Kalaasi Siè 1
1
Tìɛníkɛrɔ́
1Hɔ̀ iè ǹpe Pooli lɛ ɛ́ Yiezu Kirisa ɛ́ wɔ́ àá mí tɔnkɛrɔ kɛ́ ɓɛ́ yí ɓɛ́ nìnbirìe, à lò yí nìnbírɔ dɔ̀ ɛ́ te nin tɔrɛ, kɛ́ á iè pe Yiezu Kirisa àá ɔ́ Yàá Dɔfĩn lɛ ti-e vìeniɛ ɛ́ lɔ́ hɔ́ húmú hũn ɛ́ te nin tɔrɛ. Ɛ́ ńpe ɛ́ te lepe vɛ̃hṹ lɛ ɛ́ wĩ́. 2Kìe zɛ̀ɓɛ̀ lɛ wi hũ̀nún ɓɛ́kùi ɛ́ páa niǹ lɔ̀n ɛ́ ké dàa ke tɔní lépe vɛ̃hṹ sɔ lɛ ɛ̀ lɛ́ mípe Dɔfĩn nìɛ lɛ ɛ́ wi hɔ Kalaasi pɛ̃̀hɛ̃ hũn. 3Nɛ kìe Yàá Dɔfĩn àá ké Ɲunsɔ Yiezu Kirisa ɛ̀ wé hĩì àá miɛ, ɛ̀ ɓɛ̀ lɛ́ hũn-wiɛ̀ miɛ ǹ. 4Àpe Yiezu Kirisa ɛ́ lɛ́ míte ɛ́ ɓɛ́ ɓɔ́ ɛ́ dàa tiɛ kè bɔ̀koohɛ̃, bòo lɛ ɛ́ wé ɛ̀ hɔ̀pe zoòni dímíɲɛ́ lɛ yí sãa ɛ̀ bí bĩní yí pankɛ́ kè lɔ̀n wɛ̀. À wɔ́ hɔ́ kɛ̀a bòo lɛ ɛ́ kìe Yàá Dɔfĩn ɛ́ wɛ. 5Nɛ hɔ ɓàarɔ́ ɛ̀ bòo sì Dɔfĩn pɛ̃̀hṹ lɛ yá vé hũn! Amiina.
Bentĩnu dɛ̀ɓuiɛ̀ dɔ̀ ɛ́ bĩniɛ mí wɛ̀
6Mí hɛ̀ yòokɛa niǹ lɔ̀n àá bòo lɛ ɛ́ mí dàa khũ̀a fùa fùa hɔ̀ Dɔfĩn lɛ vɔn miɛ àá ɔ́ Kirisa hĩì máahṹ, ɛ́ khie van wɔ́ Bentĩnu dɛ̀ɓuɛ̀ dɔ̀ máahṹ ɛ́ mí bɔ̀. 7Ɛ́ hɔ́ lò yí bòo ɛ́ Bentĩnu dɛ̀ɓuɛ̀ dɔ̀ ɛ́ wi wɛ̀. Kɛ́ ɓɛ́ nìnbirìe dɔ̀ ɛ́ temu wi yán ɛ́ mì bũmɛkɛ, ɛ́ wɛ ɛ́ ɓɛ ɛ̀ yáakɛ a Kirisa Bentĩnu. 8Kɛ́ nìnbírɔ dɔ̀ ɛ́ ɓɛrɛ bie Bentĩnnu dɔ̀ ɛ́ lɛ́ miɛ ǹ kɛ́ lé wi mí dòonún àá lépe Bentĩnu lɛ ɛ́ ké ɛ́ khɛ́ lɛ́ miɛ ǹ, hɛ̀rí kɛ́ hɔ́ iè kèpe kète ǹ tàá hóohũn mɛlɛkɛ dɔ̀, ɛ̀ nɛ Dɔfĩn ɛ̀ dánkɛ́ní ɓàasɔ. 9Ké sɛ̃̀nɛ́hã̀ bie hɔ̀ ɛ́ lɛ́ miɛ ǹ, ɛ́ nin bĩní tĩ̀iní hɔ́ ɛ̀ lɛ́ miɛ ǹ nɛ kɛ́ nìnbírɔ dɔ̀ ɛ́ ɓɛrɛ bie Bentĩnu dɔ̀ ɛ́ lɛ́ miɛ ǹ kɛ́ lé wi mí dòonún àá lé Bentĩnu lɛ ɛ́ mí ɛ́ tɛ̀ bòo, ɛ̀ nɛ ɓàasɔ ɛ́ Dɔfĩn ɛ̀ dánkɛ́ní.
10Ɛ́ kɛ̀a sáalɛ ɛ́ ɓɛ́ sũǹ iè ɓɛ̀ nìnbirìe ɛ́ ń wɛ nɛ ɓɛ tɛ̀ niǹ bòo? Ńɓùé lò! Dɔfĩn iè pe ɛ́ ń wɛ nɛ Hɔ tɛ̀ niǹ bòo. Nin wiè sũǹ ɛ́ cɛ̀ nɛ niǹ bòo ɛ̀ tĩìní ɓɛ́ nìnbirìe ǹ? Kɛ́ ń hṹn cɛ̀ nɛ niǹ bòo ɛ̀ tĩìní ɓɛ́ nìnbirìe ǹ, ɛ́ ń hṹn yá ɓén wé Kirisa tɔntɛ́ wɛ̀.
Pooli ɛ́ bòo lɛ á dàa wɔ́ Kirisa tɔnkɛrɔ bòo ɛ̀ bie
Bɔw 22.3-16; 26.9-20; 9.1-20,23,30
11Kìe zɛ̀ɓɛ̀, nín bie lɛ́ miɛ ǹ nɛ le Bentĩnu lɛ ɛ́ ń khɛ́ lɛ́ miɛ ǹ ɛ́ yí lé nìnbírɔ viì wɛ̀. 12À yí nìnbírɔ dɔ̀ ɛ́ te le munkɛa ɛ́ lɛ́ mi ǹ, tàá ń yí kɛ̀rán lé nìnbírɔ dɔ̀ viì wɛ̀. Kɛ́ á iè Yiezu Kirisa míte ǹ ɛ́ te le zɛ̃́niɛ ɛ́ lɛ́ mi ǹ.
13Mí lò wo ɲɛ́ hɔ́ bòo lɛ ɛ́ ń hàarí wóò wé pɛ̃̀hṹ lɛ ɛ́ ń dàa hàarí wi ɓɛ́ Zuifuɓɛ làndɛ́ wṹn lɔ̀n. Ń hàarí ɛ́ ɔ̀ Yiezu Kirisa nìɛ lɔ̀n ɛ̀ biení cɛ̃̀un àá mɛkɛnɲiì, ɛ́ hàarí ɛ́ cɛ̀ ɛ́ nín yaakɛ peɓɛ̀ wṹn. 14Ɓɛ̀ Zuifuɓɛ làndɛ́ wṹn lɔ̀n, ɛ́ ń hàarí pɔ kìe ńkɔhĩ́ Zuifuɓɛ cɛ̀rìɛɛ. Ń hàarí ɛ́ can niǹ kuò cɛ̃̀un ɛ́ pɔ ɓɛ kiè zĩkĩ́nɓɛ̀ làndɛ́ wṹn lɔ̀n. 15Kɛ́ Dɔfĩn àá mí hiì ɛ́ sɛ̃̀nɛ́hã̀ munɛ mi kɛ́ ń wi kìe nín hũn, ɛ̀ Hɔ̀ vɔn mi nɛ n tɛ́ mí tɔnlɔ́. 16Ɛ́ hɔ́ lɛ ɛ́ hɔ́ tĩìniɛ Hɔ̀ ǹ, ɛ́ Hɔ́ wo zɛ̃́niɛ ɔ̀pe mí Zuú ɛ́ lɛ́ mi ǹ bòo lɛ ɛ́ wé ɛ̀ ǹ vɛ bie piè bòo ɛ̀ lɛ́ ɓɛ́ nìnbirìe lɛ yí ɓɛ́ Zuifuɓɛ ǹ. Ɛ́ ń wo yí vɛ cɛ̀ bénlɔ́ nìnbírɔ dɔ̀ viì wɛ̀. 17Ɛ̀ ǹ lò yí yòó vɛ hɔ̀ Zerizalɛɛmu, ɛ̀ bie nɛ nin vɛ mi ɓɛ nìnbirìe lɛ ɛ́ wɔ́ á Yiezu Kirisa tɔnkɛriè ɛ́ cɔ́ mi wɛ̀. Kɛ́ ń den hĩ́nà cã̀aniɛ van àá hɔ́ Arabii pɛ̃̀hɛ̃, ɛ̀ ǹ den bĩniɛ khie khũ̀a ɛ́ ɓɛrɛ hɔ̀ Damaasi lóo hũn. 18Ɛ́ pehɔ̀ lɔ́líe bɔ̀nbɔ̀ tĩ máahṹ, ɛ̀ ǹ den wo yóò van hɔ̀ Zerizalɛɛmu ɛ́ nɛ nin vɛ dũń ɔ́ Piɛre, ɛ́ ń van wɔ́ wihĩ́ pírú àá hũanú piè viì. 19Kɛ́ ń yí bĩní mi Yiezu tɔnkɛrɔ wìɓuiɛ̀ dɔ̀ ɛ̀ sĩiní, kɛ́ á ɓen yí Zaake lɛ iè ɔ̀pe kè Ɲunsɔ ɓà fìɛ.
20Hɔ̀pe lɛ ɛ́ nín wĩ́ ɛ̀ lɛ́ miɛ ǹ ɛ́ bɔn Dɔfĩn híɛhɔ́, ɛ́ nin khɛ́ hɔ́ ɛ̀ lɛ́ miɛ ǹ nɛ hɔ yí ɓúo ɛ́ nín ɓúukɛ wɛ̀.
21Ɛ́ pehɔ̀ máahṹ, ɛ̀ ǹ khie cɔ́ van hɔ̀ Siiri àá hɔ́ Silisi pɛ̃̀hɛ̃ hũn. 22Hɔ́rɔsí kɛ́ á Kirisa ńdɛsĩ̀riè lɛ wi hɔ Zudee pɛ̃̀hɛ̃ hũn ɛ́ yìe ɲɛùn yí bè niǹ lɔ̀n ɛ́ yí wɛ̀. 23Ɓɛ̀ den hàarí ɲɛ́ mí dòonún kɛ́ ɓɛ́ nɛ ape nùún lɛ ɛ́ pɛ̃̀hṹ ɛ́ peɓɛ̀ lɔ̀n ɛ̀ biení ɛ́ wo ɛ́ lè Bentĩnu ɛ̀ buie ɛ̀ lɛ́ ɓɛ́ nìnbirìe ǹ kɛ̀a sáalɛ, ɛ̀ ɓɛ̀ dɛsĩ̀ kɛ̀a; lèpe Bentĩnu sɔ lɛ á hàarí wɛ ɛ́ mii yáakɛ. 24Ɛ́ ɓɛ́ wo ɛ́ Dɔfĩn ɛ̀ ɓàanínin niǹ bòo hũn.
Currently Selected:
Kalaasi Siè 1: bwj
Highlight
Copy
Compare
Share
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation
