Bɔ̀werà 20

Pooli viɛnù hɔ̀ Maseduanɛ àá hɔ́ Kɛrɛɛsi pɛ̃̀hɛ̃ hũn

1Ɛ́ bòo lɛ ɛ́ ɓɛ́ nìnbirìe lɛ ɛ́ hṹn hoò ɛ́ siɛ wuaniɛ ɓɛ́te, ɛ́ Pooli ɛ́ vɔn ɓɛ̀ ńdɛsĩ̀riè ɛ́ koo ɓánlɔ̀n à hĩ̀iníkɛa peɓɛ̀ tĩɛ̀, à fòoníkɛa ɓɛ̀, à lɔ́ cɔ́ kháa Maseduanɛ pɛ̃̀hɛ̃. 2Á khie cankɛa hɔ̀ pɛ̃̀hɛ̃ sɔ, ɛ́ hĩ̀iníkɛa ɓɛ̀ ńdɛsĩ̀riè tĩɛ̀ àá hɔ́ bérɛ́ lɛ á hṹn lɛ́ ɓà ǹ, ɛ́ pehɔ̀ máahṹ, à khie van Kɛrɛɛsi#20.2 Kɛrɛɛsi ɛ́ hàarí iè hɔ̀ pɛ̃̀hɛ̃ lɛ ɛ́ ɓɛ́ Kɛrɛkiɓɛ ɛ́ hàarí wi hũn; ɓɛ̀ wóò bĩní ve hɔpe pɛ̃̀hɛ̃ sɔ nɛ Akayi (18.2) pɛ̃̀hɛ̃ hũn, 3ɛ́ van wɔ́ ńpĩ́ihɛ̃ bɔ̀nbɔ̀ tĩ yán, à hṹn wɛ mii khíi zɔ le ɲumu wiè dɛ̀bɛhɔ́ à khã́a hɔ́ Siiri cɛ̃̀mɛ̀nɛ́, kɛ́ á den ɲɛ́ ɛ̀ ɓɛ̀ nɛ ɓɛ Zuifuɓɛ ɛ́ ɲɛ́ɓán ɛ́ nɛ ɓɛ si pie wṹn, á wo nɛ mii bĩní khũ̀á vɛ lé àá Maseduanɛ. 4Ɛ́ ɓɛ́ nìnbirìe lɛ hàarí ɛ́ ɔ̀ níiní ɛ́ iè Sopatɛɛre lɛ iè ɔ̀ Piriise lɛ ɛ́ lé hɔ́ Beere yɛ̀nù, ɛ̀ khíi páa Arisitaake àá Sekɔndiise lɛ ɛ́ lé hɔ́ Tesaloniike, ɛ̀ khíi páa Kayiise lɛ ɛ́ lé hɔ́ Dɛrɛbu, ɛ̀ khíi páa Timote, ɛ̀ bĩní khíi páa Tisiike àá Torofiimu lɛ ɛ́ lé hɔ́ Azii pɛ̃̀hɛ̃ hũn. 5Ɛ́ ɓɛ́pe ɛ́ dú ké híɛhɔ́ ɛ́ van ɛ́ kè hìé hɔ́ Toroasi lóo hũn. 6Ɛ̀ kèpe, ɛ́ hɔ́ lɛ ɛ́ hɔ́ búrú lɛ ɛ́ ɲɛfĩni mi hũn sɛ́rí ɛ́ van khie vɔ́, ɛ́ ké khie van Filiipu lóo ɛ́ van mɔ̀ lè ɲumu wiè dɛ̀bɛhɔ́ yán. Ɛ́ sítĩnlɔ́ hùanú, ɛ̀ kè van dɛ̃un ɓɛ̀ hɔ̀pe Toroasi lóo hũn, ɛ́ ké wo páaníɛ ɛ́ wɔ́ sítĩnlɔ́ hùuɲu yán.

Bòo lɛ ɛ́ Pooli dàa vìeniɛ zufɛ̀-cíì dɔ̀ Toroasi lóo hũn

7Ɛ́ lé ńvũùnín sí zɔn zĩ́ihṹ, ɛ̀ kè koo ɓánlɔ̀n ɛ́ ké ɛ̀ páaní dí Ɲunsɔ bòo lieníkɛrɔ díe. Ɛ́ Pooli ɛ́ bie àá ɓɛ́ nìzã̀amáa. Kɛ́ hɔ́ lɛ ɛ́ sí ɓen tɛ̃un à vaá-lan, á khɛ́ àá ɓɛ́ fúu ɛ́ hɔ́ sí ɛ́ van nɛ̀. 8Ɛ́ lé lɔ́nkɔ́#20.8 Ɓɛ̀dɔ̀ ɛ́ wóò bie nɛ núnkɔ́ zũ-bɔ́nú. zũ-bɔ́nú lɛ ɛ́ ké yóò kóo ɓánlɔ̀n hũn ɛ́ pɛ̃̀ntĩ́hĩ́ ɛ́ zɔn wi hũn ɛ́ buò. 9Ɛ́ zufɛ̀-cíì dɔ̀ lɛ yèrè ɛ́ ɓɛ́ nɛ Etikiise ɛ́ yòó kɛsí lé bɔnkhĩì ɲunù. Ɛ́ hɔ́ lɛ Pooli ɛ́ bie ɛ̀ míi, á zufɛ̀-cíì sɔ ɛ́ kɛsí ɛ́ fɛ̃̀ dɛmu lé bɔnkhĩì sɔ lɔ̀n, á yòó lɔ́ lépe lɔ́nkɔ́ zũ-bɔ́hĩ́ lɛ sɛ̃̀mɛkɛa ɓán yòó cɔ́ bɔ̀nbɔ̀tĩlán hũn ɛ́ kùerɛ van lè sṹsùnù. Ɛ́ ɓɛ́ síɛ hóoní-ɛ yòoní à húrun. 10Ɛ́ Pooli ɛ́ yòó lɔ́ ɛ́ ɓen siɛ lúnluosí dɛ̃̀ piè ɲún hũn, à siɛ mɔ̀ à ɛ́ yòó dàanin mí bàanì hũn à zɔn bie ɛ́ nɛ làa: «Mì bí nɛ mi hũn yen wɛ̀, à yìe wi.» 11À khũ̀a khie van yòó ɛ́ ɓùenkɛa hɔ̀ búrú ɛ́ ɓɛ́ lɛ̀, à bĩniɛ khie bie míɛ fúu ɛ́ sí van tɛ̃un. Ɛ́ pehɔ̀ máahṹ à den wo khie lɔ́ cɔ́. 12Ɛ́ ɓɛ́ wo khie dàa ɔ̀ zufɛ̀-cíì sɔ ɛ́ dàa cɔ́ kɛ́ á yìe wi, ɛ́ hɔ́ hɛ̀ wɔ́ tĩ-hĩ̀iníkɛà bɔ̀bɛhɔ́ ɓɛ̀ nìnbiriè ɓɛ́kùi viì.

Pooli ɛ́ lɔ́ hɔ́ Toroasi ɛ́ khie kã́a hɔ̀ Mile

13Ɛ́ képe ɛ́ khie ɛ́ zɔn lè ɲumu wiè dɛ̀bɛhɔ́ ɛ̀ kè dú hɔ́ híɛhɔ́ ɛ́ khã́a Asɔɔsi lóo lɛ ɛ́ ke vɛ mìí ɔ́ Pooli hũn. Sí iè bòo lɛ á hũn nɛ ke wé iè hɔ̀ lɛ á hṹn wɛ mii vɛ àá mí laà ɛ̀ dàá vɛ yán. 14Ɛ́ hɔ́ lɛ á ɓɛrɛ yú kie hɔ̀ Asɔɔsi hũn, á yòó zɔn àá kie lè ɲumu wiè dɛ̀bɛhɔ́ hũn ɛ́ ké wo khie kã́a hɔ̀ Mitilɛɛnɛ lóo. 15Ɛ́ ké van lɔ́ yán, ɛ̀ kè khie bɔ̀ kè wṹn ɛ́ cɔ́ hɔ́ ɲun-bɛhɔ́ lɔ̀n, ɛ́ pehɔ̀ sí lɛ ɛ́ tĩ, ɛ̀ kè van dɛ̃un hɔ̀ Sio lóo ɲunù. Ɛ́ pehɔ̀ sí lɛ bĩniɛ ɛ́ tĩ, ɛ̀ kè van dɛ̃un Samɔɔsi, ɛ́ pehɔ̀ sí lɛ bĩniɛ tĩ, ɛ̀ kè den dɛ̃un Milee. 16Pooli ɛ́ den hṹn nɛ mii vɛ khíi Efɛɛzi lóo ɲunù kɛ́ mí bí dìń yán, bòo lɛ ɛ́ wé ɛ̀ mí bí mìí pɛ̃̀hṹ cɛ̃̀un hɔ̀pe Azii pɛ̃̀hɛ̃ hũn wɛ̀. Iè hɔ̀ lɛ á den hṹn cɛ̀ nɛ kɛ́ hɔ́ dàa ɓen dɛ̀ ɛ́ wé yínin, kɛ́ lé Pantekɔɔte ɛ́ ɓen mii dɛ̃ kɛ́ ɛ́ wi hɔ Zerizalɛɛmu.

Pooli ɛ́ dìkìmú àá ɓɛ́ Efɛɛzi ńdɛsĩ̀riè nìkĩ́ɛ Milee lóo hũn

17Ɛ́ Pooli ɛ́ kɛsí hɔ Milee lóo hũn à khie lɛ́ lé háanín viɛniɛ hɔ̀ Efɛɛzi lóo hũn ɛ́ nɛ ɓɛ bie nɛ ɓɛ ńdɛsĩ̀riè nìkĩ́ɛ ɛ̀ ɓen. 18Ɛ́ Bòo lɛ ɛ́ ɓɛ́ ɓɛrɛ dɛ̃un piè viì, á bie lɛ ɓà ǹ ɛ́ nɛ làa: «Mí lò wo dũ bòo lɛ ɛ́ ń dàa ɛ́ dàa niǹte àá miɛ ɛ̀ dàá mìí lé wurù lɛ ɛ́ ń dàa ɓɛrɛ dɛ̃un hɔ̀pe Azii pɛ̃̀hɛ̃. 19Ń tɛ́ á Ɲunsɔ tɔnlɔ́ àá te-síɛnírɔ́, ɛ̀ ǹ kɛrɛ hɔ̀ yìncuò àá lé sɛ̃́ɲíi hũn iè hɔ̀ lɛ ɛ́ ɓɛ́ Zuifuɓɛ ɛ́ hṹn wóò vɛ tànkɔ̀ní ɲí ɓán ɛ́ cɛ̀ ɛ́ ɓɛ wé bɔ̀koohɔ́ àá mí. 20Mí dũ kɛ́ ń yí tànkɔ̀ní bòo dɔ̀ àá miɛ, kɛ́ ń khɛ́ hɔ́ lɛ ɛ́ dɛ̀ miɛ ɛ́ sĩiní míkùi ɛ́ lɛ́ miɛ ǹ. Ń kɛ̀rɛa miɛ ɓɛ̀ nìzã̀amáa hũn, ɛ̀ ǹ lò kɛ̀rɛa miɛ mì zĩhĩ́ɛ hũn. 21Ń bie àá ɓɛ́ Zuifuɓɛ àá ɓɛ́lɛ ɛ́ yí ɓɛ́ Zuifuɓɛ nɛ ɓɛ zɛ̀ní ɓɛ́ tĩɛ̀ ɛ̀ ɓɛ̀ fùansí ɓɛ́ bɔ̀koohɛ̃ wénlɔ́ ǹ, ɛ̀ ɓɛ̀ lɛ́ ɓɛ́te Dɔfĩn, ɛ̀ ɓɛ̀ dɛsĩ̀ Ɲunsɔ Yiezu ǹ. 22Ɛ́ kɛ̀a sáalɛ, ɛ́ ń lɛ iè pe wo yòó vaá-vɛ hɔ Zerizalɛɛmu iè hɔ̀ lɛ ɛ́ lé Mɛkɛ̃n-Sãanu ɛ́ niǹ ɲàa nɛ ń vɛ yán, kɛ́ ń lò yí dũ bòo lɛ mii vɛ wé mi ǹ yán wɛ̀. 23Hɔ̀ lɛ ɛ́ ń dũ iè hɔ̀ lɛ ɛ́ lóo yée lóo lɛ ɛ́ ń wóò vɛ zɔ hũn, ɛ́ lé Mɛkɛ̃n-Sãanu ɛ́ wóò ɲì niǹ zen lɔ̀n nɛ lè kɛ̀sí àá lé sɛ̃́ɲíi ɛ́ nin hìé. 24Kɛ́ ńpe niǹ kùrú mɛkɛ̃nì bòo ɛ́ yí hie mi ǹ wɛ̀. Hɔ̀ lɛ bòo ɛ́ hie mi ǹ ɛ́ iè hɔ̀ lɛ ɛ̀ ǹpe wo bè niǹ wṹn ɛ̀ vɛ víení, ɛ̀ ǹ tɛ́ á Ɲunsɔ Yiezu tɔnlɔ́ lɛ á dɔ́ niǹ bàanì hũn ɛ̀ tíiní ɲunù, hɔ̀pe tɔnlɔ́ sɔ iè hɔ̀ lɛ ɛ̀ ǹ buie le Bentĩnu nɛ Dɔfĩn ɛ́ mii wé mí hiì àá kie.

25Ɛ́ kɛ̀a sáalɛ, ɛ́ ń dũ kɛ́ mí yí mii bĩní mi mi wɛ̀, mìpe lɛ ɛ́ ń bie Dɔfĩn bɛ́záanú bòo tĩ́ihṹ mìkùi. 26Ɛ́ sí iè hɔ̀pe ɛ́ ń dàa ɛ́ bie lɛ́ miɛ ǹ zoòni nɛ kɛ́ mípe mì tĩ́ihṹ ádɔ̀ ɛ́ khɔn lè mɛkɛ̃nì lɛ yáà vé ǹ, ɛ̀ hɔ̀ wo ɛ́ yí lé mi ǹ wɛ̀. 27Iè hɔ̀ lɛ ɛ́ ń yí tànkɔ̀ní Dɔfĩn tĩì bòo àá miɛ kɛ́ ń khɛ́ hɔ́ míkùi ɛ́ lɛ́ miɛ ǹ. 28Ɛ́ mí pɛ mite bòo ɛ̀ mì ɓɛ́ɓɛ́ ɓɛ́ nìnbirìe lɛ ɛ́ lé Mɛkɛ̃n-Sãanu ɛ́ dɔ́ mí núnú hũn nɛ mi húi bòo. Mì ɓɛ́ɓɛ́ ɓɛ́ ńdɛsĩrìe lɛ ɛ́ Dɔfĩn ɛ́ yɛ̀ ɲún àá mí kùrú Zuú cãani. 29Ń dũ kɛ́ ń ɓen cɔ́ vɔ́, ɛ̀ ɓɛ̀ nìnbirìe dɔ̀ lɛ mɛnkɛ̃nɲiì wi kɛ̀a ɓɛ maa bɔhĩ́ ɛ́ ɓén ɓén zɔ mi tĩ́ihṹ; ɛ́ ɓɛ́ yá wóo ɓén pɛ ɓɛ́pe ńdɛsĩ̀riè àá lé miikɛ sɛ̃́ɲíi wɛ̀. 30Hɛ̀rí mìpe mì tĩ́ihṹ ɛ́ ɓɛ́dɔ̀ ɛ́ wóo ɓén siɛ hĩ́ní ɛ́ ɓúukɛ hɔ ɓúo, bòo lɛ ɛ́ wé ɛ̀ ɓɛ̀ vɛ́ ɓɛ́ ńdɛsĩ̀riè dɔ̀ ɛ̀ ɓɛ̀ vɛ bè peɓɛ̀ máahṹ. 31Ɛ́ mí piɛ̀ní mí yìe ɛ̀ mì bí nɛ mi hũn ɓé kɛ́ lɔ́líe bɔ̀nbɔ̀ tĩ hũn sṹnúhũn àá wiɛhɔ́ ɛ̀ ǹ wóò bé miɛ fúu, ɛ̀ hɔ̀ dɔ̀ ɛ̀ niǹ yìncuò ɛ̀ yɛ̀rɛ́ lé.

32Ɛ́ kɛ̀a sáalɛ, ɛ́ ń wo dɔ́ miɛ Dɔfĩn àá mí hiì bienù núnú hũn. Hɔ̀ dàa pànkɛ́ lɛ ɛ́ lɛ́ ɛ́ mí ɛ́ vɛ vanlɔ́ àá híɛhɔ́ hɔ̀ ńdɛsĩ̀nlɔ́ hũn, ɛ̀ Hɔ̀ ɛ́ lɛ́ ɛ́ mí ɛ́ yí hɔ́ bòo lɛ ɛ́ Hɔ́ sɛ́sɛ́a ɛ́ mii lɛ́ ɓɛ́ nìnbirìe lɛ bòo sɛ̃̀ hɔ̀ ǹ ɓɛ́kùi. 33Niǹ yìi ɛ́ yí lé nìnbírɔ dɔ̀ màa ǹ tàá piè sɛ̃́ní ǹ tàá piè tĩ̀zɔriè ǹ wɛ̀. 34Mìpe mìte ǹ ɛ́ dũ kɛ́ ń hṹn wóò tɛ́ àá niǹ kùrú níhĩ́ lɛ ɛ́ mí loo, ɛ̀ dàá yí hɔ́ bòo lɛ ɛ́ ńpe àá ɓɛ́lɛ ɛ́ wóò bèɓán àá mi ɛ́ mɛ̀kóo ɛ́ wi nin. 35Ɛ́ hɔ́ bòo míkùi hũn, ɛ́ ń zɛ̃́niɛ ɛ́ lɛ́ miɛ nɛ mi sãawi ɛ̀ mì wóo tɛ́ kɛ̀amu, ɛ̀ dàá wóo sĩiní ɓɛ́ nìnbirìe lɛ cũ̀kṹ mí; ɛ́ mí wóo liení-ɛ Ɲunsɔ Yiezu kùrú biehĩ́ lɛ á hàarí bie ǹ ɛ́ nɛ làa: “À nìnbírɔ lɛ wóò hɛ̃ hɔ bòo àá ɓɛ́ nìnbirìe ɛ́ ɲún ɛ́ tĩ pɔ alɛ ɛ́ wóò fé fénlɔ́#20.35 Àpe Yiezu bienù sɔ lɛ ɛ́ yí wĩ́ lé Bentĩnu vɛ̃hɛ̃ hũn wɛ̀. (Vɛ húi Zãn 21.25).”»

36Ɛ́ Pooli ɛ́ khɛ́ hɔ́pe sí vɔ́, à siɛ kɛsí mí nunkɛ́yìe lɔ̀n àá ɓɛ́pe ɓɛ́kùi ɛ̀ ɓɛ̀ ɛ́ hɛ̃nnɛ Dɔfĩn. 37Ɛ́ ɓɛ́pe ɓɛ́kùi ɛ́ hɛ̀ wírí kɛ́ ɓɛ̀ ɛ́ ɔ̀ Pooli ɛ̀ sìikɛ ɓɛ́ ɓàaní hũn ɛ́ ɔ̀ fòoníkɛ à dàá lé bè mí wṹn. 38Peɓɛ̀ tĩɛ̀ ɛ́ hɛ̀ hṹn yáa cɛ̃̀un iè hɔ̀ lɛ ɛ́ Pooli ɛ́ bie nɛ ɓɛ yí ɓɛ bĩní mi mí wɛ̀. Ɛ́ ɓɛ́ wo khie níiniɛ ɔ̀ ɛ́ van dɔ́ lé ɲumu wiè dɛ̀bɛhɔ́ hũn.

Currently Selected:

Bɔ̀werà 20: bwj

Highlight

Compare

Copy