Bɔ̀werà 21

Pooli ɛ́ kã́a Zerizalɛɛmu

1Ɛ́ bòo lɛ ɛ́ ké lɔ́ ɓánlɔ̀n vɔ́, ɛ́ ké khie zɔn lè ɲumu wiè dɛ̀bɛhɔ́ ɛ̀ kè cã̀aniɛ ɛ́ kã́a Kɔɔsi. Ɛ́ pehɔ̀ sí lɛ ɛ́ tĩ, ɛ̀ kè van dɛ̃un Rɔɔde, ɛ́ ké van dɛ̃̀ yán ɛ̀ kè khie van Patara. 2Ɛ́ ké van yú ɲumu wiè dɛ̀bɛhɔ́ dɔ̀ yán kɛ́ lé vaá-vɛ àá Fenisi, ɛ́ ké wo yòó zɔn lè ɛ̀ kè cɔ́. 3Ɛ́ bòo lɛ ɛ́ ké van loo hɔ Siipere, ɛ́ ké fùɛrɛ̀sí hɔ̀ ǹ àá ké ńmiinín ɛ̀ kè cɔ́ kã́a lè Siiri cɛ̃̀mɛ̀nɛ́. Ɛ́ ké van dɛ̃̀ Tiire hũn, lè lóo lɛ ɛ́ lé ɲumu wiè dɛ̀bɛhɔ́ ɓàasiè ɛ́ sãawi ɛ̀ ɓɛ̀ síɛní hɔ́ tìerɔ́ dɔ̀ hũn. 4Ɛ́ ké zɔn lɔ́ ɛ́ van yú ńdɛsĩ̀riè dɔ̀ yán, ɛ́ ké wɔ́ sítĩnlɔ́ hùuɲu àá ɓɛ́. Ɛ́ lé Mɛkɛ̃n-Sãanu ɛ́ zɛ̃́niɛ bòo ɛ́ lɛ́ ɓà ǹ, ɛ́ ɓɛ́ wo khie ɛ́ bie lɛ́ á Pooli ǹ nɛ a bí yòó vɛ Zerizalɛɛmu wɛ̀. 5Kɛ́ hɔ́ lɛ ɛ́ hɔ́ sítĩnlɔ́ hùuɲu sɔ ɛ́ van khie, ɛ́ ké bĩniɛ lɔ́ mɔ̀ kè wṹn. Ɛ́ ɓɛ́pe ɓɛ́kùi àá ɓɛ́ hãá àá ɓɛ́ zĩncãahɛ̃ ɛ́ khie níiniɛ kie ɛ́ dàa van lɔ́ hɔ́ lóo máahṹ. Ɛ́ ké páaníɛ siɛ kɛsí ké nunkɛ́yìe lɔ̀n hɔ̀ ɲun-bɛhɔ́ ɲunù ɛ̀ kè hɛ̃nnɛ Dɔfĩn. 6Ɛ́ ké khie fòoníkɛa ɓán, ɛ̀ kèpe ɛ́ khie van zɔn lè ɲumu wiè dɛ̀bɛhɔ́ ɛ̀ kè cɔ́, ɛ̀ ɓɛ́pe ɛ́ khũ̀a zɔn ɓɔn. 7Ɛ́ ké lɔ́ hɔ́ Tiire ɛ́ khie van hɔ̀ Potolemayiise, ɛ́ ké wṹn bènlɔ́ hɔ̀ ɲun-bɛhɔ́ lɔ̀n ɛ́ wo vɔ́ yán. Ɛ́ ké van fòoniɛ ɓɛ̀pe Potolemayiise ńdɛsĩ̀riè ɛ̀ kè wɔ́ wu-kùi àá ɓɛ́. 8Ɛ́ pehɔ̀ sí lɛ ɛ́ tĩ ɛ̀ kè hĩ́nà cɔ́, ɛ́ ké van dɛ̃un Sezaree ɛ̀ kè van zɔn ɔ̀ Yiezu Bentĩnu buierɔ Filiipu yíe ɛ́ van làa piè lɔ̀n. Àpe Filiipu iè ɓɛ̀pe nìɛ hùuɲu lɛ ɛ́ ɓɛ́ ńdɛsĩ̀riè ɛ́ hàarí lerɛ hɔ̀ Zerizalɛɛmu hũn dɔ̀#21.8 Vɛ huí Bɔw 6.5. 9À hàarí dàa hĩ́ini bìɛ nɛ́ lɛ yí dũ báa wɛ̀; ɛ̀ lè Mɛkɛ̃n-Sãanu ɛ́ hàarí wóò zɛ̃́ní Dɔfĩn bòo ɛ̀ lɛ́ ɓà ǹ ɛ̀ ɓɛ̀ khíi háaní lɛ́ ɓɛ́ nìnbirìe ǹ. 10Ɛ́ hɔ́ lɛ ké hàarí ɛ́ cãakɛ yán, ɛ́ Dɔfĩn bɔ̀háanírɔ dɔ̀ lɛ yèrè ɛ́ ɓɛ́ nɛ Akabuuse ɛ́ yòó van lɔ́ Zudee pɛ̃̀hɛ̃ hũn ɛ́ ɓen siɛ kè viì. 11Á khie fɔ́ Pooli khìrí à can mí zehĩ́ àá mí níhĩ́ àá lé, à zɔn bie ɛ́ nɛ làa: «Lɛ iè bòo lɛ Mɛkɛ̃n-Sãanu ɛ́ bie: À nìnbírɔ lɛ ɛ́ te lepe khìrí sɔ lɛ ɛ́ ɓɛ́ Zerizalɛɛmu Zuifuɓɛ ɛ́ ɓén vɛ ɓaà ɛ́ cɛ kɛ̀a hɔpe lɛ ɓà ńmàa, ɛ̀ ɓɛ̀ ɛ́ khíi dí-e ɓɛ̀ nìnbirìe lɛ ɛ́ yí ɓɛ́ Zuifuɓɛ núnú hũn.» 12Ɛ́ bòo lɛ ɛ́ ké ɲɛ́ hɔ́ biehĩ́ hɔ́ sí, ɛ́ képe àá ɓɛ́ Sezaare ńdɛsĩ̀riè ɛ́ khie ɓɔ́nɓɔ́niɛ Pooli ǹ nɛ a bí yòó vɛ Zerizalɛɛmu wɛ̀. 13Kɛ́ Pooli ɛ́ den zɔn kɔ̃́niɛ ɛ́ nɛ làa: «Hɔ̀ iè ńɓùo ɛ́ mí dàa ɛ́ wírí ɛ̀ mì ɛ́ cɛ̀ ɛ̀ mì tìení niǹ bàanì? Niǹ te sɛ́sɛ́a vɔ́, ń tɛ̀ nɛ ɓɛ vɛ cɛ mi, ɛ̀ ǹ yɛ̀rɛ́ pɛ́wi tɛ̀ ɛ́ nín hí hɔ́pe Zerizalɛɛmu hũn kè Ɲunsɔ Yiezu yèrè bòo hũn.» 14Kɛ́ hɔ́ lɛ ɛ́ ké ɛ́ bie àá ɔ́ taaní kɛ́ á pɛ̃́ ɛ́ nɛ mí yá bè kè bòo lɔ̀n, ɛ́ ké wo fùɛrɛ̀sí ɛ̀ kè den wo zɔn bie ɛ́ nɛ Ɲunsɔ tĩì bòo ɛ̀ temu wé!

15Ɛ́ bòo lɛ ɛ́ ké wɔ́ hɔ́pe sítĩnlɔ́ bɔ̀nbɔ̀ yiɛní sɔ sí lèpe viì sɔ hũn ɛ́ vɔ́, ɛ́ ké khie sɛ́sɛ́a kète ɛ̀ kè hĩ́nà cɔ́ ɛ́ khã́a Zerizalɛɛmu. 16Ɛ́ ɓɛ́ Sezaree ńdɛsĩ̀riè dɔ̀ ɛ́ khie bɔ̀ɓán àá kie, ɛ́ níiniɛ kie fúu ɛ́ dàa van ɔ̀ Mnazɔn yíe nɛ ke vɛ làá yán. À Mnazɔn sɔ ɛ́ hàarí ɛ́ lé Siipere cɛ̃̀mɛ̀nɛ́ hũn, à hàarí iè ńdɛsĩ̀rɔ ɛ́ míɛ cɛ̃̀un.

Pooli ɛ́ kóo ɓánlɔ̀n àá Zerizalɛɛmu ńdɛsĩ̀riè nìkĩ́ɛ Zaake yíe

17Ɛ́ hɔ́ lɛ ɛ́ ké van dɛ̃un hɔ̀ Zerizalɛɛmu, ɛ́ ɓɛ́ kìe zɛ̀ɓɛ̀ ńdɛsĩ̀riè ɛ́ hɛ̀ van tɛ̀ fɔ́ kie àá tĩwiɛ̀. 18Ɛ́ pehɔ̀ sí lɛ ɛ́ tĩ, ɛ̀ Pooli àá képe ɛ́ hĩ́nà van ɔ̀ Zaake yíe, ɛ́ ɓɛ́ ńdɛsĩ̀rìe nìkĩ́ɛ ɛ́ ɓɛrɛ koo ɓánlɔ̀n yán. 19Ɛ́ Pooli ɛ́ fòoniɛ ɓɛ̀, ɛ̀ hɔ̀ bòo lɛ ɛ́ Dɔfĩn ɛ́ wɔ́ ɓɛ́pe nìnbirìe lɛ ɛ́ yí ɓɛ́ Zuifuɓɛ tĩ́ihṹ míkùi àpe Pooli tɔnlɔ́ hũn, ápe Pooli ɛ́ munkɛa àá pehɔ̀ bɔ̀cíini míkùi ɛ́ lɛ́ ɓà ǹ. 20Ɛ́ ɓɛ́ ɲɛ́ piè bòo vɔ́, ɛ́ ɓɛ́ ɓàaniɛ Dɔfĩn. Ɛ̀ ɓɛ̀ khie bie ɛ́ lɛ́ ápe Pooli ɛ́ nɛ làa: «Kìe zuú, kɔ́ lò wo loo kɛ́ ɓɛ́ Zuifuɓɛ muasíe bɔ̀kùi ɛ́ wɔ́ ńdɛsĩ̀riè, ɛ̀ ɓɛ̀pe ɓɛ́kùi ɛ́ den bɔ̀ Moyiize làndɛ́ bòo hièniɛ cɛ̃̀un. 21Kɛ́ ɓɛ́ den bie ɛ́ lɛ́ ɓà ǹ ie kɔpe ɛ́ ɓɛ̀ Zuifuɓɛ lɛ van wi hɔ dàa bìɓuà tĩ́ihṹ ɛ̀ kɛ̀rán nɛ ɓɛ pĩ́ Moyiize làndɛ́ bòo; ie kɔ́ nɛ ɓɛ bí wóo fũ̀a ɓɛ́ zĩncãahɛ̃ ɛ̀ ɓɛ̀ lò bí wóo wé ɓɛ́ Zuifuɓɛ làndɛ́a bòo wɛ̀. 22Ɓɛ̀ lò wo ɓén dũń àá bɔ̀bín kɛ́ kɔ́ ɓɛrɛ wi hũ̀nún. Ɛ́ ké wo ke wiɛ wiɛlɔ́? 23Ɛ́ hɔ́ bòo lɛ ɛ́ ke ɛ̀ bie lɛ́ kɔ ǹ iè pe ɛ́ kɔ́ wé. Báa bìɛ nɛ́ dɔ̀ ɛ́ wi ke tĩ́ihṹ hũ̀nún ɛ́ tɛ̀ ɲunù kiè àá Dɔfĩn. 24Ɛ́ kɔ́ khíi fé ɓɛ́ ɛ̀ kɔ̀ vɛ páa ɓɛ́ lɔ̀n ɛ̀ mì páaní tiɛ mite ɛ̀ kɔ̀ sàaní hɔ́ bòo lɛ ɛ́ ɓɛ́ sãawi ɛ̀ ɓɛ̀ leń ɛ̀ dàá khũa ɓɛ́ ɲúuhɛ̃. Ɛ́ kɛ̀amu, ɛ́ ɓɛ́ nìnbirìe ɓɛ́kùi ɛ́ wo ɛ́ dũń kɛ́ hɔ́ bòo lɛ ɛ́ ɓɛ́ ɛ́ ɲɛ́ kɔ́ bòo hũn ɛ́ yí be wɛ̀; ɛ̀ ɓɛ̀ ɛ́ dũń kɛ́ kɔ́pe kùusɔ ɛ́ ɔ̀ Moyiize làndɛ́ ɛ̀ mɛ̀ndɛ̃. 25Kɛ́ hɔ́ ɓen kɛ́ ɓɛ́ nìnbirìe lɛ ɛ́ yí ɓɛ́ Zuifuɓɛ lɛ ɛ́ khie wɔ́ ɓɛ́ ńdɛsĩ̀riè, ɛ̀ kè wɔ́ ké ɲunù àá dìcóoní ɛ̀ kè wɛ̃́ lé vɛ̃hṹ ɛ́ lɛ́ ɓà ǹ nɛ ɓɛ bí wóo lɛ̀ wɛ̃̀hɛ̃ taà, ɛ̀ ɓɛ̀ bí dí cãani, ɛ̀ ɓɛ̀ bí lɛ̀ bìlaàsiè lɛ húrun kɛ́ peɓɛ̀ cãani ɛ́ yí kóosí, ɛ̀ ɓɛ̀ lò bí wóo fékɛ ɓán kũǹ wɛ̀.»

26Ɛ́ pehɔ̀ sí lɛ ɛ́ tĩ, ɛ̀ Pooli ɛ́ hĩ́nà fɔ́ ɓɛ́ báa bìɛ nɛ́ sɔ ɛ́ van páa peɓè lɔ̀n ɛ́ dàa tiɛ ɓɛ́te. Ɛ́ pehɔ̀ máahṹ à khie van zɔn lè Dɔfĩn zũ-bɛhɔ́ hũn ɛ́ zɔn zɛ̃́niɛ lè yìi lɛ ɛ́ peɓɛ̀ te tiɛrɔ́ sítĩnlɔ́ ɛ́ mii vé hũn, lɛ iè ɓɛ̀pe àá ɓɛ́ nì-cóohɛ̃ te tiɛrɔ́ bòo leńlɔ́ yìi.

Pooli ɓaàrɔ́ lè Dɔfĩn zũ-bɛhɔ́ dànkɔ̀ hũn

27Ɛ́ bòo lɛ ɛ́ peɓɛ̀ te tiɛrɔ́ sítĩnlɔ́ hùuɲu ɛ́ vaá-vɛ mí vénlén, ɛ́ ɓɛ́ Zuifuɓɛ lɛ ɛ́ lé hɔ́ Azii pɛ̃̀hɛ̃ hũn ɛ́ zɔn mɔn ɔ̀ Pooli lè Dɔfĩn zũ-bɛhɔ́ hũn. Ɛ́ ɓɛ́ khie sùkúrɛ ɓɛ̀ nìzã̀amáa ɛ́ ɓɛ́ hĩ́nà khie ɓaa ɔ̀, 28kɛ́ ɓɛ́ ɛ́ wũamɛkɛ ɛ́ nɛ: «Mìpe Yizarayɛɛle nìɛ, mì zè ɓen sĩ́ní kie! Lɛ iè ɔ̀pe nùún sɔ lɛ ɛ́ te ɓɛ nìnbirìe ɓɛ́kùi ɛ́ kɛ̀rán lé viì míkùi nɛ ɓɛ pĩ́ ɓɛ́ Yizarayɛɛle nìɛ bòo àá ɔ́pe Moyiize làndɛ́ bòo àá lé Dɔfĩn zũ-bɛhɔ́ bòo. À fɔ́ ɓɛ́ nìnbirìe lɛ ɛ́ yí ɓɛ́ Zuifuɓɛ ɛ́ dàa zɔn lè Dɔfĩn zũ-bɛhɔ́ hũn ɛ́ zɔn fĩiniɛ lè, lèpe lɛ lò ɛ́ iè viì lɛ ce.» 29Ɓɛ̀ den hṹn sɛ̃̀nɛ́hã̀ mɔn ɔ̀ Torofiimu lɛ ɛ́ lé hɔ́ Efɛɛzi kɛ́ á wi ɓánlɔ̀n àá Pooli lè fɔ́nú hũn, ɛ́ ɓɛ́ wo ɛ́ nùún ɛ̀ ɓɛ̀ nɛ Pooli ɛ́ dàa ɔ̀ ɛ́ dàa yòó zɔn lè Dɔfĩn zũ-bɛhɔ́ hũn.

30Ɛ́ lé lóo míkùi ɛ́ hɛ̀ hĩ́nà ɛ́ tɛ́ dɛ̃̀, ɛ́ ɓɛ́ nìnbirìe ɛ́ van zɔ̀kɛ ɛ́ lɔ́ hɔ́ vuò míkùi ɓɛrɛ. Ɛ́ ɓɛ́ khie ɓaa Pooli ɛ́ vɛ́kɛsí ɛ́ dàa yòó lɔ́ lé Dɔfĩn zũ-bɛhɔ́ dànkɔ̀ hũn ɛ̀ ɓɛ̀ khie hiɛ pelè zĩínù ɲihĩ́ɛ mí laà hũn. 31Ɛ́ ɓɛ́ hṹn cɛ̀ ɛ́ ɓɛ ɛ̀ ɓí-e, kɛ́ á Rɔmu sɛ̃̀nɛ̀dɔ́síɓɛ́ ɲúnsɔ wì-bɛhɔ́ ɛ́ den van ɲɛ́ kɛ́ ɓɛ́ nɛ Zerizalɛɛmu lóo míkùi ɛ́ hĩ́nà tɛ́ dɛ̃̀. 32Ɛ́ mí laà hũn, á khie fɔ́ ɓɛ́ sɛ̃̀nɛ̀dɔ́síɓɛ́ dɔ̀ àá ɓɛ́ ɲúuhɛ̃ siè à zɔ̀ van ɓɛ̀ nìzã̀amáa viì. Ɛ́ bòo lɛ ɛ́ ɓɛ́ nìzã̀amáa van mɔn ɔ̀ sɛ̃̀nɛ̀dɔ́síɓɛ́ ɲúnsɔ wì-bɛhɔ́ kɛ́ á ɛ́ ɓen àá ɓɛ́ sɛ̃̀nɛ̀dɔ́síɓɛ́, ɛ́ ɓɛ́ yòó dɛ̃̀ ɛ́ bĩniɛ yá Pooli ɛ̀ hɛ wɛ̀. 33Á sɛ̃̀nɛ̀dɔ́síɓɛ́ ɲúnsɔ wì-bɛhɔ́ ɛ́ van lúwiniɛ Pooli à ɓaa ɔ̀, à lɛ́ lé ɲunù nɛ ɓɛ cɛ a àá zɔ̀kɔ̀zɔ́kɔ́ɓɛ̀ bɔ̀nbɔ̀ ɲu, à khie ɛ́ dìe nɛ a iè wieni, ie hɔ iè ńɓùo á wɔ́. 34Kɛ́ ɓɛ́ nìzã̀amáa tĩ́ihṹ ɛ́ ɓɛ́dɔ̀ ɛ́ wóò zɔ bén ɛ̀ bie bòo dɔ̀ ɛ̀ ɓɛ̀dɔ̀ ɛ̀ khíi vɛ bén ɛ̀ bie bɔ̀ɓuɛ̀. Á sɛ̃̀nɛ̀dɔ́síɓɛ́ ɲúnsɔ wì-bɛhɔ́ ɛ́ wo yí dɛ̀ hɔ̀pe bòo lɛ ɛ́ wɔ́ hɛ̀lɛ̀lɛ̀ ɛ́ yá dũń hɔ́pe miikɛ yerɛ̀ sɔ sí hũn wɛ̀. Á wo lɛ́ lé ɲunù nɛ ɓɛ dàá Pooli ɛ̀ dàá vɛ zɔ ɓɛ sɛ̃̀nɛ̀dɔ́síɓɛ́ zũ-bɛhɔ́ hũn. 35Ɛ́ bòolɛ ɛ́ ɓɛ́ van dɛ̃un lè zũnù zànkɛ́nu lɛ ɛ́ ɓɛ́ wóò bènin ɛ̀ dàá yòó vɛ zɔ, ɛ́ ɓɛ́ sɛ̃̀nɛ̀dɔ́síɓɛ́ hɛ̀ wɔ́ tan ɛ́ ɓɛ́ siɛ mɔ̀ Pooli ɛ́ yòó dàanin ɓɛ́ bàanì hũn ɓɛ̀ nìzã̀amáa hiɛ̀ lɛ ɛ́ ɓɛ́ ɛ́ lɛ̀ bòo hũn. 36Iè hɔ̀ lɛ ɛ́ ɓɛ́pe ɓɛ́kùi ɛ́ hṹn bɔ̀ piè máahṹ kɛ́ ɓɛ̀ bénkɛ ɛ́ nɛ: «Mì ɓí-e!»

Pooli ɛ́ mí ɲunù ɛ̀ sɛ

37Ɛ́ pɛ̃̀hṹ lɛ ɛ́ ɓɛ ɛ̀ yòó zɔ àá Pooli ɓɛ̀ sɛ̃̀nɛ̀dɔ́síɓɛ́ zũ-bɛhɔ́ hũn, á zɔn ɛ́ bie àá ɔ́pe sɛ̃̀nɛ̀dɔ́síɓɛ́ ɲúnsɔ ɛ́ nɛ làa: «Ń dɛ̀ ɲunù ɛ́ yí ɛ́ zɔ́ bie bòo dɔ̀ ɛ́ lɛ́ kɔ ǹ?» Á sɛ̃̀nɛ̀dɔ́síɓɛ́ ɲúnsɔ wì-bɛhɔ́ ɛ́ zɔn ɛ́ ɔ̀ dìenin nɛ làa: «Kɔ́ ɛ́ Kɛrɛkiɓɛ níi ɛ̀ ɲíi? 38Ɛ́ kɔ́ yí dɛ̀ ɛ́ yá wí-e pe Eziputi nùún lɛ zɔǹ hɔ̀ sáalɛ, ɛ́ hĩ́nà sùkúrɛ ɓɛ̀ nìnbirìe ɛ́ hĩ́nà pɛ̃́ dɛ̃̀, à khie fɔ́ ɓɛ́ nìɓériè muasíe náa (4 000) ɛ́ dàa van lè ńɲiì-herà lò!» 39Ɛ́ Pooli ɛ́ zɔn nɛ làa: «Ǹpe iè Zuifu, ń tɔn Tarise lɛ iè lóo lɛ ɛ́ ɲún wi cɛ̃̀un hɔ̀ Silisi pɛ̃̀hɛ̃ hũn. Ɛ́ nín kɔ̀ hɛ̃nnin nɛ kɔ lɛ́ ɲunù mi ǹ ɛ̀ ǹ khɛ́ àá ɓɛ́pe nìzã̀amáa.» 40Á sɛ̃̀nɛ̀dɔ́síɓɛ́ ɲúnsɔ wì-bɛhɔ́ ɛ́ tɛ̀ ɛ́ lɛ́ lé ɲunù ɔ̀ ǹ. Ɛ́ Pooli ɛ́ dɛ̃̀ lè zànkɛ́nú lɔ̀n, à yòó díɛníɛ mí núnú ɓɛ̀ nìzã̀amáa ǹ, ɛ́ ɓɛ́pe ɓɛ́kùi ɛ́ yòó hĩɛ, á wo zɔn ɛ́ khɛ́ àá ɓɛ́ ɓá Hebereɓɛ níi hũn ɛ́ nɛ làa:

Currently Selected:

Bɔ̀werà 21: bwj

Highlight

Compare

Copy