2 Tesaloniike Siè 3
3
Pooli nɛ Tesaloniike siè wóo hɛ̃un Dɔfĩn ɛ̀ lɛ́ ɓá ǹ
1Ɛ̀ dàá víeníkɛ mìpe kìe zɛ̀ɓɛ̀, mì wóo hɛ̃un Dɔfĩn ɛ̀ lɛ́ kiè ǹ bòo lɛ ɛ́ wé à Ɲunsɔ bienù ɛ̀ dàá saà vɛ viì míkùi fùa fùa, ɛ̀ ɓɛ̀ nìnbirìe ɛ̀ wóo mɛ̀ndɛ̃ le kɛ̀a bòo lɛ ɛ́ lé dàa ɛ́ wóò yí hɔ́ mɛ̀ndɛ̃rɔ́ mìpe mì viì. 2Ɛ̀ mì lò ɛ̀ wóo hɛ̃un Dɔfĩn ɛ̀ lɛ́ kie ǹ nɛ Hɔ ɛ̀ pɛ ke bòo àá ɓɛ́ nìsũmúa àá ɓɛ́ mɛkɛ̃nɲiì ɓàasiè iè hɔ̀ lɛ ɛ́ ɓɛ́ yí ɓɛ́ nìnbirìe ɓɛ́kùi ɛ́ temu tɛ̀ dũmuasɛ̃̀ lè Dɔfĩn bienù ǹ wɛ̀. 3Kɛ́ Ɲunsɔ ɛ́ yá fùansí nìnbírɔ lɛ ɛ́ dɔ̀ míte piè núnú hũn wɛ̀; á wo ɓén dé cũ̀kṹ miɛ ǹ, à ɛ́ pɛ mi bòo àá ɔ́ Sĩtuanɛ. 4Ké dũmuasɛ̃̀ Ɲunsɔ ǹ mìpe mì bòo hũn nɛ hɔ bòo lɛ ɛ́ ké ɛ́ bie lɛ́ miɛ ǹ nɛ mí ɛ́ wé ɛ́ mí ɛ́ wé, ɛ̀ mì lò ɓén vɛ àá híɛhɔ́ ɛ́ wé hɔ́. 5Nɛ Ɲunsɔ Dɔfĩn ɛ̀ dí mí tĩɛ̀ híɛhɔ́, bòo lɛ ɛ́ wé ɛ̀ mì dàá wɛní hɔ́pe Dɔfĩn ɛ́ mì lò dàá lé hũn hĩ̀nlɔ́ kɛ̀a ɔpe Kirisa.
Àlɛ yí wɛ à tɛ́ tɔnlɔ́ ɛ́ ɓiɛ̀ yí sãawi à dí wɛ̀
6Kìe zɛ̀ɓɛ̀, ké mì hɛ̃nnin kè Ɲunsɔ Yiezu Kirisa yèrè lɔ̀n nɛ mi wóo lɛ́ nɛ mi viì ɛ̀ niìní àá ɓɛ́pe ńdɛsĩriè lɛ ɛ́ hɔ̀ paahĩ́ ɛ̀ dí, ɓɛ̀pe lɛ ɛ́ yá hɔ̀ bòo lɛ ɛ́ ké kɛ̀rɛa àá miɛ ɛ̀ vɛ bènin. 7Mìpe mìte ǹ ɛ́ lò wo dũ hɔ bòo lɛ ɛ́ mí sãawi ɛ̀ mì wé ɛ̀ dàá ken kè bɔ̀werà ǹ; iè hɔ̀ lɛ ɛ́ pɛ̃̀hṹ lɛ ɛ́ ké dàa hàarí ɓɛrɛ wi ɓánlɔ̀n àá miɛ ɛ́ ké yí wé paariè wɛ̀. 8Ké hàarí ɛ́ yí dí nìnbírɔ dɔ̀ bɔ̀díe kã́amáa wɛ̀; kɛ́ ké den hàarí tɛ̀ ɛ́ ɲinɛ kè sɛ̃́hṹ ɛ́ tɛ́ hɔ́ tɔnlɔ́ sṹnúhṹn àá wiɛhɔ́ bòo lɛ ɛ́ wé ɛ̀ kè dàá bí wé ɲún hũn tìerɔ́ hɛ̀rí nìnbí-cóoní dɔ̀ lɔ̀n mì tĩ́ihṹ wɛ̀. 9Ɛ́ hɔ́ lò yí bòo ɛ́ ké hàarí ɛ́ yí dàa ɲunù lɛ ɛ́ fé hɔ́ bòo lɛ ɛ́ mí dàa ɛ́ mii dàá sĩiní kie wɛ̀. Kɛ́ hɔ́ den iè bòo ɛ́ ké hàarí wɛ nɛ mi ken kè bɔ̀wera ǹ ɛ́ ké dàa wɔ́ hɔ́pe sí. 10Ɛ́ sí iè hɔ̀pe ɛ́ pɛ̃̀hṹ lɛ ɛ́ ké dàa hàarí ɓɛrɛ wi mi viì, ɛ́ ké dàa hàarí wóò bie lɛ́ miɛ ǹ ɛ̀ hièní nɛ kɛ́ álɛ ɛ́ yí wɛ à tɛ́ tɔnlɔ́, ɛ̀ ɓàasɔ ɛ́ ɓiɛ̀ yí sãawi à dí wɛ̀. 11Kɛ́ ké den ɛ́ ɲí ɛ̀ ɓɛ̀ nɛ ɓɛdɔ̀ mì tĩ́ihṹ ɛ́ iè paariè; ie ɓɛ yáà wé bòo dɔ̀ kɛ́ hɔ́ ńkóo ɓɛ́ ɲihĩ́ɛ ɓɛ̀ nìnbirìe lɛ kɛ́ bòo hũn ɛ́ ɓen bòo ɛ́ mí. 12Ɛ́ ɓɛ́pe nìnbirìe sɔ lɛ ɛ́ wé kɛ̀amu ɛ́ ké ɛ́ bie lɛ́ nin hiení, ké hɔ̀ berɛ́ ɛ̀ lɛ́ ɓà ǹ kè Ɲunsɔ Yiezu Kirisa yèrè lɔ̀n nɛ ɓɛ ɓaà ɓɛ́te ɛ̀ ɓɛ̀ wóo tɛ́ tɔnlɔ́ ɛ̀ dàá yí ɓɛ́ kùrú ɲunù dínlɔ́. 13Kɛ́ hɔ́ ɓen kɛ́ mípe, mìpe kìe zɛ̀ɓɛ̀, ɛ̀ mì bí wóo tɛ àá hɔ́ bɔ̀tente wénlɔ́ wɛ̀. 14Kɛ́ nìnbírɔ dɔ̀ ɛ́ pɛ̃́ nɛ mí yá wé hɔ́pe bòo lɛ ɛ́ ké ɛ́ bie àá miɛ lèpe vɛ̃hṹ sɔ lɛ hũn, ɛ̀ mì dũń ɓàasɔ sãàní, ɛ̀ mì bí wóo dàá ńkóoɓánlɔ̀n àá ɔ́; bòo lɛ ɛ́ wé ɛ̀ lùwiè ɛ̀ dí-é. 15Ɛ̀ mì bí wé ɓàasɔ kɛ̀a bòo á iè mì ńbíyanle, kɛ́ mí ɲì piè zeǹ lɔ̀n kɛ̀a ie mì zuú ńdɛsĩ̀rɔ.
Víeníkɛlán tìɛníkɛrɔ́
16Nɛ Ɲunsɔ hũn-wiɛ̀ ɓàasɔ ɛ̀ lɛ́ lé hũn-wiɛ̀ miɛ ǹ míte ǹ pɛ̃̀hṹ míkùi hũn àá hɔ́ bòo míkùi wénlɔ́ hũn. Nɛ Ɲunsɔ ɛ̀ kań àá miɛ mìkùi. 17Ǹpe Pooli niǹte ǹ ɛ́ te hɔ pe tìɛníkɛrɔ́ sɔ lɛ ɛ́ siɛ ɛ́ wĩ́ àá niǹ kùrú núnún. Sí iè pe ɛ́ ń wóò wĩ́ niǹ yèrè niǹ vɛ̃hɛ̃ míkùi vieníkɛlán hũn kɛ̀amu. Ɛ́ hɔ́pe lɛ ɛ́ iè niǹ ńwĩ́ncɛ̃́à. 18Nɛ ke Ɲunsɔ Yiezu Kirisa hiì ɛ̀ wé àá mípe mìkùi.
Currently Selected:
2 Tesaloniike Siè 3: bwj
Highlight
Copy
Compare
Share
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation
