Bɔ̀werà 24

Hɔ̀ bòo lɛ ɛ́ ɓɛ́ Zuifuɓɛ nɛ a Pooli ɛ́ wɔ́ khɔ́n lɔ̀n

1Ɛ́ pehɔ̀ sítĩnlɔ́ hùanú máahṹ, à khɛ̃́ndàarɔ wì-bɛhɔ́ Ananiasi ɛ́ bɔ̀ɓán àá ɓɛ́ nìkĩ́ɛ nìɛ ɓɛ̀ yìɛní dɔ̀ àá nùún dɔ̀ lɛ yèrè ɛ́ ɓɛ́ nɛ Tɛrɛtiliise ɛ́ dàa siɛ van hɔ̀ Sezaree. À Tɛrɛtiliise sɔ ɛ́ hàarí iè ɓɛ̀ nìnbirìe ɲɛtɛ̀ hɔ̀ lìe lènlɔ́ hṹn. Ɛ́ ɓɛ́ siɛ van ɔ̀ Kuvɛrɛnɛɛre Felikise viì ɛ́ siɛ van munkɛa bòo lɛ ɛ́ ɓɛ nɛ a Pooli ɛ́ wɔ́ khɔn lɔ̀n piè híɛhɔ́. 2Ɛ́ ɓɛ́ khie vɔn ɔ̀ Pooli á ɓɛrɛ, á Tɛrɛtiliise ɛ́ wo hĩ́nà ɛ́ hɔ̀ bòo lɛ ɛ́ ɓɛ́ nɛ a wɔ́ khɔn lɔ̀n ɛ̀ bie ɔ̀ kuvɛrɛnɛɛre híɛhɔ́ ɛ́ nɛ làa: «Nì-bɛhɔ́ Felikise, kɔ̀pe temu lɛ ɛ́ ké dàa wi le hũn-wiɛ̀ bɛ̀bɛhɔ́ hũn, ɛ̀ hɔ̀ iè hɔ̀ lɛ ɛ́ kɔ́ dàa kè cɛ̃̀mɛ̀nɛ́ àá bɔ̀dũmunù ɛ́ hɔ́ bòo míkùi ɛ́ dàa zɛ̀niɛ ɛ́ vɛ sãa. 3Ɛ́ ké wóò yí hɔ́pe bɔ̀tente lɛ ɛ́ kɔ́ ɛ́ wé àá kie fúu lè viì míkùi, ɛ́ ké hɛ̀ ɛ́ kɔ̀ tanɓiì ɛ̀ dé pehɔ̀ bòo hũn. 4Kɛ́ ń yí nín bie míi ɛ̀ kɔ̀ dàa bí kansí míi ɛ̀ ɲí àá niǹ viì wɛ̀. Ɛ́ sí iè hɔ̀pe ɛ́ ń dàa ɛ́ kɔ̀ hɛ̃nnin nɛ kɔ wé kɔ hiì ɛ̀ kɔ̀ ɲí àá niǹ viì bìcínbóo. 5Ké huie ɔ̀pe nùún sɔ lɛ ɛ́ mɔn kɛ́ á iè nìsũmúi cɛ̃̀un. À ɛ́ ɓɛ̀ Zuifuɓɛ ɓɛ́kùi ɛ́ khiɛní lé dímíɲɛ́ míkùi hũn, à iè dɔfĩn wṹn koohɔ́ dɔ̀ nìɛ hándí; ɓɛ̀pe lɛ ɛ́ ɓɛ́ wóò ve nɛ “*Nazarɛti siè”. 6À yɛ̀rɛ́ hṹn cɛ̀ mii fĩiní ké Dɔfĩn zũ-bɛhɔ́ ɛ́ ké dàa ɛ́ ɓaa ɔ̀. [Ɛ́ ké hṹn cɛ̀ ɛ̀ kè lè piè lìe ɛ̀ ɓáaní ɓán àá ké làndɛ́, 7kɛ́ á sɛ̃̀nɛ̀dɔ́síɓɛ́ ɲúnsɔ Liziasi ɛ́ den ɓɛrɛ vúa ɔ̀ lɔ́ ké núnú hũn àá pànkɛ́, 8à khie bie lɛ́ ɓɛ́pe lɛ nɛ a wɔ́ khɔn, nɛ ɓɛ ɓen kɔ̀ viì.] Ɛ́ kɔ́ dɛ̀-a ɛ́ dìekɛnin kɔ̀te ǹ ɛ́ dàá mi kɛ́ hɔ́pe lɛ ɛ́ ké ɛ́ bie nɛ a wɔ́ ɛ́ iè bòo lɛ ɛ́ bɔn.» 9Ɛ́ ɓɛ́ Zuifuɓɛ ɛ́ zɔn tɛ̀ hɔ̀pe bòo lɛ á Tɛrɛtiliise ɛ́ bie ǹ ɛ́ nɛ hɔ wɔ́ kɛ̀amu.

Pooli ɛ́ mí ɲunù ɛ̀ sɛ á kuvɛrɛnɛɛre Felikise híɛhɔ́

10Á Kuvɛrɛnɛɛre ɛ́ wo khie lɛ́ lé bienù à Pooli ǹ, ɛ́ Pooli ɛ́ zɔn bie ɛ́ nɛ làa: «Ń dũ kɛ́ lɛ iè pehɔ̀ lɔ́líe bɔ̀kuì kɔ́ iè lìe lèrɔ kìe cɛ̃̀mɛ̀nɛ́ hũn. Ɛ́ ń wo nín munkɛ niǹ ɲunù kɔ̀ híɛhɔ́ kɛ́ ń yá zán wɛ̀. 11Hɔ̀ ɲɛùn yí pɔ sítĩnlɔ́ pírú àá bɔ̀nbɔ̀ ɲu, ɛ́ ń zɔn yòó van hɔ̀ Zerizalɛɛmu ɛ́ nɛ nin yòó vɛ ɓàaní Dɔfĩn. Ɛ́ kɔ́ dɛ̀ ɛ́ dìekɛ ɛ́ dũń kɛ́ hɔ́ iè bɔ̀bín. 12Ɛ́ nìnbírɔ dɔ̀ ɛ́ ɲɛùn yí ɓen tɛrɛ́ mi kɛ́ nin wũ̀aní àá ɔ́dɔ̀ lè Dɔfĩn zũ-bɛhɔ́ hũn tàá kɛ́ nin ɓɛ̀ nìnbirìe ɛ̀ sùkún hóoní ké ńkóoɓánlɔ̀n zĩhĩ́ɛ hũn, tàá lè fɔ́nú hũn wɛ̀. 13Ɛ́ ɓɛ́pe nìɛ sɔ lɛ ɛ́ yí dɛ̀ yá zɛ̃́ní kɛ́ hɔ́pe bòo sí ɛ́ ɓɛ́ ɛ́ bie nɛ n wɔ́ ɛ́ bɔn wɛ̀. 14Kɛ́ lɛ iè hɔ̀ bòo lɛ ɛ́ ń tɛ̀ dũ nɛ nín wé: ǹpe niǹ Dɔfĩn wṹn lɛ ɛ́ bɔ̀ ɛ́ ɓɛ́pe ɛ́ den nɛ le iè dɔfĩn wṹn koohɔ́; kɛ́ ńpe ɛ́ lò den iè kìe zĩnkĩ́nɓɛ̀ Dɔfĩn tɔnlɔ́ ɛ́ nín tɛ́ kɛ̀amu, ɛ̀ ǹ dũmuasɛ̃̀ hɔ̀pe bòo lɛ ɛ́ wɛ̃́ hɔ́ làndɛ́ vɛ̃hṹ hũn àá ɓɛ́ Dɔfĩn bɔ̀háaníriè vɛ̃hɛ̃ hũn míkùi. 15Ɛ́ lɛ iè hɔ̀ bòo lɛ ɛ́ nín hìé àá ńdɛsĩ̀nlɔ́ Dɔfĩn viì: ɓɛ̀ nìnbirìe ɓɛ́kùi, ɓɛ̀lɛ ɛ́ sãa àá ɓɛ́lɛ ɛ́ yí sãa ɛ́ ɓén bɛ̃́nkí ɛ́ vìé. Ɛ́ ɓɛ̀pe kùusɔ ɛ́ lò ɓiɛ̀ dũmuasɛ̃̀ hɔ̀ ǹ. 16Ɛ́ sí iè hɔ̀pe, ɛ́ ń dàa ɛ́ can niǹ kuò bòo lɛ ɛ́ wé ɛ̀ niǹ hũn nùnlé ɛ̀ dàá kań vi-cóoní, ɛ̀ dàá zɛ̃́ní kɛ́ ń yí wé bɔ̀koohɔ́ dɔ̀ Dɔfĩn híɛhɔ́ àá ɓɛ́pe nìnbirìe híɛhɔ́ wɛ̀.

17Ɛ́ lɔ́líe bɔ̀kùi ɛ́ van khie, ɛ́ van khũ̀a ɓɛrɛ hɔ̀ Zerizalɛɛmu hũn àá ńsĩinín ɛ́ nín ɓen lɛ́ kìe dàa nìɛ ǹ, ɛ̀ ǹ leń hɛ̃mù bòo ɛ̀ lɛ́ Dɔfĩn. 18Ɛ́ sí iè pe bòo lɛ ɛ́ ń hṹn wé ɛ́ ɓɛ́ dàa ɓɛrɛ tɛ̀rɛa mi lè Dɔfĩn zũ-bɛhɔ́ hũn. Ɛ́ ń wɔ niǹ te tiɛrɔ́ bòo míkùi ɛ́ vieniɛ kɛ́ nìzã̀amáa ɛ́ yí ɓen kírí mi ǹ, ɛ̀ bɔ̀kánkɛà bòo dɔ̀ ɛ́ lò yí wé yán wɛ̀. 19Kɛ́ hɔ́ Azii pɛ̃̀hɛ̃ Zuifuɓɛ nìɛ ɓɛ̀ yìɛní dɔ̀ ɛ́ pe hṹn wi yán. Ɛ́ kɛ́ ɓɛ́pe ɛ́ hṹn dàa bòo dɔ̀ lɛ ɛ́ ɓɛ nɛ ń wɔ́ khɔn lɔ̀n, ɛ̀ ɓɛ̀pe ɛ́ temu hṹn sãawi ɛ̀ ɓɛ̀ ɓen kɔ̀ viì ɛ̀ ɓen bie hɔ. 20Kɛ́ dàa ɓen bòo mí, ɛ̀ nɛ ɓɛpe nìɛ sɔ lɛ wi hũ̀nún ɛ̀ zɛ̃́ní hɔ́ bɔ̀koohɔ́ lɛ ɛ́ ń wɔ́ ɛ́ ɓɛ́ mɔn ɛ́ dɛ̀rɛ zɛ̃́niɛ pɛ̃̀hṹ lɛ ɛ́ ɓɛ́ dàa zɔn dàa mi ɛ́ dàa van ɓɛ̀ kè lìe lèriè híɛhɔ́. 21Kɛ́ hɔ́ ɓen yí hɔ́pe lɛ ɛ́ ń yòó dɛ̃̀ peɓɛ̀ tĩ́ihṹ ɛ̀ ǹ zɔn bérɛ ɛ́ nɛ: “Hɔ̀ iè hɔ̀ lɛ ɛ́ ń dũmuasɛ̃̀ nɛ ɓɛ nìhiè ɛ́ ɓén vìé ɛ́ niǹ lìe dàa ɛ́ lè hɔ̀pe zooni lɛ mì híɛhɔ́.”»

22Àpe Felikise ɛ́ den hṹn dũ a Ɲunsɔ wṹn bòo ɛ́ ciiníkɛa cɛ̃̀un. Á khíiníɛ hɔ̀pe lìe lènlɔ́ sɔ ǹ, à nɛ ɓɛ lankɛ; à khie bie lɛ́ ɓɛ́lɛ ɛ́ nɛ a Pooli ɛ́ wɔ́ khɔn ɛ́ nɛ làa: «Pɛ̃̀hṹ lɛ kɛ́ á sɛ̃̀nɛ̀dɔ́síɓɛ́ ɲúnsɔ wì-bɛhɔ́ Liziasi ɛ́ ɓen ɓɛrɛ, ɛ́ ń den ɛ́ wiekɛ mi bòo sɔ.» 23À khie ɛ́ khɛ́ lɛ́ á sɛ̃̀nɛ̀dɔ́síɓɛ́ ɲúnsɔ lɛ ti-e Pooli ɛ́ hiènin nɛ a vɛ dí-e lè kɛ̀sí hũn, kɛ́ á fùansí-è ǹ nɛ a teń míte bìcínbóo, à lò fùansí ɓà pàáɓɛ́ ǹ nɛ ɓɛ wóo ɓen húi piè bòo.

Felikise àá ɓá hṹnu Durisiile ɛ́ Pooli ɲunù bienù ɛ̀ ɲí

24Ɛ́ pehɔ̀ wihĩ́ bɔ̀nbɔ̀ yiɛní khíirɔ́ máahṹ, ɛ̀ Felikise ɛ́ van ɓɛrɛ àá ɓà hṹnu Durisiile lɛ pe iè Zuifuɓɛ hãa-cíì, à nɛ ɓɛ vɛ ve Pooli ɛ̀ dàá ɓen. Ɛ́ Pooli ɛ́ ɓɛrɛ bie hɔ̀ ńdɛsĩ̀ Yiezu Kirisa ǹ bòo ɛ́ lɛ́ à ǹ á ɲɛ́. 25Kɛ́ hɔ́ lɛ ɛ́ Pooli wo zɔn ɛ́ hɔ̀ cã̀anírɔ́ àá hɔ́ te ɓaàrɔ́ àá hɔ́ lìe lènlɔ́ lɛ vaá-ɓen bòo ɛ̀ bie, ápe Felikise ɛ́ hɛ̀ zɛ́rɛ á zɔn bie lɛ́ Pooli ǹ nɛ a dɛ̀ ɛ́ lan; ie mí ɓen núnú ɛ́ yí ɓaà yìi lɛ hũn, ɛ́ mí khũ̀á vi-e. 26À hṹn tĩì à nɛ Pooli ɛ́ ɓén lɛ́ màa mí ǹ; sí iè hɔ̀pe á dàa wóò vi-e fúu ɛ̀ dàá ɓen dìkìmú. 27Ɛ́ hɔ́ wɔ́ kɛ̀amu fúu ɛ́ lɔ́líe bɔ̀nbɔ̀ ɲu ɛ́ van khie. Ɛ́ Felikise ɛ́ khie lɔ́ yán ɛ̀ Pɔrikiyuuse Fɛsitiise ɛ́ temu khie zɔn piè kṹun. Kɛ́ hɔ́ lɛ ápe Felikise ɛ́ den hṹn wɛ nɛ mí bòo ɛ̀ tĩiní ɓɛ́ Zuifuɓɛ ǹ, á fùrɛsí Pooli lè kɛ̀sí hũn.

Currently Selected:

Bɔ̀werà 24: bwj

Highlight

Compare

Copy