Bɔ̀werà 28

Pooliɓɛ ɛ́ van dɛ̃un Malite

1Ɛ́ bòo lɛ ɛ́ ké yú fuerɛ van lɔ́ lé sṹsùnù lɔ̀n, ɛ́ ké ɲɛ́ kɛ́ ɓɛ́ nɛ lepe viì sɔ lɛ iè viì dɔ̀ lɛ ɛ́ zɔn wi hɔ ɲumu tĩ́ihṹ yèrè ɛ́ ɓɛ́ nɛ Malite. 2Ɛ́ lepe viì sɔ nìɛ ɛ́ hɛ̀ perɛ kiè ɛ́ sãàniɛ cɛ̃̀un. Kɛ́ hɔ́ lɛ ɛ́ hɔ́ hóo ɛ́ tè ɛ̀ hɔ̀ tìɛní ɛ́ lò wi, ɛ́ ɓɛ́ khie zĩiniɛ dṹn-bɛhɔ́ ɛ́ ké wo van kírienin ɛ́ wɛni. 3Ɛ́ Pooli khie ɛ́ khuie hɔ̀ dãakɛ-cíini dɔ̀ ɛ́ mii zɔn hɔ̀ń kóo hɔ́ dṹn hũn, kɛ́ hɔ́ dṹn sɔmu ɛ́ lɛ́ ɛ́ hóonú dɔ̀ ɛ́ zɔn lɔ́ hɔ́pe dãakɛ-cíini sɔ hũn ɛ́ lɔ́ can dɛ̃̀ piè núnú ǹ. 4Ɛ́ hɔ́ lɛ ɛ́ lépe viì sɔ nìɛ ɛ́ mɔn ɔ̀ hóonú kɛ́ á can dɛ̃̀ Pooli núnú ǹ, ɛ́ ɓɛ́ khie ɛ́ biekɛ ɛ̀ lɛ́kɛ ɓá ǹ ɛ́ nɛ: «Àpe nùún sɔ lɛ ɛ́ hɛ̀ iè pe nìɓé àá bɔ̀bín; iè hɔ̀ lɛ ɛ́ ké dɔfĩn àá mí cã̀anírɔ́ ɛ́ den nɛ sãawi ɛ̀ piè mɛkɛ̃nì ɛ̀ bí kań yán, hɛ̀rí kɛ́ á yɛ̀rɛ́ yú fuerɛ lɔ́ hɔ́ ɲun-bɛhɔ́ hũn.» 5Kɛ́ Pooli ɛ́ den zɛ̀kɛ̀niɛ ɔ̀pe hóonú sɔ ɛ́ siɛ dɔ́ hɔ́ dṹn hũn kɛ́ hɛ̀rí víɛ dɔ̀ lɛ á ɲínin ɛ́ yí wé wɛ̀. 6Ɛ́ ɓɛ́ nìnbirìe ɛ́ wo ɛ́ húi nɛ Pooli ɛ́ ɓén yòó hòoní tàá à ɓén kùén ɛ́ siɛ hí mí laà hũn. Kɛ́ hɔ́ lɛ ɛ́ ɓɛ́ huie ɔ̀ ɛ́ van míɛ kɛ́ bòo dɔ̀ ɛ́ yá ɔ̀ wé, ɛ́ ɓɛ́ zɛ̀niɛ ɓɛ́ ɲunù ɛ̀ ɓɛ̀ ɛ́ bie nɛ a iè dɔfĩn dɔ̀.

7Ɛ́ lé viì sɔ ɛ́ lepe lóo sɔ nì-bɛhɔ́ yíe ɛ́ wi sɛnù. Piè yèrè ɛ́ ɓɛ́ nɛ Pibiliyuusi. Á van perɛ kiè ǹ kɛ̀a ɓá pàáɓɛ́, ɛ́ ké wɔ́ wihĩ́ bɔ̀nbɔ̀ tĩ piè yíe. 8Ápe Pibiliyuusi ɓà yàá ɛ́ hàarí dũmua ɛ́ tɛkɛ̀a bɔn ɛ̀ hɔ̀ tɔ̀kɔ̀tɔ́kɔ́ ɛ́ lò ɓaa ɔ̀. Ɛ́ Pooli ɛ́ van zɔn piè viì, ɛ́ zɔn bɔ̀ mí níhĩ́ piè lɔ̀n, à hɛ̃nnɛ Dɔfĩn lɛ́ à ǹ, á wan. 9Ɛ́ pehɔ̀ máahṹ, ɛ̀ lèpe viì sɔ dɔriè lɛ kɛ́ ɛ́ ɓiɛ̀ van ɓɛrɛ, ɛ́ ɓɛ́ ɓiɛ̀ ɛ́ wan. 10Ɛ́ ɓɛ́ ɓàaniɛ kie ǹ sãàniɛ. Ɛ́ bòo lɛ ɛ́ ké vaá-lan, ɛ́ ɓɛ́ lɛ́ hɔ́ bòo lɛ ɛ́ ke dàá bè kè wṹn míkùi kie ǹ.

Pooliɓɛ ɛ́ lɔ́ Malite ɛ́ khie kã́a Rɔmu

11Ɛ́ ké wɔ́ ńpĩ́ihɛ̃ bɔ̀nbɔ̀ tĩ hɔ̀pe Malite hũn. Ɛ́ pehɔ̀ máahṹ, ɛ̀ kè khie van mɔ̀ lè Alɛkisandiri ɲumu wiè dɛ̀bɛhɔ́ dɔ̀ lɛ yèrè ɛ́ ɓɛ́ nɛ «Lɛ́yɛhĩ́» ɛ̀ kè cɔ́. Lè hàarí ɓɛrɛ wɔ́ lé mùn-tìɛní yìi lèpe viì sɔ hũn. 12Ɛ́ ké van dɛ̃un Sirakiise ɛ́ ké kɛsí yán wihĩ́ bɔ̀nbɔ̀ tĩ. 13Ɛ́ ké lɔ́ yán, ɛ̀ khie zɔn lè wiè ɛ́ van dɛ̃un Rezio. Ɛ́ pehɔ̀ sí lɛ ɛ́ tĩ, ɛ̀ lè pinpinù ɛ́ hĩ́nà ɛ́ zè ɛ́ kè súuní, ɛ́ wihĩ́ bɔ̀nbɔ̀ ɲu, ɛ̀ kè zĩ̀níkɛa van dɛ̃un Puzɔɔle ɛ́ ké wo siɛ. 14Ɛ́ ké van yú ńdɛsĩ̀riè dɔ̀ yán, ɛ́ ɓɛ́ hɛ̃nnɛ kie ǹ ɛ́ ké wɔ́ wihĩ́ hùuɲu àá ɓɛ́. Ɛ́ sí iè pe ɛ́ ké wo wɔ́kɛ kɛ̀amu ɛ́ dàa kã́a hɔ̀ Rɔmu. 15Ɛ́ Rɔmu ńdɛsĩ̀riè ɛ́ van ɲɛ́ ké bòo ɛ́ ɓɛ́ ɓen lɔ́ sɛ̃́ ké híɛhɔ́. Ɓɛ̀dɔ̀ ɛ́ ɓɛrɛ fúu Apiyuusi yàa hũn, ɛ̀ ɓɛ̀dɔ̀ ɛ́ ɓɛrɛ lè viì lɛ ɛ́ ɓɛ́ wóò ve nɛ «Nì-hã̀a làalén zĩhĩ́ɛ Bɔ̀nbɔ̀ tĩ» hũn. Ɛ́ bòo lɛ ɛ́ Pooli ɛ́ mɔn ɓɛ̀, á dɔ́ Dɔfĩn bɛrikɛ, ɛ̀ piè tĩì ɛ́ wo wookɛa yòó hie. 16Ɛ́ bòo lɛ ɛ́ ké van dɛ̃un Rɔmu, ɛ́ ɓɛ́ nɛ Pooli ɛ́ dɛ̀ ɛ́ kansí mí dòonún zũnù hũn, ɛ̀ ɓɛ̀ nɛ sɛ̃̀nɛ̀dɔ́sí dɔ̀ ɛ̀ hìé ɔ̀ ǹ.

Pooli ɛ́ lè Bentĩnu ɛ̀ buie Rɔmu hũn

17Ɛ́ wihĩ́ bɔ̀nbɔ̀ tĩ ɛ́ van khie; ɛ́ Pooli ɛ́ vɔn ɓɛ̀ Zuifuɓɛ lɛ wi le Rɔmu lóo hũn hándíe mí viì. Ɛ́ bòo lɛ ɛ́ ɓɛ́ ɓɛrɛ koo ɓánlɔ̀n, á zɔn bie lɛ́ ɓà ǹ ɛ́ nɛ làa: «Kìe zɛ̀ɓɛ̀, ń yí wé khe àá kìe dàa nìɛ, ɛ̀ ǹ lò ɛ́ yí wé khe àá kìe zĩkĩ́nɓɛ̀ làndɛ́a wɛ̀; kɛ́ ɓɛ́ den pɛ́ ɓaa mi hɔ̀ Zerizalɛɛmu hũn ɛ́ van dɔ́ ɓɛ́ Rɔmu siè núnú hũn. 18Ɛ́ ɓɛ́ dìeka mi ǹ vɔ́, ɛ̀ ɓɛ̀ hṹn wɛ ɛ́ ɓɛ fùansí mi iè hɔ̀ lɛ ɛ́ ɓɛ́ yí mi bɔ̀koohɔ́ dɔ̀ lɛ ɛ́ ń wɔ́ ɛ́ ń dàa fɔ́ɓán ɛ̀ ǹ hí wɛ̀. 19Kɛ́ ɓɛ́ Zuifuɓɛ ɛ́ den pɛ̃́, ɛ́ ń dàa wɔ́ tan ɛ́ ń vɔn ɔ̀ Rɔmu bɛ́zu-bɛhɔ́ ǹ nɛ a teń niǹ lìe ɛ̀ lè, kɛ́ hɔ́ lò yí bòo ɛ́ ń nɛ nin ɓen bie nɛ ɓɛpe kiè dàa nìɛ ɛ́ wɔ́ khɔn wɛ̀. 20Ɛ́ sí iè hɔ̀pe ɛ́ ń dàa nɛ nin ve miɛ ɛ̀ dàá khɛ́. À den iè ɔ̀pe lɛ ɛ́ ɓɛ́ Yizarayɛɛle nìɛ ɛ́ bɔ̀ ɓɛ́ tĩɛ̀ lɔ̀n bòo hũn ɛ́ ɓɛ́ dàa can mi àá hɔ́pe zɔ̀kɔ̀zɔ́kɔ́ɓɛ̀ lɛ.» 21Ɛ́ ɓɛ́ zɔn kɔ̃́niɛ ɔ̀ ɛ́ nɛ làa: «Ké yí yí vɛ̃hṹ dɔ̀ lɛ ɛ́ lɔ́ Zudee lɛ ɛ́ kɔ̀ bòo ɛ̀ bie wɛ̀; ɛ̀ kìe zuú dɔ̀ ɛ́ lò yí ɓen bie kɔ bòo ɛ̀ lɛ́ kie ǹ tàá ɛ̀ bie nɛ kɔ́ wɔ́ bɔ̀koohɔ́ dɔ̀ wɛ̀. 22Kɛ́ ké den wɛ nɛ kɔ munkɛ hɔpe bòo lɛ ɛ́ kɔ́ ɛ́ lieníkɛ ɛ̀ lɛ́ kie ǹ nɛ ke ɲí; iè hɔ̀ lɛ ɛ́ ké dũ kɛ́ vuò míkùi hũn, ɛ́ ɓɛ́ nìnbirìe ɛ́ hɛ̀ ɛ́ wũ̀aní cɛ̃̀un lè wṹn lɛ ɛ́ kɔ́ bɔ̀ bòo hũn.»

23Ɛ́ ɓɛ́ wo khie zɛ̃́niɛ lè sí dɔ̀ ɛ́ lɛ́ á Pooli ǹ. Ɛ́ lépe sí sɔ zɔn, ɛ̀ ɓɛ̀ khũ̀a ɓɛrɛ buòniɛ lèpe viì lɛ á Pooli ɛ́ wi hũn. Ɛ́ ɲɛ̀nbín fúu ɛ̀ vɛ dɛ̃ zĩ́ihṹ kɛ́ Pooli ɛ́ khɛ́ àá ɓɛ́. À ɛ́ bie Dɔfĩn bɛ́záanú bòo ɛ́ lɛ́ ɓà ǹ, à wóò dìń ɔ́ Moyiize làndɛ́ lɔ̀n àá ɓɛ́ Dɔfĩn bɔ̀háaníriè vɛ̃hɛ̃ lɔ̀n ɛ̀ dàá bie Yiezu bòo ɛ̀ lɛ́ ɓà ǹ, bòo lɛ ɛ́ wé ɛ̀ ɓɛ̀ dɛsĩ̀. 24Ɛ́ ɓɛ́ dɔ̀ ɛ́ dũmuasɛ̃̀ hɔ̀ bòo lɛ á khɛ́ ǹ, ɛ̀ ɓɛ̀dɔ̀ ɛ́ ɓiɛ̀ pɛ̃́ ɛ́ yí dɛsĩ̀ wɛ̀. 25Kɛ́ hɔ́ lɛ ɛ́ ɓɛ́ hĩ́nà saakɛ vaá-lan kɛ́ peɓɛ̀ ɲunù ɛ́ lò yí dìcóoní, ɛ́ Pooli ɛ́ zɔn bie hɔ̀ bòo lɛ ɛ́ lɛ́ ɓà ǹ nɛ làa: «Lè Mɛkɛ̃n-Sãanu ɛ́ hàarí bòo tĩ ɛ́ Lé dàa hàarí khie àá Dɔfĩn bɔ̀háanírɔ Ezayi ɛ́ dàa khɛ́ lépe biènù sɔ lɛ ɛ́ lɛ́ mì zĩnkĩ́nɓɛ̀. 26Lè den hàarí bie ɛ́ nɛ làa:

“Vɛ hɔpe dàa sɔ lɛ nìɛ viì ɛ̀ kɔ̀ bie lɛ́ ɓà ǹ nɛ làa:

Mí wóo ɓén ɲí hɔ́ bòo àá mí ɲɛkɛ̃̀a, kɛ́ mí yá dũń pehɔ̀ ɲún wɛ̀;

Mí wóo ɓén húi hɔ́ bòo àá mí yìe, kɛ́ mí yá mi bòo dɔ̀ wɛ̀;

27 Iè hɔ̀ lɛ ɛ́ hɔ́pe dàa sɔ lɛ nìɛ ɛ́ hɛ̀ dĩìniɛ ɓɛ́ tĩ̀ɛ ɛ́ yá bòo dɔ̀ ɛ̀ ɲí wɛ̀;

Ɓɛ̀ sun ɓɛ́ ɲɛkɛ̃̀a,

Ɛ̀ ɓɛ̀ lò hiɛ ɓɛ́ yìe,

Boò lɛ ɛ́ wé ɛ̀ peɓɛ̀ yìe ɛ̀ bí mi bòo,

Ɛ̀ peɓɛ̀ ɲɛkɛ̃̀a ɛ̀ bí ɲí bòo,

Ɛ̀ peɓɛ̀ hɛciri ɛ̀ dàá bí dũń bòo dɔ̀ wɛ̀,

Ɛ́ kɛ̀amu, ɛ́ ɓɛ́ yá khũ̀á ɛ́ ɓen niǹ viì ɛ̀ ǹ wiɛní ɓɛ́ wɛ̀.”»

28Ɛ́ Pooli ɛ́ zɔn bie sĩiniɛ ɛ́ nɛ làa: «Ɛ́ mí dũń sãàní kɛ́ Dɔfĩn ɛ́ tɔniɛ lèpe fuerɛ̀ Bentĩnu sɔ lɛ ɛ́ lɛ́ ɓɛ́ nìnbirìe lɛ yí ɓɛ́ zuifuɓɛ ǹ. Ɛ́ ɓɛ́pe ɛ́ ɓén tɛ̀ pelè bòo!»

[ 29Ɛ́ hɔ́ lɛ ɛ́ Pooli ɛ́ bie hɔ̀pe sí vɔ́, ɛ́ ɓɛ́ Zuifuɓɛ ɛ́ khie cɔ́ kɛ́ ɓɛ́ hɛ̀ ɛ́ wũ̀aní ɓán hũn cɛ̃̀un.]

30Ɛ́ Pooli ɛ́ wɔ́ lɔ́líe bɔ̀nbɔ̀ ɲu míkùi lè zũnù lɛ á hàarí mɔ̀ ɛ́ wóò sàaní hũn. Ɛ́ ɓɛ́ nìnbirìe lɛ ɛ́ wóò ɓen piè viì ɓɛ́kùi á wóò tɛ̀ fé sãàní, 31à hàarí ɛ́ Dɔfĩn bɛ́záanú bòo ɛ̀ buie, à lò ɛ́ ɓɛ̀ nìnbiriè ɛ̀ kɛ̀rán àá Ɲunsɔ Yiezu Kirisa bòo kɛ́ á fɔnù tɛ́rɛ ɛ̀ bòo dɔ̀ ɛ́ lò ɛ́ yí si-e wɛ̀.

Currently Selected:

Bɔ̀werà 28: bwj

Highlight

Compare

Copy