Bɔ̀werà 16

Timote ɛ́ Pooli àá Silaasi ɛ̀ níiní

1Ɛ́ Pooli ɛ́ van dɛ̃un Dɛrɛbu, à khie van hɔ̀ Lisitere. Á van yú ńdɛsĩ̀rɔ dɔ̀ lɛ yèrè ɛ́ ɓɛ́ nɛ Timote yán, lɛ ɓà nín ɛ́ iè Zuifuɓɛ hãa-cíi lɛ ɛ́ dũmuasɛ̃̀ Yiezu ǹ, kɛ́ ɓà yàá ɛ́ pe iè Kɛrɛkiɓɛ nùún. 2Ɛ́ ɓɛ́ ńdɛsĩ̀riè lɛ hàarí wi hɔ Lisitere àá hɔ́ Yikoniɔmu hũn ɛ́ hàarí ɛ́ ɔ̀ Timote bɔ̀tente bòo ɛ̀ bie. 3Ɛ́ Pooli ɛ́ hàarí wɛ mii fí-e ɛ̀ dàá bè mí wṹn. Á lɛ́ ɛ́ ɓɛ́ fɛ̃̀-à ɓɛ̀ Zuifuɓɛ lɛ hàarí wi hɔ vuò sɔ hũn bòo hũn iè hɔ̀ lɛ ɛ́ ɓɛ́pe ɓɛ́kùi ɛ́ hàarí dũ hɔ lɛ kɛ́ ápe Timote ɓà yàá ɛ́ iè Kɛrɛkiɓɛ nùún. 4Ɛ́ ɓɛ́ hṹn khie bɔ̀ hɔ̀ lóoniɛ ǹ, ɛ́ bie àá ɓɛ́ ńdɛsĩ̀riè nɛ bòo lɛ ɛ́ ɓɛ́ tɔnkɛriè àá ɓɛ́ nìkĩ́ɛ ɛ́ ɲɛ́ ɓánlɔ̀n hɔ̀ Zerizalɛɛmu hũn ɛ́ ɓɛ́ tɛ̀ bòo. 5Ɛ́ ɓɛ́ ńdɛsĩ̀riè wo ɛ́ hàarí ɛ́ hɔ̀ pànkɛ́ ɛ̀ yí hɔ́ ńdɛsĩ̀nlɔ́ hũn, ɛ̀ ɓɛ̀ lò hàarí buòní àá sítĩnlɔ́.

Hɔ̀ yìnmirà bòo lɛ ɛ́ Pooli ɛ́ mɔn Toroasi lóo hũn

6Ɛ́ lé Mɛkɛ̃n-Sãanu ɛ́ sun Pooliɓɛ̀ nɛ ɓɛ bí vɛ buie le Bentĩnu hɔ̀ Azii pɛ̃̀hɛ̃ hũn wɛ̀. Ɛ́ ɓɛ́ wo khie zɔn cankɛa hɔ̀ Firizi àá hɔ́ Kalaasi pɛ̃̀hɛ̃ ɛ́ lɔ́ cɔ́. 7Ɛ́ bòo lɛ ɛ́ ɓɛ́ van dɛ̃un Misii sɛnù, ɛ́ ɓɛ́ hṹn wɛ ɛ́ ɓɛ khíi vɛ Bitini, kɛ́ Yiezu Mɛkɛ̃ni ɛ́ den yí lɛ́ wṹn ɓà ǹ wɛ̀#16.7 Yiezu Mɛkɛ̃ni àá Mɛkɛ̃n-Sãanu ɛ́ iè dìcóoní.. 8Ɛ́ ɓɛ́ wo zɔn cánkɛa hɔ̀pe Misii ɛ́ siɛ van àá Toroasi. 9Ɛ́ hɔ́ sṹnúhṹn, ɛ́ Pooli ɛ́ mɔn yìnmirà bòo dɔ̀: à mɔn Maseduanɛ nùún dɔ̀ kɛ́ á dɛ̃̀ ɛ́ ɔ̀ hɛ̃nnin pɛ̀ pɛ̀ ɛ́ nɛ a ɓen hɔ̀pe Maseduanɛ cɛ̃̀mɛ̀nɛ́ hũn ɛ̀ ɓen yíiní ɓɛ́. 10Ɛ́ hɔ́ lɛ ɛ́ Pooli ɛ́ mɔn hɔ̀pe yìnmirà bòo sɔ sí vɔ, ɛ́ fùa fùa ɛ̀ kè khie ɛ́ cɛ̀ nɛ ke vɛ hɔpe Maseduanɛ iè hɔ̀ lɛ ɛ́ ké hṹn dũmuasɛ̃̀ kɛ́ Dɔfĩn ɛ́ vɔn kie nɛ ke vɛ buie le Bentĩnu yán.

Lidi ɛ́ dũmuasɛ̃̀ Ɲunsɔ ǹ hɔ̀ Filiipu lóo hũn

11Ɛ́ ké khie zɔn lè ɲumu wiè dɛ̀bɛhɔ́ Toroasi lóo hũn ɛ́ dàa khie cã̀aniɛ cɔ́ van Samotarasi. Ɛ́ pehɔ̀ sí lɛ ɛ́ tĩ, ɛ́ ké khie van Neapoliise. 12Ɛ́ ké lɔ́ yán, ɛ̀ kè khie cɔ́ van Filiipu lɛ iè lɔ́-bɛhɔ́ hɔ̀ Maseduanɛ cɛ̃̀mɛ̀nɛ́ hũn, ɛ̀ ɓɛ̀ Rɔmu siè ɛ́ temu hàarí wi lepe Filiipu lóo ɲún hũn. Ɛ́ ké van wɔ́ wihĩ́ cɛ̀rìɛɛ lèpe Filiipu lóo hũn. 13Ɛ́ ɓɛ́ Zuifuɓɛ ńvũùnín sí zɔn, ɛ́ ké zɔn lɔ́ lé lóo hũn ɛ́ lɔ́ van lè vṹn dɔ̀ ɲunù ɛ́ nɛ ké bìe ɛ́ vɛ yí ɓɛ́ Zuifuɓɛ Dɔfĩn hɛ̃nlén viì dɔ̀ yán. Ɛ́ ké van lɔ́ kɛsí ɛ̀ kè khɛ́ àá ɓɛ́ hã́a dɔ̀ lɛ ɛ́ hṹn van lɔ́ koo ɓánlɔ̀n yán. 14Ɓɛ̀ hã́a sɔ tĩ́ihṹ ádɔ̀ ɛ́ hàarí yèrè ɛ́ ɓɛ́ nɛ Lidi. À hàarí ɛ́ lé Tiyatiire lóo, à hàarí iè danlɔ lɛ wóò yìɛní tṹntṹa bɔ̀miɛ̀ lɛ yàamu hie cɛ̃̀un, à hàarí ɛ́ Dɔfĩn ɛ̀ ɓàanínin. Á tɛ́ mí ɲɛkɛ̃̀a, ɛ́ Dɔfĩn ɛ́ hɛ́rɛ piè tĩì nɛ a ɲí Pooli bòo lɛ á ɛ́ bie sãàní. 15Á dũmuasɛ̃̀, ɛ́ ɓɛ́ kie ńlíiní ɔ̀ hɔ̀ ɲumu hũn àpe àá mí zũnù nìɛ. Á khie hɛ̃nnɛ kiè ǹ ɛ́ nɛ làa: «Mí ɓen nɛ ń dũmuasɛ̃̀ Ɲunsɔ ǹ àá bɔ̀bín, ɛ̀ mì ɓen niǹ yíe ɛ̀ ɓen làá yán.» Á hɛ̀ bie fúu ɛ́ ké wɔ́ tan ɛ́ ké tɛ̀.

Pooli àá Silaasi kɛ̀sí zɔnlɔ́ hɔ̀ Filiipu lóo hṹn

16Ɛ́ wurù dɔ̀ zɔǹ lɛ ɛ́ ké vaá-vɛ Dɔfĩn hɛ̃nlén, ɛ́ wɔn-hãa dɔ̀ ɛ́ ɓɛrɛ sɛ̃́ ké híɛhɔ́. Ńɲíkĩ́rɔ dɔ̀ ɛ́ hàaarí wi-è ǹ lɛ wóò lɛ́ á yìe ɛ̀ mi bòo. Ɛ́ piè bòo tĩirɔ́ ɛ́ hàarí wóò lɛ́ ɛ̀ piè ɲúuhɛ̃ siè ɛ̀ yí hɔ́ màa cɛ̃̀un. 17Á khie ɛ́ bɔ̀ kè máahṹ kèpe àá Pooli kɛ́ á ɛ́ bénkɛ ɛ́ nɛ làa: «Ɓɛ̀pe nìɛ sɔ lɛ ɛ́ iè Dɔfĩn lɛ wi hɔ bòo míkùi ɲún hũn tɔntɛ́riè. Ɛ́ lé iè fuenírɔ́ wṹn ɛ́ ɓɛ́ ɛ́ bòo ɛ̀ bie àá miɛ.» 18Á wɔ́ hɔ́pe sí fúu wihĩ́ bɔ̀kùi hũn. Ɛ́ Pooli ɛ́ hɛ̀ wɔ́ tan á tĩì síɛ hĩ́nà á khie bie lɛ́ á ńɲíkĩ́rɔ sɔ ǹ ɛ́ nɛ: «Yiezu Kirisa yèrè lɔ̀n ɛ́ ń nɛ kɔ lí-e pe hãa-cíi sɔ lɛ hũn.» Á ńɲíkĩ́rɔ ɛ́ zɔn lɔ́ mí laà hũn. 19Ápe wɔn-hãa sɔ ɲúuhɛ̃ siè ɛ́ wo loo kɛ́ ɓɛ́ màa yínlɔ́ ɛ́ wo ɲún ɓɔ́, ɛ́ ɓɛ́ khie ɓaakɛa Pooli àá Silaasi ɛ́ dàa van lè yàa kúie hũn ɓɛ̀ lìe lèriè viì. 20Ɛ́ ɓɛ́ van dɔ́ ɓɛ́ ɓɛ̀ Rɔmu siè lìe lèriè núnú hũn ɛ̀ ɓɛ̀ bie lɛ́ ɓà ǹ ɛ́ nɛ làa: «Ɓɛ̀pe nìɛ sɔ lɛ ɛ́ kìe lóo ɛ̀ kánkɛ. Ɓɛ̀ iè Zuifuɓɛ. 21Ɛ́ ɓɛ́ ɛ́ ɓɛ̀ nìnbirìe ɛ̀ kɛ̀rán àá làndɛ́a dɔ̀, kɛ́ képe lɛ ɛ́ bòo sɛ̃̀ ɓɛ̀ Rɔmu siè ǹ ɛ́ ɲunù ɛ́ yí lɛ́ nin nɛ ke tɛ̀ hɔ̀pe làndɛ́a sɔ bòo tàá ɛ̀ ké wé pehɔ̀ bòo lɛ ɛ́ hɔ́ bie wɛ̀.»

22Ɛ́ ɓɛ́ nìzã̀amáa ɛ́ lò ɓiɛ̀ hĩ́nà ɛ́ pɛ̃́ dɛ̃̀ Pooli àá Silaasi ɲún hũn. Ɛ́ ɓɛ́ Rɔmu siè lìe lèriè ɛ́ lɛ́ ɛ́ ɓɛ́ khɛ̃̀akɛa peɓɛ̀ tĩ̀ɛ ɛ́ lɔ́ peɓɛ̀ lɔ̀n, ɛ̀ ɓɛ̀ han ɓɛ̀ àá hɔ́ ńhùehĩ́. 23Ɛ́ bòo lɛ ɛ́ ɓɛ́ fùukɛa hɔ̀ ńhùehĩ́ peɓɛ̀ lɔ̀n vɔ́, ɛ̀ ɓɛ̀ van koo ɓɛ̀ lè kɛ̀sí hũn ɛ̀ ɓɛ̀ bie lɛ́ á kɛ̀sí zũ-hìerɔ ǹ nɛ a húi ɓɛ́ sãaní. 24Á kɛ̀sí zũ-hìerɔ ɛ́ ɲɛ́ hɔ́ á van zɔn koo ɓɛ̀ lè kɛ̀sí zũ-bɔ́nú dɔ̀ hũn à can peɓɛ̀ zehĩ́ ɛ́ dĩniɛ hɔ̀ dãa-kúo dɔ̀ ǹ. 25Ɛ́ hɔ́ sínɛ̀hɛ̃ǹ, ɛ́ Pooli àá Silaasi ɛ́ Dɔfĩn ɛ̀ hɛ̃nnin kɛ́ ɓɛ́ ɛ́ hɔ̀ yánbéhĩ́ ɛ̀ bé ɛ́ Dɔfĩn ɛ̀ ɓàanínin. Ɛ́ ɓɛ́ kɛ̀sí zũnù nìɛ lɛ ɛ́ kɛ́ ɛ́ tɛ́ ɓɛ́ ɲɛkɛ̃̀a ɛ́ hɔ̀ ɲí. 26Ɛ́ lé sṹsùnù ɛ́ pan pan ɛ̀ lè siɛ zɛ̀ cɛ̃̀un, ɛ́ lépe kɛ̀sí zũnù fìi ɲìnlénɓɛ̀ míkùi ɛ́ hɛ̀ zɛ̀. Ɛ́ mí laà hũn, ɛ́ lé kɛ̀sí zĩínu ɲihĩ́ɛ míkùi ɛ́ hánkɛa, ɛ̀ hɔ̀ zɔ̀kɔ̀zɔ́kɔ́ɓɛ̀ lɛ ɛ́ ɓɛ́ hṹn dàa can ɓɛ̀ kɛ̀sí nìɛ ɓɛ́kùi ɛ́ fuenkɛa. 27Á kɛ̀sí zũ-hìerɔ ɛ́ yìe siɛ fɛ́, ɛ́ bòo lɛ á loo kɛ́ lé kɛ̀sí zĩínù ɲihĩ́ɛ ɛ́ hánkɛa, á zɔn vua mí khɛ̃́n-tɔ́nú ɛ́ hṹn mii yòó ɓé míte iè hɔ̀ lɛ á hṹn líi à nɛ ɓɛpe kɛ̀sí nìɛ ɛ́ lɔ́ zɔ̀kɛ vṹnun. 28Kɛ́ Pooli ɛ́ den zɔn bérɛ à ǹ cɛ̃̀un ɛ́ nɛ làa: «Bí wé kɔ́te àá bɔ̀koohɔ́ wɛ̀. Kèpe kè kùi ɛ́ wi yán.» 29Á kɛ̀sí zũ-hìerɔ ɛ́ khie nɛ ɓɛ dàá dṹn dàá ɓen, à khie khɔ́ zɔn lè kɛ̀sí zũ-bɔ́nú hũn kɛ́ á ɛ́ zɛ́rɛ ɛ́ zɛ̀ wɛ̀wɛ̀, ɛ́ van zɔn kùerɛ siɛ Pooli àá Silaasi híɛhɔ́. 30Á khie dàa ɓɛ̀ ɛ́ dàa van lɔ́ hɔ́ yíe à ɛ́ ɓɛ̀ dìenin nɛ làa: «Niǹ ɲúuhɛ̃ siè, hɔ̀ iè ńɓùo ɛ́ ń fɔ́ɓán ɛ̀ ǹ wé ɛ̀ dàá fuen?» 31Ɛ́ ɓɛ́ zɔn kɔ̃́niɛ ɔ̀ ɛ́ nɛ làa: «Dɛsĩ̀ Ɲunsɔ Yiezu ǹ ɛ́ kɔ́ ɛ́ fuen, kɔ̀pe àá kɔ́ zũnù nìɛ ɓɛ́kùi.» 32Ɛ́ ɓɛ́ bie Ɲunsɔ bienù ɛ́ lɛ́ à ǹ, àpe àá ɓɛ́ nìɛ lɛ wi piè yíe ɓɛ́kùi. 33Ápe kɛ̀sí zũ-hìerɔ ɛ́ khie fɔ́ ɓɛ́ hɔ̀pe sṹnúhṹn sɔ ɛ́ dàa cɔ́ ɛ́ van tiɛ peɓɛ̀ tɛkɛ̀a lɛ ɓóoníkɛanin. Ɛ́ mí laà hũn ɛ́ ɓɛ́ khie líiniɛ ɔ̀ hɔ̀ ɲumu hũn àpe àá mí zũnù nìɛ. 34Á khie fɔ́ Pooli àá Silaasi ɛ́ dàa van mí yíe ɛ́ van lɛ́ hɔ́ bɔ̀díe ɓà ǹ, à hɛ̀ wɛniɛ míte àpe àá mí zũnù nìɛ iè hɔ̀ lɛ ɛ́ ɓɛ́ dũmuasɛ̃̀ Dɔfĩn.

35Ɛ́ bòo lɛ ɛ́ hɔ́ sí van tɛ̃un, ɛ́ ɓɛ́ lìe lèriè ɛ́ tɔrɛ ɓɛ́ tɔntɛ́riè dɔ̀ nɛ ɓɛ vɛ bie lɛ́ á kɛ̀sí zũ-hìerɔ ǹ nɛ a hán ɓɛ́ nìɛ sɔ ɲunù ɛ̀ fùansínin nɛ ɓɛ lan. 36Á kɛ̀sí zũ-hìerɔ ɛ́ ɓɛrɛ bie hɔ̀ ɛ́ lɛ́ Pooli ǹ ɛ́ nɛ làa: «Ɓɛ̀ lìe lèriè ɛ́ lɛ́ lé ɲunù nɛ n fùansí miɛ̀ ǹ. Ɛ́ mí wo dɛ̀ ɛ́ lé lan àá hũn-wiɛ̀.» 37Kɛ́ Pooli ɛ́ den zɔn bie lɛ́ ɓɛ́ tɔntɛ́riè sɔ ǹ ɛ́ nɛ làa: «Ɓɛ̀ ɛ́ lɛ́ ɛ́ ɓɛ́ nàa kie ɓɛ̀ nìnbí-zã̀amá híɛhɔ́ kɛ́ ké lìe lò yí lè wɛ̀, kèpe lɛ lò iè ɓɛ̀ Rɔmu siè, ɛ̀ ɓɛ̀ khie koo kie lè kɛ̀sí hũn. Ɛ́ kɛ̀a sáalɛ ɛ́ ɓɛ́ den wɛ ɛ́ ɓɛ tànkɔ̀ní lén kie ɛ̀ fùansínin? Hɔ̀ yí dɛ̀ yá wé wɛ̀! Nɛ ɓɛpe ɓɛ́te ǹ ɛ̀ ɓen leń kie ɛ̀ fùansínin.» 38Ɛ́ ɓɛ́ tɔntɛ́riè ɛ́ van bie hɔ̀ biehĩ́ sɔ ɛ́ lɛ́ ɓɛ́ lìe lèrie ǹ. Ɛ́ ɓɛ́ yòó zɛ́rɛ iè hɔ̀ lɛ ɛ́ ɓɛ́ ɲɛ́ kɛ́ ɛ́ Pooli àá Silaasi iè Rɔmu siè dɔ̀. 39Ɛ́ ɓɛ́ hĩ́nà ɓɛrɛ nɛ ɓɛ wé ɓɛ́ sɛ́wɛ́rí, ɛ̀ ɓɛ̀ lerɛ ɓɛ̀ ɛ́ líeniɛ lè kɛ̀sí hũn ɛ̀ ɓɛ̀ ɓɔ́nɓɔ́niɛ ɓà ǹ nɛ ɓɛ lé lé lóo hũn ɛ̀ lé lan. 40Ɛ́ bòo lɛ ɛ́ Pooli àá Silaasi lɔ́ lé kɛ̀sí hũn, ɛ́ ɓɛ́ khie van Lidi yíe, ɛ́ van mɔn ɓɛ̀ ńdɛsĩ̀riè ɛ̀ ɓɛ̀ hĩ̀iníkɛa peɓɛ̀ tĩɛ̀ ɛ̀ ɓɛ̀ lɔ́ cɔ́.

Currently Selected:

Bɔ̀werà 16: bwj

Highlight

Compare

Copy