Bɔ̀werà 26

Pooli ɛ́ mí ɲunù ɛ̀ sɛ Akiripa híɛhɔ́

1Ɛ́ Akiripa ɛ́ zɔn bie lɛ́ Pooli ɛ́ nɛ làa: «Kɔ́ dɛ̀ kɔ̀ ɲunù ɛ́ munkɛ.» Ɛ́ Pooli ɛ́ yòó díɛniɛ mí núnú khieniɛ à zɔn ɛ́ mí ɲunù munkɛ ɛ́ nɛ làa: 2«Bɛ́zuú Akiripa, niǹ ɲún ɛ́ tĩ iè hɔ̀ lɛ ɛ́ zoòni ɛ́ ń dɛ̀ niǹ ɲunù ɛ́ nin munkɛ kɔ híɛhɔ́ hɔ̀pe bòo lɛ ɛ́ ɓɛ́ Zuifuɓɛ ɛ́ nɛ ń wɔ́ khɔn bòo hũn míkùi. 3Ń den hɛ̀ wookɛa wɛ niǹte iè hɔ̀ lɛ́ ɛ́ kɔ́ dũ ɓɛ Zuifuɓɛ làndɛ́a àá hɔ́ bòo lɛ ɛ́ ɓɛ́ wóò wũ̀aní lɔ̀n míkùi cɛ̃̀un. Ɛ́ nín kɔ̀ hɛ̃nnin nɛ kɔ hĩ̀ kɔ̀ hũn ɛ̀ kɔ̀ ɲí niǹ bòo lɛ ɛ́ nín bie.

4Ɓɛ̀ Zuifuɓɛ ɓɛ́kùi ɛ́ dũ niǹ bòo lɛ ɛ́ te dàa hàarí wi niǹ zĩncɛ́mu hũn, ɛ̀ ɓɛ̀ dũ kɛ́ niǹ zĩncɛ́mu míkùi ɛ́ wɔ́ kìe dàa nìɛ tĩ́ihṹ àá Zerizalɛɛmu hũn. 5Ɓɛ̀ dũ mi hɛ̀rí hàarí ɛ́ kɛ́ ɓɛ́ tɛ̀ ɛ́ ɓɛ ɛ̀ bie hɔ bòo lɛ ɛ́ ɓɛ́ mɔn niǹ bòo hũn, ɛ́ ɓɛ́ dɛ̀ hɔ̀ ɛ́ bie nɛ ńpe ɛ́ iè farizĩɛ dɔ̀, ɓɛ̀pe lɛ ɛ́ wóò bè hɔ̀ làndɛ́ bòo ɛ́ hièní cɛ̃̀un. 6Ɛ́ zoòni, ɛ́ niǹ lìe ɛ́ lè iè hɔ̀ lɛ ɛ́ Dɔfĩn bòo lɛ ɛ́ Hɔ́ hàarí lɛ́ mí ɲunù nɛ mí ɓén wé ɛ́ lɛ́ kìe zĩnkĩ́ɓɛ̀ ǹ iè pe ɛ́ nín hiè àá ńdɛsĩ̀nlɔ́. 7Ɛ́ hɔ́pe kìe dàa zĩhĩ́ɛ ɲúuhɛ̃ pírú àá bɔ̀nbɔ̀ ɲu míkùi ɛ́ lò ɓiɛ̀ ɛ́ hìé àá ńdɛsĩ̀nlɔ́ nɛ ɓɛ ɛ̀ mi hɔpe bòo sɔ ɲunù tínlɔ́, ɛ́ ɓɛ́ wo can ɓɛ́ kuò ɛ́ hɔ̀pe Dɔfĩn ɛ̀ ɓàanínin sṹnúhṹn àá wiɛhɔ́. Ɛ́ kɔ́pe bɛ́zuú Akiripa, hɔ̀ iè hɔ̀ lɛ ɛ́ ńpe ɛ́ hɔ̀pe bòo sɔ ɛ̀ hìé àá ńdɛsĩ̀nlɔ́ ɛ́ ɓɛ́ Zuifuɓɛ ɛ́ dàa nɛ ń wɔ́ khɔn. 8Ɛ́ hɔ́ iè ńɓùo ɛ́ mípe Zuifuɓɛ dàa wóo líi ɛ̀ mì nɛ hɔ lɛ ɛ̀ Dɔfĩn ɛ̀ vìení ɓɛ́ nìhiè ɛ́ iè bòo lɛ ɛ́ yí dɛ̀ yá wé? 9Ǹpe kùusɔ yɛ̀rɛ́ hṹn wóò nùún ɛ̀ ǹ nɛ ń fɔ́ɓán ɛ̀ ǹ wé bòo míkùi ɛ̀ dàa sí-e pe Nazarɛɛte Yiezu yèrè lénlɔ́. 10Ɛ́ sí iè pe bòo lɛ ɛ́ ń hàarí wɔ́ hɔ́ Zerizalɛɛmu hũn. Ń hàarí yú lé ɲunù ɓɛ̀ khɛ̃́ndàariè hándíe viì lɛ ɛ́ dàá ɓaakɛ ɓɛ ńdɛsĩ̀riè bìkuì ɛ́ kóo lé kɛ̀sí hũn. Ɛ̀ ɓɛ̀ hṹn wóo ɓen lɔ̀ peɓɛ̀ lìe ɛ́ nɛ ɓɛ fɔ́ɓán ɛ̀ ɓɛ̀ ɓén, ɛ̀ ǹ wóò tɛ̀ peɓɛ̀ ɓénlɔ bòo. 11Ń hṹn wóò hĩ́ní bè ɓɛ̀ Zuifuɓɛ ńkóoɓánlɔ̀n zĩhĩ́ɛ míkùi ǹ ɛ̀ vɛ́ peɓɛ̀ ɲɛkɛ̃̀a pehɔ̀ hũn, ɛ̀ ǹ hàarí wɛ wóo nin mɛmɛkɛ ɓɛ ɛ̀ ɓɛ̀ pĩ́-ɛ pe Yiezu bòo. Niǹ tĩì ɛ́ hɛ̀ hàarí wóò cĩ̀ ɓà ǹ cɛ̃̀un ɛ̀ ǹ hɛ̀ ɲɛ peɓɛ̀ máahṹ ɛ̀ vɛ hɔ lɔ́-ɓuà hũn ɛ̀ vɛ vɛ́ peɓɛ̀ ɲɛkɛ̃̀a yán.»

Bɔw 9.1-19; 22.6-16

12«Ɛ́ sí iè pe hɔ̀ bòo hũn, ɛ́ wurù dɔ̀ zɔǹ ɛ́ ń dàa yú lé ɲunù àá hɔ́ pànkɛ́ ɓɛ̀ khɛ̃́ndàariè hándíe viì ɛ́ dàa vaá-vɛ hɔ Damaasi. 13Ɛ́ hɔ́ lɛ ɛ́ ń wi le wṹn lɔ̀n, kɔ̀pe bɛ́zuú Akiripa, lè wṹsɔn-dáabíi hũn, ɛ́ ń mɔn ńpiemu dɔ̀ lɛ ɛ́ pɔ le wurù ńpiemu kɛ́ hɔ́ yòó ɲiiniɛ lɔ́ hɔ́ hóohũn ɛ́ ɓen siɛ kíríkɛa kie ǹ, ǹpe àá kè ńkɔhĩ́ lɛ hàarí bɔ̀ lè wṹn àá mi. 14Ɛ́ ké pe kè kùi ɛ́ kùɛnkɛa siɛ lè súsũ̀nù; ɛ́ ń ɲɛ́ hɔ́ tɛmu dɔ̀ kɛ́ hɔ́ zɔn ɛ́ bie àá mí àá Hebereɓɛ níi ɛ́ nɛ làa: “Sooli, Sooli, hɔ ńɓuò ɛ́ kɔ́ dàa ɛ́ niǹ lɔ̀n ɛ̀ biení? Hɔ̀ ɛ́ hie kɔ̀ viì ɛ̀ kɔ̀ bie nɛ kɔ ɛ̀ tán hɔ hĩɛ̀ àá kɔ́ zeń.” 15Ɛ́ ń zɔn dìe ɛ́ nɛ: “Ɲunsɔ, kɔ iè wieni?” Ɛ́ Ɲunsɔ ɛ́ zɔn nɛ: “Hɔ̀ ie ǹpe Yiezu lɛ ɛ́ kɔ́ lɔ̀n ɛ̀ biení. 16Kɛ kɔ́ síɛ hĩ́ní yòó dìń kɔ́ zehĩ́ lɔ̀n iè hɔ̀ lɛ ɛ́ lɛ iè bòo lɛ ɛ́ ń dàa zɛ̃́niɛ niǹte kɔ ǹ: Nín wé kɔ àá niǹ tɔntɛ́, kɔ́ wóo kɔ vɛ bie hɔ bòo lɛ ɛ́ kɔ́ dàa mɔn mi hɔ̀ zoòni, ɛ̀ kɔ̀ ɛ́ bĩní bie hɔ bòo lɛ ɛ́ ń wóo ɓén zɛ̃́ní ɛ́ lɛ́ kɔ ǹ. 17Ɛ́ ń wóo ɓén leń kɔ ɛ́ lé mì dàa nìɛ núnú hũn àá ɓɛ́pe lɛ ɛ́ yí mì dàa núnú hũn, ɓɛ̀pe lɛ ɛ́ nin tɔn kɔ ɛ̀ kɔ̀ vɛ viì. 18Nín tɔn kɔ ɛ̀ kɔ vɛ hán peɓɛ̀ yìe, ɛ̀ kɔ̀ leń ɓɛ́ hɔ̀ síbínú hũn ɛ̀ khíi vɛ dé hɔ́ ńpiemu hũn, ɛ̀ ɓɛ̀ lí-e Sitũanɛ núnú hũn ɛ̀ khíi vɛ Dɔfĩn viì. Kɛ́ ɓɛ́ tɛ̀ ɛ́ dũmuasɛ̃̀ mi ǹ, ɛ́ nín dé peɓɛ̀ bɔ̀koohɛ̃ sɛ́wɛ́rí ɛ́ lɛ́ ɓà ǹ, ɛ̀ ɓɛ̀ ɛ́ yí ɓɛ́ kaǹlén ɓɛ̀ nìnbirìe lɛ bòo sɛ̃̀ Dɔfĩn tĩ́ihṹ.”

19Ɛ́ kɛ̀amu, kɔ̀pe bɛ́zuú Akiripa, ɛ́ ń yí pĩ́ hɔ́ bòo lɛ ɛ́ ń mɔn lɛ ɛ́ lɔ́ àá Dɔfĩn viì wɛ̀. 20Kɛ́ ń van zɔn buie lè Bentĩnu ɛ́ lɛ́ ɓɛ́ Damaasi nìɛ ǹ vɔ́, ɛ̀ den khie van buie lè ɛ́ lɛ́ ɓɛ́ Zerizalɛɛmu nìɛ ǹ àá hɔ́pe Zudee pɛ̃̀hɛ̃ nìɛ ɓɛ́kùi ɛ́ khie van páa ɓɛ̀pe lɛ yí ɓɛ́ Zuifuɓɛ. Ń bie lɛ́ ɓà ǹ nɛ ɓɛ zɛ̀ní ɓɛ́ tĩɛ̀ ɛ̀ ɓɛ̀ fùansí hɔ́ bɔ̀koohɛ̃ wénlɔ́ ǹ, ɛ̀ ɓɛ̀ lɛ́ ɓɛ́te Dɔfĩn, ɛ̀ ɓɛ̀ wé bòo lɛ ɛ́ zɛ̃́ní kɛ́ peɓɛ̀ tĩɛ̀ ɛ́ hɛ̀ zɛ̀niɛ. 21Ɛ́ sí iè pe bòo lɛ temu lɛ́ ɛ́ ɓɛ́ Zuifuɓɛ ɛ́ dàa ɓɛrɛ zɔn ɓaa mi kɛ́ ń wi le Dɔfĩn zũ-bɛhɔ́ hũn, ɛ̀ ɓɛ̀ hṹn cɛ̀ ɛ́ ɓɛ ɛ̀ ɓé mi. 22Kɛ́ Dɔfĩn ɛ́ hìe mi ǹ fúu ɛ́ ɓɛrɛ dɛ̃un zoòni; ɛ́ ń pɛ́ wi yán ɛ́ hɔ̀ bòo lɛ ɛ́ ń mɔn pehɔ̀ bòo hũn ɛ̀ bie ɛ̀ lɛ́ ɓɛ́ nìnbirìe ɓɛ́kùi ǹ, ɓɛ̀ nì-cíini àá ɓɛ́ nì-bɛ̃hɛ̃ ɓɛ́kùi. Ń yá bɔ̀ɓuɛ̀ dɔ̀ bòo ɛ̀ bie, kɛ́ hɔ́lɛ ɛ́ ɓɛ́ Dɔfĩn bɔ̀háaníriè àá ɔ́ Moyiize ɛ́ hàarí bie nɛ hɔ ɓén wé ɛ́ ɓen bòo mí. 23Ɓɛ̀ den hàarí bie ɛ́ nɛ ape Kirisa ɛ́ lɔ̀n ɛ́ ɓén be fúu ɛ́ vɛ hí, à ɛ́ wí-e hán nìnbírɔ lɛ mii vìé, à ɓén buie hɔ ńpiemu bòo ɛ̀ lɛ́ ɓɛ́ Zuifuɓɛ ǹ àá ɓɛ́ dàa nìɛ lɛ ɛ́ kɛ́ ɓɛ́kùi.»

24Ɛ́ hɔ́ lɛ ɛ́ Pooli ɛ́ mí ɲunù ɛ̀ munkɛ kɛ̀amu, ɛ́ Fɛsitiise ɛ́ zɔn bérɛ ɛ́ nɛ: «Pooli, kɔ̀ ɲún hĩ́nà, kɔ́ kɛ̀rɛa fúu ɛ́ kɔ́ bĩniɛ ɛ́ khíekɛ!» 25Ɛ́ Pooli ɛ́ zɔn kɔ̃́niɛ ɔ̀ ɛ́ nɛ làa: «Nì-bɛhɔ́ Fɛsitiise, nín ɲún ɛ́ yí hĩ́ní wɛ̀. Hɔ̀ biehĩ́ lɛ ɛ́ nín bie ɛ́ iè bɔ̀berà biehĩ́ àá bɔ̀dũmunù biehĩ́. 26À bɛ́zuú Akiripa ɛ́ dũ hɔ, ɛ́ sí iè hɔ̀pe ɛ́ ń dàa ɛ́ dɛ̀ hɔ̀ ɛ́ bie piè híɛhɔ́ kɛ́ niǹ fɔnù ɛ́ tɛ́rɛ. Ń dũmuasɛ̃̀ kɛ́ á dũ hɔ míkùi iè hɔ̀ lɛ ɛ́ hɔ́ yí bòo lɛ ɛ́ wɔ́ tànkɔ̀niɛ wɛ̀. 27Ɛ́ kɔ́pe bɛ́zuú Akiripa, kɔ́ dũmuasɛ̃̀ hɔ̀pe bòo lɛ ɛ́ ɓɛ́ Dɔfĩn bɔ̀háaníriè ɛ́ khɛ́ ǹ? Ń dũ kɛ́ kɔ́ dũmuasɛ̃̀ hɔ̀ ǹ!» 28Ápe Akiripa ɛ́ zɔn bie lɛ́ Pooli ǹ ɛ́ nɛ làa: «Kɔ́ cɛ̀ ɛ́ kɔ wé mi àá Kèrètĩ́ɛ fùa fùa kɛ̀amu?» 29Ɛ́ Pooli ɛ́ zɔn nɛ: «Hɛ̀rí ɛ̀ hɔ̀ wé fùa fùa tàá ɛ̀ hɔ̀ míi, ɛ̀ ǹpe wo ɛ́ Dɔfĩn ɛ̀ hɛ̃nnin nɛ hɔ́ bí wé kɔ́pe kɔ̀ dòomún, kɛ́ mípe lɛ ɛ́ ɲí àá niǹ viì mìkùi zoòni, ɛ̀ zɛ̀ní ɛ̀ dĩń kɛ̀a mi, lɛ kɛ́ hɔ́pe zɔ̀kɔ̀zɔ́kɔ́ɓɛ̀ lɛ ɛ́ bòo mí yán wɛ̀!»

30Ápe bɛ́zuú Akiripa àá ɔ́ kuvɛrɛnɛɛre Fɛsitiise àá Bereniise àá ɓɛ́pe lɛ ɛ́ hṹn wi yán ɓɛ́kùi ɛ́ wo síɛ hĩ́nà, 31ɛ́ wo khie ɛ́ lé kɛ́ ɓɛ́ ɛ́ bie ɛ̀ lɛ́kɛ ɓán ɛ́ nɛ: «Àpe nùún sɔ lɛ ɛ́ yí wé bɔ̀koohɔ́ dɔ̀ lɛ á dàa sãawi à ɓé tàá à dé kɛ̀sí hũn wɛ̀.» 32Ɛ́ Akiripa ɛ́ khie bie lɛ́ á Fɛsitiise ǹ ɛ́ nɛ: «Àpe nùún sɔ lɛ ɛ́ hṹn dɛ̀ ɛ́ fúànsínin kɛ́ á hṹn yí vi-e bɛ́zu-bɛhɔ́ ǹ wɛ̀.»

Currently Selected:

Bɔ̀werà 26: bwj

Highlight

Compare

Copy