2 Korɛnte Siè 9
9
1Hɔ̀ den yɛ̀rɛ́ ɲún mí ɛ̀ ǹ wĩ́ vɛ̃hṹ ɛ̀ lɛ́ miɛ ǹ hɔ̀ Zudee pɛ̃̀hɛ̃ ńdɛsĩ̀riè sĩinírɔ́ bòo hũn wɛ̀. 2Iè hɔ̀ lɛ ɛ́ ń dũ bòo lɛ ɛ́ mí dàa wɛ hɔ bɔ̀tente wénlɔ́, ɛ́ ń dàa yú niǹte ɛ́ ɓàaniɛnin mì bòo hũn ɓɛ̀ Maseduanɛ siè híɛhɔ́. Ń den bie lɛ́ ɓà ǹ nɛ mipe kìe zɛ̀ɓɛ̀ Akayi pɛ̃̀hɛ̃ ńdɛsĩ̀riè ɛ́ te sɛ́sɛ́a vɔ́ zɛnù ɛ́ mi ɛ̀ lɛ́ mí ńsĩinín. Ɛ́ mí kuò canlɔ́ ɛ́ wo lɛ́ hɔ́ pànkɛ́ peɓɛ̀ nìnbí-kuì ǹ, ɛ́ ɓɛ́ ɓiɛ̀ wɛ ɛ́ ɓɛ ɛ̀ lɛ́ ɓɛ́ hɛ̃mù bòo. 3Ɛ́ ń wo nin tɔn ɓɛ̀ kìe zɛ̀ɓɛ̀ dɔ̀ ɛ̀ ɓɛ̀ ɓen miì vii, bòo lɛ ɛ́ wé ɛ̀ mì yèn-tente lɛ ɛ́ ń lerɛ hɔ̀pe bòo sɔ sí hũn ɛ̀ bí wé kã́amáa wɛ̀. Ɛ́ ń den hɛ̀ wɛ nɛ ɓɛ ɓen yí miɛ kɛ́ míte ɛ́ sɛ́sɛ́a vɔ́ kɛ̀a boo lɛ ɛ́ ń dàa bie hɔ̀. 4Mì bí lɛ́ nɛ kɛ́ zɔndɔ̀ kɛ́ Maseduanɛ nìɛ dɔ̀ ɛ́ bɔ̀ɓán àá mi ɛ́ dàa ɓɛrɛ mì viì, ɛ̀ ɓɛ̀ ɓen yí kɛ́ míte ɛ́ ɲɛùn yí sɛ́sɛ́ vé wɛ̀. Ɛ́ hɔ́ hɛ̀ ɛ́ wé lùwiè kè viì, iè hɔ̀ lɛ ɛ́ ké bɔ̀ kè tĩɛ̀ mì lɔ̀n pehɔ̀ bòo hũn, ɛ̀ hɔ̀ lò ɓiɛ̀ ɛ́ wé lùwiè mìpe kùusɔ viì. 5Ɛ́ sí iè hɔ̀pe ɛ́ ń dàa nɛ hɔ sãa ɛ̀ ǹ hɛ̃un ɓɛ̀ kìe zɛ̀ɓɛ̀ lɛ ǹ ɛ̀ ɓɛ̀ dí niǹ híɛhɔ́ ɛ̀ ɓen mì viì, ɛ̀ hɔ̀ mì hɛ̃mù bòo lɛ ɛ́ mí nɛ mii lɛ́ ɛ́ ɓɛ́ ɓen húi bòo. Ɛ́ kɛ̀amu, ɛ́ ń ɓen nín ɓen dɛ̃, ɛ̀ hɔ̀ wo sɛ́sɛ́a vɔ́, ɛ̀ dàa zɛ̃́ní kɛ́ mí ɛ́ lɛ́ hɔ́ àá tĩwiɛ̀ kɛ́ mí yí lɛ́ hɔ́ àá yìnniì wɛ̀.
6Ɛ́ mí dũń sãàní kɛ́ álɛ ɛ́ wóò zì fĩ́i ɛ̀ ɓìɛ wóò mìí fĩ́i, àlɛ ɛ́ wóò zĩ̀ buòní ɛ́ ɓìɛ wóò mìí buòní. 7Ɛ́ mí nɛ hɔ́rɔ wóo lɛ́ kɛ̀a bòo lɛ á dàa munɛ mí tĩì hũn nɛ mii wé, kɛ́ á bí wé hɔ́ àá tĩyaarè tàá kɛ̀a bòo ɛ́ hɔ́ iè bòo ɛ́ ɓɛ́ ɔ́ mɛmɛ́kɛ wɛ̀. Iè hɔ̀ lɛ ɛ́ Dɔfĩn ɛ́ den wɛ a nìnbírɔ lɛ ɛ́ wóò lɛ́ àá tĩwiɛ̀. 8Ɛ̀ Dɔfĩn ɛ́ den dàa pànkɛ́ lɛ ɛ́ lɛ́ hɔ́ yírɛ́ bɔ̀kuì miɛ ǹ àá mí ɲúuhɛ̃ ɲúuhɛ̃, bòo lɛ ɛ́ wé ɛ̀ hɔ̀ bòo lɛ ɛ́ mí mɛ̀kóo wi nin ɛ̀ wóo kań mí núnú hũn fúu, ɛ̀ bĩní páa yán, ɛ̀ mì lò wóo dàa hɔ́ bòo wɔ̀sɔ̀kɔ̀ lɛ ɛ́ mí wóo mii dàá wé hɔ́ bɔ̀tente àá mí ɲúuhɛ̃ ɲúuhɛ̃ míkùi, 9kɛ̀a bòo lɛ ɛ́ hɔ̀ dàa wɛ̃́ lé Dɔfĩn bienù vɛ̃hṹ hũn à nìnbírɔ lɛ ɛ́ cã̀aní bòo hũn ɛ́ nɛ làa:
«À wóò lɛ́ wɔ̀sɔ̀kɔ̀ ɓɛ̀ nìkherà ǹ,
Ɛ̀ piè bɔ̀tente wénlɔ́ ɛ́ wi yán fúu ɛ́ yá vé yá mi wɛ̀.»
10Ɛ́ Dɔfĩn lɛ wóò lɛ́ hɔ́ bɔ̀dàa ɔ̀ zìrɔ ǹ ɛ̀ hɔ̀ lò lɛ́ piè ɲunù dínlɔ́ ɔ̀ ǹ, ɛ́ ɓén lɛ́ hɔ́ bɔ̀dàa lɛ ɛ́ mí mɛ̀kóo wi nin míkùi miɛ ǹ wɔ̀sɔ̀kɔ̀, ɛ̀ Hɔ̀ ɛ́ lɛ́ ɛ́ hɔ́ síɛ sɛ̀ ɛ́ yòó, bòo lɛ ɛ́ wé ɛ̀ mì bɔ̀tente wénlɔ́ ɛ̀ hɛ biè bɔ̀kùi. 11Hɔ̀ ɓén lɛ́ ɛ́ mí ɛ́ wé bòo ɓàasiè cɛ̃̀un bòo míkùi hũn, bòo lɛ ɛ́ wé ɛ̀ mì wé bùuɲɛ́ dériè fúu. Ɛ́ kɛ̀amu, ɛ́ nìnbí-kuì ɛ́ ɓén dé Dɔfĩn bɛrikɛ hɔ̀ hɛ̃mù bòo lɛ ɛ́ mí lɛ́ ɛ́ ke vɛ lɛ́ ɓà ǹ bòo hũn. 12Iè hɔ̀ lɛ ɛ́ hɔ́pe ńsĩinín sɔ ɛ́ yí ɓɛ́pe ńdɛsĩ̀riè sɔ ɲúuhɛ̃ bòo mí dòonún ɛ́ hɔ́ mii ɛ̀ fénin, kɛ́ hɔ́ mii bĩní lɛ́ ɛ̀ ɓɛ̀ nìnbí-kuì ɛ̀ dé Dɔfĩn bɛrikɛ. 13Ɛ́ ɓɛ́ ɓen mɔn hɔ̀pe mì hɛ̃mù bòo tũ̀nú, ɛ́ ɓɛ́ ɓén dé Dɔfĩn bɛrikɛ mì tɛmu fénlɔ́ bòo hũn, hɔ̀pe lɛ ɛ́ temu ɛ́ zɛ̃́ní kɛ́ mí ɲúuhɛ̃ ɛ́ cã̀aní àá ɔ́ Kirisa Bentĩnu. Ɛ̀ ɓɛ̀ lò ɛ́ dé Dɔfĩn bɛrikɛ iè hɔ̀ lɛ ɛ́ mí sankɛa mì núnú hũn bòo àá ɓɛ́, ɛ̀ mì lò wóò sankɛ hɔ àá ɓɛ́pe nìnbirìe lɛ kɛ́. 14Ɛ́ ɓɛ́ ɓén hɛ̃un Dɔfĩn ɛ́ lɛ́ miɛ ǹ ɛ́ dàá zɛ̃́ní ɓɛ́ wanminu àá miɛ, lèpe hiì dɛ̀bɛhɔ́ lɛ ɛ́ Dɔfĩn ɛ́ wɔ́ àá miɛ bòo hũn. 15Nɛ̀ Dɔfĩn yèrè ɛ̀ ɓàaní pehɔ̀ bùuɲɛ́ bɔ̀bɛhɔ́ lɛ ɓà ńmàa ɛ́ mí bòo hũn.
Currently Selected:
2 Korɛnte Siè 9: bwj
Highlight
Copy
Compare
Share
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation
