2 Timote 1

Tìɛníkɛrɔ́

1Hɔ̀ iè ǹpe Pooli lɛ ɛ́ Dɔfĩn àá mí tĩì bòo ɛ́ wɔ́ àá Yiezu Kirisa tɔnkɛrɔ nɛ n bie le mɛkɛ̃nì bòo, lèpe mɛkɛ̃nì lɛ ɛ́ hɔ́pe Dɔfĩn ɛ́ lɛ́ mí ɲunù nɛ mí ɓén lɛ́ kie ǹ kè ńcɛɓánlɔ́ àá Yiezu Kirisa bòo hũn. 2Ɛ́ ń te lepe vɛ̃hṹ lɛ ɛ́ wĩ́ ɛ́ nín lɛ́ kɔ́pe Timote lɛ iè niǹ yɛ̀nù lɛ ń hɛ̀ wɛ cɛ̃̀un. Nɛ kìe Yàá Dɔfĩn àá ké Ɲunsɔ Yiezu Kirisa ɛ̀ wé hiì àá kɔ, ɛ̀ ɓɛ̀ mi kɔ miinɛ̀, ɛ̀ ɓɛ̀ lò lɛ́ hũn-wiɛ̀ kɔ ǹ.

Hɔ̀ bérɛ́ lɛ Pooli ɛ́ lɛ́ à Timote ǹ

3Nín Dɔfĩn bɛrikɛ ɛ̀ dé, Hɔ̀pe lɛ ɛ́ nín tɔnlɔ́ ɛ̀ tɛ́ àá hũn nùnlé lɛ ɛ́ ce, kɛ̀a bòo lɛ ɛ́ kìe zĩkĩ́nɓɛ̀ ɛ́ dàa ɛ́ sɛ̃̀nɛ́hã̀ ɛ́ wɔ́ hɔ́. Ń wóò liení kɔ bòo fúu niǹ Dɔfĩn hɛ̃nnɛ hũn sṹnúhṹn àá wiɛhɔ́. 4Ń ɓen siɛ lieniɛ bòo lɛ ɛ́ kɔ́ yìncuò ɛ́ dàa hàarí lɔ́ pɛ̃̀hṹ lɛ ɛ́ ké dàa hàarí fɔ́ɓán ɛ̀ kè lé ɓánlɔ̀n, ɛ̀ ǹ hɛ̀ hṹn wɛ ɛ̀ ǹ bĩní mi kɔ, ɛ̀ dàá wɛní niǹte cɛ̃̀un. 5Hɔ̀ ńdɛsĩ̀nlɔ́ lɛ ɛ́ kɔ́ dàa àá kɔ́ hũn lɛ ɛ́ hɛrɛ ɛ́ ń wóò siɛ liení bòo; hɔ̀pe ńdɛsĩ̀nlɔ́ lɛ ɛ́ mì ńkĩ́n Loyiize àá mì nín Eniise ɛ́ hàarí sɛ̃̀nɛ́hã̀ ɛ́ dàa. Ɛ́ ń hɛ̀ dũ kɛ́ hɔ́pe ńdɛsĩ̀nlɔ́ sɔ ɛ́ wi kɔ ǹ. 6Ɛ́ sí iè hɔ̀pe ɛ́ ń dàa ɛ́ kɔ̀ liení nɛ hɔ hɛ̃mù bòo lɛ ɛ́ kɔ́ hàarí yú Dɔfĩn viì lè yìi lɛ ɛ́ ǹ dàa bɔ̀ niǹ níhĩ́ kɔ̀ lɔ̀n ɛ̀ ǹ hɛ̃nnɛ hɔ̀pe Dɔfĩn ɛ́ lɛ́ kɔ ǹ, ɛ́ kɔ́ ɓɛ́ɓɛnin ɛ̀ dàá wookɛ tɛ́ hɔ̀pe Dɔfĩn tɔnlɔ́. 7Iè hɔ̀ lɛ ɛ́ Mɛkɛ̃n-Sãanu lɛ ɛ́ Dɔfĩn lɛ́ kie ǹ ɛ́ yí dìɛ lɛ ɛ́ wóò lɛ́ ɛ̀ kè bɛ̃un bɛ̃unlɔ́ wɛ̀. Kɛ́ lépe Mɛkɛ̃ni sɔ ɛ́ te hɔ pànkɛ́ àá lé wanminu àá hɔ́ te ɓaàrɔ́ ɛ́ wóo lɛ́ kie ǹ.

8Ɛ́ kɔ́ bí wóo lɛ́ ɛ̀ kè Ɲunsɔ bòo bierɔ́ lùwiè ɛ̀ ɓaà kɔ wɛ̀; ɛ̀ kɔ̀ lò bí wóo lùwi niǹ bòo hũn, ǹpe lɛ iè ɔ̀ kɛ̀sí nùún kè Ɲunsɔ bòo hũn. Kɛ́ kɔ́ den tɛ̀ ɛ̀ kɔ̀ lɔ̀n ɛ̀ páaní be àá mi lè Bentĩnu bòo hũn kɛ́ kɔ́ bɔ̀ kɔ̀ tĩì hɔ̀ pànkɛ́ lɛ ɛ́ Dɔfĩn ɛ́ wóò lɛ́ lɔ̀n. 9Hɔ̀pe Dɔfĩn ɛ́ te kie ɛ́ fuieniɛnin ɛ̀ hɔ̀ vɔn kie nɛ ke bòo ɛ̀ sĩ̀ mí ǹ. Hɔ̀ yí ké bɔ̀werà lɛ sãa bòo hũn ɛ́ Hɔ́ dàa wɔ́ hɔ́, kɛ́ hɔ́ iè bòo lɛ ɛ́ Hɔ́ temu wɛ ɛ́ mii wé. Ɛ́ lé iè hiì ɛ́ Hɔ́ wɔ́ àá kie pɛ̃̀hṹ lɛ kɛ́ lé dímíɲɛ́ ɛ́ dàa ɲɛùn mí, kè ńcɛɓánlɔ́ àá ɔ́pe Yiezu Kirisa bòo hũn. 10Ɛ́ lépe hiì sɔ ɛ́ ɓɛ́ nìnbirìe ɛ́ wo mɔn pɛ̃̀hṹ lɛ ɛ́ ké fuenírɔ Yiezu Kirisa ɛ́ dàa ɓɛrɛ lè sṹsùnù. Àpe ɛ́ te hɔ húmú pànkɛ́ ɛ́ ɓɛrɛ víeniɛ, à ɛ́ lɛ́ ɛ́ ké yú lé mɛkɛ̃nì lɛ ɛ́ yá vé lè Bentĩnu ɛ́ ké tɛ̀ bòo bòo hũn. 11Ɛ́ lé iè lèpe Bentĩnu sɔ buierɔ́ bòo hũn ɛ́ Dɔfĩn ɛ́ dàa wɔ́ mi àá mí ben-bierɔ, àá mí tɔnkɛrɔ àá ɓɛ́ nìnbirìe kɛ̀ránlɔ. 12Ɛ́ sí iè pehɔ̀ bòo hũn ɛ́ ń dàa wi lepe lɔ̀nbiè lɛ hũn. Kɛ́ ń den yá lùwi iè hɔ̀ lɛ ɛ́ ń dũ a lɛ ɛ́ ń dũmuasɛ̃̀ nin, ɛ̀ ǹ lò dũ sãa sãa kɛ́ á dàa hɔ pànkɛ́ lɛ ɛ́ ɓɛ́ɓɛ́ hɔ́ bòo lɛ á dɔ́ niǹ núnú hũn fúu ɛ́ vɛ dɛ̃ hɔ lìe lènlɔ́.

13Ɛ́ hɔ́ bɔ̀berà biehĩ́ lɛ ɛ́ kɔ́ ɛ́ ɲɛ́ niǹ viì iè pe ɛ́ kɔ́ wóo húi ɛ̀ dàá vɛ. Ɛ̀ kɔ̀ cɛ dìń sãaní hɔ́ ńdɛsĩ̀nlɔ́ hũn àá lé wanminu hũn kè ńcɛɓánlɔ́ àá ɔ́ Yiezu Kirisa bòo hũn. 14Ɛ́ kɔ́ ɓɛ́ɓɛ́ hɔ́ bɔ̀sãanù lɛ ɛ́ Dɔfĩn ɛ́ dɔ́ kɔ́ núnú hũn, ɓɛ́ɓɛ́ hɔ̀ ǹ àá lé Mɛkɛ̃n-Sãanu pànkɛ́ lɛ ɛ́ wi kiè ǹ.

15Kɔ́ lò wo dũ kɛ́ ɓɛ́ ńdɛsĩ̀riè lɛ ɛ́ wi hɔ Azii#1.15 Hɔ̀ Azii lɛ ɛ́ ɓɛ́ ɛ́ bòo ɛ̀ bie hũ̀nún ɛ́ yí hɔ́ zòoní Azii ɛ́ ɓɛ́ nɛ̀ wɛ̀. Kɛ́ hɔ́ den iè hɔ̀ Azii dɛ̀zuú lɛ iè hɔ̀ zooni Turikii viì lɛ ɛ́ hɔ́ wi hũn. pɛ̃̀hɛ̃ hũn ɓɛ́kùi ɛ́ fùɛrɛ̀sí mi ǹ. À Fizɛɛle àá Hɛrɛmozɛɛnɛ ɛ́ lò ɓiɛ̀ ɛ́ wi ɓɛpe lɛ ɛ́ fùɛrɛ̀sí mi ǹ hũn. 16Nɛ Dɔfĩn ɛ̀ wé mí hiì àá ɔ́ Onezifɔɔre zũnù nìɛ iè hɔ̀ lɛ á wóò wé à hĩ̀iníkɛ niǹ tĩì. Ɛ̀ hɔ̀ lɛ ɛ́ ń wi hɔ kɛsí hũn ɛ́ lò lùwiè ɛ́ yí ɓaà ɔ̀ wɛ̀. 17Kɛ́ hɔ́ lɛ á ɓɛrɛ hɔ̀ Rɔmu lóo hũn á can mí kuò ɛ́ cɛ̀ mi fúu ɛ́ ɓɛrɛ ɛ́ mɔn. 18Nɛ Ɲunsɔ Dɔfĩn ɛ̀ wé mí hiì àá ɔ́pe Onezifɔɔre hɔ̀ lìe lènlɔ́ zɔn. Kɔ́ lò wo dũ hɔ̀ bɔ̀tente lɛ á hàarí wɔ́ àá mi hɔ̀ Efɛɛzi lóo hũn cɛ̃̀un.

Currently Selected:

2 Timote 1: bwj

Highlight

Copy

Compare