Kalaasi Siè 5

Mì bí bĩní khũ̀á ɛ̀ wé hɔ́ làndɛ́ wɔhĩ́ wɛ̀

1À Kirisa ɛ́ fueniɛ kie ǹ, ɛ́ ké dàa te kéte àá bɔ̀bín. Ɛ́ mí wo fɛ́sí dìń sãaní ɛ̀ mì dàá bí bĩní khũ̀á vɛ zɔ hɔ́ wɔnyáamu hũn wɛ̀. 2Mì tɛ́ mí ɲɛkɛ̃̀a sãàní: ǹpe Pooli temu ɛ́ bie ɛ̀ lɛ́ miɛ ǹ nɛ kɛ́ mí lɛ́ míte ɛ́ ɓɛ́ fũ̀a, hɔ́rɔsí à Kirisa bòo lɛ á wɔ́ mí bòo hũn ɛ́ ɲún mí wɛ̀. 3Ɛ́ nin bĩní khɛ́ hɔ́ ɛ̀ lɛ́ miɛ ǹ nɛ nìnbírɔ yée nìnbírɔ lɛ ɛ́ lɛ́ míte ɛ́ ɓɛ́ fɛ̃̀, ɛ̀ ɓàasɔ ɛ́ fɔ́ɓáǹ à wé hɔ́ làndɛ́ bòo lɛ ɛ́ hɔ́ khɛ́ míkùi ɛ̀ vɛ tíiní ɲunù. 4Mìpe lɛ ɛ́ cɛ̀ nɛ hɔ làndɛ́ ɛ̀ lɛ́ ɛ̀ mì cã̀aní Dɔfĩn híɛhɔ́, mí sankɛa ɓán àá Kirisa, mí khɔn hɔ̀ Dɔfĩn hiì ǹ. 5Ɛ́ képe kè viì, ké bɔ̀ kè tĩɛ̀ Dɔfĩn lɔ̀n nɛ ɛ́ ɓén lɛ́ ɛ́ ké cã̀aní mí híɛhɔ́. Ɛ́ sí iè hɔ̀pe lɛ ɛ́ ké ɛ́ hìé àá ńdɛsĩǹnlɔ́ lè Mɛkɛ̃n-Sãanu pànkɛ́ hũn. 6Iè hɔ̀ lɛ kɛ́ ké ɓen iè dìcóoní àá Yiezu Kirisa, ɛ̀ hɔ̀ ńfĩ̀ tàá hɔ̀ ńbífĩ̀ ɛ́ yí temu bòo hie wɛ̀. Kɛ́ hɔ́ lɛ bòo hie ɛ́ iè hɔ̀ ńdɛsĩ̀nlɔ́ lɛ temu wóò lɛ́ ɛ̀ kè dàá wɛní ɓɛ́ nìnbirìe.

7Mìpe lɛ ɛ́ hṹn sãa lè Dɔfĩn wṹn lɔ̀n, á iè wie ɛ́ te miɛ ɓaa dĩ̀niɛ ɛ́ mí dàa bĩniɛ yá hɔ̀ bɔ̀berà bòo ɛ̀ ɲí? 8Hɔ̀pe bòo lɛ ɛ́ ɓɛ́ nìnbirìe ɛ́ khɛ́ lɛ́ miɛ ǹ ɛ́ dàa sun mì wṹn ɛ́ yí lé Dɔfĩn lɛ te miɛ vɔn viì wɛ̀. 9Ɓɛ̀ nìnbirìe ɛ́ wóò nɛ hɔ ɲɛfĩni bìcínbóo ɛ́ wóò lɛ́ ɛ̀ hɔ̀ dũmu lɛ kań míkùi ɛ̀ pòó yòó#5.9 Lèpe wĩ̀i lɛ ɛ́ ɓɛ́ wóò wĩ̀ nɛ ɲɛfĩni bìcínbóo ɛ́ wóò lɛ́ ɛ̀ hɔ̀ dũmu míkùi ɛ̀ pòó yòó iè bòo ɛ́ ɓɛ́ nɛ hɔ bɔ̀làahṹ yɛ̀rɛ́ hṹn kɛ fĩ́i kɛ̀a ńɓuò ɛ̀ hɔ̀ wóò yáakɛ bòo míkùi.. 10Kɛ́ á Ɲunsɔ ɛ́ lɛ́ ɛ́ ń dũmuasɛ̃̀ miɛ ǹ. Ɛ́ ń dũ kɛ́ mí hũn-vànminù ɛ́ yá ɓén wé mí dòonún àá hɔ́ bɔ̀berà lɛ ń kɛrɛa àá miɛ wɛ̀. Kɛ́ ɓɛ́ nìnbirìe lɛ ɛ́ mì kánkɛ́ ɓɛ́kùi, hɛ̀rí ɛ̀ ɓɛ̀ yɛ̀rɛ́ hṹn bɛ́sɔ, ɛ̀ ɓɛ̀ ɓén yí ɓɛ́ ɲún hũn tìerɔ́ hɔ̀ Dɔfĩn híɛhɔ́. 11Kìe zɛ̀ɓɛ̀, kɛ́ hɔ́ hɛ̀ hṹn bɔn kɛ́ ńpe ɛ́ wóò bie nɛ ɓɛ nìnbirìe ɛ́ fɔ́ɓán ɛ̀ ɓɛ̀ wóo fũ̀a, ɛ̀ hɔ̀ iè ńɓùo ɛ́ ɓɛ́ dàa pɛ́wi ɛ́ niǹ lɔ̀n ɛ̀ biení? Kɛ́ ń hṹn hɔ̀ bie, ɛ́ nɛ à Kirisa bòo lɛ á dàa húrun lè ɓáalén dãanù lɔ̀n, lɛ ɛ́ nín bòo ɛ̀ bie ɛ́ hṹn yá ɓén ɲí ɓà ǹ wɛ̀. 12Ɛ́ ɓɛ́pe lɛ ɛ́ mì kánkɛ́ kɛ̀amu nɛ mi fũ̀a ɛ́ ɓen wɛ ɓɛ́te ɛ̀ ɓɛ̀ làn vɛ lɛ́ ɓɛ́te nɛ ɓɛ mun.

13Kìe zɛ̀ɓɛ̀, Dɔfĩn ɛ́ vɔn miɛ bòo lɛ ɛ́ wé ɛ̀ mì teń míte. Kɛ́ mí bí wóo bie nɛ hɔ lɛ ɛ́ mí te míte, ɛ́ mí wo dɛ̀ mì nìnbí-yáamu bòo lɛ ɛ́ hɔ́ wɛ ɛ́ wé wɛ̀. Ńɓùé; kɛ́ mí den wɛní ɓán ɛ̀ mì wóo síiní ɓán. 14Iè hɔ̀ lɛ á Moyiize làndɛ́ bòo lɛ ɛ́ hɔ́ khɛ́ míkùi ɛ́ wi le bienù dìcóoní lɛ hũn: Kɔ́ fɔ́ɓán ɛ̀ kɔ̀ wɛní mì ńkɔnù kɛ̀a bòo lɛ ɛ́ kɔ́ dàa wɛ kɔ kùrú sɛ̃́hṹ. 15Kɛ́ mí den ɓen ɛ́ wé kɛ̀a ie ɓɛ bìlaàsiè lɛ wóò dũ̀akɛ ɓán ɛ̀ wũmɛkɛ, ɛ̀ mì pɛ mite bòo; kɛ́ bòo dàa mí, ɛ̀ mì iè pe wo ɛ́ yáakɛ ɓán lò!

Mì fùansí nɛ le Mɛkɛ̃n-Sãanu ɛ̀ teń mí híɛhɔ́ ɛ̀ dí

16Ɛ́ nin khɛ́ hɔ́ lɛ́ miɛ ǹ nɛ mi fùansí nɛ lé Mɛkɛ̃n-Sãanu ɛ̀ teń mí híɛhɔ́ dí; kɛ́ mí wɔ́ hɔ́, ɛ́ mí yá bĩní ɛ́ bè mì nìnbí-yáamu bòo lɛ hɔ wɛ máahṹ wɛ̀. 17Iè hɔ̀ lɛ ɛ́ hɔ́ nìnbí-yáamu bòo lɛ ɛ́ hɔ́ wɛ ɛ́ wi mí dòonún àá lé Mɛkɛ̃n-Sãanu bòo lɛ ɛ́ lé wɛ, ɛ̀ lè Mɛkɛ̃n-Sãanu bòo lɛ lé wɛ ɛ́ ɓiɛ̀ wi mí dòonún àá hɔ́ nìnbí-yáamu bòo lɛ ɛ́ hɔ wɛ. Hɔ̀ hɛ̀ wi mí-dòohĩ́ dòohĩ́ cɛ̃̀un, ɛ́ kɛ̀amu, ɛ́ mí wo yí dɛ̀ hɔ̀ bòo lɛ ɛ́ mí wɛ ɛ́ yá wé wɛ̀. 18Kɛ́ lé Mɛkɛ̃n-Sãanu ɛ́ ɓen te mi híɛhɔ́ ɛ́ dú, hɔ́rɔsí ɛ̀ mì wo bĩniɛ mí hɔ́pe làndɛ́ núnú hũn wɛ̀.

19Ɛ́ hɔ́ nìnbí-yáamu bòo lɛ ɛ́ hɔ́ wɛ ɛ́ ké lò wo dũ: hɔ̀ wóò lɛ́ ɛ̀ ɓɛ̀ nìnbirìe ɛ̀ daaníkɛ ɓán kũǹ, ɛ̀ ɓɛ̀ wé hɔ́ yìrá bòo, ɛ̀ ɓɛ̀ wé hɔ́ lùwiè bòo, 20ɛ̀ ɓɛ̀ ɓàaní hɔ́ wɛ̃̀hɛ̃ ǹ, ɛ̀ ɓɛ̀ wé hɔ́ híenú bòo, ɛ̀ ɓɛ̀ hán ɓán, ɛ̀ ɓɛ̀ fi ɓán hũn, ɛ̀ ɓɛ̀ dí lé yanlienú ɓán hũn, ɛ̀ ɓɛ̀ tĩɛ̀ ɛ̀ cĩ̀ ɓán, ɛ̀ ɓɛ̀ dí ńbíyaanún ɓán hũn, ɛ̀ ɓɛ̀ sankɛ ɓán, ɛ̀ ɓɛ̀ wiekɛ ɓán, 21ɛ̀ ɓɛ̀ yìe ɛ̀ lé ɓán bòo ǹ, ɛ̀ ɓɛ̀ wé ɓɛ́ ɲɛkhĩɛɓɛ̃́ɓɛ́, ɛ̀ ɓɛ̀ dí dí ɛ̀ dɛ̀ khíi. Ɛ̀ ɓɛ̀ wóò bĩní wé hɔ́ bòo dɔ̀ lɛ lɔ́ɓán àá hɔ́pe sí. Ɛ́ nín ɲì mì zeǹ lɔ̀n kɛ̀a bòo lɛ ɛ́ ń dàa sɛ̃̀nɛ́hã̀ khɛ́ hɔ́ nɛ ɓɛpe nìnbirìe lɛ wóò wé hɔ́pe bòo sɔ sí ɛ́ yá ɓén yí ɓɛ́ kaǹlén Dɔfĩn bɛ́záanú hũn wɛ̀.

22Kɛ́ lépe Mɛkɛ̃n-Sãanu bòo lɛ ɛ́ lé wóò wé ɛ́ iè lè wanminu àá lé tĩwiɛ àá lé hũn-wiɛ̀ àá hɔ́ hũn-hĩ̀nlɔ́ àá hɔ́ nìcã̀anírɔ mu àá hɔ́ sãamu àá lé ɲún cã̀anírɔ́, 23àá hɔ́ te wuawinírɔ́ àá hɔ́ te ɓaàrɔ́. Hɔ̀ làndɛ́ ɛ́ yí pĩ́ hɔ́pe sí bòo wɛ̀. 24Ɓɛ̀ nìnbirìe lɛ bòo ɛ́ sɛ̃̀ à Yiezu Kirisa ǹ ɛ́ ɓáa ɓɛ́ kùrú nìnbí-yáamu àá pehɔ̀ bòo lɛ ɛ́ hɔ́ wɛ cɛ̃̀un àá pehɔ̀ pɔnù bòo lè ɓáalén dã̀anù lɔ̀n. 25Ɛ́ hɔ́ lɛ ɛ́ lé Mɛkɛ̃n-Sãanu ɛ́ temu lɛ́ ɛ́ ké dàa wi ke mɛkɛ̃nì hũn, ɛ́ mí nɛ ke fùansí lépe Mɛkɛ̃n-Sãanu sɔ ǹ ɛ̀ lè teń ké híɛhɔ́ ɛ̀ dí. 26Ɛ́ mí bí nɛ ke wé yèncɛ̀riè, ɛ̀ wóo fi ɓán hũn, ɛ̀ yìe ɛ̀ wóò lé ɓán bòo ǹ wɛ̀.

Currently Selected:

Kalaasi Siè 5: bwj

Highlight

Copy

Compare