2 Korɛnte Siè 10
10
Pooli ɛ́ mí tɔnlɔ́ ɲunù ɛ̀ sɛ
1Ńpe Pooli niǹte ǹ ɛ́ mì hɛ̃nnin à Kirisa te wuawinírɔ́ àá piè sãamu bòo hũn. Ǹpe lɛ ɛ́ ɓɛ́ nìnbirìe ɛ́ wóò nɛ ń ɓen wi mi tĩ́ihṹ ɛ̀ ǹ Zãn ɛ̀ wé niǹte fĩ́i, ie kɛ́ niǹ viì ɛ́ ɓen van ni àá miɛ ɛ̀ niǹ tĩì den hièní mí lɔ̀n. 2Nín mì hɛ̃nnin nɛ mi bí lɛ́ nɛ kɛ́ ń ɓen ɓɛrɛ dɛ̃un mì viì ɛ̀ ǹ lɛ̀ hiɛ̀ àá miɛ wɛ̀. Iè hɔ̀ lɛ ɛ́ ɓɛ́pe lɛ ɛ́ wóò nɛ hɔ iè nìnbí-yáamu bòo wénlɔ́ mí dòonún ɛ́ ké dàa ɛ́ kè bòo ɛ̀ wé ɛ́ ń den nin dàá lɛ̀ hiɛ̀ cɛ̃̀un. 3Hɔ̀pe wo bɔn kɛ́ ké iè nìnbirìe, kɛ́ ké den yá kè hĩɛ̀ tánlɔ́ ɛ̀ tɛ àá nìnbí-yáamu hĩɛ̀ tánlɔ́ wɛ̀. 4Iè hɔ̀ lɛ ɛ́ hɔ́ hĩɛ̀ tĩ̀ɛ lɛ ɛ́ ké dàa ɛ́ hɔ̀ hĩɛ̀ ɛ̀ tɛ́ ɛ́ yí nìnbirìe hĩɛ̀ tĩ̀ɛ, kɛ́ hɔ́ iè Dɔfĩn hĩɛ̀ tĩ̀ɛ lɛ pànkɛ́ wi, lɛ wóò wúa hɔ vuò lɛ ɛ́ Dɔfĩn ɓà ńbíyanliè ɛ́ wóò vɛ tànkɛ̀níkɛ ɓɛ́te hũn. Ɛ́ ké wo ɛ́ wóò yáakɛ ɓɛ́ nìnbirìe ɓúo bɔ̀lieníkɛà biehĩ́. 5Ɛ́ hɔ́ bòo míkùi lɛ wóò lɛ́ ɛ̀ ɓɛ̀ yèncɛ̀riè ɛ̀ dàá bie nɛ ɓɛ ɛ̀ si ɓɛ̀ nìnbirìe ɛ̀ ɓɛ̀ bí dũń Dɔfĩn ɛ́ ké wóò láakɛ kóokɛsí, ɛ̀ ɓɛ̀ nìnbirìe bɔ̀lieníkɛà ɛ́ ké ɛ́ wóò zɛ̀ní, bòo lɛ ɛ́ wé ɛ̀ ɓɛ̀ tɛ̀ à Kirisa bòo. 6Ɛ́ pɛ̃̀hṹ lɛ kɛ́ mípe mì bòo lɛ ɛ́ mí dàa ɛ́ Dɔfĩn bòo ɛ̀ ɲí ɛ́ ɓen van ɲunù ɛ́ tú, ɛ́ képe ɛ́ den wo vɛ́ ɓɛ́ nìnbirìe lɛ yá Dɔfĩn bòo ɲí ɲɛkɛ̃à.
7Ɛ́ mí den wóo húi hɔ́ bòo àá mí híɛhɔ́ lò! Kɛ́ nìnbírɔ lɛ ɛ́ dũmuasɛ̃̀ nɛ mípe ɛ́ bòo sɛ̃̀ Kirisa ǹ, à fɔ́ɓán à dũń sãàní kɛ́ képe ɛ̀ ɓiɛ̀ kùusɔ bòo sɛ̃̀ àpe Kirisa ǹ kɛ̀a ɔpe. 8Ɛ́ hɛ̀rí kɛ́ ń yɛ̀rɛ́ hṹn ɓàaniɛ niǹte ǹ ɛ́ van khie mí khiɛ̀ bìcínbóo hɔ̀ pànkɛ́ lɛ ɛ́ Dɔfĩn ɛ́ lɛ́ kie ǹ bòo hũn, hɔ̀pe ɛ́ mii sĩiní miɛ ɛ̀ mì vɛ àá híɛhɔ́ kɛ́ hɔ́ bí yaakɛ miɛ, ɛ́ ń pɛ́wi ɛ́ yá lùwi wɛ̀. 9Ɛ́ hɔ́ lò yí bòo ɛ́ nín cɛ̀ ɛ́ nin záaníkɛ miɛ àá niǹ vɛ̃hɛ̃ lɛ ɛ́ wóò wĩ́ ɛ̀ lɛ́ miɛ ǹ wɛ̀. 10Ɛ́ ɓɛ́dɔ̀ ɛ́ pe wo wóò bie nɛ niǹ vɛ̃hɛ̃ hũn, ɛ́ niǹ biehĩ́ ɛ́ hɛ̀ hie ɛ̀ hɔ̀ lò pànkɛ́ wi, ie kɛ́ ń ɓen wi ɓɛ́ tĩ́ihṹ, ɛ̀ niǹ cũ̀kṹ mí, ɛ̀ ǹ lò wóò bie kɛ̀a nìnbírɔ lɛ yí dũ biehĩ́ wɛ̀. 11Ɛ́ nɛ ape lɛ ɛ́ bie kɛ̀amu ɛ̀ dũń kɛ́ hɔ́ bòo lɛ ɛ́ ké te dàa wi ke vɛ̃hɛ̃ wĩ́nlɔ́ hũn lɛ kɛ́ ké viì ɛ́ ni àá miɛ, iè pe ɛ́ ké ɓén dìń kɛ̀amu kè bɔ̀werà hũn pɛ̃̀hṹ lɛ kɛ́ ké ɓɛrɛ wi mi tĩ́ihṹ.
12Ɛ́ ké hɛ̀ yá hĩ̀ kè tĩɛ̀ ɛ̀ kè ɛ́ wé kéte àá dìcóoní tàá ɛ̀ màaní kéte àá ɓɛ́pe lɛ ɛ́ wóò bie ɓɛ́ kùrú yèn-tente bòo wɛ̀. Ɓɛ̀ wóò cɛ̀ ɓɛ́ kùrú bòo màatɛ̃́lán ɛ̀ dàá màatɛ̃́ ɓɛ́te, ɛ̀ ɓɛ̀ wóò bĩní màaníkɛ ɓɛ́te ɓán hũn. Ɛ́ ɓɛ́ hɛ̀ wo iè pe bɛ̃́nbṹà. 13Kɛ́ hɔ́ ɓen kɛ́ képe, ɛ̀ kè yí ke ɛ̀ ɓàaní kéte ǹ ɛ̀ vɛ khíi mí khiɛ̀ wɛ̀. Kɛ́ kéte ɓàarɔ́ ɛ́ ɲunù mii vɛ bè hɔ̀ tɔnlɔ́ lɛ ɛ́ Dɔfĩn lɛ́ kie ǹ, lɛ iè hɔ̀ lɛ ɛ́ Hɔ́ lɛ́ ɛ́ ké ɓɛrɛ dɛ̃un mì viì. 14Ɛ́ ké yí pɛ̃́un ké ńtṹnú kɛ̀a bòo ɛ́ ké hàarí ɛ́ yí ɓen mì viì, iè hɔ̀ lɛ ɛ́ képe ɛ́ temu hàarí dú hɔ́ híɛhɔ́ ɛ́ ɓɛrɛ dɛ̃un mi viì àá ɔ́ Kirisa Bentĩnu. 15Ɛ́ kɛ̀amu, ɛ́ ké wo yáà pɛ̃́un lé ńtṹnú lɛ lerɛ, ɛ̀ khíi vɛ ɓàaní kéte nìnbí-ɓuà tɔnlɔ́ hũn wɛ̀. Ké den dũmuasɛ̃̀ nɛ mi ńdɛsĩ̀nlɔ́ ɛ́ ɓén vɛ àá híɛhɔ́, ɛ́ ké wo ɛ́ yí tɔnlɔ́ lɛ wóokɛa ɓàń ɛ́ tɛ́ mí tĩ́ihṹ, ɛ́ ɓáaníɓán àá lépe ńtṹnú lɛ lerɛ. 16Ɛ́ pehɔ̀ máahṹ, ɛ̀ kè ɛ́ khíi vɛ buie le Bentĩnu hɔ̀ vuò lɛ cánkɛa van lɔ́ wi mi máahṹ hũn. Ké den yá cɛ̀ ɛ̀ kè ɓàaní kéte ǹ nìnbí-ɓuà tɔnlɔ́ lɛ ɛ́ ɓɛ́ tɛ́ hũn wɛ̀.
17Kɛ́ hɔ́ lò den wɛ̃́ lé Dɔfĩn bienù vɛ̃hṹ hũn ɛ́ nɛ làa: Àlɛ kɛ́ á ɛ́ cɛ̀ à ɓàaní míte ǹ, ɛ̀ ɓàasɔ ɛ̀ ɓàaní míte ǹ ɔ̀ Ɲunsɔ bòo lɛ á wɔ́ bòo hũn. 18Iè hɔ̀ lɛ á yí-e lɛ ɛ́ mí kùrú yèn-tente bòo ɛ̀ bie míte ǹ ɛ́ Dɔfĩn wóò tɛ̀ bòo, kɛ́ á iè ɔ̀lɛ ápe Ɲunsɔ ɛ́ te yèn-tente bòo ɛ́ bie.
Currently Selected:
2 Korɛnte Siè 10: bwj
Highlight
Copy
Compare
Share
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation
