Kalaasi Siè 2

Hɔ̀ ńkooɓánlɔ̀n lɛ wɔ́ hɔ́ Zerizalɛɛmu lóo hũn bòo

Bɔw 15.1-29

1Ɛ́ lɔ́líe pírú àá bɔ̀nbɔ̀ nɛ́ ɛ́ van khie, ɛ́ Baranabaasi ɛ́ bɔ̀ɓán àá mi ɛ́ dàá bĩniɛ yòó van hɔ̀ Zerizalɛɛmu, ɛ̀ ǹ lò bĩniɛ fɔ́ á Tite á bɔ̀ɓán àá mi. 2Dɔfĩn ɛ́ temu hàarí zɛ̃́niɛ lɛ́ mi ǹ nɛ n yòó vɛ ɛ́ ń dàa yòó van. Ɛ́ ń wo van munkɛa lè Bentĩnu lɛ ɛ́ nín buie ɓɛ nìnbirìe lɛ yí ɓɛ́ Zuifuɓɛ tĩ́ihṹ ɛ́ lɛ́ ɓà ǹ. Ɓɛ̀ iè ɓɛ̀pe ńdɛsĩ̀rìe hándíe ɓɛ́ dòonún ɛ́ ń munkɛa lè ɛ́ lɛ́ nin. Ń den hàarí yá cɛ̀ nɛ niǹ tɔnlɔ́ lɛ ɛ́ ń tɛ́ khíiniɛ àá hɔ́ lɛ ɛ́ nín tɛ́ ɛ̀ wé kã́amáa wɛ̀. 3Hɛ̀rí àpe Tite lɛ ɛ́ hàarí bɔ̀ɓán àá mi kɛ́ á lò iè kɛrɛkiɓɛ biɛ̀ ɛ́ ɓɛ́ yí mɛmɛ́kɛ nɛ á fĩ̀ wɛ̀. 4Hɔ́rɔsí ɛ̀ ɓɛ́ ɓúo ńdɛsĩ̀riè dɔ̀ ɛ́ lò píɛkɛasí wi ke tĩ́ihṹ ɛ́ hàarí wɛ nɛ a fĩ̀. Ɓàasiè sɔ ɛ́ tànkɔ̀niɛ ɛ́ zɔn kè tĩ́ihṹ ɛ́ nɛ ɓɛ́ ɛ̀ zɔ mi hɔ bòo lɛ ɛ́ ké dàa te kete à Yiezu Kirisa viì, ɛ̀ ɓɛ̀ dàá khũ̀aní kiè ǹ ɛ̀ vɛ dé hɔ́ làndɛ́ wɔnyáamu hũn. 5Ɛ́ ké yí fùansí ɓà ǹ ɛ̀ ɓɛ̀ wé hɔ́ hùúu, bòo lɛ ɛ́ wé ɛ̀ lè Bentĩnu lɛ iè bɔ̀berà ɛ̀ dàá kań mí tĩ́ihṹ fúu. 6Ɛ́ ɓɛ́pe lɛ ɛ́ ɓɛ́ nìnbirìe wóò líi àá nìɛ lɛ ɲúuhɛ̃ lì (ɛ̀ wé nìɛ lɛ ɲúuhɛ̃ lì tàá ɛ̀ ɓɛ̀ bí wé nìɛ lɛ ɲúuhɛ̃ lì, ɛ̀ hɔ̀ yí cɛrɛkɛa mi, iè hɔ̀ lɛ ɛ́ Dɔfĩn ɛ́ yáà wiekɛ nìnbirìe wɛ̀), ɛ́ ɓɛ́pe nìɛ sɔ ɛ́ yí yòó sĩiní bòo bɔ̀ɓuɛ̀ dɔ̀ niǹ kɛ̀ránlɔ́ lɔ̀n wɛ̀. 7Kɛ́ ɓɛ́ den dũnɛ kɛ́ Dɔfĩn ɛ́ dɔ́ lé Bentĩnu niǹ núnún hũn nɛ vɛ buie ɛ̀ lɛ́ ɓɛ́ nìnbirìe lɛ yí ɓɛ́ Zuifuɓɛ ǹ, kɛ̀a bòo lɛ ɛ́ Hɔ́ dàa ɓiɛ̀ dɔ́ lé à Piɛre núnú hũn nɛ a vɛ buie lɛ́ ɓɛ́ Zuifuɓɛ ǹ. 8Iè hɔ̀ lɛ ɛ́ hɔ́pe Dɔfĩn lɛ ɛ́ wɔ́ á Piɛre àá mí tɔnkɛrɔ nɛ a vɛ ɓɛ Zuifuɓɛ viì, ɛ́ lò ɓiɛ̀ te nin wɔ́ àá mí tɔnkɛrɔ nɛ n vɛ ɓɛ nìnbirìe lɛ yí ɓɛ́ Zuifuɓɛ viì. 9Ɛ́ Zaake àá Piɛre àá Zãn lɛ ɛ́ ɓɛ́ ńdɛsĩ̀riè ɛ́ líi àá ɓɛ́ hándíe lɛ ɲúuhɛ̃ lìi, ɛ́ dũnɛ kɛ́ Dɔfĩn àá mí hiì ɛ́ te hɔ tɔnlɔ́ sɔ ɛ́ dɔ́ niǹ núnú hũn, ɛ́ ɓɛ́ zɔn wo koo ɓɛ́ níhĩ́ ǹpe àá Baranabaasi níhĩ́ hũn ɛ́ dàa zɛ̃́niɛ kɛ́ peɓɛ̀ ɲunù ɛ́ iè dìcóoní àá kie. Ɛ́ ké wo ɲɛ́ ɓán nɛ kepe ɛ́ sãawi ɛ̀ kè tɛ́ ɓɛ́lɛ yí ɓɛ́ Zuifuɓɛ tĩ́ihṹ, ɛ̀ ɓɛpe ɛ̀ ɓiɛ̀ tɛ́ ɓɛ́ Zuifuɓɛ tĩ́ihṹ. 10Kɛ́ bɔ̀cóoní dɔ̀ iè pe ɛ́ ɓɛ́ hɛ̃nnɛ kè vìi: ɓɛ̀ nɛ ke wóo liení ɓɛ́ nìkherà lɛ ɛ́ wi ɓɛ́ Dɔfĩn zĩhĩ́ɛ hũn bòo. Ɛ́ sí iè pe bòo lɛ ɛ́ ń ɓɛ́ɓɛ́anin ɛ́ wé.

Bòo lɛ ɛ́ Pooli ɛ́ dàa wũ̀aniɛ Piɛre Antiɔsi lóo hũn

11Ɛ́ pehɔ̀ máahṹ, ɛ̀ Piɛre ɛ́ ɓɛrɛ hɔ̀ Antiɔsi lóo hũn. Ɛ́ ń hɛ̀ wũ̀aniɛ ɔ̀ cɛ̃̀un ɓɛ̀ nìnbirìe yìe hũn iè hɔ̀ lɛ á hàarí wɔ́ khɔn. 12Hɔ̀ lɛ ɛ́ ɓɛ́ nìnbirìe dɔ̀ lɛ hàarí van lɔ́ á Zaake viì ɛ́ ɲɛ̀un yí ɓen dɛ̃ hɔpe Antiɔsi lóo hṹn, àpe Piɛre ɛ́ hṹn wóò páaní dí àá ɓɛ́ ńdɛsĩ̀riè lɛ yí ɓɛ́ Zuifuɓɛ. Ɛ́ hɔ́ lɛ ɛ́ ɓɛ́pe niɛ̀ sɔ ɛ́ ɓɛrɛ dɛ̃un, á khũ̀a lɔ́ dɛ̃̀ mí dòonún ɛ́ wo yáà bĩní páaní dí àá ɓɛ́, iè hɔ̀ lɛ á den ɛ́ ɓɛ̀pe Zuifuɓɛ sɔ lɛ bɔ̀ hɔ̀ fũ̀arɔ́ bòo hìeniɛ ɛ̀ zán. 13Ɛ́ ɓɛ́pe Zuifuɓɛ lɛ iè ɓɛ̀ ńdɛsĩ̀riè lɛ kɛ́ ɛ́ ɓiɛ̀ khie ɛ́ wé kɛ̀a ɔ́pe Piɛre. Ɛ́ ɓɛ́ wɔ́ hɔ́ fúu ɛ́ hɛ̀rí ápe Baranabaasi kùusɔ ɛ́ ɓiɛ̀ khie zɔn peɓɛ̀ nìhĩímu sɔ hũn. 14Ɛ́ hɔ́ lɛ ɛ́ ń mɔn kɛ́ hɔ́pe sí ɛ́ ɓɛ́ ɛ́ wé ɛ́ yí ɓáaɓán àá lé Bentĩnu bɔ̀berà bòo, ɛ́ ń zɔn bie lɛ́ á Piɛre ǹ ɓɛ̀ nìnbirìe ɓɛ́kùi yìe hũn ɛ́ nɛ làa: «Kɔ̀pe lɛ iè ɔ̀ Zuifu, kɛ́ kɔ́ den ɛ́ wé kɛ̀a ie nìnbírɔ lɛ ɛ́ yí Zuifu wɛ̀. Ɛ́ kɔ́ wo wiɛ dàa dɛ̀ ɛ́ bie nɛ kɔ ɛ̀ mɛmɛ́kɛ ɓɛ ńdɛsĩ̀riè lɛ yí ɓɛ́ Zuifuɓɛ ɛ̀ ɓɛ̀ wé kɛ̀a ie ɓɛ Zuifuɓɛ?»

Ɓɛ̀ Zuifuɓɛ àá ɓɛ́ lɛ yí Zuifuɓɛ ɛ́ fuerɛ iè hɔ̀ lɛ ɛ́ ɓɛ́ dũmuasɛ̃̀ Yiezu ǹ

15Kèpe, ké tɔn vaá-lé ɛ̀ kè iè Zuifuɓɛ, ɛ́ ké yí bɔ̀konwériè kɛ̀a nìnbirìe lɛ yí ɓɛ́ Zuifuɓɛ, lɛ yí dũ ɓɛ Zuifuɓɛ làndɛ́ wɛ̀. 16Ké lò wo dũ kɛ́ nìnbírɔ lɛ ɛ́ Dɔfĩn wóò nɛ a ɛ́ cã̀aní iè ɔ̀lɛ ɛ́ dũmuasɛ̃̀ Yiezu Kirisa ǹ mí dòonún, kɛ́ hɔ́ yí hɔ́ lɛ ɛ́ ɓàasɔ ɛ́ dɛ̀ à Moyiize làndɛ́ bòo míkùi ɛ̀ wé ɛ́ dàá cã̀aní wɛ̀. Ɛ́ képe ɛ́ ɓiɛ̀ dũmuasɛ̃̀ àpe Yiezu Kirisa ǹ bòo lɛ ɛ́ wé ɛ̀ Dɔfĩn ɛ̀ líi kie àá nìcã̀aníriè kè bòo lɛ ɛ́ ké dàa ɛ́ dũmuasɛ̃̀ àpe Kirisa ǹ bòo hũn, kɛ́ hɔ́ yí hɔ́ lɛ ɛ́ ké wóò wé bòo míkùi kɛ̀a bòo lɛ á Moyiize làndɛ́ ɛ́ bie wɛ̀. Ɛ́ nìnbírɔ lɛ ɛ́ Dɔfĩn ɛ́ wóò líi àá nìcã̀anírɔ iè hɔ̀ lɛ ɛ́ ɓàasɔ ɛ́ wóò wé bòo míkùi kɛ̀a bòo lɛ á Moyiize làndɛ́ ɛ́ bie ɛ́ mínɛ wɛ̀. 17Kɛ́ képe Zuifuɓɛ ɛ́ ɓen cɛ̀ nɛ Dɔfĩn ɛ̀ líi kie àá nìcã̀aníriè ɔ̀ Kirisa viì, ɛ̀ ɓɛ̀ Zuifuɓɛ làndɛ́ wṹn lɔ̀n, ɛ̀ kè iè bɔ̀konwériè kɛ̀a ɓɛ́ nìnbirìe lɛ yí ɓɛ́ Zuifuɓɛ; ɛ́ hɔ́pe sí iè bòo sũǹ ɛ́ zɛ̃́ní kɛ́ á Kirisa ɛ́ iè bɔ̀koohɔ́ á dɔ́ kie hũn? Ńɓùé lò, hɔ̀ yí kɛ kiɛ́ wɛ̀! 18Kɛ́ ń ɓen bĩniɛ khũ̀a ɛ́ tɛ̀ hɔ̀ làndɛ́ lɛ ɛ́ ń hṹn pɛ̃́ bòo, hɔ́rɔsí ɛ̀ ǹ wɔ́ khɔn àá hɔ́pe làndɛ́. 19Ɛ́ hɔ́ làndɛ́ wṹn lɔ̀n, ɛ́ ń iè wie lɛ ɛ́ húrun. Hɔ̀pe làndɛ́ ɛ́ te nin ɓɔ́, bòo lɛ ɛ́ wé ɛ̀ Dɔfĩn viì ɛ̀ niǹ yìe ɛ̀ wé. Ɛ́ ń wo húrun àá ɔ́ Kirisa lè ɓáalén dãanù lɔ̀n. 20Ɛ́ ń ɓen yìe ɛ́ wi, ɛ̀ hɔ̀ yí ńpe ɛ́ temu yìe wi, kɛ́ á iè ɔ̀ Kirisa mɛkɛ̃nì ɛ́ temu wi mi ǹ. Ɛ́ ń ɓen yìe ɛ́ wi zòoni, ɛ̀ hɔ̀ iè hɔ̀ lɛ ɛ́ ń dũmuasɛ̃̀ Dɔfĩn Zuú ǹ ɛ́ ń dàa yiè wi. Àpe ɛ́ temu wɛniɛ mi, à lɛ́ mí mɛkɛ̃nì niǹ yènsénín. 21Ń yí pĩ́ Dɔfĩn hiì wɛ̀. Iè hɔ̀ lɛ kɛ́ hɔ́ hṹn iè ɓɛ̀ Zuifuɓɛ làndɛ́ ɛ́ temu dɛ̀ ɛ́ lɛ́ ɛ́ Dɔfĩn ɛ́ dàá ɛ́ bie nɛ nìnbírɔ ɛ́ cã̀aní mí híɛhɔ́, hɔ́rɔsí à Kirisa ɛ́ húrun kã́amáà.

Currently Selected:

Kalaasi Siè 2: bwj

Highlight

Copy

Compare