Bɔ̀werà 27

Pooli tɔní viɛnírɔ́ Rɔmu lóo hũn

1Ɛ́ ɓɛ́ wo khie nɛ ɓɛ ɛ̀ kóo kie lè ɲumu wiè dɛ̀bɛhɔ́ hũn ɛ̀ dàá vɛ hɔ Yitalii cɛ̃̀mɛ̀nɛ́ hũn. Ɛ́ ɓɛ́ khie lɛ́ á Pooli àá ɓá ńkɔhĩ́ kɛ̀sí nìɛ bìɛ yiɛní dɔ̀ à sɛ̃̀nɛ̀dɔ́ɓɛ́ ɲunsɔ dɔ̀ ǹ lɛ yèrè ɛ́ ɓɛ́ nɛ Zuliyuusi, lɛ hàarí iè ɓɛ̀pe Rɔmu sɛ̃̀nɛ̀dɔ́síɓɛ́ dɔ̀ lɛ ɛ́ ɓɛ́ wóò ve nɛ «Bɛ́zu-bɛhɔ́ sɛ̃̀nɛ̀dɔ́síɓɛ́» ɛ́ te ɓɛ́ ɲúnsɔ dɔ̀. 2Ɛ́ ké wo khie zɔn lè ɲumu wiè dɛ̀bɛhɔ́ dɔ̀ lɛ ɛ́ van lɔ́ àá Adaramiite ɛ́ khie vaá-vɛ Azii pɛ̃̀hɛ̃ hũn ɛ̀ kè wo cɔ́. Ɛ̀ nùún dɔ̀ lɛ ɛ́ yèrè ɛ́ ɓɛ́ nɛ Arisitaake lɛ ɛ́ lé Tesaloniike hɔ̀ Maseduanɛ pɛ̃̀hɛ̃ hũn ɛ́ hàarí wi àá kie. 3Ɛ́ pehɔ̀ sí lɛ ɛ́ tĩ, ɛ̀ kè van dɛ̃un Sidɔn lóo. À Zuliyuusi ɛ́ hàarí dàa Pooli sãàniɛ; á wo fùansí-è ǹ à vɛ zɔ mi ɓá pàáɓɛ́ lɛ wi lepe lóo sɔ hũn, ɛ̀ ɓɛ̀ húi piè bòo. 4Ɛ́ ké lɔ́ yán ɛ̀ kè khie van lɔ́ àá Siipere sɛ̀nù iè hɔ̀ lɛ ɛ́ lé pinpinù ɛ́ hàarí ɛ́ kè híɛhɔ́ ɛ̀ sĩ́. 5Ɛ́ ké cankɛa hɔ̀ ɲun-bɛhɔ́ lɛ ɛ́ hɔ́ Silisi àá hɔ́ Panfili pɛ̃̀hɛ̃ ɛ́ wi sɛnù ɛ́ van dɛ̃un Mira, hɔ̀ Lisii pɛ̃̀hɛ̃ hũn. 6Ɛ́ yán á sɛ̃̀mɛ̀dɔ́síɓɛ́ ɲúnsɔ ɛ́ tɛ̀rɛa lè ɲumu wiè dɛ̀bɛhɔ́ dɔ̀ lɛ ɛ́ lɔ́ Alɛkisandiri ɛ́ khie vaá-vɛ àá Yitalii; á wo khie yòó zooniɛ kie pelè hũn. 7Ɛ́ ké zɔ̀ hɔ̀ ɲun-bɛhɔ́ lɔ̀n yɛ́lɛ̀lɛ̀ wĩhĩ́ cɛ̀rìɛɛ hũn. Ɛ́ ké lɔ̀n hɛ̀ bɔn cɛ̃̀un ɛ́ dàa yú van dɛ̃un Kiniide lóo ɲunu. Kɛ́ hɔ́ lɛ ɛ́ lé pinpinù ɛ́ wo lɛ́ ɛ́ ké yí dɛ̀ yá cã̀aní ɛ́ vɛ àá ké híɛhɔ́, ɛ́ ké zɔn làa ɛ́ van khie àá Salomonɛ lóo sɛnù ɛ́ lan hɔ̀ Kɛrɛti ǹ lɛ iè hɔ̀ pɛ̃̀hɛ̃ dɔ̀ lɛ zɔn wi hɔ ɲun-bɛhɔ́ tĩ́ihṹ. 8Ɛ́ ké lɔ̀n hɛ̀ bɔn cɛ̃̀un hɔ̀ ɲumu lɔ̀n lè viì sɔ hũn kè wṹn bènlɔ́n hũn, ɛ́ dàa van dɛ̃un viì dɔ̀ lɛ ɛ́ ɓɛ́ wóò ve nɛ Ɲumu wuò Bɔ̀bɛ̃hɛ̃ Dĩ̀nlén lɛ sãa, lɛ wi Lazee lóo sɛnù.

9Ɛ́ ké hɛ̀ hàarí míɛ cɛ̃̀un hɔ̀ ɲumu lɔ̀n, ɛ̀ hɔ̀pe ɲumu lɔ̀n viɛnù ɛ́ wo hàarí kɛ́ mɛ̀rɔ́ iè hɔ̀ lɛ ɛ́ ɓɛ́ Zuifuɓɛ ɲihĩ́ɛ lìnlɔ́ pɛ̃̀hṹ ɛ́ hàarí khie. Ɛ́ Pooli ɛ́ wo ɲɛ̀ peɓɛ̀ zen lɔ̀n ɛ́ nɛ: 10«Kìe pàáɓɛ́, ń loo kɛ́ ké wṹn bènlɔ́ sɔ lɛ ɛ́ wo kɛ́ mɛ̀rɔ́. Ńtèmíi ɛ́ mii zɔ le ɲumu wiè dɛ̀bɛhɔ́ àá mí tìerɔ́, ɛ̀ wɔ́ khɔn ɛ́ képe kùusɔ mɛkɛ̃nì ɛ́ ɓén kén yán.» 11Kɛ́ á Rɔmu sɛ̃̀mɛ̀dɔ́síɓɛ́ ɲúnsɔ ɛ́ den wɔ́ ápe ɲumu wiè dɛ̀bɛhɔ́ ɓàasɔ àá ɔ́lɛ te le ɛ́ zìení biehĩ́ iè pe á dũmuasɛ̃̀ nin ɛ́ pɔ́ Pooli hɔ́n. 12Lè viì sɔ lɛ ɛ́ hɔ́pe ɲumu wuò ɛ́ wóò dìń hũn ɛ́ den hàarí yí sãa àá dĩ̀nlén fúu ɛ̀ lè mùn-tìɛní pɛ̃̀hṹ ɛ̀ vɛ khíi. Ɛ́ sí iè pe temu lɛ́ ɛ́ ɓɛ́ nìnbí-kuì lè wiè hũn ɛ́ dàa nɛ fɔ́ɓán ɛ̀ kè lan ɛ̀ lé yán. Ie kɛ́ hɔ́ dàa ɓén ɛ́ wé yínin, ɛ̀ kè vɛ dɛ̃ hɔ Fenikise lɛ iè hɔ̀ wuò bɔ̀bɛ̃hɛ̃ dĩ̀nlén dɔ̀ lɛ wi hɔpe Kɛrɛti pɛ̃̀hɛ̃ hũn, kɛ́ lé máahṹ ɛ́ bĩniɛ lɛ́ lé pinpinù ǹ, ɛ̀ vɛ wé lé mùn-tìɛní pɛ̃̀hṹ yán.

Lè pinpi-bɛhɔ́ dɔ̀ lɛ ɛ́ hĩ́nà hɔ̀ ɲún-bɛhɔ́ lɔ̀n bòo

13Ɛ́ pinpi-cí dɔ̀ lɛ van lɔ́ àá lé wurù línlén ńmiinín ɛ́ siɛ hĩ́nà ɛ́ zè; ɛ́ lé ɲumu wiè dɛ̀bɛhɔ́ ɓàasiè ɛ́ tĩì ɛ̀ ɓɛ̀ nɛ ɓɛ́ dɛ̀ hɔ̀ bòo lɛ ɛ́ ɓɛ́ hṹn nɛ ɓɛ ɛ̀ wé ɛ́ ɓén wé. Ɛ́ ɓɛ́ hóoniɛ lèpe ɲumu wiè ɛ̀ ɓɛ̀ ɛ́ zè cɔ́ ɛ́ bɔ̀ hɔ̀ kɛrɛti sɛnù ǹ. 14Ɛ́ hɔ́ yí míi wɛ̀, ɛ̀ lè pinpi-bɛhɔ́ dɔ̀ lɛ ɓɛ́ wóò ve nɛ «Erakiɲɔn» ɛ́ van yòó hĩ́nà lɔ́ hɔ́pe lóo sɔ lɛ zɔn wi hɔ ɲumu tĩ́ihũ ɛ́ ɓen siɛ. 15Ɛ́ lé pinpinù sɔ ɛ́ ɓɛrɛ mɔ̀ lè ɲumu wiè ɛ́ lépe ɲumu wiè ɛ́ hɛ̀ yí dɛ̀ lè pinpinù híɛhɔ́ ɛ́ yá sĩ́ wɛ̀. Ɛ́ ké hɛ̀ wɔ́ tan ɛ́ ké fùɛrɛ̀sí kéte ǹ ɛ́ lépe pinpinù ɛ́ fɔ́ dàa cɔ́. 16Ɛ́ ké van khie lè lɔ́-cíi dɔ̀ lɛ zɔn wi hɔ ɲun-bɛhɔ́ tĩ́ihṹ lɛ yèrè ɛ́ ɓɛ́ nɛ Koda, ɛ́ ké den hɛ̀ wo yú lé ɲumu wiè dɛ̀zuú lɛ te ɓɛ nìnbirìe ɛ́ wóò fénin ɛ́ wuaniɛnin, kɛ́ ké lɔ̀n ɛ́ den hɛ̀ bɔn cɛ̃̀un. 17Ɛ́ lépe wiè ɓàasiè ɛ́ vɛ́ lépe wiè dɛ̀zuú sɔ ɛ́ yòó dɔ́ lé dɛ̀bɛhɔ́ hũn, ɛ̀ ɓɛ̀ khie can lè àá hɔ́ huunìɛ. Ɓɛ̀ den hṹn zán nɛ wɔ́ khɔn ɛ́ lé pinpinù ɛ́ fé lépe wiè dɛ̀bɛhɔ́ ɛ́ vɛ yáakɛ hɔ Libii cɛ̃̀mɛ̀nɛ́ hã̀anì hũn. Ɛ́ ɓɛ́ wo khie lerɛ lè ɲumu wiè dĩ̀nílán hɛ̃nlɔ́ ɛ́ fùɛrɛ̀sínin hɔ̀ ɲumu hũn ɛ́ lé pinpinù ɛ́ wo khie fɔ́ kie dàa cɔ́. 18Ɛ́ lé pinpinù ɛ̀ hɛ̀ bieniɛ kè lɔ̀n fúu ɛ́ pehɔ̀ sí lɛ ɛ́ tĩ, ɛ́ lé wiè dɛ̀bɛhɔ́ ɓàasiè ɛ́ hĩ́nà ɛ́ hɔ̀ tìerɔ́ dɔ̀ ɛ̀ khũa táa kóosí hɔ́ ɲun-bɛhɔ́ hũn. 19Ɛ́ pehɔ̀ sí lɛ bĩniɛ ɛ́ tĩ, ɛ́ ɓɛ́pe ɓɛ́te ǹ ɛ́ hĩ́nà khũa lèpe wiè zìení lán tĩ̀ɛ dɔ̀ ɛ́ taa koosí hɔ́ ɲumu hũn. 20Ɛ́ ké wɔ́ wihĩ́ cɛ̀rìɛɛ kɛ́ ké yí loo wurù, ɛ̀ kè lò yí loo ńpĩ́nàwuò wɛ̀; ɛ̀ lè pinpi-bɛhɔ́ ɛ́ pɛwi hɛ̀ ɛ́ zè fúu, ɛ́ ké hɛ̀ wo nɛ ké yá ɓén fuen wɛ̀.

21Ɛ́ ɓɛ́pe lɛ hàarí wi lepe ɲumu wiè dɛ̀bɛhɔ́ hũn ɛ́ hɛ̀ hàarí míɛ kɛ́ ɓɛ́ yí dí bòo dɔ̀ wɛ̀. Ɛ́ Pooli ɛ́ khie dɛ̃̀ peɓɛ̀ híɛhɔ́ à zɔn bie lɛ́ ɓà ǹ ɛ́ nɛ làa: «Kìe pàáɓɛ́, kɛ́ mí hṹn ɲɛ́ niǹ bòo, nɛ kè hṹn yá ɓén lé hɔ́pe Kɛrɛti cɛ̃̀mɛ̀nɛ́ hũn wɛ̀; ɛ́ nɛ hɔ̀pe bɔ̀sũmúa àá hɔ́pe bɔ̀yàarè lɛ ɛ́ hṹn yá ɓén yí kie wɛ̀. 22Kɛ́ kɛ̀a sáa lɛ ɛ́ ń nɛ mi wo hĩ̀ mì tĩɛ̀ iè hɔ̀ lɛ ɛ́ hɛ̀rí nìnbírɔ dɔ̀ mɛkɛ̃nì ɛ́ yá ɓén vĩ́ wɛ̀; kɛ́ lé ɲumu wiè mí dòonún ɛ́ temu ɓén yáa. 23Iè hɔ̀ lɛ ɛ́ hɔ́ sṹnúhṹn, ɛ́ Dɔfĩn lɛ ɛ́ niǹ bòo ɛ́ sɛ̃̀ nin ɛ̀ nin pehɔ̀ tɔnlɔ́ ɛ̀ tɛ́ mɛlɛkɛ dɔ̀ ɛ́ ɓɛrɛ zɛ̃́niɛ míte mi ǹ, 24à bie lɛ́ mi ǹ nɛ làa: “Pooli, bí zán wɛ̀; kɔ̀ lìe ɛ́ sãawi hɔ̀ vɛ lè Rɔmu bɛ́zu-bɛhɔ́ híɛhɔ́. Ɛ́ hɔ́ iè kɔ̀pe kɔ̀ bòo hũn ɛ́ Dɔfĩn ɛ́ dàa mii fuení ɓɛ́pe lɛ wi le wiè hũn àá kɔ ɓɛ́kùi mɛkɛ̃nì.” 25Ɛ́ mí wo hièní mì tĩɛ̀, mìpe kìe pàáɓɛ́ iè hɔ̀ lɛ ɛ́ ń dũmuasɛ̃̀ Dɔfĩn, ɛ́ hɔ́pe bòo míkùi ɛ́ ɓén wé kɛ̀a bòo lɛ ɛ́ Hɔ́ dàa bie hɔ̀ ɛ́ lɛ́ mi ǹ. 26Kɛ́ lé pinpinù ɛ́ den sãawi ɛ̀ lè pùnkúnkɛ kie ɛ́ vɛ tɛ́viɛní lé sṹsùnù dɔ̀ lɛ ɛ́ zɔn wi hɔ ɲun-bɛhɔ́ tĩ́ihṹ lɔ̀n.»

27Ɛ́ lɛ wo hàarí iè pehɔ̀ sṹnúhṹn pírú àá bɔ̀nbɔ̀ nɛ́ kɛ́ lé pinpi-bɛhɔ́ ɛ́ kè pùkúnkɛ dàa cɔ́ hɔ́ ɲun-bɛhɔ́ lɛ ɛ́ ɓɛ́ wóò ve nɛ Adiriyatiike lɔ̀n. Ɛ́ hɔ́ sínɛ̀hɛ̃ǹ, ɛ́ lé ɲumu wiè tɔntɛ́riè ɛ́ nɛ yénkɛ́ ké van ɛ́ sṹsùnù dɔ̀ ǹ ɛ̀ lúwinínin. 28Ɛ́ ɓɛ́ khie mɔ̀ lè hurɔ́ dɔ̀ ɛ́ can lè dìɛ dɔ̀ lɛ lì ǹ ɛ́ tɛ́ dɔ́ hɔ́ ɲumu hũn ɛ́ ɓɛ dàá màatɛ̃́ pehɔ̀ niìrɔ́. Ɛ́ ɓɛ́ mɔn kɛ́ hɔ́ ni ɛ́ yú mɛtɛrɛɓɛ ɓénlé àá pírú àá bòo hùuɲu (37). Ɛ́ van híɛhɔ́ fíi ɛ̀ ɓɛ̀ bĩniɛ tɛ́ lé hurɔ́ ɛ́ dɔ́ hɔ́ ɲumu hũn, ɛ́ ɓɛ́ mɔn kɛ́ pehɔ̀ niìrɔ́ ɛ́ yú mɛtɛrɛɓɛ ɓénlé àá bòo hùutĩ (28). 29Ɛ́ ɓɛ́ den ɛ́ zánkɛ nɛ wɔ́ khɔn ɛ́ lé wiè ɛ́ ɓén vɛ hén lɛnù. Ɛ́ ɓɛ́ wo khie can lè wiè dĩ̀nílán hɛ̃nlɛ̀a bɔ̀nbɔ̀ nɛ́ pelè máahṹ ǹ ɛ́ táa koo hɔ̀ ɲumu hũn, ɛ̀ ɓɛ̀ wo khie ɛ́ hìé nɛ ɓɔ́nɓɔ́n ɛ̀ sí vɛ tĩ fùa. 30Kɛ́ ɓɛ́pe ɲumu wiè tɔntɛ́riè ɛ́ den hṹn cɛ̀ ɛ̀ ɓɛ̀ zè lé lé wiè hũn. Ɛ́ ɓɛ́ wo khie lerɛ lèpe ɲumu wiè dɛ̀zuú lɛ te ɓɛ nìnbirìe wóo fénin ɛ́ siɛniɛ, ɛ̀ ɓɛ̀ wɔ́ kɛ̀a bòo ɛ́ hɔ́ iè bòo ɛ́ ɓɛ́ síɛ vɛ cɛ le wiè dĩ̀nílán hɛ̃nlɛ̀a dɔ̀ pelè híɛhɔ́ ǹ. 31Ɛ́ Pooli ɛ́ khie bie lɛ́ á Rɔmu sɛ̃̀nɛ̀dɔ́síɓɛ́ ɲúnsɔ àá mí sɛ̃̀nɛ̀dɔ́síɓɛ́ ǹ ɛ́ nɛ làa: «Kɛ́ ɓɛ́pe nìɛ sɔ lɛ ɛ́ yí kansí lé wiè hũn ɛ́ mí yí dɛ̀ yá fuen wɛ̀.» 32Ɛ́ ɓɛ́ sɛ̃̀nɛ̀dɔ́síɓɛ́ ɛ́ khie ɓúukɛa hɔ̀ huunìɛ lɛ te lepe wiè dɛ̀zuú sɔ ɛ́ zɛ̃nkɛanin ɛ̀ ɓɛ̀ fùɛrɛ̀sí lè ǹ ɛ́ lé cɔ́.

33Ɛ́ hɔ́ lɛ ɛ́ ké wo ɛ́ hɔ̀ sí vɛ tĩnlɔ́ ɛ̀ hìé, ɛ́ Pooli ɛ́ khie bie ɛ́ lɛ́ ɓɛ́pe ɓɛ́kùi ǹ nɛ ɓɛ khíi dí bòo, à zɔn nɛ: «Lɛ wo iè wihĩ́ pírú àá bɔ̀nbɔ̀ nɛ́ kɛ́ mí wi le kɔhìé hũn ɛ́ hìé kɛ́ mí yá bòo dɔ̀ ɛ̀ dí wɛ̀. 34Ɛ́ nín mì hɛ̃nnin nɛ mi khíi dí bòo iè hɔ̀ lɛ ɛ́ mí fɔ́ɓán ɛ̀ mì dí ɛ̀ dàá fuen. Hɛ̀rí nìnbí-cóoní mì tĩ́ihṹ ɛ́ ɲún ńɲiihĩ́ dìcóoní dɔ̀ ɛ́ yí mii vĩ́ wɛ̀.» 35Á khɛ́ hɔ́pe sí vɔ́, à khie mɔ̀ hɔ̀ búrú à dɔ́ Dɔfĩn bɛrikɛ ɓɛ̀pe ɓɛ́kùi híɛhɔ́, à ɓùekɛa hɔ̀ à wo ɛ́ lɛ̀. 36Ɛ́ ɓɛ́pe ɓɛ́kùi ɛ́ wo yòó yú lé tĩhiè ɛ́ ɓɛ́ ɓiɛ̀ ɛ́ khie ɛ́ dí. 37Kèpe lɛ hàarí wi le ɲumu wiè dɛ̀bɛhɔ́ hũn kè kùi ɛ́ hàarí iè nìnbirìe khĩɛ́-ɲu àá ɓaàtĩ àá pírú àá nìɛ huézĩ́ (276). 38Ɛ́ hɔ́ lɛ ɛ́ ɓɛ́ dú tù vɔ́, ɛ́ ɓɛ́ khie khũa hɔ̀ dínlɔ́ lɛ kɛ́ wi lepe ɲumu wie hũn ɛ́ táa koosí hɔ́ ɲumu bòo lɛ ɛ́ wé ɛ̀ lè yòó zɛ́winí.

Lè ɲumu wiè dɛ̀bɛhɔ́ kùeń yáarɔ́ bòo

39Ɛ́ bòo lɛ ɛ́ hɔ́ sí van tɛ̃un, ɛ́ ɓɛ́ yí dũń lé viì ɛ́ lé pinpinù ɛ́ dàa kie ɛ́ dàa van hũn wɛ̀; kɛ́ lé ɲumu wie tɔntɛ́riè den mɔn lè viì dɔ̀ lɛ ɛ́ ké dɛ̀ ɛ́ vɛ dìń hũn. Ɛ́ ɓɛ́ nɛ kɛ́ hɔ́ ɛ́ wé yínin ɛ́ ɓɛ́ ɛ́ dàá lé ɲumu wiè ɛ́ vɛ dĩ́ní yán. 40Ɛ́ ɓɛ́ wo khie fuerɛ pelè dĩ̀nílán hɛ̃nlɛ̀a ɛ́ fùɛrɛ̀sínin hɔ̀ ɲumu hũn, ɛ̀ hɔ̀ dãahĩ́ lɛ te lepe wiè ɛ́ wóò cã̀aní ɛ́ ɓɛ́ lò fuenkɛa ɛ̀ ɓɛ̀ khie can lè fúrɛ́ dɛ̀bɛhɔ́ lèpe wiè híɛhɔ́, bòo lɛ ɛ́ wé ɛ̀ lè pinpinù ɛ̀ súuní lé ɛ̀ dàá khã́a lépe viì lɛ ɛ́ ɓɛ́ mɔn ɛ́ wɛ ɓɛ vɛ dĩń hũn. 41Kɛ́ lé wiè ɛ́ den van zɔn hɔ̀ hã̀anì bɔ̀kuì dɔ̀ hũn hɔ̀ ɲumu fìi hũn, ɛ́ pelè híɛhɔ́ ɛ́ wo van zɔn fùuniɛ ɛ́ lé wo yí dɛ̀ ɛ́ yá bĩní lé wɛ̀. Ɛ̀ pelè máahṹ bòo ɛ́ hɔ́ ɲumu lɛ ɛ́ sànbɔ̀níkɛ àá pànkɛ́ ɛ́ ɓɛrɛ háakɛa.

42Ɛ́ ɓɛ́ sɛ̃̀nɛ̀dɔ́síɓɛ́ ɛ́ hṹn cɛ̀ ɓɛ ɛ̀ ɓé ɓɛ́ kɛ̀sí nìɛ bòo lɛ ɛ́ wé àdɔ̀ ɛ́ bí zè lé wũa ɛ̀ vĩ́ wɛ̀. 43Kɛ́ á sɛ̃̀nɛ̀dɔ́síɓɛ́ ɲúnsɔ ɛ́ den hṹn cɛ̀ à fuení Pooli ǹ á pɛ̃́, ɛ́ ɓɛ́ wo yí dàń hɔ́ bòo lɛ ɛ́ ɓɛ́ hṹn nɛ ɓɛ wé ɛ́ yí wé wɛ̀. Ápe sɛ̃̀nɛ̀dɔ́síɓɛ́ ɲúnsɔ ɛ́ wo lɛ́ lé ɲunù ɓà ǹ nɛ ɓɛ lɛ ɛ́ dɛ̀ wóò wũa ɛ̀ dí hɔ́ híɛhɔ́ ɛ̀ cáakɛ zɔ hɔ ɲumu ɛ̀ wũa kã́a lé sṹsùnù. 44Ɛ̀ ɓɛ̀lɛ kɛ́ ɛ̀ dɛkɛsí hɔ́ dãahĩ́ lɔ̀n tàá lè ɲumu wiè bòo lɛ ɛ́ wúa ɛ̀ hɔ̀ kɛ́ lɔ̀n ɛ̀ dàá vɛ lé. Ɛ́ hɔ́ wɔ́ kɛ̀amu ɛ́ ɓɛ́pe ɓɛ́kùi ɛ́ dɛ̀rɛ van lɔ́ lé sṹsùnù kɛ́ bòo dɔ̀ ɛ́ yí wí-e dɔ̀ wɛ̀.

Currently Selected:

Bɔ̀werà 27: bwj

Highlight

Compare

Copy