Filemɔn 1

Tìɛníkɛrɔ́

1Hɔ̀ iè ǹpe Pooli lɛ iè ɔ̀ kɛ̀sí nùún à Yiezu Kirisa tɔnlɔ́n lɛ ɛ́ nín tɛ́ bòo hũn àá kiè zuú Timote ɛ́ te lepe vɛ̃hṹ lɛ ɛ́ wĩ́ ɛ́ ke ɛ̀ lɛ́ kɔ́pe Filemɔn lɛ iè kiè ńtɛ́ɓánlɔ̀n nùún lɛ ké hɛ̀ wɛ cɛ̃̀un. Kɔ̀pe 2àá ɔ́ kìe hãá Apia àá ɔ́ Arisiipe lɛ páa kè lɔ̀n ɛ́ dàa ɛ́ hɔ̀ sɛrɔ́ ɛ̀ sɛ, àá ɓɛ́pe ńdɛsĩ̀riè lɛ wóò ɓen kóo ɓánlɔ̀n kɔ̀ yíe ɓɛ́kùi. 3Nɛ kìe Yàá Dɔfĩn àá ké Ɲunsɔ Yiezu Kirisa ɛ̀ wé hiì àá miɛ ɛ̀ ɓɛ̀ ɛ̀ lɛ́ hũn-wiɛ̀ miɛ ǹ.

Filemɔn waminu àá pie ńdɛsĩ̀nlɔ́ bòo

4Ń ɓen ɛ́ Dɔfĩn ɛ̀ hɛ̃nnin fúu ɛ̀ ǹ wóò nùún kɔ́pe Filemɔn bòo, ɛ̀ ǹ wóò dé hɔ́pe niǹ Dɔfĩn bɛrikɛ. 5Ń den ɲɛ́ bòo lɛ ɛ́ kɔ́ dàa dũmuasɛ̃̀ à Ɲunsɔ Yiezu Kirisa ǹ, àá bòo lɛ ɛ́ kɔ́ dàa wɛ ɓɛ́ Dɔfĩn nìɛ ɓɛ́kùi. 6Nín Dɔfĩn ɛ̀ hɛ̃nnin nɛ Hɔ lɛ́ ɛ̀ hɔ̀ ńdɛsĩ̀nlɔ́ lɛ ɛ́ kɔ́ lɔ̀nin àá kie ɛ̀ yí pànkɛ́ kɔ̀ viì, ɛ̀ kɔ̀ dàá dàń hɔ́ bɔ̀tente lɛ ɛ́ ké yú ké ńcɛɓánlɔ́ àá ɔ́ Kirisa hũn míkùi ɛ̀ zɛ̃́ní sãaní ɛ̀ lɛ́ ɓɛ́ nìnbirìe ǹ. 7Kɔ̀pe kìe zuú, lè wanminu lɛ ɛ́ kɔ́ dàa ɛ́ hɛ̀ lɛ́ tĩwiɛ̀ dɛ̀bɛhɔ́ àá mí tĩhiè mi ǹ, iè hɔ̀ lɛ ɛ́ kɔ́ hɛ̀ lɛ́ ɛ́ ɓɛ́ Dɔfĩn nìɛ tĩɛ̀ ɛ́ hɛ̀ kɛsí vi-cóoní.

Poli ɛ́ Filemɔn ɛ̀ hɛ̃nnin nɛ a tɛ̀ fí-e Oneziimu sãàní

8Ɛ́ kɛ̀amu, hɛ̀rí kɛ́ hɔ́ lɛ ɛ́ ké ńcɛɓánlɔ́ àá ɔ́ Kirisa ɛ́ lɛ́ ɛ́ ń te niǹte ɛ́ dɛ̀ hɔ̀ bòo lɛ ɛ́ kɔ́ sãawi ɛ̀ kɔ̀ wé ɛ́ bie ɛ́ lɛ́ kɔ ǹ, 9kɛ́ ń den yí nin wé hɔ́pe sí wɛ̀. Kɛ́ hɔ́ den iè bòo ɛ́ niǹ hɛ̃un kɔ ǹ lè wanminu bòo hũn. Ǹpe Pooli lɛ iè ɔ̀ nìkĩ́ihṹ àá bòo lɛ ɛ́ ń te dàa dɛ̃̀, ɛ̀ bĩní páa yán, ń lɛ wi le kɛ̀sí hũn kɛ̀a sáa lɛ à Yiezu Kirisa yènsénin, 10nín kɔ̀ hɛ̃nnin ɔ̀ Oneziimu#1.10 «Oneziimu» iè bòo ɛ́ ɓɛ́ nɛ «Piè tũ̀nú ɛ́ hɛ̀ wi cɛ̃̀un». bòo hũn, àpe lɛ ɛ́ wɔ́ niǹ yɛ̀nù lè kɛsí hũn hũ̀nún à Yiezu Kirisa bòo hũn. 11Hṹn àá híɛhɔ́ ɛ̀ piè tũ̀nú dɔ̀ ɛ́ hṹn mí kɔ́ viì wɛ̀. Kɛ́ kɛ̀a sáalɛ ɛ́ piè tũ̀nú ɛ́ wo wi npe àá kɔ́pe kè viì.

12Ɛ́ nin khũ̀aní-ɛ̀ ǹ à ɓen kɔ̀ viì, àpe lɛ ɛ́ ń hɛ̀ wɛ cɛ̃̀un kɛ̀a bòo á iè niǹ sɛnù dɔ̀. 13Ń den hṹn wɛ nɛ a kánsí niǹ sɛnù, ɛ̀ ǹ wóo tɔnkɛ a kɔ́pe kɔ̀ kṹun hũn, lɛ kɛ́ ń wo wi le kɛ̀sí hũn lè Bentĩnu buierɔ bòo hũn. 14Kɛ́ ń den yá cɛ̀ ɛ̀ ǹ wé bòo dɔ̀ kɛ́ ń yí dìe kɔ ǹ vé wɛ̀; bòo lɛ ɛ́ wé ɛ̀ hɔ̀ bɔ̀tente lɛ ɛ́ kɔ́ ɛ̀ wé ɛ̀ bí wé bòo ɛ́ nín kɔ̀ mɛ́mɛ́kɛ ɛ́ kɔ́ dàa kɔ wé hɔ́, kɛ́ kɔ́ ɛ̀ hán kɔ́ hũn ɛ̀ dàá wé hɔ́. 15Wɔ́ khɔn àpe Oneziimu iè wìe lɛ ɛ́ hṹn fɛ́rɛ lɔ́ kɔ́ sɛnù pɛ̃̀hṹ dìkíndíɛ hũn, bòo lɛ ɛ́ wé ɛ̀ kɔ̀ den wo bĩní khũ̀á yí-e lè pɛ̃̀hṹ lɛ ɛ́ yá vé hũn. 16Ɛ́ kɛ̀a sáalɛ á wo bĩniɛ yí wɔnù mí dòonún, kɛ́ á den yɛ̀rɛ́ bòo tṹ wɔnù cɛ̃̀un. À iè kìe zuú lɛ bòo ɛ́ hie cɛ̃̀un. Piè bòo ɛ́ hɛ̀ hie ǹpe ǹ cɛ̃̀un, kɛ́ piè bòo ɛ́ lò den ɓén hìení kɔ́pe ǹ cɛ̃̀un ɛ́ pɔní iè hɔ̀ lɛ á iè nìnbírɔ àá lò iè ńdɛsĩ̀rɔ.

17Ɛ́ kɛ́ kɔ́ ɓen ɛ́ nìn líi àá mì pàá, ɛ̀ kɔ̀ tɛ̀ fí-e kɛ̀a bòo ɛ́ hɔ́ iè ǹpe ɛ́ kɔ́ fɔ́. 18Kɛ́ á wɔ́ khɔn àá kɔ bòo dɔ̀ hũn, tàá kɛ́ kɔ́ kiè ɛ́ wi è ǹ, ɛ̀ kɔ̀ bè hɔ̀ niǹ lɔ̀n, ɛ̀ ǹ sàaní hɔ́ ɛ̀ lɛ́ kɔ ǹ. 19Ǹpe Pooli ɛ́ te hɔpe biehĩ́ sɔ lɛ ɛ́ siɛ ɛ́ wĩ́ àá niǹ kùrú núnún. Ɛ́ ń ɓén khũ̀á ɛ́ sàaní lépe kiè sɔ ɛ́ lɛ́ kɔ̀ ǹ, ɛ̀ ǹ lò yá cɛ̀ ɛ̀ ǹ liení kɔ nɛ kɔpe àá kɔ́ mɛkɛ̃nì míkùi ɛ́ bòo sɛ̃̀ mi ǹ wɛ̀. 20Ũun, kìe zuú, nín kɔ̀ hɛ̃nnin nɛ kɔ wé hɔ́ pesí ɛ̀ lɛ́ mi ǹ kè Ɲunsɔ bòo hũn. Nɛ kɔ lɛ́ ɛ̀ niǹ tĩì ɛ̀ kań vìcóoní kè ńcɛɓánlɔ́ àá ɔ́ Kirisa bòo hũn.

21Hɔ̀ iè hɔ̀ lɛ ɛ́ ń dũ kɛ́ kɔ́ wóò tɛ̀ ɲí niǹ bòo ɛ́ ń dàa ɛ́ lèpe vɛ̃hṹ lɛ ɛ̀ wĩ́ ɛ̀ lɛ́ kɔ ǹ. Ɛ́ ń dṹ kɛ́ kɔ́ ɓén wé ɛ́ pɔní hɔ́pe lɛ ɛ́ bie lɛ́ kɔ ǹ. 22Ɛ̀ bĩní páa yán, ɛ́ kɔ́ wo sɛ́sɛ́ lé danlén dɔ̀ àá yìn-cóoní ɛ̀ dàa hìe mi, iè hɔ̀ lɛ ɛ́ ń den dũmuasɛ̃̀ nɛ mi Dɔfĩn hɛ̃nnɛ̀ pànkɛ́ ɛ́ ɓén lɛ́ ɛ́ ɓɛ́ ɛ́ leń mi ɛ́ fùansí nin ɛ́ lɛ́ miɛ ǹ.

Vieníkɛlán tìɛníkɛrɔ́

23À Epafaraase lɛ wi le kɛ̀sí hũn àá mi à Yiezu Kirisa bòo hũn ɛ́ kɔ̀ tìɛníkɛnin, 24ɛ̀ ɓɛ̀ kìe ńtɛ́ɓánlɔ̀n nìɛ Marike àá Arisitaake àá Demaasi àá liike ɛ́ lò ɓiɛ̀ ɛ́ kɔ̀ tìɛníkɛnin. 25Nɛ a Ɲunsɔ Yiezu Kirisa hìi ɛ̀ kań àá miɛ.

Currently Selected:

Filemɔn 1: bwj

Highlight

Copy

Compare