Bɔ̀werà 22

1«Kìe zɛ̀ɓɛ̀ àá kìe yàáɓɛ́, mì tɛ́ mí ɲɛkɛ̃̀a ɛ̀ mì ɲí hɔ́ bòo lɛ ɛ́ nin bie lɛ́ miɛ ǹ ɛ̀ dàá sɛ niǹ ɲunù.» 2Ɛ́ hɔ́ lɛ ɛ́ ɓɛ́ ɛ̀ húi à ɛ́ bie àá ɓɛ́ ɓà Hebereɓɛ níi hũn, ɛ́ ɓɛ́ hɛ̀ wóokɛa wɔ́ hĩ́ɔɔn ɛ̀ ɓɛ̀ tɛ́ ɓɛ́ ɲɛkɛ̃̀a. Ɛ́ Pooli ɛ́ wo ɛ́ bie cɔ́ ɛ́ nɛ làa: 3«Ǹpe iè Zuifu lɛ ɛ́ tɔn Tarise lóo hũn hɔ̀ Silisi pɛ̃̀hɛ̃ hũn; kɛ́ ń tú hṹnún, hɔ̀pe Zerizalɛɛmu hũn. Ɛ́ Kamaliɛle ɛ́ temu wɔ́ niǹ kɛ̀ránlɔ, á kɛ̀rɛa mi àá kiè yàaɓɛ̀ làndɛ́ àá mí híɛhɔ́. Ɛ́ ń hàarí can niǹ kuò cɛ̃̀un Dɔfĩn bòo hũn kɛ̀a bòo lɛ ɛ́ mípe ɓiɛ̀ dàa can mì kuò zooni. 4Ń hàarí bieniɛ ɓɛ̀ nìnbirìe lɛ bɔ̀ à Ɲunsɔ wṹn lɔ̀n cɛ̃̀un. Ń hàarí lɛ́ ɛ́ ɓɛ́ ɓaakɛa ɓɛ̀ báa dɔ̀ àá ɓɛ́ hã́a dɔ̀ ɛ́ van koo lè kɛ̀sí hũn fúu ɛ́ ɓɛ́dɔ̀ ɛ́ yɛ̀rɛ́ húrunkɛ. 5À khɛ̃́ndàarɔ wì-bɛhɔ́ àá ɓɛ́pe kiè nìkĩ́ɛ ńkóoɓánlɔ̀n nìɛ ɛ́ dɛ̀ ɛ́ zɛ̃́ní ɛ́ lɛ́ miɛ ǹ kɛ́ hɔ́ iè bɔ̀berà ɛ́ nín munkɛ. Ń hàarí yú lé vɛ̃hṹ peɓɛ̀ viì lɛ nin vɛ lɛ́ ɓɛ́ kìe zɛ̀ɓɛ̀ Zuifuɓɛ lɛ van wi Damaasi lóo hũn, ɛ̀ ǹ van yán ɛ́ wɛ nin vɛ ɓaakɛ ɓɛ ńdɛsĩ̀riè lɛ wi yán ɛ̀ cɛ dàá ɓen Zerizalɛɛmu, ɛ̀ ɓen vɛ́ ɲɛkɛ̃̀a.»

Bɔw 9.1-19; 26.12-18

6«Ɛ́ ń wo hàarí wi le wṹn lɔ̀n ɛ́ tan van lúwi Damaasi lóo ǹ lè wúsɔn-dáabíi hũn. Ɛ́ hɔ́ ńpiemu bɔ̀bɛhɔ́ dɔ̀ ɛ́ pan pan ɛ̀ hɔ̀ yòó ɲiiniɛ lɔ́ hɔ́ hóohũn ɛ́ ɓen síɛ kíríkɛa mi ǹ. 7Ɛ́ ń kùerɛ síɛ lè sṹsùnù, ɛ́ ń ɲɛ́ tɛmu dɔ̀ kɛ́ lé ɛ́ bie àá mi ɛ́ nɛ làa: “Sooli, Sooli, hɔ̀ iè ńɓùo ɛ́ kɔ́ dàa ɛ́ niǹ lɔ̀n ɛ̀ biení?” 8Ɛ́ ń zɔn kɔ̃́niɛ ɛ́ nɛ: “Ɲunsɔ kɔ́ iè wíeni?” Ɛ́ hɔ́ tɛmu sɔ ɛ́ zɔn nɛ làa: “Hɔ̀ iè ǹpe Nazarɛɛte Yiezu lɛ ɛ́ kɔ́ lɔ̀n ɛ̀ biení.” 9Ɓɛ̀ nìnbirìe lɛ hàarí bɔ̀ɓán àá mi ɛ́ mɔn hɔ̀pe ńpiemu sɔ, kɛ́ álɛ ɛ́ bie àá mi tɛmu ɛ́ ɓɛ́ yí ɲí wɛ̀. 10Ɛ́ ń zɔn ɛ́ diè ɛ́ nɛ: “Ɲunsɔ, ɛ́ hɔ́ iè ńɓùo ɛ́ ń sãawi ɛ̀ ǹ wé?” Ɛ́ Ɲunsɔ ɛ́ zɔn bie lɛ́ mi ǹ ɛ́ nɛ làa: “Síɛ hĩ́ní vɛ zɔ hɔ Damaasi lóo hũn, ɛ́ ɓɛ́ ɓén vɛ zɔ munkɛ hɔ bòo lɛ ɛ́ Dɔfĩn nɛ kɔ́ sãawi ɛ̀ kɔ̀ wé ɛ́ lɛ́ kɔ̀ ǹ yán.” 11Kɛ́ hɔ́ ńpiemu bɔ̀bɛhɔ́ sɔ ɛ́ den hàarí muiníɛ niǹ yìe; ɛ́ ɓɛ́lɛ ɛ́ bɔ̀ɓán àá mi ɛ́ khie zɛ̃nkɛa niǹ núnú ǹ ɛ̀ ɓɛ̀ dàa mi ɛ́ dàa van zɔn hɔ̀pe Damaasi lóo hũn.

12Ɛ̀ nùún dɔ̀ ɛ́ hàarí wi yán lɛ yèrè ɛ́ ɓɛ́ nɛ Ananiasi, à hàarí ɛ́ can mí kuò Dɔfĩn bòo hũn, à lò ɛ́ vɛ a Moyiize làndɛ́ wṹn lɔ̀n, ɛ̀ ɓɛ̀ Zuifuɓɛ lɛ wi hɔ Damaasi hũn ɛ́ hàarí ɛ́ ɔ̀ mɛndɛ̃. 13Á ɓɛrɛ ɓen yú mi, à dɛ̃̀ niǹ sɛnù à zɔn nɛ làa: “Kìe zuú Sooli, nɛ kɔ yìe ɛ̀ bĩní mi bòo.” Ɛ́ mí laà hũn, ɛ́ niǹ yìe ɛ́ yòó loo bòo, ɛ́ ń wo mɔn ɔ̀. 14Á bĩniɛ zɔn bie ɛ́ nɛ làa: “Kìe zĩkĩ́nɓɛ̀ Dɔfĩn ɛ́ sɛ̃̀nɛ́hã̀ munɛ kɔ bòo lɛ ɛ́ wé ɛ̀ kɔ̀ dũń pehɔ̀ tĩì bòo, ɛ̀ kɔ̀ mi pehɔ̀ nùún lɛ ɛ́ cã̀aní, ɛ̀ kɔ̀ ɲí piè ɲunù tɛmu. 15Iè hɔ̀ lɛ ɛ́ kɔ́ ɛ́ sãawi ɛ̀ kɔ̀ wé piè nìnbírɔ lɛ mii bie hɔ bòo lɛ ɛ́ kɔ́ mɔn àá hɔ́ lɛ ɛ́ kɔ́ ɲɛ́ ɓɛ́ nìnbirìe ɓɛ́kùi híɛhɔ́. 16Ɛ́ kɛ̀a sáalɛ, ɛ́ kɔ́ wo bí líiníkɛ wɛ̀! Síɛ hĩ́ní vi-e pe Yiezu yèrè, ɛ̀ kɔ́ lɛ́ kɔ́te ɛ̀ ɓɛ̀ líiní hɔ́ ɲumu hũn, ɛ̀ kɔ̀ bɔ̀koohɛ̃ ɛ̀ tiɛ lé kɔ́ lɔ̀n.”

17Ɛ́ pɛ̃̀hṹ lɛ ɛ́ ń khũ̀a yòó van hɔ̀ Zerizalɛɛmu, ɛ́ hɔ́ lɛ ɛ́ ń van zɔn ɛ́ Dɔfĩn ɛ̀ hɛ̃nnin lè Dɔfĩn zũ-bɛhɔ́ hũn, ɛ́ ń mɔn yìnmirà bòo dɔ̀. 18Ń mɔn Ɲunsɔ kɛ́ á ɛ́ bie àá mi ɛ́ nɛ làa: “Síɛ hĩ́ní fùa fùa ɛ̀ khíi zè lé hɔ́ Zerizalɛɛmu lóo hũn, iè hɔ̀ lɛ ɛ́ ɓɛ́ Zerizalɛɛmu nìɛ yá ɓén tɛ̀ hɔ̀ bòo lɛ ɛ́ kɔ́ mɔn ɛ́ bie niǹ bòo hũn wɛ̀.” 19Ɛ́ ń zɔn nɛ: “Ɲunsɔ, ɓɛ̀ dũ sãàniɛ kɛ́ ń hàarí wóò hĩ́ní bè peɓɛ̀ ńkóoɓánlɔ̀n zĩhĩ́ɛ ǹ ɛ̀ ɓaakɛ ɓɛ nìnbirìe lɛ ɛ́ dũmuasɛ̃̀ kɔ ǹ ɛ̀ hɛ, ɛ̀ vɛ kóo lé kɛ̀sí hũn. 20Ɛ̀ pɛ̃̀hṹ lɛ ɛ́ ɓɛ́ dàa ɛ́ ɔ̀ Etiɛnɛ lɛ hàarí wóò bie hɔ́ bɔ̀berà kɔ̀ bòo hũn ɛ̀ ɓé, ɛ̀ ǹ wi yán. Ɛ́ ń hàarí tɛ̀ ɓɛ̀lɛ ɛ́ ɔ̀ ɓé bòo, ɛ̀ ǹ te peɓɛ̀ tĩ̀ɛ ɛ́ hàarí ɛ́ hiènin.” 21Ɛ́ Ɲunsɔ ɛ́ wo zɔn bie lɛ́ mi ǹ ɛ́ nɛ làa: “Hĩ́ní lan iè hɔ̀ lɛ ɛ́ nín tɔn kɔ ɛ̀ kɔ̀ vɛ viì lɛ ni, hɔ̀ dàa bɔ̀ɓuà nìɛ tĩ́ihṹ!”»

22Ɛ́ ɓɛ́ nìzã̀amáa ɛ́ ɲɛ́ á Pooli bòo lɛ á ɛ́ bie fúu ɓen dɛ̃un lèpe bienù lɛ. Kɛ́ ɛ́ den zɔn ɛ́ bénkɛ ɓɛ́kùi ɛ́ nɛ: «Àpe nùún sɔ lɛ ɛ́ mí ɓé! à yí sãawi à kań lé sṹsùnù sɔ lɛ lɔ̀n wɛ̀.» 23Ɛ̀ ɓɛ̀ ɛ́ wũamɛkɛ, ɛ́ duinkɛa ɓɛ́ tĩ̀ɛ ɛ́ kóokɛasí, ɛ̀ ɓɛ̀ ɛ́ hɔ̀ tĩ́ní ɛ̀ khui hɔ̀nkɛ yòoní hɔ́ hóo hũn.

24Á Rɔmu sɛ̃̀nɛ̀dɔ́síɓɛ́ ɲúnsɔ wì-bɛhɔ́ ɛ́ wo lɛ́ lé ɲunù nɛ ɓɛ dàá Pooli ɛ̀ vɛ zooní ɓɛ́ sɛ̃nɛ̀dɔ́síɓɛ zũ-bɛhɔ́ hũn, ɛ̀ ɓɛ̀ zɔ dìekɛ à ǹ àá lé ńhùenú, à bie hɔ bòo lɛ ɛ́ ɓɛ́ nìnbirìe ɛ́ dàa ɛ́ wũamɛkɛ piè lɔ̀n kɛ̀amu ɛ̀ mí dàá dũń hɔ́. 25Ɛ́ hɔ́ lɛ ɛ́ ɓɛ́ can ɔ̀ ɛ́ ɓɛ́ ɛ̀ hɛ, ɛ́ Pooli ɛ́ zɔn khɛ́ lɛ́ á sɛ̃̀nɛ̀dɔ́síɓɛ́ ɲunsɔ lɛ ɛ́ wi yán ɛ́ nɛ làa: «Mí dàa ɲunù lɛ ɛ́ hɛ Rɔmu sɔ kɛ́ piè lìe ɛ́ lò yí lè?» 26Ɛ́ bòo lɛ á sɛ̃̀nɛ̀dɔ́síɓɛ́ ɲunsɔ ɛ́ ɲɛ́ Pooli biehĩ́ sɔ sí á khie zɔ̀ van zɔn bie hɔ̀ ɛ́ lɛ́ ɓɛ́ ɲúnsɔ wì-bɛhɔ́ ǹ ɛ́ nɛ làa: «Hɔ ńɓuò ɛ́ kɔ ɛ̀ wé àá ɔ́pe nùún sɔ lɛ? Nɛ́ a iè Rɔmu sɔ!» 27Ápe sɛ̃̀nɛ̀dɔ́síɓɛ́ ɲúnsɔ wì-bɛhɔ́ ɛ́ ɓɛrɛ ɛ́ Pooli ɛ̀ dìenin ɛ́ nɛ làa: «Hãà kɔ́ iè Rɔmu sɔ àá bɔ̀bín?» Ɛ́ Pooli zɔn nɛ «Ũun.» 28Á sɛ̃̀nɛ̀dɔ́síɓɛ́ ɲúnsɔ wì-bɛhɔ́ ɛ́ zɔn nɛ: «Ǹpe sàaniɛ mɛ̀-kuì ɛ́ dàa yú wɔ́ Rɔmu sɔ.» Ɛ́ Pooli ɛ́ zɔn nɛ: «Ɛ̀ ǹpe ɛ́ tɔn vaá-lé ɛ̀ ǹ iè Rɔmu sɔ.» 29Ɛ́ mí laà hũn, ɛ́ ɓɛ́pe lɛ ɛ́ hṹn ti-e ɓɛ dìekɛnin àá lé ńhùenú ɛ́ khie cɔ́ ɛ̀ ɓɛ̀ kɛ́ á. Ápe sɛ̃̀nɛ̀dɔ́síɓɛ́ ɲúnsɔ wì-bɛhɔ́ ɛ́ yòó zɛ́rɛ iè hɔ̀ lɛ á mii húi ɛ̀ Pooli ɛ́ iè Rɔmu sɔ, à lò den hṹn lɛ́ ɛ́ ɓɛ́ can ɔ̀ àá zɔ̀kɔ̀zɔ́kɔ́ɓɛ̀.

Ɓɛ̀ dàa Pooli ɛ́ dàa van ɓɛ̀ Zuifuɓɛ lìe lèriè híɛhɔ́

30Àpe sɛ̃̀nɛ̀dɔ́síɓɛ́ ɲúnsɔ wì-bɛhɔ́ ɛ́ den hṹn cɛ̀ mii dũń hɔ́ bòo lɛ ɛ́ Pooli ɛ́ wɔ́ hɛ̀lɛ̀lɛ̀ ɛ́ ɓɛ́ Zuifuɓɛ ɛ́ dàa nɛ a wɔ́ khɔn. Ɛ́ sí iè hɔ̀pe, ɛ́ hɔ́ lɛ ɛ́ hɔ́ sí ɛ́ van tɛ̃un á dàa lɛ́ ɛ́ ɓɛ́ fuerɛ à, à khie lɛ́ lé ɲunu nɛ ɓɛ khɛ̃́ndàariè hándíe àá ɓɛ́ lìe lèriè ɓɛ́kùi ɛ́ lé kóo ɓánlɔ̀n, à dàa ɔ̀ Pooli ɛ́ ɓen lɔ́ dĩ̀niɛ peɓɛ̀ híɛhɔ́.

Currently Selected:

Bɔ̀werà 22: bwj

Highlight

Compare

Copy