Bɔ̀werà 18

Pooli ɛ́ van wi Korɛnte lóo hũn

1Ɛ́ hɔ́pe sí máahṹ, ɛ́ Pooli ɛ́ zɔn lɔ́ Atɛɛnɛ lóo hũn ɛ́ khie van Korɛnte. 2Á van mɔn Zuifu dɔ̀ lɛ yèrè ɛ́ ɓɛ́ nɛ Akilaasi yán. À hàarí ɛ́ lé àá Pɔn pɛ̃̀hɛ̃ hũn. Á hàarí lɔ́ hɔ́ Yitalii cɛ̃̀mɛ̀nɛ́ hũn ɛ́ ɓɛrɛ dɛ̃un sáalɛ àá ɓá hṹnu Pirisiile iè hɔ̀ lɛ á Rɔmu bɛ́zu-bɛhɔ́ Kuloode ɛ́ hàarí ɛ́ lɛ́ lé ɲunù nɛ ɓɛ Zuifuɓɛ ɓɛ́kùi ɛ̀ lé hɔ́ Rɔmu lóo hũn. Ɛ́ Pooli ɛ́ van ɔ̀pe Akilaasi àá ɓá hṹnu Pirisiile viì. 3Ɛ̀ hɔ̀ lɛ ɛ́ hɔ́ hàarí iè tɔn-cóoní ɛ́ ɓɛ́ tɛ́, ɛ́ Pooli ɛ́ kɛsí peɓɛ̀ viì ɛ́ ɓɛ́ dàa ɛ́ páaníɛ ɛ́ tɛ́. Ɓɛ̀ den hàarí iè hɔ̀ pɔnkɔ̀-bɛ̃hɛ̃ lɛ ɛ́ wóò wé àá hɔ́ zĩhĩ́ɛ ɛ́ ɓɛ́ hàarí wóò tĩ́. 4Ɛ́ ɓɛ́ Zuifuɓɛ ńvũùnín sí ɛ́ hàarí wóo ɓen van dɛ̃un, ɛ̀ Pooli wóò vɛ zɔ peɓɛ̀ ńkóoɓánlɔ̀n zũnù hũn, ɛ̀ vɛ zɔ bie àá ɓɛ́, ɛ́ cɛ̀ nɛ ɓɛpe Zuifuɓɛ àá ɓɛ́pe lɛ yí ɓɛ́ Zuifuɓɛ ɓɛ́kùi ɛ̀ tɛ̀ mí bienù bòo.

5Ɛ́ hɔ́ lɛ ɛ́ Silaasi àá Timote ɛ́ van yòó lɔ́ hɔ́ Maseduanɛ cɛ̃̀mɛ̀nɛ́ hũn ɛ́ ɓɛrɛ siɛ dɛ̃un, ɛ́ Pooli ɛ́ wo khie wɔ́ lé Dɔfĩn bienù mí dòonún á wóò buie. À wóò zɛ̃́ní lɛ́ ɓɛ́ Zuifuɓɛ ǹ kɛ́ Yiezu ɛ́ temu iè ɔ̀pe Kirisa. 6Kɛ́ hɔ́ lɛ ɛ́ ɓɛ́ Zuifuɓɛ den pɛ̃́ piè bòo ɛ̀ ɓɛ̀ ɛ́ ɔ̀ tòokɛ, ɛ́ Pooli ɛ́ pùkúrɛ mí tĩ̀ɛ khũnkhũnù ɛ́ kóosí à zɔn bie lɛ́ ɓà ǹ ɛ́ nɛ làa: «Mì mɛkɛnì ɓen vṹnun, ɛ̀ mì dũń kɛ́ hɔ́ lɔ́ miɛ ǹ, ɛ̀ ǹpe zèn ɛ́ mí yán wɛ̀. Ɛ́ kɛ̀a sáalɛ ɛ́ ń wo nín vɛ àá ɓɛ́ nìnbirìe lɛ yí ɓɛ́ Zuifuɓɛ viì.» 7À khie lɔ́ yán ɛ́ khie van nùún dɔ̀ lɛ wóò ɓàaní Dɔfĩn yíe, à nùún sɔ yèrè ɛ́ ɓɛ́ nɛ Titiise Zusitiise, ɛ̀ piè zũnù ɛ́ hàarí wi ɓɛ Zuifuɓɛ ńkóoɓánlɔ̀n zũnù sɛnù. 8Hɔ́rɔsí kɛ́ á Kirisipiise lɛ iè ɓɛ̀pe Zuifuɓɛ ńkóoɓánlɔ̀n zũnù hándí ɛ́ dũmuasɛ̃̀ Ɲunsɔ ǹ, àpe àá mí zũnù nìɛ ɓɛ́kùi. Ɛ̀ ɓɛ̀ Korɛnte siè nìnbí-kùi lɛ hṹn ɛ́ ɔ̀ Pooli biehĩ́ ɛ̀ ɲí ɛ́ dũmuasɛ̃̀ ɛ̀ ɓɛ̀ lɛ́ ɓɛ́te ɛ́ ɓɛ́ líiníkɛa hɔ̀ ɲumu hũn.

9Ɛ́ sṹnũ̀hṹn dɔ̀ zɔn, ɛ́ Ɲunsɔ ɛ́ ɓɛrɛ zɛ̃́niɛ míte Pooli ǹ hɔ̀ yìnmirà hũn à bie lɛ́ à ǹ ɛ́ nɛ làa: «Bí zán wɛ̀, vɛ̀ àá híɛhɔ́ ɛ̀ bie lan kɛ́ kɔ́ bí hĩì wɛ̀; 10iè hɔ̀ lɛ ɛ́ ńpe ɛ́ wi àá kɔ, ɛ́ nìnbírɔ dɔ̀ ɛ́ yí dɛ̀ mí núnú ɛ́ yá mìí ɛ́ bè kɔ̀ lɔ̀n ɛ́ bie nɛ mii ɛ̀ biení kɔ́ lɔ̀n wɛ̀; iè hɔ̀ lɛ ɛ́ nìnbirìe lɛ bòo sɛ̃̀ mi ǹ ɛ́ buò cɛ̃̀un hɔ̀pe lóo sɔ lɛ hũn.» 11Ɛ́ Pooli ɛ́ wɔ́ lɔ́lɔ́-kuì àá mí tĩ́ihṹ Korɛnte lóo hũn. À hṹn wóò kɛ̀rán ɓɛ́ nìnbirìe àá Dɔfĩn bienù.

12Ɛ́ pɛ̃̀hṹ lɛ á Rɔmu nùún Kaliyɔn ɛ́ dàa temu hàarí iè kuvɛrɛnɛɛre hɔ̀ Akayi#18.12 Korɛ̃nte ɛ́ hàarí iè hɔ̀pe Akayi pɛ̃̀hɛ̃ lɔ́-bɛhɔ́. pɛ̃̀hɛ̃ hũn, ɛ́ ɓɛ́ Zuifuɓɛ ɛ́ ɲɛ́ ɓán ɛ̀ ɓɛ̀ hĩ́nà ɔ̀ Pooli ǹ, ɛ̀ ɓɛ̀ dàa ɔ̀ ɛ́ dàa van hɔ̀ lìe lènlén, 13ɛ̀ ɓɛ̀ ɛ́ bie ɛ́ nɛ làa: «Àpe nùún sɔ lɛ ɛ́ ɓɛ̀ nìnbirìe kɛ̀rán nɛ ɓɛ wóo ɓàaní Dɔfĩn àá ɓàanírɔ́ lɛ ɛ́ wi mí dòonún àá hɔ́ làndɛ́ bòo lɛ ɛ́ hɔ́ khɛ́.» 14Ɛ́ Pooli ɛ́ hṹn mii haà mí ɲunù ɛ̀ zɔ bie, hɔ́rɔsí à Kaliyɔn ɛ́ den zɔn ɛ́ bie lɛ́ ɓɛ́ Zuifuɓɛ ǹ nɛ làa: «Mìpe Zuifuɓɛ, kɛ́ hɔ́ hṹn iè bòo ɛ́ mí nɛ ape nùún sɔ lɛ ɛ́ yáakɛa bòo dɔ̀ tàá nɛ a wɔ́ bɔ̀koohɔ́ dɔ̀, ɛ́ ń hṹn ɓén kansí ɛ̀ nìń ɲí àá mí viì sãa sãa. 15Kɛ́ hɔ́ lɛ ɛ́ mí iè bìe lɛ ɛ́ wũ̀aní hɔ́ biehĩ́ dɔ̀ lɔ̀n, àá hɔ́ yèhĩ́ dɔ̀ lɔ̀n, àá mípe mì kùrú làndɛ́ lɔ̀n, ɛ́ hɔ́pe sí ɛ́ cɛrɛkɛa miɛ. Ǹpe yí nin wé hɔ́pe bòo sí ɓà ńmaà lìe lèrɔ wɛ̀.» 16À nɛ ɓɛ khíi lan ɛ̀ lé hɔ̀ lìe lènlén. 17Ɛ́ ɓɛ́pe ɓɛ́kùi ɛ́ khie ɓaa ɔ̀ Sɔsitɛɛnɛ lɛ ɛ́ iè ɓɛ̀pe Zuifuɓɛ ńkóoɓánlɔ̀n zũnù hándí ɛ́ wo ɛ́ nàa hɔ̀pe lìe lènlén. Kɛ́ Kaliyɔn ɛ́ pe ɛ́ yí líi hɔ́pe sí àá bòo dɔ̀ wɛ̀.

Pooli khũ̀á viɛnù hɔ̀ Antiɔsi lɛ wi hɔ Siiri cɛ̃̀mɛ̀nɛ́ hũn

18Ɛ́ Pooli ɛ́ bĩniɛ khie kɛsí míɛ Korɛnte lóo hũn. Ɛ́ pehɔ̀ máahũ, à hĩ́nà lɔ́ ɓɛ́ ńdɛsĩ̀riè viì ɛ́ khie kã́a Siiri cɛ̃̀mɛ̀nɛ́, àpe àá Pirisiile àá Akilaasi. Ɛ́ hɔ́ lɛ ɛ́ ɓɛ́ van dɛ̃un Sankere lóo, á kie lɛ́ mí ɲún ɛ́ ɓɛ́ khũa, iè hɔ̀ lɛ á den hṹn tɛ̀ lè ɲunù kiè àá Dɔfĩn. Ɛ́ pehɔ̀ máahṹ, ɛ̀ ɓɛ̀ den khie van zɔn lè ɲumu wiè dɛ̀bɛhɔ́ ɛ́ ɓɛ̀ cɔ́. 19Ɛ́ ɓɛ́ van dɛ̃un Efɛɛzi lóo, ɛ́ Pooli ɛ́ fúɛrɛ̀sí Akilaasi àá Pirisiile yán, á khie van zɔn ɓɛ̀ Zuifuɓɛ ńkóoɓánlɔ̀n zũnù, ɛ́ zɔn ɛ́ dìkìmú àá ɓɛ́. 20Ɛ́ ɓɛ́ hɛ̃nnɛ a ǹ nɛ a kansí míi àá ɓɛ́, kɛ́ Pooli ɛ́ den ɛ́ yí tɛ̀ wɛ̀. 21Á fùɛrɛ̀sí ɓà ǹ, kɛ́ á den zɔn bie lɛ́ ɓà ǹ ɛ́ nɛ làa: «Dɔfĩn ɓen tɛ̀ ɛ́ ń ɓén bĩní ɛ́ khũ̀á ɓen mì viì.» À khie van zɔn lè ɲumu wiè dɛ̀bɛhɔ́ hɔ̀ Efɛɛzi hũn à cɔ́. 22Á van dɛ̃un Sezaree, à zɔn lɔ́ lé ɲumu wiè dɛ̀bɛhɔ́ hũn ɛ́ khie yòó van Zerizalɛɛmu, ɛ́ van yòó fòoniɛ ɓɛ̀ ńdɛsĩ̀riè vɔ́ à den khie siɛ van Antiɔsi. 23Á wo van míɛ bìcínbóo yán, à khũ̀a khie cɔ́ van bɔ̀ hɔ̀ Kalaasi àá hɔ́ Firizi pɛ̃̀hɛ̃ ǹ, kɛ́ á ɛ́ ɓɛ̀ ńdɛsĩ̀riè ɓɛ́kùi tĩɛ̀ ɛ̀ hĩ̀iníkɛ.

Apolɔɔsi ɛ́ van wi Efɛɛzi àá Korɛnte hũn

24Ɛ́ Zuifuɓɛ nùún dɔ̀ lɛ yèrè ɛ́ ɓɛ́ nɛ Apolɔɔsi lɛ ɛ́ lé Alɛkisandiri ɛ́ hàarí van dɛ̃un Efɛɛzi. À hàarí iè nìnbírɔ lɛ ɲunù tĩ àá lé bienù, à lò dũ le Dɔfĩn bienù ńwĩ́ncã́a cɛ̃̀un. 25À hàarí yú kɛ̀ránlɔ́ à Ɲunsɔ Yiezu wṹn bènlɔ́ bòo hũn, à lò hàarí can mí kuò ɛ́ ɔ̀pe Yiezu bòo ɛ́ buie àá mí tĩì míkùi, kɛ́ á ɛ́ ɓɛ̀ nìnbirìe ɛ̀ kɛ̀rán pehɔ̀ lɔ̀n hɛ̀lɛ̀lɛ̀. Kɛ́ hɔ́ den hàarí iè ɔ̀ Zãn ńlíiníɲumu bòo mí dòonún iè pe á dũ. 26Á hĩ́nà ɛ́ bie kɛ́ á fɔnù tɛ́rɛ ɓɛ Zuifuɓɛ ńkóoɓánlɔ̀n zũnù hũn. Ɛ́ Pirisiile àá Akilaasi ɛ́ ɲɛ́ piè biehĩ́ vɔ́, ɛ́ ɓɛ́ khie fɔ́ á ɛ́ dàa van ɓɛ́ yíe ɛ́ van munkɛa Dɔfĩn wṹn bòo àá mí híɛhɔ́ ɛ́ lɛ́ à ǹ. 27Ɛ́ pehɔ̀ máahṹ, ɛ̀ Apolɔɔsi ɛ́ wɛ mii vɛ Akayi pɛ̃̀hɛ̃ hũn. Ɛ́ ɓɛ́ Efɛɛzi ńdɛsĩ̀riè ɛ́ hĩ̀iníkɛa piè tĩì pehɔ̀ bòo hũn, ɛ̀ ɓɛ̀ khie wɛ̃́ lé vɛ̃hṹ dɔ̀ ɛ́ nɛ a vɛ lɛ́ ɓɛ́ ńdɛsĩ̀riè lɛ ɛ́ van wi hɔpe pɛ̃̀hɛ̃ sɔ hũn, ɛ́ nɛ ɓɛ pen ɔ̀ sãaní. Ɛ́ hɔ́ lɛ ɛ́ Apolɔɔsi ɛ́ van dɛ̃un yán, ɛ́ ɓɛ́pe nìnbirìe lɛ ɛ́ Dɔfĩn àá mí hiì ɛ́ lɛ́ ɛ́ ɓɛ́ wɔ́ ɓɛ́ ńdɛsĩ̀riè á hɛ̀ van yíiniɛ cɛ̃̀un. 28Iè hɔ̀ lɛ ɛ́ ɓɛ́ Zuifuɓɛ bòo lɛ ɛ́ ɓɛ́ wóò bie á den wóò pĩ́ bòo cɛ̃̀un ɓɛ̀ nìzã̀amáa híɛhɔ́, à dìń lépe Dɔfĩn bienù ńwĩ́ncɛ̃́a lɔ̀n ɛ̀ dàá zɛ̃́ní kɛ́ Yiezu ɛ́ iè ɔ̀pe Masiya, lɛ iè ɔ̀pe Fuenírɔ.

Currently Selected:

Bɔ̀werà 18: bwj

Highlight

Compare

Copy