Hebereɓɛ 11

Hɔ̀ ńdɛsĩ̀nlɔ́ bòo

1Ɛ́ hɔ́ ńdɛsĩ̀nlɔ́ ɛ́ wo iè hɔ̀ ńtán kɔ́ fɔnù ɛ̀ hìé nɛ hɔpe bòo lɛ ɛ́ kɔ́ ɛ́ hìé ɛ́ ɓén wé, hɔ̀ iè hɔ̀ ńzɛ̃́ní kɛ́ hɛ̀rí hɔ̀pe bòo lɛ ɛ́ yí loo àá yiè ɛ́ pɛ́ wi. 2Ɛ́ hɔ́ iè pe kìe hàarí nìkĩ́ɛ ńdɛsĩ̀nlɔ́ temu hàarí lɛ́ ɛ́ ɓɛ́ dàa bòo ɛ́ tĩìniɛ Dɔfĩn.

3Hɔ̀ iè hɔ̀ ńdɛsĩ̀nlɔ́ temu lɛ́ ɛ́ ké dàa dũ kɛ́ lé dímíɲɛ́ ɛ́ Dɔfĩn hàarí mɛ́ àá mí bienù. Ɛ́ kɛ̀amu, ɛ́ ke wo dũ kɛ́ hɔ́pe bòo lɛ ɛ́ loo àá yìe ɛ́ den zɔn lɔ́ hɔ́pe lɛ ɛ́ yí loo àá yìe hũn.

4Hɔ̀ iè hɔ̀ lɛ á Abɛɛle ɛ́ hàarí dũmuasɛ̃̀ Dɔfĩn ɛ́ piè miyiɛ́ ɛ́ dàa hàarí bòo tĩ̀iniɛ Hɔ̀ ǹ ɛ́ pɔniɛ ɔ̀ Kaɲɛ hɔ́n. Hɔ̀ iè piè ńdɛsĩ̀nlɔ́ temu lɛ́ ɛ́ Dɔfĩn dàa hàarí wɛniɛ piè hɛ̃mù bòo, ɛ̀ Hɔ̀ nɛ a iè nìcã̀anírɔ. Ɛ́ hɔ́ den wo iè hɔ̀ lɛ ápe Abɛɛle ɛ́ hàarí dũmuasɛ̃̀ Dɔfĩn ɛ́ hɔ́pe bòo lɛ á hàarí wɔ́ ɛ́ dàa ɛ́ bie àá kie hɛ̀rí kɛ́ á lò húrun.

5Ɛ̀ hɔ̀ iè hɔ̀ lɛ á Henɔɔke ɛ́ hàarí dũmuasɛ̃̀ Dɔfĩn ɛ́ hɔ́pe Dɔfĩn ɛ́ dàa hàarí mɔ̀ à ɛ́ yòó viɛniɛ mí viì á dàa yí dũń hɔ́ húmú wɛ̀. Ɛ́ nìnbírɔ dɔ̀ ɛ́ wo yí bĩní mi-ɛ iè hɔ̀ lɛ ɛ́ Dɔfĩn ɛ́ hàarí mɔ̀ à ɛ́ yòó van bɔ̀sí mí viì. Kɛ́ hɔ́ lɛ á hàarí ɲɛùn yí mìí yòó vɛ, ɛ̀ lè Dɔfĩn bienù ɛ́ den hàarí bie piè bòo nɛ piè bòo ɛ́ tĩ Dɔfĩn. 6Ɛ́ hɔ́ ńdɛsĩ̀nlɔ́ ɛ́ ɓen bòo mí ɛ̀ nìnbírɔ bòo ɛ́ yí dɛ̀ yá tĩìní Dɔfĩn wɛ̀. Iè hɔ̀ lɛ ɛ́ nìnbírɔ lɛ wóò vɛ lúwiní Dɔfĩn ɛ́ sãawi à dɛsĩ̀ kɛ́ hɔ̀pe Dɔfĩn ɛ́ wi, ɛ̀ Hɔ̀ wóò sàaní ɓɛ́lɛ ɛ́ Hɔ̀ cɛ̀ àá ɓɛ́ tĩɛ̀ míkùi.

7Hɔ̀ iè hɔ̀ lɛ á Nowe ɛ́ hàarí dũmuasɛ̃̀ Dɔfĩn, iè pe temu lɛ́ ɛ́ hɔ́ lɛ ɛ́ hɔ́pe Dɔfĩn ɛ́ dàa ɲɛ̀ piè zeń lɔ̀n hɔ̀ bòo lɛ ɛ́ hàarí ɓén wé bòo hũn, lɛ iè bòo lɛ ɛ́ ɓɛ́ ɛ́ lò ɲɛùn yí mi ɛ́ yí mi, á dàa tɛ̀ ɲɛ́ hɔ́pe Dɔfĩn bòo. À hàarí mɔ̀ hɔ̀pe Dɔfĩn bòo lɛ ɛ́ Hɔ́ bie àá sɔ̀bíɛ á dàa hàarí ɓáa lè ɲumu wiè dɛ̀bɛhɔ́ lɛ ápe àá mí zũnù nìɛ ɛ́ fuerɛ hũn. Ɛ́ kɛ̀amu, ápe Nowe ɛ́ iè pe wo zɛ̃́niɛ kɛ́ ɓɛ́ dímíɲɛ́ nìɛ lɛ kɛ́ bɔ̀werà ɛ́ yí sãa wɛ̀. Ɛ́ Dɔfĩn ɛ́ hàarí wɔ́ á àá nìnbírɔ lɛ ɛ́ cã̀aní piè ńdɛsĩnlɔ́ bòo hũn.

8Hɔ̀ iè hɔ̀ lɛ á Abarahaamu ɛ́ hàarí dũmuasɛ̃̀ Dɔfĩn á dàa hàarí tɛ̀ pehɔ̀ verɛ̀ ǹ: à hàarí lɔ́ cɔ́ kãa lè cɛ̃̀mɛ̀nɛ́ lɛ ɛ́ Dɔfĩn nɛ mii lɛ́ à ǹ à teń. Á wo hàarí lɔ́ cɔ́ kɛ́ á lò yí dũ viì lɛ á vaá-vɛ wɛ̀. 9Hɔ̀ iè piè ńdɛsĩ̀nlɔ́ temu hàarí lɛ́ á dàa van kɛsí ɛ́ wɔ́ á nɛ̀hũnù lè cɛ̃̀mɛ̀nɛ́ sɔ hũn, lèpe lɛ ɛ́ Dɔfĩn hàarí lɛ́ mí ɲunù nɛ mí ɓén lɛ́ à ǹ hũn. Á hàarí wɔ́ lé pɔnkɔ̀-zũnù á wi hũn, ápe Yizaake àá Zakɔɔbu lɛ hɔ́pe Dɔfĩn lò ɓiɛ̀ hàarí nɛ mí ɓén lɛ́ hépe cɛ̃̀mɛ̀nɛ́ nin ɛ́ kùusɔ hàarí wi hɔ́pe pɔnkɔ̀-zĩhĩ́ɛ hũn kɛ̀a ɔpe. 10Àpe Abarahaamu ɛ́ wɔ́ kɛ̀amu iè hɔ̀ lɛ á hàarí ɛ́ lè lóo lɛ fìi ɲɛ̀ sãa ɛ̀ hìé, lóo lɛ tenlɔ́ ɛ́ Dɔfĩn ɛ́ te zɛ̃́niɛ, ɛ̀ Hɔ̀ lò te hɔ tɔn míten.

11Hɔ̀ iè hɔ̀ lɛ á sara lɛ hàarí yá te ɛ́ hàarí dũmuasɛ̃̀ Dɔfĩn, á dàa hàarí dɛ̀rɛ máahṹ ɛ́ yú mí hɛ́kĩ́imu hũn, iè hɔ̀ lɛ á hàarí dũmuasɛ̃̀ àpe lɛ hàarí bie lɛ́ à ǹ nɛ a ɓén te zuú. 12Ɛ́ sí iè pe temu lɛ́ á nìnbí-cóoní lɛ iè ɔ̀pe Abarahaamu lɛ lò hàarí kĩ́nɛ́ vɔ́ ɛ́ wo kɛ́ hɔ́ húmú ɛ́ dàa tɔn ɔ̀ zuú lɛ hũn nìɛ ɛ́ khie boòniɛ cɛ̃̀un kɛ̀a hɔ ńpĩ́nàawoò bòo sí, kɛ̀a hɔ hã̀anì lɛ ɛ́ wi hɔ ɲun-bɛhɔ́ ɲunù lɛ ɲún ɛ́ yí dɛ̀ yà mì ɛ́ dũń bòo sí.

13Ɛ́ ɓɛ́pe sí ɓɛ́kùi ɛ́ húrunkɛ hɔ ńdɛsĩ̀nlɔ́ hũn. Ɓɛ̀ hàarí ɛ́ yí mi hɔ́pe bòo lɛ ɛ́ Dɔfĩn ɛ́ lɛ́ mí ɲunù nɛ mí ɓén lɛ́ ɓàn wɛ̀; kɛ́ ɓɛ́pe wo mɔn hɔ̀ kɛ́ hɔ́ viì van ni, ɛ́ ɓɛ́ hɛ̀ wɛniɛ ɓɛ́te pehɔ̀ bòo hũn. Ɓɛ̀ hàarí dũnɛ bie nɛ ɓɛ́ iè nɛ̀hãà, nìnbirìe lɛ wi le sṹsùnù lɔ̀n kɛ́ ɓɛ́ yí ɓɛ míi yán wɛ̀. 14Ɛ́ ɓɛ́pe lɛ ɛ́ bie kɛ̀amu ɛ́ iè pe wo den ɛ́ zɛ̃́ní kɛ̀amu kɛ́ lé iè peɓɛ̀ kùrú lóo ɛ́ ɓɛ́ ɛ́ cɛ̀. 15Kɛ́ lé lóo lɛ ɛ́ ɓɛ́ hàarí lɔ́ hũn ɛ́ hàarí hṹn pɔnù ɛ́ ɓɛ̀ ɓé, nɛ ɓɛ hàarí yú pɛ̃̀hṹ lɛ ɛ́ khũ̀a vɛ́ yán. 16Kɛ́ lé den iè lɔ́-ɓuɛ̀ lɛ bòo tṹ lépe sí ɛ́ ɓɛ́ ɛ́ cɛ̀, lè lòo lɛ ɛ́ yòó van wi hɔ hóohũn. Ɛ́ sí iè pe temu lɛ́ ɛ́ Dɔfĩn dàa yá lùwi ɛ̀ ɓɛ̀ wóo ve mí nɛ ɓɛ́ Dɔfĩn wɛ̀; Hɔ̀ den ɛ́ sɛ́sɛ́a lóo dɔ̀ peɓɛ̀ bòohũn.

17Hɔ̀ iè hɔ̀ lɛ á Abarahaamu ɛ́ hàarí dũmuasɛ̃̀ Dɔfĩn á dàa hàarí mɔ̀ à Yizaake ɛ́ mii vɛ wé àá miyiɛ́ pɛ̃̀hṹ lɛ ɛ́ Dɔfĩn dàa hàarí ɛ́ ɔ̀ hàaní nɛ mii húi nɛ bòo á dũmuasɛ̃̀ mí ǹ àá bɔ̀bín. Á wo hàarí mɔ̀ àpe mí zu-cóoní mí dòonún ɛ́ mii dàá vɛ wé àá miyiɛ́ ɛ̀ lɛ́ hɔ́pe Dɔfĩn, hɔ́rɔsí kɛ́ hɔ́pe Dɔfĩn ɛ́ lò den hàarí lɛ́ mí ɲunù ɔ̀ ǹ 18ɛ̀ Hɔ́ ɛ́ khɛ́ lɛ́ à ǹ nɛ làa: «À iè Yizaake ɛ́ temu ɛ́ mii lɛ́ ɛ̀ kɔ̀ hũn nìɛ ɛ̀ dàá wé.» 19Abarahaamu ɛ́ den hàarí ɛ́ nùún mí tĩì hũn nɛ Dɔfĩn ɛ́ dɛ̀ nìhen ɛ́ vìení. Ɛ́ sí iè pe temu lɛ́ ɛ́ Dɔfĩn dàa khũ̀a lɛ́ piè zuú ɔ̀ ǹ, ɛ́ hɔ́ wo wɔ́ kɛ̀a bòo ɛ́ hɔ́ iè bòo á vìé#11.19 Hɔ̀pe sí ɛ́ iè Yiezu vìerɔ́ bòo ɛ́ hɔ́ ɛ́ zɛ̃́ní..

20Ɛ́ hɔ́ iè hɔ̀ lɛ á Yizaake ɛ́ hàarí dũmuasɛ̃̀ Dɔfĩn á dàa dúɓɛ́a ɔ̀ Zakɔɔbu àá ɔ́ Esoo ǹ hɔ̀ bòo lɛ ɛ́ vaá-ɓen bòo hũn. 21Ɛ̀ hɔ̀ iè hɔ̀ lɛ á Zakɔɔbu ɛ́ hàarí dũmuasɛ̃̀ Dɔfĩn, ɛ́ hɔ́ lɛ ɛ́ piè húmú ɛ́ van dɛ̃un, á dàa dúɓɛ́a ɔ̀ Zozɛɛfu bɛ́zikíini ǹ àá ɓɛ́ nì-cóohɛ̃, à khie cúsí mí lànlè ɛ́ siɛ hùerɛ̀sí lɔ̀n à ɓàaniɛ Dɔfĩn. 22Ɛ́ hɔ́ iè hɔ̀ lɛ á Zozɛɛfu ɛ́ hàarí dũmuasɛ̃̀ Dɔfĩn, ɛ́ hɔ́ lɛ ɛ́ piè húmú ɛ́ van lúwi á dàa bie nɛ ɓɛ Yizarayɛɛle nìɛ ɛ́ ɓén zɔ lé hɔ́ Eziputi lóo hũn, à khɛ́ hɔ́ bòo lɛ ɛ́ ɓɛ́ sãawi ɛ̀ ɓɛ̀ wé àá mí hũà ɛ́ lɛ́ ɓà ǹ.

23Ɛ̀ hɔ̀ iè hɔ̀ lɛ á Moyiize ɓà nìɛ ɛ́ hàarí dũmuasɛ̃̀ Dɔfĩn ɛ́ hɔ́ lɛ ápe Moyiize ɛ́ tɔn ɛ́ ɓɛ́ dàa tànkɔ̀niɛ ɔ̀ fúu ńpĩ́ihɛ̃ bɔ̀nbɔ̀ tĩ. Ɓɛ̀ hàarí mɔn kɛ́ á iè zĩncáahɔ́ lɛ sãa ɛ́ ɓɛ́ dàa yí zán ɛ̀ ɓɛ̀ pĩ́-ɛ bɛ́zuú ɲunù bienù wɛ̀. 24Ɛ̀ hɔ̀ iè hɔ̀ lɛ á Moyiize ɛ́ hàarí dũmuasɛ̃̀ Dɔfĩn ɛ́ hɔ́ lɛ á tú vɔ́ á dàa pɛ̃́ nɛ ɓɛ bí wóo ve mi nɛ Faraɔn hãá yɛ̀nù wɛ̀. 25Kɛ́ á tɛ̀ ɛ́ van páa Dɔfĩn nìɛ lɔ̀n ɛ́ dàa lɔ̀n wóò be, à pɛ̃́ hɔ́ bɔ̀koohɔ́ tũmù iè hɔ̀ lɛ ɛ́ hɔ́ iè tĩwiɛ̀ lɛ yáà míi wɛ̀. 26À hàarí ɛ́ húi lɛ ɛ̀ ɓɛ̀ nìnbirìe yìe ɛ̀ bí tí-é kɛ̀a ie Kirisa bòo sí ɛ́ tũ̀nú wi cɛ̃̀un ɛ́ pɔ hɔpe Eziputi yírɛ́, iè hɔ̀ lɛ ɛ́ hɔ́ sàanín lɛ vaá-ɓen iè pe á hàarí ɛ́ húi. 27Ɛ́ hɔ́ iè hɔ̀ lɛ ápe Moyiize ɛ́ hàarí dũmuasɛ̃̀ Dɔfĩn á dàa hàarí zɔn lɔ́ lé Eziputi cɛ̃̀mɛ̀nɛ́ hũn kɛ́ á yí zán ɔ́ bɛ́zuú tĩcĩ̀nín, iè hɔ̀ lɛ á den hàarí fɛ́sí dɛ̃̀ sãa kɛ̀a ie nìnbírɔ lɛ ɛ́ loo hɔpe Dɔfĩn lɛ yáà mi àá yìe. 28Ɛ́ hɔ́ wo iè hɔ̀ lɛ ápe Moyiize ɛ́ hàarí dũmuasɛ̃̀ Dɔfĩn á dàa hàarí ɲɛ̀ lè Nyiewɛlɔn sɛ́rí dínlɔ́ fìi, à lɛ́ lé ɲunù ɛ́ ɓɛ́ hɔnkɛa hɔ̀ cãani hɔ̀ zĩínù ɲihĩ́ɛ ǹ, bòo lɛ ɛ́ wé à húnú Mɛlɛkɛ ɛ̀ bí dɛ̃ ɓɛ Yizarayɛɛle nìɛ hán bɛ́zikíini wɛ̀.

29Ɛ̀ hɔ̀ iè hɔ̀ lɛ ɛ́ ɓɛ́ Yizarayɛɛle nìɛ ɛ́ hàarí dũmuasɛ̃̀ Dɔfĩn ɛ́ hɔ́ ɲun-bɛhɔ́ lɛ ɛ́ ɓɛ́ wóò ve nɛ ɲun-miɛ̀ ɛ́ dàa hàarí sankɛa mí tĩ́ihṹ ɛ́ ɓɛ́ zɔn cánkɛa ɛ́ van lɔ́ lé sṹsùnù lɛ hɔn lɔ̀n, hɔ́rɔsí kɛ́ ɓɛ́ Eziputi nìɛ lɛ ɓiɛ̀ hàarí nɛ ɓɛ zɔ cánkɛ́ hàaní ɛ́ hɔ́ ɲumu ɛ́ zɔn fɔ́. 30Ɛ̀ hɔ̀ iè hɔ̀ lɛ ɛ́ ɓɛ́pe Yizarayɛɛle nìɛ ɛ́ hàarí dũmuasɛ̃̀ Dɔfĩn ɛ́ hɔ́ lɛ ɛ́ ɓɛ́ dàa hàarí bɛ́khie lè Zeriko lóo fúu wihĩ́ hùuɲu, ɛ́ lé tóohɔ́ lɛ tɔn kírie lèpe lóo ǹ ɛ́ dàa hàarí ɓúukɛa khie siɛ. 31Ɛ̀ hɔ̀ iè hɔ̀ lɛ á Rahaabu, àpe hṹnu lɛ ɛ́ hàarí wóò yìɛní míte ɛ́ hàarí dũmuasɛ̃̀ Dɔfĩn, ɛ́ ɓɛ́ nìɛ lɛ hàarí van ɛ́ lèpe Zeriko lóo ɛ̀ kuen á hàarí perɛnin sãàniɛ, á dàa hàarí yí páaní hí àá ɓɛ́pe lɛ hàarí pɛ̃́ Dɔfĩn bòo wɛ̀.

32Ɛ́ ń wo ɛ́ bĩní zɔ́ bie nɛ wɛrɛ̀? Lè pɛ̃̀hṹ ɛ́ wo yèrɛ mi ǹ lɛ ǹ bie nɛ nin bie ɔ Zedeyɔn àá ɔ́ Baraake àá ɔ́ Samusɔn àá ɔ́ Zɛfitee àá ɔ́ Daviide àá ɔ́ Samuɛle àá ɓɛ́ Dɔfĩn bɔ̀háaníriè bòo. 33Hɔ̀ iè hɔ̀ ńdɛsĩ̀nlɔ́ temu lɛ́ ɛ́ ɓɛ́ dàa hàarí tɛ́ hɔ́ hĩɛ̀ ɛ́ yú hɔ́ pànkɛ́ hɔ̀ bɛ́záahĩ́ dɔ̀ lɔ̀n, ɛ́ wɔ́kɛ hɔ bòo lɛ ɛ́ cã̀aní, ɛ̀ ɓɛ̀ yúkɛ hɔ́ bòo lɛ ɛ́ Dɔfĩn hàarí lɛ́ mí ɲunù nɛ mí ɓén lɛ́kɛ ɓà ǹ, ɛ̀ ɓɛ̀ híɛkɛa ɓɛ̀ zankɛ́woohɛ̃ ɲihĩ́ɛ, 34ɛ̀ ɓɛ̀ ɓɔ́kɛ hɔ́ dṹn bɔ̀bɛ̃hɛ̃ pànkɛ́, ɛ̀ ɓɛ̀ fuerɛ ɛ́ lɔ́ ɓɛ́lɛ ɛ́ hàarí ɛ́ cɛ̀ ɛ́ ɓɛ ɓé ɓɛ́ àá hɔ́ khɛ̃́n-tɔ́hĩ́ núnú hũn, ɛ̀ ɓɛ̀ lɔ́ lé duiè hũn ɛ́ khũ̀a khie yú hɔ́ pànkɛ́, ɛ̀ ɓɛ̀ wɔ́kɛ ɓɛ̀ hĩtɛ́riè lɛ yáà zán bòo, ɛ̀ ɓɛ̀ ɲɛunkɛ ɓɛ cɛ̃̀mɛ̀náa bìɓuà hĩtɛ́riè. 35Ɛ̀ hɔ̀ iè hɔ̀ lɛ ɛ́ ɓɛ́ hã́a dɔ̀ ɛ́ hàarí dũmuasɛ̃̀ Dɔfĩn ɛ́ ɓɛ́ dàa hàarí mɔn ɓá nìɛ dɔ̀ lɛ ɛ́ húrunkɛ kɛ́ ɓɛ́ vìé.

Kɛ́ ɓɛ̀dɔ̀ ɛ́ ɓɛ́ bieniɛ lɔ̀n fúu ɛ́ ɓɛ́ van húrunkɛ kɛ́ ɓɛ́ nɛ ɓɛ́ yá pĩ́ Dɔfĩn ɛ̀ ɓɛ̀ dàá yí ɓɛ́ fùansí nin, bòo lɛ ɛ́ wé ɛ̀ ɓɛ̀ den yí vìé ɛ̀ khíi yí lé mɛkɛ̃nì lɛ sãa cɛ̃̀un ɛ́ pɔ. 36Ɛ̀ ɓɛ̀dɔ̀ ɛ́ ɓɛ́ tòokɛa, ɛ̀ ɓɛ̀ han ɓɛ̀ àá hɔ́ ńhùiehĩ́, ɛ̀ ɓɛ̀dɔ̀ ɛ́ ɓɛ́ ɓaakɛa ɛ́ cankɛ ɛ́ van koo lè kɛ̀sí hũn. 37Ɛ̀ ɓɛ̀dɔ̀ ɛ́ ɓɛ́ taa ɓɔ́ àá hɔ́ sɛ̃̀nlɛ̀a, ɛ̀ ɓɛ̀dɔ̀ ɛ́ ɓɛ́ wánkɛa àá lé síi ɛ́ ɓɔ́, ɛ̀ ɓɛ̀dɔ̀ ɛ́ ɓɛ́ ɓɔ́ àá hɔ̀ khɛ̃́n-tɔ́hĩ́. Ɛ̀ ɓɛ̀dɔ̀ ɛ́ wo hàarí ɛ́ vɛkɛ kũǹ ɛ́ wɔ́ ɓɛ́ pirìe tàá ɓɛ̀ bìe sɛ́hɛ̃ ɛ́ ɓɛ́ zɔn, ɓɛ̀ hàarí iè nìkherà, ɛ̀ ɓɛ̀ nìnbirìe ɛ́ hàarí ɛ́ peɓɛ̀ ɲɛkɛ̃̀a ɛ̀ vɛ́, ɛ̀ ɓɛ̀ ɛ́ peɓɛ̀ lɔ̀n ɛ̀ biení. 38Ɓɛ̀ hàarí ɛ́ vɛkɛ kũǹ lè ńɲiherà hũn àá hɔ́ ɓúkùo hũn, ɛ̀ ɓɛ̀ dɛ hɔ ɓúkùo kṹuhɛ̃ àá lé sṹsùnù kṹuhɛ̃ hũn. Kɛ́ ɓɛ́pe ɛ́ den hàarí iè nìtentiè lɛ ɛ́ lépe dímíɲɛ́ sɔ lɛ ɛ́ yí dàa fɔ́ɓán wɛ̀. 39Ɛ́ ɓɛ́pe ɓɛ́kùi ɛ́ bòo tĩiniɛ Dɔfĩn peɓɛ̀ ńdɛsĩ̀nlɔ́ bòo hũn. Kɛ́ ɓɛ́ lò den yí yí hɔ́pe bòo lɛ ɛ́ hɔ́pe Dɔfĩn ɛ́ lɛ́ mí ɲunù nɛ mí ɓén lɛ́ ɓà ǹ wɛ̀. 40Dɔfĩn ɛ́ den sɛ́sɛ́a bòo bɔ̀bɛhɔ́ dɔ̀ kè bòohũn, ɛ́ Hɔ́ den ɛ́ yí wɛní nɛ ɓɛpe ɛ̀ vɛ tíiní pehɔ̀ ɲunù kɛ́ képe ɛ́ ɲɛùn mí wɛ̀.

Currently Selected:

Hebereɓɛ 11: bwj

Highlight

Copy

Compare