Bɔ̀werà 19

Pooli ɛ́ van wi Efɛɛzi lóo hũn

1Ɛ́ pɛ̃̀hṹ lɛ ɛ́ Apolɔɔsi ɛ́ van wi Korɛnte, ɛ́ Pooli ɛ́ zɔn cánkɛ́a hɔ̀ pɛ̃̀hɛ̃ lɛ wi hɔ ɓúkùo hũn ɛ́ van lɔ́ dɛ̃un Efɛɛzi. Á van yú ńdɛsĩ̀riè nìɛ ɓɛ̀ yìɛní dɔ̀ yán, 2á zɔn ɓɛ̀ dìenin nɛ làa: «Hɔ̀ lɛ ɛ́ mí dũmuasɛ̃̀ à Yiezu ǹ, ɛ́ mí yú lé Mɛkɛ̃n-Sãanu yée?» Ɛ́ ɓɛ́ zɔn kɔ̃́niɛ ɔ̀ ɛ́ nɛ làa: «Ké yɛ̀rɛ́ ɲɛùn yí ɲí kɛ́ ɓɛ́ ɛ́ Mɛkɛ̃n-Sãanu dɔ̀ bòo ɛ̀ bie wɛ̀.» 3Ɛ́ Pooli ɛ́ zɔn ɛ́ ɓɛ̀ dìenin ɛ́ nɛ làa: «Ɛ́ hɔ́ iè hɔ̀ ńlíiníɲumu hɔ́sɔ ɛ́ mí yú?» Ɛ́ ɓɛ́ zɔn nɛ hɔ iè Zãn ńlíiní ɲumu. 4Ɛ́ Pooli ɛ́ zɔn bie lɛ́ ɓà ǹ nɛ làa: «À Zãn ɛ́ hàarí wóò líiníkɛ ɓɛ nìnbirìe hɔ̀ ɲumu hũn ɛ̀ dàá zɛ̃́ní kɛ́ ɓɛ́ zɛ̀niɛ ɓɛ́ tĩɛ̀ ɛ̀ ɓɛ̀ fùɛrɛ̀sí ɓɛ́ bɔ̀koohɛ̃ wénlɔ́ ǹ. À hàarí wóò bie lɛ́ ɓɛ́ ninbirìe ǹ nɛ ɓɛ dɛsĩ̀-ɛ nìnbírɔ lɛ mii khíi ɓen mí máahṹ, àpe lɛ iè ɔ̀pe Yiezu.» 5Ɛ́ bòo lɛ ɛ́ ɓɛ́ ɲɛ́ hɔ́pe biehĩ́ sɔ sí vɔ́, ɛ́ ɓɛ́ khie lɛ́ ɓɛ́te ɛ́ ɓɛ́ líiníkɛa hɔ̀ ɲumu hũn Ɲunsɔ Yiezu yèrè lɔ̀n. 6Ɛ́ Pooli ɛ́ khie bɔ̀ mí níhĩ́ peɓɛ̀ lɔ̀n, ɛ́ lé Mɛkɛ̃n-Sãanu ɛ́ ɓɛrɛ síɛ peɓɛ̀ lɔ̀n, ɛ́ ɓɛ́ wo ɛ́ hɔ̀ níi bɔ̀ɓuà ɛ̀ bie, ɛ̀ lèpe Mɛkɛ̃n-Sãanu ɛ́ lò wóò zɛ̃́ní Dɔfĩn bòo ɓà ǹ ɛ̀ ɓɛ̀ khíi háaní lɛ́ ɓɛ́ nìnbirìe. 7Ɓɛ̀pe ɓɛ́kùi ɛ́ hàarí ɛ́ dɛ̃ báa pírú àá nìɛ ɓɛ̀ ɲu.

8Ɛ́ ńpĩ́ihɛ̃ bɔ̀nbɔ̀ tĩ kɛ́ Pooli ɛ́ wóò vɛ zɔ ɓɛ Zuifuɓɛ ńkóoɓánlɔ̀n zũnù, ɛ̀ vɛ zɔ tán mí fɔnù ɛ̀ bie àá ɓɛ́ nìnbirìe. À wóò bie Dɔfĩn bɛ́záanú bòo àá ɓɛ́ sãàní, ɛ́ cɛ̀ nɛ ɓɛ tɛ̀ pehɔ̀ bòo. 9Kɛ́ ɓɛ́ nìnbirìe dɔ̀ ɛ́ pe den dĩìniɛ ɓɛ́ ɲɛkɛ̃̀a ɛ̀ ɓɛ̀ pɛ̃́ nɛ ɓɛ́ yá dɛsĩ̀ wɛ̀; ɛ̀ ɓɛ̀ yɛ̀rɛ́ ɔ̀ Ɲunsɔ wṹn ɛ̀ yáakɛ ɓɛ nìzã̀amáa yìe hũn. Ɛ́ Pooli ɛ́ khie cɔ́ à kɛ́ ɓɛ́, à fɔ́ ɓɛ́ ńdɛsĩ̀riè ɛ́ dàa van nùún dɔ̀ lɛ yèrè ɛ́ ɓɛ́ nɛ Tiraniisi kɛ̀ránzunù hũn, ɛ́ wóò vɛ dìkìmú àá ɓɛ́ yán sítĩnlɔ́ míkùi hũn. 10Ɛ́ hɔ́pe sí míɛ fúu ɛ́ van dɛ̃un lɔ́líe bɔ̀nbɔ̀ ɲu. Ɛ́ ɓɛ́ nìnbirìe lɛ ɛ́ hàarí wi hɔ Azii pɛ̃̀hɛ̃ hũn ɓɛ́kùi, ɓɛ̀ Zuifuɓɛ àá ɓɛ́pe lɛ yí ɓɛ́ Zuifuɓɛ ɛ́ wo ɲɛ́ á Ɲunsɔ bienù.

Seva zɛ̀ɓɛ̀ lɛ ɛ́ cɛ̀ ɛ́ ɓɛ ɛ̀ ɲɛ ɓɛ ńɲíkĩ́nìɛ bòo

11Ɛ́ Dɔfĩn ɛ́ hàarí ɛ́ hɔ̀ yéréké bòo àá hɔ́ bòo bɔ̀bɛ̃hɛ̃ ɛ̀ wé àá Pooli níhĩ́. 12Ɛ́ hɛ̀rí ɛ́ hɔ́ pɔnkɔ̀nìɛ àá hɔ́ pɛ́cɛ́hĩ́ lɛ ɛ́ hàarí han ɔ̀pe Pooli tɛkɛ̀a ǹ ɛ́ ɓɛ́ wóò dàá vɛ ɛ̀ bè ɓɛ̀ dɔriè lɔ̀n, ɛ́ ɓɛ́pe dɔ̀rie sɔ ɛ̀ wɛ, ɛ̀ ɓɛ̀ ńɲíkĩ́nìɛ ɛ́ lò wóò zè lé ɓɛ́pe lɛ ɛ́ ɓɛ́ hṹn wi nin. 13Ɛ́ ɓɛ́ Zuifuɓɛ dɔ̀ lɛ hàarí wóò hĩ́ní bè hɔ̀ vuò ǹ, ɛ̀ bie nɛ ɓɛ ɛ̀ ɲɛ ɓɛ ńɲíkĩ́nìɛ ɛ̀ líení ɓɛ́ nìbirìe lɛ ɛ́ ɓɛ́ wi nin, ɛ́ khie nɛ ɓɛ ɛ̀ hàaní Ɲunsɔ Yiezu yèrè ɛ̀ dàá wé hɔ́. Ɛ́ ɓɛ́ wo wóò zɔ bie lɛ́ ɓɛ́pe ńɲíkĩ́nìɛ ǹ nɛ làa: «Àpe Yiezu lɛ á Pooli ɛ́ bòo ɛ̀ buie yèrè lɔ̀n, ɛ́ ń nɛ mi lé!» 14Ɓɛ̀pe nìɛ lɛ hàarí te hɔpe bòo sɔ sí ɛ́ wé ɛ́ hàarí iè zɛ̀ɓɛ̀ hùuɲu dɔ̀ lɛ iè ɓɛ̀ Zuifuɓɛ khɛ̃́ndàarɔ wì-bɛhɔ́ dɔ̀ lɛ yèrè ɛ́ ɓɛ́ nɛ Seva ɛ́ te mí nìɛ. 15Á ńɲíkĩ́rɔ ɛ́ zɔn kɔ̃́niɛ ɓɛ̀ nɛ làa: «Ń dũ a Yiezu, ɛ̀ ǹ lò dũ a Pooli; ɛ̀ mìpe ɛ́ iè bíɛ?» 16Ápe nìnbírɔ lɛ ápe ńɲíkĩ́rɔ sɔ ɛ́ wi nin ɛ́ khie yíe koo ɓɛ̀ lɔ̀n à dɛ̀rɛ ɓɛpe ɓɛ́kùi, ɛ́ ɲínkɛa ɓɛ̀ fúu ɛ́ ɓɛ́ zɔkɛ lɔ́ lé zũnù hũn àá ɓɛ́ bùe kíemáa, kɛ́ peɓɛ̀ tɛkɛ̀a ɛ́ lò wĩmikɛa míkùi. 17Ɛ́ ɓɛ́ Efɛɛzi siè, ɓɛ̀ Zuifuɓɛ àá ɓɛ́pe lɛ yí ɓɛ́ Zuifuɓɛ ɓɛ́kùi ɛ́ ɲɛ́ hɔ́ ɛ́ ɓɛ́ hɛ̀ zɛ́rɛ, ɛ́ ɓɛ́ den hɛ̀ wo khie ɛ́ Ɲunsɔ Yiezu yèrè ɛ̀ ɓàanínin. 18Ɛ́ ɓɛ́pe lɛ hàarí dũmuasɛ̃̀, ɛ́ peɓɛ̀ nìnbí-kuì ɛ́ wóò ɓen dìń ɓɛ́ nìzã̀amáa híɛhɔ́ ɛ̀ ɓɛ̀ biè hɔ bɔ̀koohɔ́ lɛ ɛ́ ɓɛ́ wɔ́ bòo. 19Ɛ́ ɓɛ́ nìnbí-kuì lɛ hàarí ɛ́ wi hɔ híenú hũn, ɛ́ dàa ɓɛ́ híenù vɛ̃hɛ̃ ɛ́ ɓɛrɛ lɛ́ ɛ́ ɓɛ́ cĩ̀niɛ ɓɛ̀ nìnbirìe ɓɛ́kùi yìe hũn. Ɛ́ ɓɛ́ khie mɛ̀ hɔ̀pe vɛ̃hɛ̃ sɔ màa lɛ ɛ́ hɔ́ dɛ̀ ɛ́ yí, ɛ́ ɓɛ́ mɔn kɛ́ hɔ́ van yú denie#19.19 Denie dìcóoní ɛ́ hàarí wóò wé tɔntɛ́ wu-kùi sàanín. muasié dɛ̀wɛ́ àá pírú (50 000). 20Ɛ́ kɛ̀amu, ɛ́ Ɲunsɔ pànkɛ́ ɛ́ hàarí lɛ́ ɛ́ pie bienù ɛ́ wookɛa saà ɛ̀ vɛ viì míkùi.

Hɔ̀ hòorè lɛ ɛ́ wé hɔ̀ Efɛɛzi lóo hũn bòo

21Ɛ́ hɔ́pe bòo sɔ sí wénlɔ́ máahṹ, ɛ̀ Pooli ɛ́ nùún mí tĩì hũn nɛ mii vɛ cánkɛ́ Maseduanɛ àá Akayi pɛ̃̀hɛ̃, ɛ̀ dàá lé vɛ Zerizalɛɛmu. Iè kɛ́ mí ɓen van dɛ̃un yán, ɛ̀ mí lò fɔ́ɓán ɛ̀ vɛ Rɔmu. 22Á khie tɔrɛ mí sĩiníriè nìɛ ɓɛ̀ ɲu dɔ̀ lɛ iè Timote àá Erasite nɛ ɓɛ vɛ hɔ Maseduanɛ, àpe ɛ́ bĩniɛ khie kɛsí bìcínbóo hɔ́pe Azii pɛ̃̀hɛ̃ hũn. 23Ɛ́ pehɔ̀ yìi hũn, ɛ́ miikɛ ńwũ̀anín dɔ̀ ɛ́ siɛ hĩ́nà ɔ̀ Ɲunsɔ wṹn bènlɔ́ bòo hũn. 24Nùún dɔ̀ ɛ́ hàarí wi yán lɛ yèrè ɛ́ ɓɛ nɛ Demetiriyuusi; à hàarí wóò ci hɛ̃nlɔ́ zũ-cíini dɔ̀ lɛ ɛ́ lɔ́ɓán àá peɓɛ̀ wɔ̃̀n-hṹnu dɔ̀ zũnu. Lè wɔ̃̀hṹ sɔ yèrè ɛ́ ɓɛ́ wóo nɛ Aritemiise. Ápe Demetiriyuusi ɛ́ den hàarí wóò lɛ́ ɛ̀ ɓɛ̀pe nìɛ lɛ ɛ́ tɛ́ àá ɔ́ ɛ̀ yí hɔ́ màa cɛ̃̀un. 25Á vɔn ɓɛ̀pe àá ɓɛ́lɛ ɛ́ hàarí ɛ́ hɔ̀ tɔnlɔ sɔ ɓà ńmàa ɛ̀ tɛ́ ɛ́ koo ɓánlɔ̀n à ɛ́ bie àá ɓɛ́ ɛ́ nɛ làa: «Mìpe mìkùi lò wo dũ kɛ́ ké bòo lɛ ɛ́ ké ɛ́ yí míkùi ɛ́ lò wo ɛ́ lé hɔ́pe tɔnlɔ sɔ lɛ hũn. 26Ɛ́ mí lò wo loo, tàá mí ɛ́ ɲí hɔ́ Efɛɛzi lóo hũn àá hɔ́pe Azii pɛ̃̀hɛ̃ míkùi hũn kɛ́ ápe nùún lɛ ɛ́ ɓɛ́ nɛ Pooli ɛ́ bie nɛ hɔpe wɛ̃̀hɛ̃ lɛ ɛ́ ɓɛ́ nìnbirìe ɛ́ te wɔ́ àá ɓɛ́ níhĩ́ ɛ́ yí dɔfĩnɓɛ wɛ̀. Á lɛ́ ɛ́ ɓɛ́ nìnbirìe bìkuì ɛ́ khũ̀a khie van dũmuasɛ̃̀ pie bienù ǹ. 27Ɛ́ hɔ́pe sí ɛ́ dɛ̀ kè tɔnlɔ́ ɛ́ yáakɛ, ɛ̀ hɔ̀ lò dɛ̀ ɛ́ bĩní lɛ́ ɛ́ ɓɛ́ nìnbirìe ɛ́ yá bĩní mɛ̀ndɛ̃ lepe kè wɔ̃̀n-hṹnu dɛ̀bɛhɔ́ Aritemiise zũnù wɛ̀. Ɛ́ pelè ɓàarɔ́ míkùi ɛ́ wo ɛ́ vé, lèpe wɔ̃̀hṹ lɛ ɛ́ ɓɛ́ Azii nìɛ ɓɛ́kùi àá hɔ́pe dímíɲɛ́ míkùi nìɛ ɛ́ wóò ɓàanínin!» 28Ɛ́ bòo lɛ ɛ́ ɓɛ́ ɲɛ́ hɔ́pe biehĩ́ sɔ sí, ɛ́ peɓɛ̀ tĩɛ̀ ɛ́ hɛ̀ siɛ hĩ́nà ɛ́ ɓɛ́ khie ɛ́ bénkɛ ɛ́ nɛ làa: «Efɛɛzi siè wɔ̃̀n-hṹnu Aritemiise ɛ́ hɛ̀ ɓàań!» 29Ɛ́ lépe lóo míkùi ɛ́ hĩ́nà tɛ́ dɛ̃̀. Ɛ́ ɓɛ́ nìnbí-kuì ɛ́ wo khie van kóo ɓánlɔ̀n fùa fùa lè yàa kúie hũn. Ɛ́ Pooli ɓà ńbèɓán nìɛ ɓɛ̀ ɲu dɔ̀ lɛ ɛ́ lé hɔ́ Maseduanɛ lɛ iè Kayiise àá Arisitaake ɛ́ ɓɛ́ khie ɓaakɛa ɛ́ dàa van yán. 30Ɛ́ Pooli ɛ́ hṹn wɛ mii vɛ lé ɓɛpe nìzã̀amáa viì, kɛ́ ɓɛ́ ńdɛsĩ̀riè ɛ́ den pɛ̃́ ɛ̀ ɓɛ̀ sun ɔ̀. 31Ɛ́ hɛ̀rí hɔ́pe Azii pɛ̃̀hɛ̃ nì-bɛ̃hɛ̃ dɔ̀ lɛ hàarí iè Pooli ɓà pàáɓɛ́ ɛ́ tɔrɛ nìnbirìe nɛ ɓɛ vɛ hɛ̃un ɔ̀ ǹ nɛ a bí lé vɛ lepe yàa kúie hũn wɛ̀. 32Hɔ̀pe sí kɛ́ ɓɛ́ nìzã̀amáa ɛ́ hɛ̀ wo tɛ́ dɛ̃̀. Ɓɛ̀dɔ̀ ɛ́ wóò zɔ bén ɛ̀ bie bòo dɔ̀, ɛ̀ ɓɛ̀dɔ̀ ɛ̀ ɓiɛ̀ zɔ bén ɛ̀ bie bɔ̀ɓuɛ̀, ɛ̀ ɓɛ̀ bìdãà ɛ́ yɛ̀rɛ́ yí dũ bòo lɛ ɛ́ ɓɛ́ dàa ɓɛrɛ koo ɓánlɔ̀n wɛ̀. 33Ɛ́ nìɛ ɓɛ̀ yìɛní dɔ̀ ɓɛ̀ nìzã̀amáa tĩ́ihṹ ɛ́ khie munkɛa hɔ bòo lɛ ɛ́ wé ɛ́ lɛ́ á nùún dɔ̀ lɛ yèrè ɛ́ ɓɛ́ nɛ Alɛkisandere lɛ ɛ́ ɓɛ́ Zuifuɓɛ ɛ́ hàarí ɛ́ súukɛ nɛ a dí hɔ́ híɛhɔ́. Ápe Alɛkisandere ɛ́ hóoniɛ mí núnú ɓɛ̀ nìzã̀amáa ǹ à wɛ mii munkɛ mí ɲunù peɓɛ̀ híɛhɔ́. 34Kɛ́ hɔ́ lɛ ɛ́ ɓɛ́ nìnbirìe ɛ́ dũnɛ kɛ á Zuifu, ɛ́ ɓɛ́pe ɓɛ́kùi ɛ́ zɔn ɛ́ bénkɛ àá tɛmu dìcóoní fúu ɛ́ van dɛ̃un liɛrɛɓɛ bɔ̀nbɔ̀ ɲu ɓà ńmàa ɛ́ nɛ: «Efɛɛzi siè wɔ̃̀n-hṹnu Aritemiise ɛ́ hɛ̀ ɓàań!»

35Á lóo hándí dɔ̀ lɛ iè peɓɛ̀ vɛnwĩ́ ɛ́ yú ɓɛ́ nìzã̀amáa ɛ́ wuaniɛ nin à zɔn bie ɛ́ nɛ làa: «Mìpe Efɛɛzi siè, ɓɛ̀ nìnbirìe ɓɛ́kùi ɛ́ dũ kɛ́ hɔ́ iè Efɛɛzi lóo hũn ɛ́ lépe wɔ̃̀n-hṹnu dɛ̀bɛhɔ́ Aritemiise zũnu ɛ̀ wi hũn, ɛ̀ kèpe ɛ́ te lepe zũnù sɔ àá lépe wɔ̃̀hṹ sɔ lɛ ɛ́ yòó van lɔ́ hɔ́ hóohũn ɛ́ kuerɛ síɛ lè sṹsùnù ɛ́ hìenin. 36Nìnbírɔ dɔ̀ lɛ dɛ̀ ɛ́ bie nɛ hɔ́pe sí ɛ́ yí be ɛ́ mí wɛ̀. Ɛ́ sí iè hɔ̀pe ɛ́ mí dàa sãawi ɛ̀ mì wuaní míte ɛ̀ mì bí wé bòo dɔ̀ ɛ̀ yòokɛ mi lɔ̀n wɛ̀. 37Ɓɛ̀pe nìnbirìe lɛ ɛ́ mí dàa ɛ́ dàa ɓɛrɛ hũ̀nún ɛ́ lò ɛ́ yí nìnbirìe lɛ ɛ́ zɔn dú ké wɔ̃̀hṹ zũnù tĩ̀ɛ, ɛ̀ ɓɛ̀ lò yí biè lɛ ɛ́ tùo lèpe kè wɔ̃̀n-hṹnu wɛ̀. 38Kɛ́ á Demetiriyuusi àá ɓá ńkɔhĩ́ tɔntɛ́riè ɛ́ ɓen nɛ nìnbírɔ dɔ̀ ɛ́ wɔ́ khɔn àá ɓɛ́, ɛ̀ hɔ̀ lìe lènlén àá ɓɛ́ lìe lèriè ɛ́ wi yán, ɛ́ sí iè viì lɛ ɛ́ ɓɛ́ fɔ́ɓán ɛ̀ ve ɓɛ hũn! 39Ɛ̀ kɛ́ mí ɓen dàa bòo bɔ̀ɓuɛ̀ dɔ̀ lɛ ɛ́ mí fɔ́ɓán ɛ̀ mì leń yìe ɓán hũn, ɛ́ pehɔ̀ yìe ɛ́ fɔ́ɓán ɛ̀ hɔ̀ leń ɓɛ́pe lóo hándíe ńkóoɓánlɔ̀n nìɛ híɛhɔ́. 40Ɛ́ hɔ́ iè mɛ̀rɔ́ bòo ɛ́ mí ɛ́ wé kɛ̀amu iè hɔ̀ lɛ ɛ́ Rɔmu siè ɛ̀ dɛ̀ ɛ́ bie nɛ ké wɔ́ khɔn hɔ̀pe bòo lɛ wɔ́ zoòni bòo hũn, ɛ̀ ɓɛ̀ ɛ́ bie nɛ ké iè bìe lɛ ɛ́ hĩ́nà pɛ̃́ ɓɛ́ bòo ɛ́ dɛ̃̀. Hɔ́rɔsí ɛ̀ kè lò yí dàa bòo dɔ̀ lɛ ké zɔ bie ɛ̀ dàá bie nɛ hɔpe ńkóoɓánlɔ̀n lɛ ɛ́ te mí yìe.» 41Á khɛ́ hɔ́pe sí vɔ́, à nɛ ɓɛ nìzã̀amáa ɛ̀ saakɛ lan.

Currently Selected:

Bɔ̀werà 19: bwj

Highlight

Compare

Copy