2 Tesaloniike Siè 2
2
Hɔ̀ bòo lɛ ɛ́ ɓén wé vé ɛ́ Ɲunsɔ ɛ́ dàá khũ̀á ɓen bòo
1Kɛ́ hɔ́ ɓen kɛ́ á kè Ɲunsɔ Yiezu Kirisa khũ̀a ɓenlɔ́ bòo àá képe kè ńvɛ kóo ɓánlɔ̀n piè viì bòo, ɛ̀ kè ɛ́ mì hɛ̃nnin mìpe kiè zɛ̀ɓɛ̀, 2nɛ mi bí wóo lɛ́ nɛ mi bɔhĩ́ ɛ̀ lékɛ fùa fùa wɛ̀. Kɛ́ ádɔ̀ ɛ́ ɓɛrɛ ɛ́ bie lɛ́ miɛ ǹ nɛ a Ɲunsɔ ɓenlɔ́ ɛ́ dɛ̃un, ɛ̀ mì bí lɛ́ nɛ mi hũn ɛ̀ yeń wɛ̀. Hɛ̀rí kɛ́ ɓɛ́ yɛ̀rɛ́ nɛ a iè Dɔfĩn bɔ̀háanírɔ dɔ̀ ɛ́ te hɔ bie tàá ie nìnbín-ɓuɛ̀ dɔ̀ ɛ́ te hɔ bie tàá hɛ̀rí kɛ́ ɓɛ́ yɛ̀rɛ́ nɛ hɔ iè kèpe ɛ́ te hɔ wɛ̃́ koo vɛ̃hṹ dɔ̀ hũn ɛ́ tɔniɛ, ɛ̀ mì bí dɛsĩ̀ ɓàasiè ǹ wɛ̀. 3Mì bí fùansí nɛ nìnbírɔ dɔ̀ ɛ̀ khɛ̃̀ní miɛ ɛ̀ yí nin hɛ̀rí bòo dɔ̀ hũn wɛ̀. Iè hɔ̀ lɛ ɛ́ lé sí sɔ ɛ́ yí mii dɛ̃ kɛ́ yí bòo lɛ ɛ́ ɓɛ́ nìnbirìe ɛ́ hĩ́nà ɛ́ pɛ̃́ Dɔfĩn bòo vɔ́, àpe nìsũmúi ɛ́ lò hĩ́nà zɛ̃́niɛ mite vɔ́; àpe lɛ ɛ́ ɓén yaa hùúu. 4À den ɓén hĩ́ní ɛ́ síɓán àá hɔ́ bòo lɛ ɛ́ ɓɛ́ nìnbiriè ɛ́ wóo ve nɛ dɔfĩn míkùi àá hɔ́ lɛ ɛ́ ɓɛ́ wóò ɓàanínin míkùi; à ɛ́ hóoní míte fúu ɛ́ yɛ̀rɛ́ ɛ́ vɛ zɔ le Dɔfĩn zũ-bɛhɔ́ hũn, ɛ́ zɔ́ kànsí yán à ɛ́ bie nɛ mípe ɛ́ temu iè pe Dɔfĩn.
5Mí iè bìe hũn ɛ́ ɓɔ́ ɛ́ yí dũ kɛ́ ń bie hɔ̀pe sí ɛ́ lɛ́ miɛ ǹ pɛ̃̀hṹ lɛ ɛ́ ń dàa hàarí wi mi viì? 6Ɛ́ kɛ̀a sáalɛ ɛ́ mí lò wo dũ hɔpe bòo lɛ ɛ́ ti-e pe nìsũmúi sɔ ɛ́ hèniɛ nin bòo lɛ ɛ́ wé à dàá bí zɛ̃́ní míte kɛ́ piè te zɛ̃́nírɔ́ pɛ̃̀hṹ ɛ́ ɲɛùn yí dɛ̃ wɛ̀. 7Ɛ́ hɔ́pe yéréké sínbín-pànkɛ́ ɛ́ pe wo zɛ̃̀níkɛa tànkɔ̀niɛ ɛ́ mí tɔnlɔ́ ɛ̀ tɛ́; kɛ́ ápe sɔ lɛ ɛ́ te hɔ ɛ́ hèniɛ nin ɛ́ den fɔ́ɓán à vĩ́ ɛ̀ lé yán vé, ɛ̀ hɔ̀ den wo dàá tɛ́ mí tɔnlɔ́ wìée. 8Ápe nìsũmúi ɛ́ wo ɓén siɛ hĩ́ní; kɛ́ Ɲunsɔ Yiezu ɛ́ ɓen khũ̀a vaá-ɓen á ɓén ɓí-é àá mí ɲunù sɛmu; à ɓén wúa ɔ ɛ́ lé yán àá mí ɓenlɔ́ ńpiemu. 9Àpe nìsũmúi sɔ ɛ́ ɓén ɓen àá Sitũanɛ pànkɛ́, à wóo ɓén wé hɔ́ ɓúo yéréké bòo àá hɔ́ bɔ̀zɛ̃́níriè àá mí ɲúuhɛ̃ ɲúuhɛ̃ míkùi. 10À wóo ɓén wé hɔ́ bɔ̀koohɛ̃ àá mí ɲúuhɛ̃ ɲúuhɛ̃ ɛ́ dàá khɛ̃̀níkɛ ɓɛpe nìnbirìe lɛ ɛ́ vaá-vɛ àá ɓɛ́ te yaalén viì iè hɔ̀ lɛ ɛ́ ɓɛ́ yí tɛ̀ ɛ́ yí wɛní hɔ́ bɔ̀berà lɛ hṹn te ɓɛ mii fuenínin wɛ̀. 11Ɛ́ sí iè hɔ̀pe ɛ́ Dɔfĩn dàa tɔrɛ hɔ̀ te vĩ́inílán pànkɛ́ ɛ́ siɛniɛ peɓɛ̀ lɔ̀n ɛ́ ɓɛ́ dàá ɛ́ wóò dɛsĩ̀ hɔ̀ ɓúo ǹ. 12Ɛ́ Dɔfĩn lìe lènlɔ́ ɛ́ wo ɓén siɛ ɓɛ́pe nìɛ lɛ ɛ́ yí dɛsĩ̀ hɔ̀ bɔ̀berà ɓɛ́kùi lɔ̀n, ɓɛ̀pe lɛ ɛ́ wɔ́ hɔ́ bɔ̀koohɔ́ wénlɔ́ ɛ́ ɓɛ́ wɛniɛ.
Hɔ̀ ńfɛ́sídìń sãàní hɔ́ ńdɛsĩ̀nlɔ́ hũn bòo
13Kɛ́ hɔ́ ɓen kɛ́ képe, ɛ̀ kè sãawi ɛ̀ kè wóo dé Dɔfĩn bɛrikɛ fúu mì bòo hũn, mìpe kìe zɛ̀ɓɛ̀ lɛ ɛ́ Dɔfĩn ɛ́ wɛ. Dɔfĩn ɛ́ den dú hɔ́ híɛhɔ́ ɛ́ munɛ miɛ bòo lɛ ɛ́ wé ɛ̀ mì fuen. Ɛ́ mí wo fuerɛ iè hɔ̀ lɛ ɛ́ lé Mɛkɛ̃n-Sãanu ɛ́ wóò tiɛ mi mɛkɛ̃nì, ɛ̀ khíi páa hɔ́ lɛ ɛ́ mí dũmuasɛ̃̀ hɔ̀ bɔ̀berà ǹ bòo hũn. 14Ɛ́ hɔ́ den iè hɔ̀pe sí bòo hũn ɛ́ hɔ́pe Dɔfĩn ɛ́ dàa bɔ̀ lè Bentĩnu lɛ ɛ́ ké ɛ́ bie lɛ́ miɛ ǹ ɛ́ dàa vɔn miɛ; Hɔ̀ den wɛ nɛ mi yí mí hón ɓàarɔ́ à kè Ɲunsɔ Yiezu Kirisa ɓàarɔ́ hũn. 15Ɛ́ kɛ̀amu, ɛ́ mípe kìe zɛ̀ɓɛ̀, mì fɛ́sí dìń sãàní ɛ̀ mì ɓɛ́ɓɛ́ hɔ́ kɛ̀ránlɔ́ lɛ ɛ́ ké lɛ́ miɛ ǹ àá ké ɲunù bienù tàá àá hɔ́ lɛ ɛ́ ké wɛ̃́ kuo lè vɛ̃hṹ hũn tɔniɛ ɛ́ lɛ́ miɛ ǹ.
16Nɛ ke Ɲunsɔ Yiezu Kirisa míte ǹ àá kìe Yàá Dɔfĩn lɛ ɛ́ wɛniɛ kie ɛ̀ Hɔ̀ wɔ́ mí hiì àá kie ɛ́ dàa lɛ́ lé tĩhiè lɛ yá vé àá lé tĩì bènlén lɛ sãa kie ǹ, 17ɛ̀ tíiní mí tĩɛ̀ àá tĩhiè, ɛ̀ Hɔ̀ lɛ́ hɔ́ pànkɛ́ miɛ ǹ ɛ̀ mì dàá wóo wé hɔ́ bɔ̀tente fúu mì bɔ̀werà àá mí biehĩ́ bierɔ́ hũn.
Currently Selected:
2 Tesaloniike Siè 2: bwj
Highlight
Copy
Compare
Share
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation
