ɛ̀ cɛ̀, ɛ̀ kɔ̀ lò yá hɔ̀ bɔ̀koohɛ̃ sɛ́wɛ́rí dénlán miyiɛ́ ɛ́ cɛ̀ wɛ̀.»

Hɔ́rɔsí ɛ̀ hɔ̀pe miyiɛ́ sɔ ɛ́ lò wóò leń ɛ̀ ɓáaníɓán àá hɔ́pe làndɛ́. 9Á bĩniɛ zɔn bie sĩiniɛ ɛ́ nɛ: «Dɔfĩn ń lɛ, nín wé hɔ́ bòo lɛ ɛ́ kɔ́ wɛ.»

Á iè pe ɛ́ wo ɓɔ́ lé miyiɛ́ dɛ̀kĩ́i ɲún kɛ̀amu, à khie bɔ̀sí lé dɛ̀fĩì lɛ iè piè kùrú yɛ̀rɛ́ húmú pelè kṹu hũn. 10Ɛ́ Yiezu Kirisa ɛ́ iè pe wo wɔ́ Dɔfĩn tĩì bòo kɛ̀amu, à lɛ́ míte ɛ́ ɓɛ́ ɓɔ́ sí-cóonín ɛ́ hɔ́ wo vɔ́, ɛ́ ké bɔ̀koohɛ̃ ɛ́ dàa ɛ́ tiɛ lɔ́ ké lɔ̀n, ɛ́ ké wo wɔ́ nìɛ lɛ bòo sɛ̃̀ Dɔfĩn.

11Hɔ́rɔń khɛ̃́ndàarɔ ɛ́ wóò dìń dìńlɔ́ àá sítĩnlɔ́ ɛ̀ dàá tɛ́ mí tɔnlɔ́. À wóò leń hɔ́pe miyiɛ́ ɲún-cóoní dɔ̀ fúu yìe bɔ̀kùi, kɛ́ hɔ́pe miyiɛ́ sɔ ɛ́ lò den yí dɛ̀ ɓɛ̀ nìnbirìe bɔ̀koohɛ̃ ɛ́ yá leń ɛ́ lé peɓɛ̀ lɔ̀n wɛ̀. 12À Kirisa ɛ́ pe lɛ́ míte ɛ́ wɔ́ àá miyiɛ́ yìn-cóoní lɔ̀n ɓɛ̀ nìnbirìe bɔ̀koohɛ̃ bòo hũn, à yòó van kɛsí Dɔfĩn ńdóonín pɛ̃̀hṹ lɛ ɛ́ yá vé hũn. 13Ɛ́ kɛ̀a sáalɛ, ɛ́ hɔ́ iè yán á ɛ́ hìé hũn nɛ Dɔfĩn ɛ̀ lɛ́ ɛ̀ ɓán ńbíyanliè ɛ̀ wé mí zehĩ́ bènlén wànlè. 14Ɛ́ piè te lɛ á lɛ́ yìn-cóoní lɔ̀n ɛ́ wɔ́ àá hɔ́ miyiɛ́ ɛ́ wo lɛ́ ɛ́ ɓɛ́ nìnbirìe lɛ á tiɛ bɔ̀koohɛ̃ ɛ́ wo bòo sɛ̃̀ Dɔfĩn, ɛ́ ɓɛ́ wo iè nìɛ lɛ ɲunù tú fúu.

15Ɛ́ lé Mɛkɛ̃n-Sãanu ɛ́ lò ɓiɛ̀ zɛ̃́niɛ ɛ́ lɛ́ kìe ǹ kɛ́ hɔ́ bɔn iè hɔ̀ lɛ ɛ́ hɔ́ sɛ̃̀nɛ́hã̀ ɛ́ khɛ́ ɛ́ nɛ: 16«Ɲunsɔ ɛ́ bie ɛ́ nɛ làa: Lɛ iè lè ɲɛbíi lɛ ɛ́ ń ɓén dí àá ɓɛ́, hɔ̀pe wihĩ́ sɔ máahṹ:

Ń ɓén dé niǹ làndɛ́ biehĩ́ peɓɛ̀ tĩɛ̀ hũn,

Ń ɓén ɛ́ wĩ́ hɔ́ peɓɛ̀ nùnlé hũn.»

17Á bĩniɛ zɔn khɛ́ sĩiniɛ ɛ́ nɛ: «Ń yá ɓén bĩní liení peɓɛ̀ ńwékemu àá peɓɛ̀ bɔ̀koohɛ̃ bòo wɛ̀.» 18Ɛ́ kɛ́ hɔ́ bɔ̀koohɛ̃ sɛ́wɛ́rí ɛ́ wo ɓen dɔ́ vɔ́, ɛ̀ hɔ̀ bɔ̀koohɛ̃ sɛ́wɛ́rí dénlán miyiɛ́ ɛ́ bĩniɛ ɲún mí lò.

Mì nɛ ke ɛ̀ cɛ̀ dĩń Dɔfĩn sãàní

19Kìe zɛ̀ɓɛ̀, ɛ́ ké wo dũ sãàniɛ kɛ́ ké dɛ̀ ɛ́ wóo vɛ́ zɔ le viì lɛ ɛ́ ce cɛ̃̀un hũn, à Yiezu cãani lɛ ɛ́ koosí bòo hũn. 20À cɔ́ lé wṹn dɛ̀fĩì lɛ ɛ́ ke ɛ̀ yí lé mɛkɛ̃nì lɔ̀n ɛ́ lɛ́ kie ǹ. À wɔ́ hɔ́ àá bòo lɛ á dàa lɛ́ mí kùrú sɛ̃́hṹ ɛ́ wɔ́ àá hɔ́ miyiɛ́, ɛ́ lépe Dɔfĩn zũnù fú-bɛhɔ́ lɛ hṹn sun kie ɛ́ dàa khã̀akɛa. 21Ɛ́ ké wo dàa khɛ̃́ndàarɔ wì-bɛhɔ́ lɛ wi lepe Dɔfĩn zũnù ɲún hũn. 22Ɛ́ mí wo nɛ ke vɛ lúwiní Dɔfĩn àá tĩɛ̀ lɛ ɛ́ cã̀aní, ɛ̀ kè dɛsĩ̀ Hɔ̀ àá ké tĩɛ̀ míkùi, iè hɔ̀ lɛ á Kirisa cãani ɛ́ tiɛ kè hũn nùnlé, à lò tiɛ kè tɛkɛ̀a hɔ̀ ɲumu lɛ ɛ́ ce hũn. 23Ɛ́ mí nɛ ke ɓɛ́ɓɛ́ lépe kè tĩì bènlén sãàní, ɛ̀ wóo bie bòo fúu, iè hɔ̀ lɛ ɛ́ Dɔfĩn ɓen lɛ́ mí ɲunù, ɛ̀ Hɔ̀ wóò tíiní pelè ɲunù. 24Ɛ́ mí nɛ ke wóo húi ɓán bòo, ɛ̀ kè dàá wookɛ wɛnín ɓán sãàní ɛ̀ wóo wé hɔ́ bɔ̀tente. 25Mì bí nɛ ke wóo fùansí ké ńkóoɓánlɔ̀nɓɛ̀ kɛ̀a bòo lɛ ɛ́ ɓɛ́dɔ̀ dàa wóò wé hɔ́ fúu wɛ̀. Kɛ́ mí den nɛ ke wóo hĩ̀iníkɛ ɓán tĩɛ̀, ɛ̀ kè dàá bĩní wookɛ wé hɔ́, iè hɔ̀ lɛ ɛ́ mí lò wo loo kɛ́ á Ɲunsɔ khũ̀á ɓenlɔ́ ɛ́ lúwi.

26Kɛ́ hɔ́ lɛ ɛ́ ké lò wo dũnɛ hɔ̀ bɔ̀berà vɔ́, kɛ́ ké den pɛ́wi wóò wé hɔ́ bɔ̀koohɔ́ àá còohĩ́, ɛ̀ miyiɛ́ dɔ̀ lɛ ɛ́ dɛ̀ kè bɔ̀koohɛ̃ ɛ́ tiɛ ɛ́ bĩniɛ mí wɛ̀. 27Hɔ́rɔsí ɛ̀ hɔ̀ bòo lɛ ɛ́ ké wo sãawi ɛ̀ kè hìé àá miikɛ hũn-yenkɛà ɛ́ iè hɔ̀ lìe lènlɔ́ àá hɔ́ miikɛ dṹn lɛ ɓén cĩ́ní ɓɛ́ nìnbirìe lɛ yí tɛ̀ Dɔfĩn bòo. 28Nìnbírɔ yée nìnbírɔ lɛ hàarí ɓen yí mɛ̀ndɛ̃ a Moyiize làndɛ́, kɛ́ nìɛ ɓɛ̀ ɲu tàá nìɛ ɓɛ̀ tĩ ɛ́ mɔn ɔ̀ ɛ́ bie bòo, ɛ́ ɓàasɔ ɛ́ ɓɛ́ hàarí wóò ɓé kɛ́ ɓɛ́ yá mi piè miinɛ wɛ̀. 29Ɛ́ hɔ́ wo iè ńɓuò ɛ́ temu ɓiɛ̀ ɓén wí-é pe nìnbírɔ lɛ yìe yá tí-é Dɔfĩn Zuú, à yá mɛ̀ndɛ̃ lepe Dɔfĩn ɲɛbíi cãani lɛ lò te ɓàasɔ ɛ́ tiɛ, à lò wóò tòokɛ le Mɛkɛ̃n-Sãanu lɛ iè lè hiì ɓàasɔ? Ɛ́ mí dũń kɛ́ lé iè miikɛ lɔ̀nbiè dɛ̀bɛhɔ́ ɛ́ te ɓàasɔ ɛ́ ɓén yí lò! 30Ɛ́ ké lò wo dũ hɔpe Dɔfĩn lɛ ɛ́ bie ɛ́ nɛ làa: «Ǹpe ɛ́ te hɔ yúa ɛ́ wóò dì, ɛ̀ ǹpe ɛ́ te hɔ́rɔń nìnbírɔ ɛ́ wóo ɓén sàaní ɛ́ ɓáaníɓán àá bòo lɛ á wɔ́!» Ɛ̀ Hɔ̀ lò bĩniɛ bie ɛ́ nɛ: «Ǹpe Ɲunsɔ ɛ́ ɓén lè niǹ nìɛ liè.» 31Ɛ́ hɔ́ hɛ̀ iè miikɛ bɔ̀sũmúa cɛ̃̀un ɛ̀ nìnbírɔ ɛ̀ kùén zɔ Dɔfĩn mɛkɛ̃nì ɓàasɔ núnú hũn.

32Mì síɛ liení mí hán wĩhĩ́ bòo ǹ lɛ mí dàa hàarí mɔn hɔ̀ Dɔfĩn ńpiemu: mì lɔ̀n hàarí bɔn cɛ̃̀un kɛ́ mí hɛ̃̀ mì hũn ɛ́ mí dàa yú hɔ́ pànkɛ́. 33Hɔ̀ dɔ̀ ɛ̀ ɓɛ̀ hàarí wóò tòokɛ miɛ, ɛ̀ ɓɛ̀ biení mí lɔ̀n ɓɛ̀ nìzã̀amáa yìe hũn, ɛ̀ hɔ̀ dɔ̀ ɛ̀ mì wóò tɛ̀ páa ɓɛ́pe lɛ ɛ́ ɓɛ́ ɛ́ lɔ̀n ɛ̀ biení lɔ̀n ɛ̀ dàá lɔ̀n be. 34Mí hàarí páa ɓɛ̀ kɛ̀sí nìɛ lɔ̀n ɛ́ dàa lɔ̀n bɔn, ɛ̀ pɛ̃̀hṹ lɛ ɛ́ ɓɛ́ dàa hàarí ɛ́ mì yírɛ́ ɛ̀ vúakɛ́, ɛ́ mí tɛ̀ àá tĩwiɛ̀ ɛ́ hɔ́ vṹnun cɔ́, iè hɔ̀ lɛ ɛ́ mí dũ kɛ́ mí dàa hɔ́ yírɛ́ lɛ yá vé, lɛ bòo tṹ hɔ́pe lɛ ɛ́ ɓɛ́ vúa mì viì. 35Ɛ́ mí bí zàaníkɛ lepe mì tĩì bènlén wɛ̀; iè hɔ̀ lɛ ɛ́ miikɛ sàanín dɛ̀bɛhɔ́ ɛ́ zɔn wi yán ɛ́ mìi hìé. 36Ɛ́ mí fɔ́ɓán ɛ̀ mì vɛ àá híɛhɔ́ hɔ̀ ńdɛsĩ̀nlɔ́ hũn ɛ̀ wé Dɔfĩn tiì bòo, ɛ̀ mì dàá yí hɔ́ bòo lɛ ɛ́ hɔ́pe Dɔfĩn ɛ́ lɛ́ mí ɲunù nɛ mí ɓén lɛ́ miɛ ǹ. 37Ɛ́ hɔ́ den wɛ̃́ lé Dɔfĩn bienù vɛ̃hṹ hũn ɛ́ nɛ làa:

«Hũ̀nún àá bìcínbóo, bìcínbóo mí dòonún,

Àpe lɛ sãawi à ɓen ɛ́ ɓen,

À yí mii míi wɛ̀.» 38Ɛ̀ Dɔfĩn ɛ́ bie ɛ́ nɛ làa:

«À nìnbírɔ lɛ ɛ́ cã̀aní iè hɔ̀ lɛ á dũmuasɛ̃̀ mì ǹ, ɛ́ piè ńdɛsĩ̀nlɔ́ ɛ́ ɓén lɛ́ á wé mí mɛkɛ̃nì hũn.

Kɛ́ á khũ̀a ɛ́ lɔ́ àá mí máahṹ, ɛ́ piè bòo ɛ́ yá tĩìní mi ǹ wɛ̀.»

39Kɛ́ hɔ́ ɓen kɛ́ képe, ɛ̀ kè yí nìnbirìe lɛ ɛ́ wóò khũ̀a lé àá ké máahṹ ɛ̀ lé vɛ vĩ́iní kéte, kɛ́ ké iè nìnbirìe lɛ ɛ́ dũmuasɛ̃̀ lɛ ɛ́ wi le fuerɛ̀ wṹn lɔ̀n.

Currently Selected:

Hebereɓɛ 10: bwj

Highlight

Copy

Compare