Bɔ̀werà 23

1Ɛ́ Pooli ɛ́ mɔ̀ mí yiè ɛ́ fɛ́ ɓɛ́ lìe lèriè ǹ à zɔn bie ɛ́ nɛ làa: «Kìe zɛ̀ɓɛ̀, ń dàa niǹte sãàniɛ Dɔfĩn híɛhɔ́ fúu ɛ́ ɓɛrɛ dɛ̃un zooni àá hũn nùnlé lɛ sãa.» 2Á khɛ̃́ndàarɔ wì-bɛhɔ́ Ananiasi ɛ́ zɔn bie lɛ́ ɓɛ́lɛ ɛ́ wi-e pe Pooli sɛnù ǹ nɛ ɓɛ yòó lí piè ɲunù ǹ. 3Ɛ́ Pooli ɛ́ zɔn bie lɛ́ à ǹ ɛ́ nɛ: «Kɔ̀pe iè pe ɛ́ Dɔfĩn ɛ́ ɓén línin! Kɔ́ lɛ kɛ̀a ie le toohɔ́ lɛ ɛ́ ɓɛ́ bɛ̀ ɛ́ wɔ́ àá dɛ̀puiè. Kɔ́ kɛsí hũ̀nún ɛ́ kɔ ɛ̀ lè niǹ lìe ɛ̀ ɓáaníɓán àá hɔ́ làndɛ́, kɛ́ kɔ́pe kɔ̀te ǹ ɛ́ den bĩniɛ khũ̀a ɛ́ wé khe àá hɔ́pe làndɛ́ ɛ́ kɔ́ dàa nɛ ɓɛ lí mi ǹ.» 4Ɛ́ ɓɛ́lɛ ɛ́ wi-e pe Pooli sɛnù ɛ́ zɔn bie lɛ́ à ǹ ɛ́ nɛ: «Hɔ̀ iè pe Dɔfĩn khɛ̃́ndàarɔ wì-bɛhɔ́ ɛ́ kɔ́ ɛ́ tòokɛ kɛ̀amu lò!» 5Ɛ́ Pooli ɛ́ zɔn nɛ: «Kìe zɛ̀ɓɛ̀, ń yí dũ kɛ́ ápe ɛ́ temu iè ɔ̀pe Dɔfĩn khɛ̃́ndàarɔ wì-bɛhɔ́ wɛ̀. Iè hɔ̀ lɛ ɛ́ hɔ́ den bɔn kɔ́ hɔ́ wɛ̃́ lé Dɔfĩn bienù vɛ̃hṹ hũn ɛ́ nɛ làa: “Kɔ́ yí sãawi ɛ̀ kɔ̀ khɛ́ khe ɛ̀ lɛ́ mí dàa nìɛ hándí ǹ wɛ̀.”»

6Pooli ɛ́ den hṹn dũ kɛ́ ɓɛ́ lìe lèriè dɔ̀ ɛ́ iè Sadusĩɛɓɛ ɛ̀ ɓɛ̀dɔ̀ ɛ́ iè Farizĩɛɓɛ. Ɛ́ sí iè hɔ̀pe á dàa zɔn bérɛ peɓɛ̀ tĩ́ihṹ ɛ́ nɛ: «Kìe zɛ̀ɓɛ̀, ǹpe iè farizĩɛ, ɛ̀ ǹ lò iè farizĩɛ yɛ̀nù. Ɛ́ hɔ́ iè hɔ̀ lɛ ń dũmuasɛ̃̀ ɛ̀ ǹ lò ɛ́ hìé nɛ ɓɛ nìhiè ɛ́ ɓén bɛ̃́nkí ɛ́ vìé ɛ́ ɓɛ́ dàa ɛ́ niǹ lìe ɛ̀ lè.» 7Ɛ́ piè ńbie hɔ́pe sí vé lòo, ɛ́ ɓɛ́ Farizĩɛɓɛ àá ɓɛ́ Sadusĩɛɓɛ ɛ́ khie ɛ́ wũ̀aní, ɛ́ ɓɛ́ nìzã̀amáa ɛ́ wo sankɛa. 8Ɓɛ̀ Sadusĩɛɓɛ pe ɛ́ den wóo nɛ ɓɛ nìhiè ɛ́ yá ɓén vìé wɛ̀; ɛ̀ ɓɛ̀ lò wóo nɛ mɛlɛkɛɓɛ ɛ́ mí, ɛ̀ ńɲíkĩ́nìɛ ɛ́ lò mí wɛ̀. Hɔ́rɔsí kɛ́ ɓɛ́ Farizĩɛɓɛ ɛ́ pe den dũmuasɛ̃̀ hɔ̀pe sí ǹ míkùi. 9Ɛ́ ɓɛ́ nìnbirìe ɛ́ bĩniɛ ɛ́ wookɛa ɛ́ wũamɛkɛ cɛ̃̀un; ɛ́ ɓɛ́ làndɛ́ kɛ̀ránliè nìɛ ɓɛ̀ yiɛní dɔ̀ lɛ ɛ́ iè ɓɛ̀ Farizĩɛɓɛ ɛ́ siɛ hĩ́nà ɛ́ pɛ̃́ dɛ̃̀ ɛ̀ ɓɛ̀ zɔn nɛ làa: «Ké yí lóo bɔ̀koohɔ́ dɔ̀ lɛ ápe nùún sɔ lɛ ɛ́ wɔ́ wɛ̀. Yée kɛ́ ńɲíkĩ́rɔ dɔ̀ tàá mɛlɛkɛ dɔ̀ ɛ́ bie àá ɔ́.» 10Ɛ́ lépe ńwũ̀aní ɛ́ hɛ̀ wo tɛ́ dɛ̃̀ fúu á sɛ̃̀nɛ̀dɔ́síɓɛ́ ɲúnsɔ wì-bɛhɔ́ ɛ́ hɛ̀ ɛ́ zán nɛ wɔ́ khɔn ɛ́ ɓɛ́ ɓén khã̀akɛ a Pooli. Á wo khie bie lɛ́ ɓɛ́ sɛ̃̀nɛ̀dɔ́síɓɛ́ ǹ nɛ ɓɛ vɛ síɛ ɓɛ́ nìzã̀amáa tĩ́ihṹ, ɛ̀ vɛ síɛ vúa ɔ́ Pooli peɓɛ̀ níhĩ́ hũn ɛ̀ dàá ɓen yòó dé ɓɛ́ sɛ̃nɛ̀dɔ́síɓɛ́ zũ-bɛhɔ́ hũn. 11Ɛ́ pehɔ̀ zɔn sṹnúhṹn, ɛ́ Ɲunsɔ ɛ́ ɓɛrɛ zɛ̃́niɛ míte à Pooli ǹ à bie lɛ́ à ǹ nɛ làa: «Hièní kɔ́ tĩì! Kɛ̀a bòo lɛ ɛ́ kɔ́ dàa ɛ́ bie niǹ bòo hɔ̀ Zerizalɛɛmu lóo hũn hṹnún, ɛ́ kɛ̀amu, ɛ́ kɔ́ sãawi ɛ̀ kɔ̀ bĩní vɛ bie niǹ bòo hɔ̀ Rɔmu lóo hũn.»

Ɓɛ̀ Zuifuɓɛ ɛ́ cɛ̀ ɛ́ ɓɛ si Pooli ɛ̀ ɓé

12Ɛ́ pehɔ̀ sí lɛ ɛ́ tĩ, ɛ̀ ɓɛ̀ Zuifuɓɛ dɔ̀ ɛ́ lɔ́ tànkɔ̀niɛ lɔ̀ tɔ̀, ɛ̀ ɓɛ̀ khie wĩ́ɛ ɛ́ nɛ kɛ́ ɓɛ́ yí ɓé Pooli vé, ɛ́ ɓɛ́ yá dí ɛ̀ ɓɛ̀ lò yá ɲu wɛ̀. 13Ɓɛ̀pe lɛ ɛ́ hàarí lɔ̀ tɔ̀ kɛ̀amu ɛ́ hàarí pɔ nìɛ dɛ̀wɛ́ (40). 14Ɛ́ ɓɛ́ van yú ɓɛ́ khɛ̃́ndàariè hándíe àá ɓɛ́ nìkĩ́ɛ ɛ̀ ɓɛ̀ bie lɛ́ ɓà ǹ ɛ́ nɛ làa: «Ké wĩ́ɛ nɛ kɛ́ yí bòo ɛ́ ké ɓɔ́ Pooli vɔ́, ɛ́ ké yá dí bòo dɔ̀ wɛ̀. 15Ɛ́ mípe ɛ́ wo vɛ ɲí ɓán àá ɓɛ́ lìe lèriè ɓɛ́kùi, ɛ̀ mì vɛ bie lɛ́ á sɛ̃̀nɛ̀dɔ́síɓɛ́ ɲúnsɔ wì-bɛhɔ́ ǹ nɛ a dàá ɔ́ Pooli ɛ̀ dàá ɓen mì viì. Ɛ̀ mì wo wé kɛ̀a bòo ɛ́ mí bĩní wóokɛ wiekɛ hɔ bòo lɛ á wɔ́ ɛ̀ sãàní. Hɔ́rɔsí ɛ̀ kèpe ɛ́ wo te sɛ́sɛ́a vɔ́, ɛ́ ké ɛ́ lé ɓaà ɔ̀ ɛ́ ɓé kɛ́ á ɲɛùn yí ɓen dɛ̃ hṹnún wɛ̀.»

16Kɛ́ Pooli ɓà hãá zuú dɔ̀ ɛ́ den ɛ́ ɲɛ́ hɔ́pe bòo lɛ ɛ́ ɓɛ́ lɔ̀ tɔ̀ lɔ̀n, á khie van ɓɛ̀ sɛ̃nɛ̀dɔ́síɓɛ zũ-bɛhɔ́ hũn ɛ́ zɔn bie hɔ̀ ɛ́ lɛ́ á Pooli ǹ. 17Ɛ́ Pooli ɛ́ khie vɔn ɔ̀ sɛ̃̀nɛ̀dɔ́síɓɛ́ ɲúnsɔ dɔ̀ à bie lɛ́ à ǹ ɛ́ nɛ làa: «Khíi dí-e biɛ̀ lɛ híɛhɔ́ ɛ̀ dàá vɛ mi ɲúnsɔ wì-bɛhɔ́ viì; à dàa bòo dɔ̀ ɛ́ mii vɛ bie lɛ́ à ǹ.» 18Á sɛ̃̀nɛ̀dɔ́síɓɛ́ ɲúnsɔ ɛ́ khie fɔ́ á ɛ́ dàa van ɓɛ́ ɲúnsɔ wì-bɛhɔ́ viì à nɛ: «À kɛ̀sí nùún Pooli ɛ́ vɔn mi à hɛ̃nnɛ mi ǹ nɛ n dàá ɔ́ biɛ̀ lɛ ɛ̀ dàá ɓen kɔ̀ viì, ie dàa bòo dɔ̀ ɛ́ mii bie ɛ̀ lɛ́ kɔ̀ ǹ.» 19Á sɛ̃̀nɛ̀dɔ́síɓɛ́ ɲúnsɔ wì-bɛhɔ́ ɛ́ khie zɛ̃nkɛa ɔ̀ biɛ̀ núnú ǹ à khɛ̃̀nɛ van lɔ́ àá ɔ́, à ɔ̀ dìenin ɛ́ nɛ làa: «Hɔ̀ iè ńɓùo ɛ́ kɔ́ dàa ɛ́ kɔ ɛ̀ bie lɛ́ mi ǹ?» 20Á biɛ̀ ɛ́ zɔn nɛ: «Ɓɛ̀ Zuifuɓɛ ɛ́ lɔ̀ tɔ̀ ɛ̀ ɓɛ̀ nɛ ɓɛ ɛ̀ hɛ̃un kɔ̀ ǹ ɛ̀ kɔ̀ yìrí dàá ɔ́ Pooli ɛ̀ dàá ɓen ɓɛ́ lìe lèriè ńkóoɓánlɔ̀n híɛhɔ́, ɛ̀ ɓɛ̀ wo ɛ́ wé kɛ̀a bòo ɛ́ ɓɛ́ bĩní wóokɛ wiekɛ hɔ bòo lɛ á wɔ́ sãàní. 21Kɛ́ kɔ́ bí ɲí peɓɛ̀ bòo wɛ̀; iè hɔ̀ lɛ ɛ́ peɓɛ̀ tĩ́ihṹ, ɛ́ nìɛ dɛ̀wɛ́ (40) àá mí máahṹ ɛ́ ɓɛ lé vɛ si-e. Ɓɛ̀ ɛ́ wĩ́ɛ nɛ kɛ́ ɓɛ́ yí ɓí-e vé, ɛ́ ɓɛ́ yá dí ɛ̀ ɓɛ̀ lò ɛ́ yá ɲu wɛ̀. Ɛ́ kɛ̀a laà lɛ lɔ̀n ɛ́ ɓɛ́ wo sɛ́sɛ́a ɓɛ́te vɔ́ ɛ́ wo kɛ́ kɔ́ tànlɔ́ ɛ́ ɓɛ́ wo ɛ́ hìé.» 22Á sɛ̃̀nɛ̀dɔ́síɓɛ́ ɲúnsɔ wì-bɛhɔ́ ɛ́ bie lɛ́ á biɛ̀ ǹ nɛ a bí lɛ́ nɛ nìnbírɔ dɔ̀ ɛ̀ ɲí hɔ́ bòo lɛ á ɓɛrɛ bie lɛ́ mí ǹ wɛ̀; à wo fùɛrɛ̀sí-è ǹ á cɔ́.

Ɓɛ̀ ɛ́ tɔniɛ ɔ̀ Pooli ɛ́ viɛniɛ ɔ̀ kuvɛrɛnɛɛre Felikise viì

23Ɛ́ pehɔ̀ máahṹ à sɛ̃̀nɛ̀dɔ́síɓɛ́ ɲúnsɔ wì-bɛhɔ́ ɛ́ khie vɔn ɓɛ̀ sɛ̃̀nɛ̀dɔ́síɓɛ́ ɲúuhɛ̃ siè bìɛ ɲu dɔ̀ à bie lɛ́ ɓà ǹ ɛ́ nɛ làa: «Mì khíi ve ɓɛ́ sɛ̃̀nɛ̀dɔ́síɓɛ́ khĩɛ́-ɲu (200) àá peɓɛ̀ záataà ɓàasiè ɓaàtĩ àá pírú (70), àá peɓɛ̀ tɛ̃́hĩ́ táariè khĩɛ́-ɲu (200) ɛ̀ kóo ɓánlɔ̀n ɛ̀ ɓɛ̀ sɛ́sɛ́ ɓɛ́te sṹnúhṹn liɛrɛɓɛ káani yìi hũn; ɓɛ̀ ɓɛ vɛ Sezaree lóo. 24Ɛ̀ mì bĩní sɛ́sɛ́ ɓɛ́ záataà dɔ̀ lɛ á Pooli ɛ́ mii yòó, ɛ̀ mì wo dàá ɔ́ ɛ̀ dàá vɛ á kuvɛrɛnɛɛre Felikise viì kɛ́ bòo dɔ̀ ɛ̀ bí yí-e wɛ̀.» 25À khie wɛ̃́ lé vɛ̃hṹ lɛ:

26«Ǹpe Kuloode Liziasi ɛ́ te lepe vɛ̃hṹ sɔ lɛ ɛ́ wĩ́ ɛ́ nin lɛ́ kɔ́pe nì-bɛhɔ́ kuvɛrɛnɛɛre Felikise ǹ, nín kɔ̀ tìɛnínin. 27Àpe nùún lɛ ɛ́ ń tɔniɛ ɛ́ nɛ ɓɛ ɓen lɛ́ kɔ̀ ǹ ɛ́ ɓɛ́ Zuifuɓɛ ɛ́ hṹn ɓaa ɛ̀ ɓɛ̀ hṹn wɛ ɛ́ ɓɛ ɛ̀ ɓí-e. Kɛ́ hɔ́ lɛ ɛ́ ń ɲɛ́ à iè Rɔmu sɔ, ɛ́ ńpe àá niǹ sɛ̃̀nɛ̀dɔ́síɓɛ́ ɛ́ van fɔ́ á peɓɛ̀ núnú hũn. 28Kɛ́ hɔ́ lɛ ɛ́ ń den hṹn wɛ nin dũń hɔ́ bòo lɛ ɛ́ ɓɛ́ nɛ a yáakɛa, ɛ́ ń dàa ɔ̀ ɛ́ dàa van peɓɛ̀ lìe lèriè viì. 29Ɛ́ ń mɔn kɛ́ hɔ́ bòo lɛ ɛ́ ɓɛ́ nɛ a wɔ́ khɔn hũn ɛ́ iè bòo lɛ ɛ́ vaá-vɛ àá peɓɛ̀ làndɛ́ viì; kɛ́ bòo dɔ̀ lɛ ɛ́ nìnbírɔ dɛ̀ ɛ́ bie nɛ a yáakɛa á wo fɔ́ɓán à ɓé tàá à dé kɛ̀sí hũn ɛ́ mí wɛ̀. 30Ɛ́ pehɔ̀ máahṹ, ɛ̀ ǹ khie ɲɛ́ kɛ́ ɓɛ́pe Zuifuɓɛ ɛ́ van lɔ̀ tɔ̀ ɛ́ nɛ ɓɛ si-e ɛ̀ ɓé. Ɛ́ sí iè hɔ̀pe ɛ́ fùa fùa ɛ́ ń dàa khie tɔniɛ ɔ̀ nɛ ɓɛ ɓen lɛ́ kɔ̀ ǹ; ɛ̀ ǹ khie bie lɛ́ ɓɛ́pe lɛ ɛ́ nɛ a wɔ́ khɔn nɛ hɔ bòo lɛ ɛ́ ɓɛ́ nɛ a wɔ́ khɔn hũn ɛ́ ɓɛ́ ɓen bie kɔ́ híɛhɔ́.»

31Ɛ́ ɓɛ́ sɛ̃̀nɛ̀dɔ́síɓɛ́ ɛ́ wɔ́ hɔ́ bòo lɛ ɛ́ peɓɛ̀ ɲúnsɔ wì-bɛhɔ́ ɛ́ bie lɛ́ ɓà ǹ: ɓɛ̀ hĩ́nà mɔ̀ à Pooli hɔ̀ sṹnúhũn ɛ́ dàa fúu ɛ́ van dɛ̃un Antipatirise lóo. 32Ɛ́ pehɔ̀ sí lɛ ɛ́ tĩ, ɛ̀ ɓɛ̀ sɛ̀nɛ̀dɔ́síɓɛ́ lɛ ɛ́ hṹn vɛ àá ɓɛ́ laà ɛ́ khie khũ̀a ɓɛrɛ ɓɛ́ yíe, ɛ̀ ɓɛ̀ fùerɛsí ɓɛ́lɛ ɛ́ yòó ɓɛ̀ záataà ǹ ɛ́ ɓɛ́ dàa ɔ̀ Pooli ɛ́ dàa cɔ́. 33Ɛ́ ɓɛ́pe záataà ɓàasiè ɛ́ van dɛ̃un hɔ̀pe Sezaree, ɛ̀ ɓɛ̀ lɛ́ lé vɛ̃hṹ à kuvɛrɛnɛɛre ǹ ɛ̀ ɓɛ̀ lɛ́ á Pooli ɔ̀ ǹ. 34Á kuvɛrɛnɛɛre ɛ́ kɛ̀rɛa lè vɛ̃hṹ sɔ vɔ́, à khie ɛ́ Pooli ɛ̀ dìenin nɛ a ɛ́ lé àá pɛ̃̀hɛ̃ hɔ́sɔ hũn. Ɛ́ hɔ́ lɛ á ɲɛ́ à nɛ mí lé àá Silisi, 35á zɔn bie lɛ́ à ǹ ɛ́ nɛ làa: «Ɓɛ̀lɛ ɛ́ nɛ kɔ́ wɔ́ khɔn ɛ́ ɓen ɓɛrɛ, ɛ́ ń den ɛ́ dìekɛ kɔ ǹ.» À nɛ ɓɛ khíi vɛ zooní-ɛ à bɛ́zuú Herɔɔde dànkɔ̀ hũn, ɛ̀ vɛ zɔ hìé ɔ̀ ǹ yán.

Currently Selected:

Bɔ̀werà 23: bwj

Highlight

Compare

Copy