Kalaasi Siè 4

1Ɛ́ lɛ iè hɔ̀ bòo lɛ ɛ́ nín cɛ̀ ɛ́ nin bie ɛ̀ lɛ́ miɛ ǹ: à yɛ̀nù lɛ te ɓá yàá kĩ́ɛ ɛ́ ɓén mìí, pɛ̃̀hṹ lɛ kɛ́ á yìe ɛ́ ɲɛùn yí pìɛ́nin, à kɛ́ kɛ̀a wɔ̀nù bòo sí, hɔ́rɔsí kɛ́ hɔ́ bòo míkùi ɛ́ lò bòo sɛ̃̀ à ǹ. 2Ɛ́ ɓɛ́ den wóò dí-e ɓɛ̀ nìnbirìe dɔ̀ núnú hũn ɛ̀ ɓɛ̀ teń bòo húi, ɛ̀ húi piè yírɛ́ bòo fúu ɛ̀ vɛ dɛ̃ le yìi lɛ ɛ́ ɓà yàá ɛ́ zɛ̃́niɛ. 3Ɛ́ sí iè pe ɛ́ hɔ́ ɓiɛ̀ dɛ̃̀ kɛ̀amu àá képe. Pɛ̃̀hṹ lɛ ɛ́ ké hṹn ɲɛùn dũ Dɔfĩn, ɛ̀ kè hṹn dɛ̃̀ kɛ̀a nìɛ lɛ yìe ɲɛùn yí pìɛ́nín wɛ̀. Ɛ́ ké wo hṹn iè lè dímíɲɛ́ síbínú pànkɛ́ wɔhĩ́. 4Kɛ́ hɔ́ lɛ ɛ́ lé yìi lɛ ɛ́ Dɔfĩn lerɛ ɛ́ van dɛ̃un, ɛ́ Hɔ́ tɔrɛ mí Zuú á ɓɛrɛ tɔn lɔ́ hṹnu dɔ̀ ǹ, ɛ́ hĩ́nà tú kɛ́ á ɔ̀ Moyiize làndɛ́ ɛ̀ mɛ̀ndɛ̃, 5bòo lɛ ɛ́ wé à fuení ɓɛ́ lɛ ɛ́ wi hɔpe làndɛ́ wɔnyáamu hũn, ɛ̀ kè dàá yí wé Dɔfĩn nìɛ. 6Ɛ́ hɔ́ iè hɔ̀ lɛ ɛ́ mí iè Dɔfĩn nìɛ ɛ́ hɔ́pe Dɔfĩn dàa tɔrɛ́ mí Zuú Mɛkɛ̃ni ɛ́ lé ɓɛrɛ kè tĩɛ̀ hũn, ɛ́ zɔn lɛ́ ɛ́ ké dàa ɛ́ bénkɛ ɛ́ nɛ: «Abba!», iè bòo ɛ́ ké nɛ «kìe Yàá!#4.6 Dɔfĩn Zuú Yiezu Mɛkɛ̃ni àá hɔ́pe Dɔfĩn Mɛkɛ̃ni ɛ́ iè dìcóoní.» 7Ɛ́ mí wo bĩniɛ yí wɔhĩ́ kɛ́ mí iè hɔ̀pe Dɔfĩn nìɛ. Ɛ́ hɔ́ lɛ ɛ́ mí iè Dɔfĩn nìɛ, ɛ́ hɔ́ bòo lɛ ɛ́ hɔ́ Dɔfĩn ɛ́ lɛ́ mí ɲunù nɛ mí ɓén lɛ́ mí nìɛ ǹ ɛ́ Hɔ́ ɓén lɛ́ miɛ ǹ.

Bòo lɛ ɛ́ Pooli kòo dàa ɛ́ hè ɓɛ̀ Kalaasi siè bòo hũn

8Hṹn àá híɛhɔ́ ɛ̀ mì yí dũ Dɔfĩn wɛ̀. Ɛ́ mí wo hṹn wɔ́ lépe dímíɲɛ́ bòo lɛ ɲún mí máahṹ ɛ́ mí bɔ̀, hɔ̀pe lɛ ɛ́ lò yí Dɔfĩn wɛ̀. Ɛ́ mí wo hṹn iè pehɔ̀ wɔhĩ́. 9Kɛ́ kɛ̀a sáalɛ ɛ́ mí wo dũ Dɔfĩn, tàá ń hṹn sãawi ɛ̀ ǹ bie nɛ Dɔfĩn ɛ́ te miɛ dũ. Ɛ́ mí wo wiɛ dàa bĩniɛ khũ̀a ɛ́ van bɔ̀ hɔ̀pe bòo sɔ sí máahṹ, hɔ̀pe lɛ pànkɛ́ mí ɛ̀ hɔ̀ lò yí loo yán? Mí biè wɛ ɛ́ mii bĩní khũ̀á wé pehɔ̀ wɔhĩ́ yée? 10Hɔ̀ wihĩ́ dɔ̀ àá hɔ̀ ńpĩ́ihɛ̃ dɔ̀ àá hɔ́ pɛ̃̀hɛ̃ dɔ̀ àá hɔ́ lɔ́líe dɔ̀ ɛ́ mí wóò bè bòo ɛ̀ hièní. 11Ɛ́ hɔ́pe lɛ ɛ́ mí wé ɛ́ hɛ̀ niǹ hũn ɛ̀ yenkɛ nɛ ɓuɔ́ ɛ̀ niǹ tɔnlɔ́ lɛ ɛ́ ń tɛ́ mí bòo hũn ɛ́ wé kã́amáa.

12Kìe zɛ̀ɓɛ̀, nín mì hɛ̃nnin nɛ mi wé kɛ̀a mi kɛ̀a bòo lɛ ɛ́ ń dàa ɓiɛ̀ ɛ́ wé kɛ̀a miɛ. Mí yí wé khe àá mi wɛ̀. 13Mí dũ kɛ́ hɔ́ hán bòo lɛ ɛ́ ń dàa hàarí ɓɛrɛ khɛ́ lé Bentĩnu ɛ́ lɛ́ miɛ ǹ, ɛ́ lé hàarí iè niǹ duiè ɛ́ temu wɔ́ ɛ́ dàa dɛ̃̀ mì viì. 14Niǹ tɛkɛ̀a ɛ́ hàarí húirɔ́ ɛ́ yí tĩ wɛ̀. Kɛ́ mí pɛ́wi ɛ́ yí pĩ́ mi ɛ̀ mì lò yí ɲìí mi wɛ̀. Kɛ́ mí den perɛ mi ǹ kɛ̀a Dɔfĩn mɛlɛkɛ, mí perɛ mi ǹ kɛ̀a ɔ̀pe Yiezu Kirisa kùusɔ. 15Mí hɛ̀ hàarí wɛ mite cɛ̃̀un. Ń dũ sãàniɛ nɛ kɛ́ hɔ́ hàarí hṹn wé yínin, nɛ mì hàarí vuakɛa mì yìe ɛ́ khie ɛ́ lɛ́ mi ǹ. Ɛ́ lépe mì tĩwiɛ̀ sɔ ɛ́ wi àá yí kɛ̀a sáalɛ? 16Ɛ́ kɛ̀a sáalɛ ɛ́ nin wìe ɛ́ wo wɔ́ mí ńbíyanle iè hɔ̀ lɛ ɛ́ ń munkɛa hɔ̀ bɔ̀berà ɛ́ lɛ́ miɛ ǹ?

17Ɛ́ ɓɛ́pe nìɛ sɔ lɛ ɛ́ bie bòo ɛ́ den ɛ́ kĩ̀nkĩ́ mí lɔ̀n kɛ́ hɔ́ lò den yí bɔ̀tente ɛ́ ɓɛ́ ɛ́ cɛ̀ àá miɛ wɛ̀. Ɓɛ̀ den ɛ́ cɛ̀ ɛ́ ɓɛ ɛ̀ fán miɛ ɛ̀ lé mi ǹ, bòo lɛ ɛ́ wé ɛ̀ mì khũ̀á khíi cɛ mi kuò peɓɛ̀ bòo hũn. 18Hɔ̀ pe wo sãa ɛ̀ nìnbírɔ ɛ̀ wóo cɛ mí kuò hɔ̀ bɔ̀tente wénlɔ́ hũn pɛ̃̀hṹ míkùi hũn, kɛ́ hɔ́ yí fɔ́ɓán ɛ̀ hɔ̀ wóo wé lé yìi lɛ ɛ́ ń wi àá miɛ mí dòonún hũn wɛ̀. 19Niǹ nìɛ, niǹ lɔ̀n ɛ́ sĩ̀n be mi bòo hũn kɛ̀a ie hṹnu lɛ ɛ́ te bòo sí. Ɛ́ sí iè pe ɛ́ hɔ́ mii wé kɛ̀amu fúu kɛ́ yí bòo ɛ́ mí van dɛ̃̀ kɛ̀a ɔpe á Kirisa kùusɔ. 20Ń den hɛ̀ hṹn cɛ̀ cɛ̃̀un ɛ̀ ǹ kań àá miɛ hɔ̀pe lɛ lɔ̀n, ɛ̀ ǹ dàá dàń niǹ tɛmu ɛ̀ siɛní ɛ̀ dàá khɛ́ àá miɛ. Ɛ́ niǹ kuò ɛ́ hɛ̀ ɛ́ hè mì bòo hũn àá bɔ̀bín.

Akaare àá Sara bòo lɛ ɛ́ hɔ́ ɛ́ zɛ̃́ní

21Ɛ́ nin dìe miɛ ǹ, mìpe lɛ ɛ́ hṹn cɛ̀ ɛ̀ mí kań ɔ́ Moyiize làndɛ́ núnú hũn, mí yá hɔ́pe làndɛ́ sɔ bòo lɛ ɛ́ hɔ́ khɛ́ ɛ̀ ɲí? 22Hɔ̀ wɛ̃́ lé Dɔfĩn bienù vɛ̃hṹ hũn ɛ́ nɛ làa: À Abarahaamu ɛ́ hàarí yú bɛ́zikíini bìɛ ɲu: à wìcóoní á yú àá wɔn-hṹnu lɛ yèrè ɛ́ ɓɛ́ nɛ Akaare, à wìcóoní á yú àá ɓá hṹnu lɛ pe yí wɔnù lɛ yèrè ɛ́ ɓɛ́ nɛ Sara. 23Á wɔn-hṹnu zuú ɛ́ tɔn ɛ́ ɓáaɓán àá nìnbírɔ tĩi bòo, à hṹnu lɛ yí wɔnù zuú ɛ́ pe tɔn ɛ́ ɓáaɓán àá Dɔfĩn ɲunù lɛ ɛ́ Hɔ́ hàarí lɛ́ á Abarahaamu ǹ. 24Lèpe bienù sɔ lɛ ɛ́ hɛ̀ ɲún lì cɛ̃̀un. Ɓɛ̀pe hã́a bìɛ ɲu sɔ ɛ́ iè ɲɛ̀bíe bɔ̀nbɔ̀ ɲu bòo ɛ́ ɓɛ́ ɛ́ zɛ̃́ní. À Akaare ɛ́ iè hɔ̀ làndɛ́ lɛ ɛ́ Dɔfĩn hàarí lɛ́ lé Sinayi ɓukìe lɔ̀n bòo á ɛ́ zɛ̃́ní. Ɛ́ ɓɛ́ nìnbirìe lɛ ɛ́ wi hɔ́pe làndɛ́ núnú hũn ɛ́ iè wɔhĩ́ kɛ̀a iè pe Akaare àá mí nìɛ bòo sí. 25Ápe Akaare sɔ iè lè Sinayi ɓúkìe lɛ wi hɔ Arabii pɛ̃̀hɛ̃ hũn bòo á ɛ́ zɛ̃́ní, à lò bĩniɛ iè hɔ̀pe zoòni lɛ Zerizalɛɛmu lóo bòo á ɛ́ zɛ̃́ní, iè hɔ̀ lɛ ɛ́ hɔ́pe Zerizalɛɛmu àá mí nìɛ ɓɛ́kùi ɛ́ wi hɔ làndɛ́ wɔnyáamu hũn. 26Kɛ́ lé Zerizalɛɛmu lɛ yòó wi hɔ hóohũn ɛ́ pe yí wɔnù wɛ̀. Ɛ́ képe iè lèpe Zerizalɛɛmu sɔ nìɛ kɛ̀a bòo lɛ ápe Sara nìɛ dàa yí wɔhĩ́ wɛ̀. 27Ɛ́ hɔ́ ɛ́ wɛ̃́ lé Dɔfĩn bienù vɛ̃hṹ hũn ɛ́ nɛ làa:

«Wɛní kɔ́te, kɔ̀pe hṹnu lɛ yá te!

Wũamɛ kɔ tĩwiɛ̀ wũamaà,

Kɔ̀pe lɛ ɛ́ yí mi hɔ tenlɔ́ lɔ̀nbiè ɛ́ yí mi,

Iè hɔ̀ lɛ á hṹnu lɛ ɛ́ ɓɛ́ pɛ̃́ tɛ́viɛniɛ nìɛ ɛ́ ɓén buòní,

Ɛ́ pɔní-ɛ lɛ ɛ́ dàa ɔ bɛ́rɔ nìɛ.»

28Ɛ́ mípe kìe zɛ̀ɓɛ̀, mí iè Dɔfĩn nìɛ lɛ tɔn ɛ́ ɓáaɓán àá Dɔfĩn ɲunù lɛ ɛ́ Hɔ́ lɛ́, kɛ̀a ie Yizaake tenlɔ́ bòo sí. 29Ɛ́ kɛ̀a bòo lɛ ápe zuú lɛ hàarí tɔn ɓáaɓán àá ɔ́ nìnbírɔ tĩì bòo ɛ́ hàarí ɛ́ ɔ̀pe lɛ ɛ́ tɔn àá lé Mɛkɛ̃n-Sãanu pànkɛ́ lɔ̀n biení, ɛ́ sí iè pe ɛ́ hɔ́ pɛ́wi ɓiɛ̀ dɛ̃̀ kɛ̀amu hɛ̀rí kɛ̀a zoòni lɛ. 30Ɛ́ Lé Dɔfĩn bienù ɛ́ nɛ wɛrɛ̀? Lè ɛ́ nɛ làa: «Ɲɛ a wɔn-hṹnu àá mí zuú, iè hɔ̀ lɛ ápe wɔn-hṹnu zuú ɛ́ yí sãawi à lè ɓá yàá kĩ́ɛ ǹ àá ɔ́ hṹnu lɛ yí wɔnù zuú wɛ̀.» 31Ɛ́ kɛ̀amu, mìpe kìe zɛ̀bɛ̀, kèpe yí-e wɔn-hṹnu nìɛ kɛ́ ké iè ɔ̀ hṹnu lɛ pe yí wɔnù nìɛ.

Currently Selected:

Kalaasi Siè 4: bwj

Highlight

Copy

Compare