Bɔ̀werà 17

Pooli àá Silaasi ɛ́ wi Tesaloniike hũn

1Ɛ́ Pooli àá Silaasi ɛ́ van lɔ́ Anfipoliise àá Apoloni lóoniɛ̀ hũn ɛ́ dàa van dɛ̃un Tesaloniike lóo lɛ ɛ́ ɓɛ́ Zuifuɓɛ ɛ́ hàarí dàa ɓɛ́ ńkóoɓánlɔ̀n zũnù dɔ̀ nin. 2Ɛ́ kɛ̀a bòo lɛ ɛ́ Pooli dàa wóò wé fúu, á khie van yán. Ɛ́ ńvũùnín síɓɛ́ bɔ̀nbɔ̀ tĩ lɛ sɛ̃̀ ɓán kɛ́ Pooli ɛ́ wóò vɛ zɔ lé ńkóoɓánlɔ̀n zũnù sɔ, ɛ̀ zɔ tɛ̀ dìkìmú àá ɓɛ́ nìnbirìe lè Dɔfĩn bienù lɔ̀n yán. 3À hàarí wóò munkɛ hɔpe bòo lɛ ɛ́ wɛ̃́ lé Dɔfĩn bienù vɛ̃hṹ hũn ɲún ɛ̀ lɛ́ ɓà ǹ, à zɛ̃́ní lɛ́ ɓà ǹ kɛ́ hɔ́ wɛ̃́ yán ɛ́ nɛ ape Masiya lɛ iè ɔ̀ Fuenírɔ ɛ́ sãawi à lɔ̀n be fúu ɛ̀ vɛ hí, à vìé ɛ̀ lé hɔ́pe húmú hũn. Ɛ́ Pooli ɛ́ den hàarí wóò bie lɛ́ ɓà ǹ nɛ ape Yiezu lɛ ɛ́ mípe Pooli ɛ́ bòo bie àá ɓɛ́ ɛ́ temu iè ɔ̀pe Masiya sɔ. 4Ɛ́ ɓɛ́ Zuifuɓɛ nìɛ ɓɛ̀ yìɛní dɔ̀ ɛ́ tɛ̀ hɔ̀ biehĩ́ sɔ bòo ɛ́ ɓɛ́ van páa Pooli àá Silaasi lɔ̀n. Ɛ̀ ɓɛ̀ Kɛrɛkiɓɛ nìnbí-kuì dɔ̀ lɛ hàarí ɛ́ Dɔfĩn ɛ̀ ɓàanínin àá ɓɛ́ hã́a dɔ̀ lɛ hàarí ɲúuhɛ̃ lìkɛ ɛ́ lò ɓiɛ̀ van páa Pooli àá Silaasi lɔ̀n. 5Kɛ́ ɓɛ́ Zuifuɓɛ dɔ̀ ɛ́ den khie ɛ́ lè yanlienú ɛ̀ dí àá Pooli àá Silaasi. Ɛ́ ɓɛ́ khie van vɔnkɛ ɓɛ nìlaahɛ̃ dɔ̀ hɔ̀ fɔhĩ́ hũn ɛ́ van koo ɓánlɔ̀n, ɛ́ ɓɛ́ khie ɛ́ lè lóo ɛ̀ kánkɛ. Ɛ̀ ɓɛ̀ khie van ɔ̀ Zazɔn yíe ɛ́ van ɛ́ Pooli àá Silaasi ɛ̀ cɛ̀, ɛ́ nɛ ɓɛ ɛ̀ ɓaakɛ ɓɛ ɛ̀ dàá vɛ ɓɛ nìzã̀amáa viì. 6Kɛ́ ɓɛ́ den yí mi ɓɛ wɛ̀. Ɛ́ ɓɛ́ khie ɓaa ɔ̀pe Zazɔn àá ɓɛ́ ńdɛsĩ̀riè dɔ̀ ɛ́ dàa van ɓɛ̀ lóo hándíe viì kɛ́ ɓɛ̀ ɛ́ bénkɛ ɛ́ nɛ làa: «Ɓɛ̀pe nìɛ sɔ lɛ ɛ́ kánkɛa lè dímíɲɛ́ míkùi, ɛ́ kɛ̀a sáalɛ ɛ́ ɓɛ́ ɓɛrɛ dɛ̃un hũ̀nún. 7Ápe Zazɔn ɛ́ perɛ ɓà ǹ mí yíe. Ɓɛ̀pe nìɛ sɔ ɓɛ́kùi bòo lɛ ɛ́ ɓɛ́ ɛ́ wé ɛ́ khɔn ɓán àá ɔ́ Rɔmu bɛ́zu-ɓɛhɔ́ làndɛ́; ɓɛ̀ wóo nɛ bɛ́zuú wìɓuiɛ̀ dɔ̀ ɛ́ wi yán lɛ ɛ́ ɓɛ́ nɛ Yiezu.» 8Ɛ́ hɔ́ biehĩ́ sɔ ɛ́ hɛ̀ yòó yáakɛa ɓɛ̀ nìzã̀amáa àá ɓɛ́ lóo hándíe hɛciri. 9Ɛ́ ɓɛ́pe lóo hándíe ɛ́ lɛ́ ápe Zazɔn àá ɓɛ́pe ńdɛsĩ̀riè ɛ́ sàaniɛ ɓɛ́te yínlán màa ɛ́ lɛ́ ɓà ǹ ɛ́ ɓɛ́ dàa yú ɓɛ́ fùrɛ̀sí nin.

Pooli àá Silaasi ɛ́ van wi Beere lóo hũn

10Ɛ́ hɔ́ lɛ ɛ́ hɔ́ sí van hɛ̃un, ɛ́ ɓɛ́ ńdɛsĩ̀riè ɛ́ lɛ́ ɛ́ Pooli àá Silaasi ɛ́ khie cɔ́ kã́a Beere lóo. Ɛ́ bòo lɛ ɛ́ ɓɛ́ van dɛ̃un hɔ̀pe Beere, ɛ́ ɓɛ́ van zɔn ɓɛ̀ Zuifuɓɛ ńkóoɓánlɔ̀n zũnù. 11Bɛ̀pe Beere Zuifuɓɛ ɛ́ pe hàarí hũn vànminù ɛ́ sãa pɔ ɓɛ Tesaloniike Zuifuɓɛ hɔ́n. Ɛ́ ɓɛ́ tɛ̀ hɛ́rɛ ɓɛ́ hũn ɛ̀ ɓɛ̀ ɲɛ́ lé Dɔfĩn bienù. Ɛ́ sítĩnlɔ́ míkùi hũn ɛ̀ ɓɛ̀ hṹn wóò kɛ̀rán lé Dɔfĩn bienù vɛ̃hṹ, ɛ̀ dàá húi nɛ hɔpe bòo lɛ ɛ́ ɓɛ́ ɛ́ kɛ̀rán àá ɓɛ́ ɛ́ bɔn. 12Ɛ́ peɓɛ̀ tĩ́ihṹ, ɛ́ nìnbí-kuì ɛ́ dũmuasɛ̃̀ Dɔfĩn; ɛ̀ ɓɛ̀ Kɛrɛkiɓɛ tĩ́ihṹ, ɛ́ ɓɛ́ hã́a cɛ̀rìɛɛ dɔ̀ lɛ ɲúuhɛ̃ ɛ́ líkɛ àá ɓɛ́ báa cɛ̀rìɛɛ ɛ́ lò ɓiɛ̀ dũmuasɛ̃̀ Yiezu ǹ. 13Ɛ́ hɔ́ lɛ ɛ́ ɓɛ́ Tesaloniike Zuifuɓɛ ɛ́ ɲɛ́ ɛ̀ ɓɛ̀ nɛ Pooli ɛ́ lò ɓiɛ̀ ɛ́ Dɔfĩn bienù ɛ̀ buie hɔ Beere lóo hũn, ɛ́ ɓɛ́ lɔ́ ɓɛrɛ yán, ɛ́ ɓɛrɛ ɛ́ ɓɛ̀ nìzã̀amáa ɛ̀ sùkún. 14Ɛ́ mí làa hũn ɛ́ ɓɛ́ ńdɛsĩ̀riè ɛ́ lɛ́ ɛ́ Pooli ɛ́ khie kã́a àá hɔ́ ɲún-bɛhɔ́ viì, kɛ́ Silaasi àá Timote ɛ́ pe kesí hɔ́ Beere hũn. 15Ɛ́ ɓɛ́pe lɛ ɛ́ hàarí ɔ̀ Pooli ɛ̀ níiní ɛ́ níiniɛ ɔ̀ ɛ́ dàa van dɛ̃un Atɛɛnɛ ɛ̀ ɓɛ̀ khie khũ̀a van hɔ̀ Beere àá lé tɔrɛ bienù lɛ ápe Pooli ɛ́ lɛ́ ɓà ǹ nɛ ɓɛ vɛ bie lɛ́ Silaasi àá Timote ǹ nɛ ɓɛ fuie ɓen mí viì.

Pooli ɛ́ lè Bentĩnu ɛ̀ buie hɔ Atɛɛnɛ lóo hũn

16Ɛ́ hɔ́ lɛ ɛ́ Pooli van wi Atɛɛnɛ lóo hũn ɛ́ ɔ̀ Silaasi àá Timote ɛ̀ hìé yán, ɛ́ piè tĩì hɛ̀ yáa cɛ̃̀un iè hɔ̀ lɛ á mɔn kɛ́ lépe lóo sɔ ɛ́ hɛ̀ tú àá hɔ́ wɛ̃̀hɛ̃. 17Á hṹn wóò vɛ zɔ ɓɛ Zuifuɓɛ ńkóoɓánlɔ̀n zũnù, ɛ̀ zɔ tɛ̀ lè ńláakɛ àá ɓɛ́pe Zuifuɓɛ àá ɓɛ́pe lɛ yí ɓɛ́ Zuifuɓɛ lɛ khie ɛ́ Dɔfĩn ɛ̀ ɓàanínin. Ɛ́ sítĩnlɔ́ míkùi hũn, à wóò bĩní vɛ ɓɛ nìnbí-zã̀amá kansílen, ɛ̀ vɛ tɛ̀ lè ńláakɛ́ àá ɓɛ́lɛ á wóò vɛ tɛ̀rɛ́ yán. 18Ɛ́ ɓɛ́ bɔ̀dũnbáa dɔ̀ ɛ́ hàarí wi yán; ɓɛ̀ hàarí wóò ve ɓɛdɔ̀ nɛ Epikirĩɛɓɛ, ɛ̀ ɓɛ̀dɔ̀ ɛ́ ɓɛ́ ve nɛ Sitoyisĩɛɓɛ. Ɛ́ ɓɛ khie ɛ́ wũ̀aní àá Pooli. Ɓɛ̀dɔ̀ ɛ́ bie nɛ hɔ iè ńɓùo ápe kankán yerɛ̀ ɓàasɔ sɔ lɛ ɛ́ cɛ̀ mii bie pe? Ɛ̀ ɓɛ̀dɔ̀ ɛ́ nɛ kɛ̀a bòo ɛ́ hɔ́ iè dɔfĩnɓɛ bɔ̀ɓuà dɔ̀ bòo á ɛ́ bie. Iè hɔ̀ lɛ ɛ́ ɓɛ́ den ɲɛ́ kɛ́ Pooli ɛ́ Yiezu Bentĩnu àá ɓɛ́ nìhiè vìerɔ́ bòo ɛ̀ buie. 19Ɛ́ ɓɛ́ khie dàa ɔ̀ ɛ́ dàa van ɓɛ́ vìi lɛ ɛ́ ɓɛ́ wóò ve nɛ Ayeropaaze#17.19 Ayeropaaze ɛ́ hàarí iè vìi dɔ̀ lɛ ɛ́ ɓɛ́ Atɛɛnɛ nì-bɛhɛ̃ ɛ́ wóò vɛ kóo ɓánlɔ̀n hũn. hũn, ɛ̀ ɓɛ̀ ɛ́ bie àá ɔ́ ɛ́ nɛ làa: «Hɔ̀ bòo bɔ̀fĩɛ̀ lɛ ɛ́ kɔ́ ɛ́ kɛ̀rán àá ɓɛ́ nìnbirìe ɛ́ kɔ́ dɛ̀ ɛ́ zɛ̃́ní ɛ́ lɛ́ kiè ǹ? 20Hɔ̀ bòo lɛ ɛ́ ké ɛ́ ɲí kɔ́ ɲunù hũn ɛ́ ké ɲɛùn yí ɲí ɛ́ yí mi wɛ̀; ɛ́ ké ɛ́ cɛ̀ ɛ́ ke ɛ̀ dũń pehɔ̀ ɲún.» 21Ɓɛ̀pe Atɛɛnɛ nìɛ àá ɓɛ́ nɛ̀hãà lɛ hàarí wi yán ɛ́ den hàarí yáà wé bòo dɔ̀ kɛ́ hɔ́ bòo bɔ̀fĩɛ̀ ɲínlɔ́ àá pehɔ̀ bierɔ́ ɛ́ ɓen bòo mí. 22Ɛ́ Pooli ɛ́ dɛ̃̀ ɓɛ̀ nìzã̀amáa tĩ́ihṹ à zɔn bie ɛ́ nɛ làa: «Mìpe Atɛɛnɛ nìɛ, ń loo kɛ́ mí iè nìnbirìe lɛ wóò bè mì wɛ̃̀hɛ̃ bòo ɛ̀ hièní cɛ̃̀un. 23Iè hɔ̀ lɛ ɛ́ hɔ́ lɛ ɛ́ nín khíi mí lóo fɔ́nú hũn, ɛ́ ń mɔn hɔ̀ wɛ̃̀hɛ̃ lɛ ɛ́ mí wóò ɓàanínin, ɛ̀ ǹ yɛ̀rɛ́ mɔn lè wɔ̃̀hṹ dúekéré dɔ̀ lɛ ɛ́ hɔ́ bòo lɛ ɛ́ wɛ̃́ dɛ̃̀ lè lɔ̀n ɛ́ iè hɔ̀ lɛ: “Ɛ̀ lɛ́ dɔfĩn dɔ̀ lɛ ɛ́ ké yí dũ ǹ wɛ̀”. Ɛ́ hɔ́pe Dɔfĩn lɛ ɛ́ mí ɛ́ ɓàanínin kɛ́ mí yí dũ hɔ, ɛ́ iè pe bòo ɛ́ ń ɓɛrɛ ɛ́ bie ɛ̀ lɛ́ miɛ ǹ. 24Hɔ̀pe Dɔfĩn lɛ ɛ́ te lé dímíɲɛ́ àá hɔ́ bòo lɛ wi pelè hũn míkùi ɛ́ mɛ́, ɛ́ temu iè hɔ̀ hóohũn àá lé sṹsùnù Ɲunsɔ. Ɛ́ Hɔ́ yáà zɔ hɔ mihĩ́ yànlén zĩhĩ́ɛ lɛ ɛ́ ɓɛ́ nìnbirìe ɛ́ te tɔn àá ɓɛ́ níhí wɛ̀. 25Ɛ̀ hɔ̀ lò mɛ̀kóo mí nɛ nìnbirìe teń mí bòo ɛ̀ húi, ɛ̀ lɛ́ bòo dɔ̀ mì ǹ wɛ̀; iè hɔ̀ lɛ ɛ́ Hɔ́pe ɛ́ te le mɛkɛ̃nì àá hɔ́ vũ̀arɔ́ àá hɔ́ bòo lɛ kɛ́ míkùi ɛ́ wóò lɛ́ ɓɛ́ nìnbirìe ɓɛ́kùi ǹ. 26Nìnbí-cóoní iè pe ɛ́ Hɔ́ mɛ́, ɛ̀ Hɔ̀ mɔ̀ à ɛ́ dàa mɛ́ ɓɛ́ dàa nìɛ lɛ kɛ́ ɓɛ́kùi ɛ́ bɔ̀sí lé sṹsùnù míkùi lɔ̀n. Hɔ̀ lerɛ peɓɛ̀ wĩhĩ́ ɲunù, ɛ̀ Hɔ̀ vuò lɛ ɛ́ Hɔ́ nɛ ɓɛ kankɛsíkɛ hũn ńtṹhĩ́ ɛ́ Hɔ́ lò lenkɛa ɛ́ lɛ́ ɓà ǹ. 27Dɔfĩn ɛ́ wɔ́ hɔ́pe sí bòo lɛ ɛ́ wé ɛ̀ ɓɛ̀ nìnbirìe ɛ̀ cɛ̀ Hɔ̀, ɛ̀ ɓɛ̀ lànkɛ lànkɛrɔ ɛ̀ dàa cɛ̀ Hɔ̀, ɛ́ wɔ́ khɔn ɛ́ ɓɛ́ den ɛ́ mi Hɔ. Kɔ́ hɔ́pe Dɔfĩn ɛ́ lò den viì ɛ́ yí ni àá képe àá ké nì-cóohɛ̃ cóohɛ̃ wɛ̀. 28Iè hɔ̀ lɛ ɛ́ hɔ́ iè hɔ̀pe Dɔfĩn temu lɛ́ ɛ́ ké dàa wi, ɛ̀ kè dàa le mɛkɛ̃nì, ɛ̀ kè dɛ̀ wóò vɛ ɛ̀ khíi. Ɛ́ sí iè hɔ̀pe ɛ́ ɓɛ́pe mì vɛ̃nwĩ́riè dɔ̀ ɛ́ dàa bie ɛ́ nɛ làa: “Kèpe lò ɓiɛ̀ iè pehɔ̀ nìɛ.” 29Ɛ́ hɔ́ lɛ ɛ́ ké iè Dɔfĩn nìɛ, ɛ́ ké yí fɔ́ɓán ɛ̀ kè wóo lieníkɛ ɛ̀ kè bie nɛ Dɔfĩn ɛ́ lɔ́ɓán àá wɔ̃̀hṹ wɛ̀; lèpe lɛ á nìnbírɔ ɛ́ mɔ̀ hɔ̀ sɛ̃́ní tàá hɔ̀ màa tàá lè sɛ̃̀nlè à nùnɛ mí tĩì hũn à khie mɛ́ lé àá mí níhĩ́. 30Ɛ́ Dɔfĩn ɛ́ yá lè pɛ̃̀hṹ lɛ ɛ́ ɓɛ́ nìnbirìe dàa hṹn yí dũ bòo dɔ̀ ɛ̀ líi wɛ̀. Kɛ́ kɛ̀a sáalɛ ɛ́ Hɔ́ wo ɛ́ ɓɛ̀ nìnbirìe ɓɛ́kùi ɛ̀ ve hɔ vuò míkùi hũn nɛ ɓɛ sãawi ɛ̀ ɓɛ̀ zɛ̀ní ɓɛ́ tĩɛ̀ ɛ̀ ɓɛ̀ fùansí hɔ́ bɔ̀koohɛ̃ wénlɔ́ ǹ. 31Ɛ́ hɔ́pe Dɔfĩn ɛ́ den lerɛ lè sí dɔ̀ lɛ ɛ́ Hɔ́ ɓén dàá lè lè dímíɲɛ́ nìnbirìe ɓɛ́kùi lìe àá cã̀anírɔ́. Ɛ́ Hɔ́ dɔ́ hɔ́ lìe lènlɔ́ sɔ piè nìnbírɔ lɛ ɛ́ á munɛ núnú hũn. Ɛ́ Dɔfĩn ɛ́ vìeniɛ ɔ̀pe nìnbírɔ lɛ ɛ́ Hɔ́ munɛ ɛ́ líeniɛ hɔ̀ húmu hũn ɛ́ dàa zɛ̃́niɛ ɛ́ lɛ́ ɓɛ́ nìnbirìe ɓɛ́kùi ǹ kɛ́ Hɔ́ ɓén wé hɔ́.»

32Ɛ́ hɔ́ lɛ ɛ́ ɓɛ́ ɲɛ́ kɛ́ Pooli ɛ́ nìhiè vìerɔ́ bòo ɛ̀ bie, ɛ́ ɓɛ́dɔ̀ ɛ́ ɔ̀ dĩ, ɛ̀ ɓɛ̀ dɔ̀ ɛ́ bie ɛ́ nɛ làa: «Ké ɓén bĩní ɛ́ ɲí hɔ́pe bòo lɛ ɛ́ kɔ́ ɛ́ bie àá sí ɓuɛ̀ dɔ̀.» 33Ɛ́ Pooli ɛ́ zɔn lɔ́ peɓɛ̀ tĩ́ihṹ ɛ́ lɔ́ cɔ́. 34Kɛ́ nìɛ ɓɛ̀ yìɛní dɔ̀ ɛ́ pe dũmuasɛ̃̀ Dɔfĩn ɛ́ ɓɛ́ khie bɔ̀ piè máahṹ. Peɓɛ̀ tĩ́ihṹ ádɔ̀ ɛ́ hàarí iè Deniise lɛ iè hɔ̀pe lóo lìe lèrɔ dɔ̀, àdɔ̀ ɛ́ iè hṹnu dɔ̀ lɛ yèrè ɛ́ ɓɛ́ nɛ Damariise, àá ɓɛ́ dɔ̀ bĩniɛ.

Currently Selected:

Bɔ̀werà 17: bwj

Highlight

Compare

Copy