Bɔ̀werà 25

Pooli ɛ́ sĩ̀n ɛ́ mí ɲunù ɛ̀ sɛ á Fɛsitiise híɛhɔ́

1Ɛ́ Fɛsitiise ɛ́ temu wo khie wɔ́ Kuvɛrɛnɛɛre hɔ̀ pɛ̃̀hɛ̃ sɔ hũn. Ɛ́ pehɔ̀ sítĩnlɔ́ bɔ̀nbɔ̀ tĩ, à lɔ́ hɔ́ Sezaree ɛ́ yòó van Zerizalɛɛmu. 2Ɛ́ ɓɛ́ khɛ̃́ndàariè hándíe àá ɓɛ́ Zuifuɓɛ nì-bɛ̃hɛ̃ ɛ́ van yú-o ɛ̀ ɓɛ̀ bie lɛ́ à ǹ nɛ Pooli ɛ́ wɔ́ khɔn, ɛ̀ ɓɛ̀ hɛ̃nnɛ à ǹ, 3nɛ a wé mí hiì à khũ̀aní-ɛ ǹ ɛ̀ ɓiení hɔ́ Zerizalɛɛmu hũn. Kɛ́ ɓɛ́ den iè bìɛ lɛ hàarí lɔ̀ tɔ̀ nɛ ɓɛ lé si Pooli ɛ̀ ɓé lé wṹn lɔ̀n. 4Ɛ́ Fɛsitiise ɛ́ zɔn bie lɛ́ ɓà ǹ nɛ a Pooli ɛ́ wi hɔ kɛsí hũn Sezaree lóo hũn, ie mípe kùusɔ ɛ́ yí mi míi kɛ́ mí mii khũ̀á siɛ vɛ yán. 5À zɔn bie sĩiniɛ ɛ́ nɛ: «Ɛ́ mí lɛ́ nɛ mi hándíe ɛ̀ bèɓán àá mi ɛ̀ dàá siɛ vɛ hɔpe Sezaree. Kɛ́ ápe nùún sɔ ɛ́ dàa ɓen wɔ́ bɔ̀koohɔ́ dɔ̀, ɛ̀ ɓɛ̀ ɛ̀ bie hɔ yán.» 6Ɛ́ Fɛsitiise ɛ́ yí cãakɛ ɛ̀ pɔní sítĩnlɔ́ hùutĩ tàá sítĩnlɔ́ pírú peɓɛ̀ tĩ́ihṹ wɛ̀; à khũ̀a síɛ van hɔ̀ Sezaree. Ɛ́ pehɔ̀ sí lɛ ɛ́ tĩ, à van kɛsí hɔ̀ lìe lènlén, à lɛ́ lé ɲunù nɛ ɓɛ dàá ɔ́ Pooli ɛ̀ dàá ɓen. 7Ɛ́ hɔ́ lɛ ɛ́ ɓɛ́ dàa ɔ̀ ɛ́ dàa ɓɛrɛ, ɛ́ ɓɛ́ Zuifuɓɛ lɛ yòó lɔ́ hɔ́ Zerizalɛɛmu ɛ́ ɓen siɛ, ɛ́ khie kírie ɔ̀ ǹ, ɛ̀ ɓɛ̀ ɛ́ nɛ a wɔ́ hɔ́ miikɛ bɔ̀koohɛ̃ bɔ̀sũmúa, kɛ́ ɓɛ́ lò den yí dɛ̀ yá zɛ̃́ní kɛ́ hɔ́pe lɛ ɛ́ ɓɛ́ ɛ́ bie ɛ́ bɔn wɛ̀. 8Ɛ́ Pooli ɛ́ zɔn ɛ́ mí kùrú ɲunù ɛ̀ sɛ ɛ́ nɛ làa: «Ǹpe ɛ́ yí wé khe bòo dɔ̀ hũn wɛ̀. Ń yí wé khe ɓɛpe Zuifuɓɛ làndɛ́ hũn, ɛ̀ ǹ yí wé khe àá lépe Dɔfĩn zũ-bɛhɔ́, ɛ̀ ǹ lò yí wé khe àá ɔ̀pe Rɔmu bɛ́zu-bɛhɔ́ wɛ̀.»

9Kɛ́ á Fɛsitiise ɛ́ den wɛ nɛ mí bòo ɛ̀ tĩìní ɓɛ́ Zuifuɓɛ ǹ; á zɔn ɛ́ Pooli ɛ̀ dìenin ɛ́ nɛ làa: «Kɔ́ tɛ̀ ɛ́ kɔ yòó vɛ hɔ Zerizalɛɛmu ɛ̀ ɓɛ̀ yòó vɛ lè kɔ̀ lìe niǹ yìe hũn hɔ̀ bòo lɛ ɛ́ ɓɛ́ khɛ́ lɔ̀n?» 10Ɛ́ Pooli zɔn kɔ̃́niɛ ɛ́ nɛ làa: «Lɛ iè ǹpe ɛ́ dɛ̃̀ à Rɔmu bɛ́zu-bɛhɔ́ lìe lèrìe híɛhɔ́, ɛ́ hɔ́ iè peɓɛ̀ viì ɛ́ niǹ lìe ɛ́ sãawi ɛ̀ hɔ̀ lè nin. Ń yí wé khe àá ɓɛ́ Zuifuɓɛ kɛ̀a bòo lɛ ɛ́ kɔ́pe kɔ̀te ǹ ɛ́ dàa dũ hɔ ɛ́ ciiníkɛa. 11Kɛ́ hɔ́ hɛ̀ ɓen bɔn kɛ́ ń wɔ́ khɔn, kɛ́ ń wɔ́ bɔ̀koohɔ́ dɔ̀ lɛ ɛ́ ń fɔ́ɓán ɛ̀ ǹ ɓé, ɛ́ ǹ yí pĩ́ niǹ húmú wɛ̀. Kɛ́ bɔ̀berà ɛ́ ɓen mí ɓɛ́pe nìɛ sɔ lɛ bòo lɛ ɛ́ ɓɛ́ ɛ́ bie nɛ ń wɔ́ khɔn hũn, ɛ̀ nìnbírɔ dɔ̀ ɛ́ yí dɛ̀ mi ɛ́ yá dé peɓɛ̀ núnú hũn wɛ̀. Nín cɛ̀ nɛ niǹ bòo yìe ɛ̀ vɛ wiekɛ á Rɔmu bɛ́zu-bɛhɔ́ híɛhɔ́.» 12Ɛ́ Fɛsitiise ɛ́ khie khɛ́ àá mí máahṹ nìɛ vɔ́, à zɔn kɔ̃́niɛ ɛ́ nɛ làa: «Kɔ́ vɔn ɔ̀ Rɔmu bɛ́zu-bɛhɔ́ ǹ, ɛ́ kɔ́ vɛ piè viì.»

Bɛ́zuú Akiripa ɛ́ wɛ mii ɲí Pooli ɲunù

13Ɛ́ pehɔ̀ sítĩnlɔ́ bɔ̀nbɔ̀ yiɛní khíirɔ́ máahṹ, à bɛ́zuú Akiripa àá ɓá hãá Bereniise ɛ́ ɓɛrɛ Sezaree hũn ɛ́ ɓɛ ɓen dé Fɛsitiise tìɛní. 14Kɛ́ hɔ́ lɛ ɛ́ ɓɛ́ hàarí ɛ́ sítĩnlɔ́ cɛ̀rìɛɛ ɛ̀ wé yán, ápe Fɛsitiise ɛ́ munkɛa ɔ̀ Pooli bòo ɛ́ lɛ́ á bɛ́zuú Akiripa ǹ. À nɛ: «Felikise ɛ́ fùɛrɛ̀sí nùún dɔ̀ ǹ lè kɛ̀sí hũn hũ̀nún. 15Ɛ́ hɔ́ lɛ ɛ́ ń yòó van Zerizalɛɛmu, ɛ́ ɓɛ́ Zuifuɓɛ khɛ̃́ndàariè hándíe àá peɓɛ̀ nìkĩ́ɛ ɛ́ ɓɛrɛ bie lɛ́ mi ǹ nɛ a wɔ́ khɔn, ɛ̀ ɓɛ̀ hɛ̃nnɛ mi ǹ nɛ ń bie nɛ a fɔ́ɓán à ɓé. 16Ɛ́ ń zɔn khɛ́ lɛ́ ɓà ǹ nɛ ɓɛ Rɔmu siè ɛ́ yáà dé nìnbírɔ́ ɓɛ̀lɛ nɛ a wɔ́ khɔn núnú hũn kɛ́ ɓɛ́ yí lɛ́ wṹn ɓàasɔ ǹ nɛ a sɛ mí ɲunù vé ɓɛ̀pe lɛ nɛ a wɔ́ khɔn híɛhɔ́ wɛ̀. 17Ɛ́ ɓɛ́ ɛ́ ɓɛrɛ hũ̀nún àá mi; ɛ́ fùa fùa ɛ̀ pehɔ̀ sí lɛ ɛ́ tĩ, ɛ̀ ǹ lɔ́ kɛsí hɔ́ lìe lènlén ɛ̀ ǹ lɛ́ lé ɲunù nɛ ɓɛ dàá ɔ́pe nùún sɔ ɛ̀ dàá ɓen. 18Ɛ́ ɓɛ́pe lɛ ɛ́ nɛ a wɔ́ khɔn ɛ́ ɓɛrɛ, kɛ́ ɓɛ́ yí bie nɛ a wɔ́ hɛ̀rí bɔ̀koohɔ́ dɔ̀ lɛ ɛ́ ńpe ɛ́ yɛ̀rɛ́ hṹn bòo ɛ̀ lieníkɛ wɛ̀. 19Peɓɛ̀ bienù lɛ ɛ́ ɓɛ́ dàa àá ɔ́ ɛ́ iè ńwũ̀anín dɔ̀ lɛ ɛ́ vaá-vɛ àá peɓɛ̀ Dɔfĩn wṹn bènlɔ́ viì, àá nùún dɔ̀ lɛ húrun lɛ yèrè ɛ́ ɓɛ́ nɛ Yiezu, kɛ́ ápe Pooli ɛ́ den nɛ a yìe wi. 20Ɛ́ ńpe wo yí dũ bòo lɛ ɛ́ nin wé ɛ̀ dàá ban hɔ́pe biehĩ́ sɔ sí yìe wɛ̀. Ɛ́ ń dìe ɔ̀pe Pooli nɛ a mii tɛ̀ yòó vɛ hɔ Zerizalɛɛmu ɛ̀ piè lìe ɛ̀ vɛ lè yán hɔ̀pe bòo sɔ si hũn? 21Kɛ́ Pooli ɛ́ den pɛ̃́ à vɔn ɔ̀ Rɔmu bɛ́zu-bɛhɔ́ ǹ. À nɛ mí cɛ̀ ɛ̀ mí lìe ɛ̀ vɛ lè àpe Rɔmu bɛ́zu-bɛhɔ́ híɛhɔ́. Ɛ́ ń wo lɛ́ lé ɲunù nɛ ɓɛ bìsí-e lè kɛ̀sí hũn fúu kɛ́ yí bòo lɛ ɛ́ ń van tɔniɛ ɔ̀ ɛ́ viɛniɛ àpe bɛ́zu-bɛhɔ́ viì.» 22Ɛ́ Akiripa ɛ́ zɔn bie lɛ́ á Fɛsitiise ǹ ɛ́ nɛ làa: «Ǹpe ɓiɛ̀ ɛ́ wɛ ɛ́ nin ɲí-ɛ pe nùún sɔ ɲunù.» Ɛ́ Fɛsitiise zɔn nɛ: «Ɛ́ yìrí ɛ̀ kɔ̀ ɓén ɲí piè ɲunù.»

23Ɛ́ pehɔ̀ sí lɛ ɛ́ tĩ, àpe Akiripa àá ɔ́ Bereniise ɛ́ van ɓɛrɛ àá ɓɛ́ nì-bɛ̃hɛ̃ yáamu ɛ́ yòó zɔn lè ńkóoɓánlɔ̀n zunù, ɓɛ̀pe àá ɓɛ́ sɛ̃̀nɛ̀dɔ́síɓɛ́ ɲúuhɛ̃sìe àá ɓɛ́ lóo nì-bɛ̃hɛ̃. Ɛ́ Fɛsitiise ɛ́ lɛ́ lé ɲunù ɛ́ ɓɛ́ van dàa ɔ̀ Pooli ɛ́ dàa ɓɛrɛ. 24Ɛ́ Fɛsitiise ɛ́ zɔn nɛ: «Kɔ̀pe bɛ́zuú Akiripa àá mípe lɛ wi hũ̀nún mìkùi àá kie, mí loo ɔ nùún lɛ, ɓɛ̀ Zuifuɓɛ ɓɛ́kùi ɛ́ ɓɛrɛ niǹ viì hɔ̀ Zerizalɛɛmu hũn àá hɔ́pe hũ̀nún, kɛ́ ɓɛ́ ɛ́ bénkɛ nɛ a yí fɔ́ɓán à bĩní yìe wé wɛ̀. 25Kɛ́ ńpe niǹ viì, à yí wé bɔ̀koohɔ́ dɔ̀ lɛ dɛ̃un piè húmú wɛ̀. Kɛ́ hɔ́ lɛ ápe míte ǹ ɛ́ vɔn ɔ̀ bɛ́zu-bɛhɔ́ ǹ, ɛ́ ń nɛ nin tɔní-ɛ ɛ̀ viɛní piè viì. 26Kɛ́ ń den wo yí dũ̀ bòo lɛ ɛ́ nin wĩ́ hɛ̀lɛ̀lɛ̀ piè bòo hũn ɛ̀ vɛ lɛ́ á bɛ́zu-bɛhɔ́ ǹ wɛ̀. Ɛ́ sí iè hɔ̀pe ɛ́ ń dàa nɛ ɓɛ dàá ɔ́ dàa ɓen mì híɛhɔ́ kɛ́ kɔ́pe bɛ́zuú Akiripa kɔ̀te ǹ ɛ́ wi yán, bòo lɛ ɛ́ wé kɛ́ ké ɓen dìekɛa ɔ̀ ǹ vɔ́, ɛ̀ ǹ yí bòo dɔ̀ lɛ ɛ́ nin wĩ́ ɛ̀ vɛ lɛ́ ápe bɛ́zu-bɛhɔ́ ǹ piè bòo hũn. 27Iè hɔ̀ lɛ ɛ́ ńpe niǹ viì, ɛ̀ hɔ̀ yí te mí yìe ɛ̀ ǹ tɔní kɛ̀sí nùún ɛ̀ viɛní kɛ́ ń yí yí bòo lɛ ɛ́ ɓɛ́ nɛ a wɔ́ ɛ̀ síɛ wĩ́ piè bòo hũn wɛ̀.»

Currently Selected:

Bɔ̀werà 25: bwj

Highlight

Compare

Copy