2 Korɛnte Siè 4

Hɔ̀ yírɛ́ lɛ wi hɔ cɔ́rɔ́ tĩ̀ɛ hũn bòo

1Dɔfĩn àá mí sãamu ɛ́ dɔ́ hɔ́ tɔnlɔ́ sɔ kè bàanì hũn, ɛ́ sí iè pe te mu lɛ́ ɛ́ ké dàa bàanì ɛ́ yá tè. 2Ɛ́ hɔ́ lùwiè bòo lɛ ɛ́ wóò wé hɔ́ síbínú hũn míkùi ɛ́ ké pɛ̃́ bòo. Ké yáà wé hɛ́cín-bòo àá nìnbírɔ́ dɔ̀, ɛ̀ kè lò yáà zɛ̀ní lé Dɔfĩn bienù wɛ̀. Kɛ́ hɔ́ bɔ̀berà iè pe ɛ́ ké wé wóò munkɛ ɛ̀ lɛ́ ɓɛ́ nìnbirìe ǹ àá ńpiemu, bòo lɛ ɛ́ wé ɛ̀ ɓɛ̀ nìnbirìe ɓɛ́kùi ɛ̀ dũń ɓɛ́ tĩɛ̀ hũn kɛ́ képe ɛ́ iè nìnbirìe lɛ ɛ́ cã̀aní Dɔfĩn híɛhɔ́. 3Ɛ́ kɛ́ lé Bentĩnu lɛ ɛ́ ké ɛ́ buie ɛ́ ɓen tànkɔ̀niɛ, ɛ̀ ɓɛ̀ iè ɓɛ̀lɛ ɛ́ vṹnun ɛ́ lé tànkɔ̀niɛ nin. 4Ɓɛ̀pe ɛ́ yí dɛsĩ̀ lèpe Bentĩnu sɔ ǹ iè hɔ̀ lɛ ɛ́ lépe dímíɲɛ́ sɔ lɛ bɛ́zuú lɛ iè ɔ̀ Sitũanɛ ɛ́ híɛ peɓɛ̀ bɔ̀dũmunù ǹ, bòo lɛ ɛ́ wé ɛ̀ ɓɛ̀ bí mi lepe Bentĩnu ńpiemu wɛ̀; hɔ̀pe ńpiemu lɛ iè ɔ̀ Kirisa ɓàarɔ́ ɛ́ hɔ́ ɛ́ zɛ̃́ní, àpe lɛ ɛ́ iè hɔ̀pe Dɔfĩn ńwĩ́ihṹ. 5Hɔ̀ yí ké kùrú bòo ɛ́ ké ɛ́ buie, kɛ́ á iè ɔ̀ Ɲunsɔ Yiezu Kirisa bòo ɛ́ ké ɛ́ buie. Ɛ́ ké wo wɔ́ mípe mì tɔntɛ́riè àpe Yiezu bòo hũn. 6Ɛ́ Dɔfĩn ɛ́ hàarí bie ɛ́ nɛ làa: «Nɛ hɔ ńpiemu ɛ̀ zɔ cĩ̀ hɔ̀ síbínú hũn.» Ɛ́ hɔ́ lò bĩniɛ iè hɔ̀pe Dɔfĩn ɛ́ te mí ńpiemu ɛ́ dɔ́ ké tĩɛ̀ hũn bòo lɛ ɛ́ wé ɛ̀ hɔ̀ ɛ̀ ciení kie ǹ ɛ̀ kè dàá dũń hɔ́pe Dɔfĩn ɓàarɔ́ lɛ ɛ́ ɲiiníkɛ ape Kirisa híɛhɔ́ lɔ̀n.

7Ɛ́ hɔ́pe yírɛ́ sɔ wi kie ǹ, kèpe lɛ ɛ́ dɛ̃̀ kɛ̀a ie hɔ cɔ́rɔ́ tĩ̀ɛ, bòo lɛ ɛ́ wé ɛ̀ ɓɛ̀ nìnbirìe ɛ̀ dàá dũń kɛ́ hɔ́pe pànkɛ́ bɛhɔ́ sɔ ɛ́ lé àá Dɔfĩn viì, kɛ́ hɔ́ yá lé àá képé kè viì wɛ̀. 8Kè lɔ̀n ɛ́ hɛ̀ ɛ́ be hɔ bòo míkùi hũn kɛ́ ké bàanì ɛ́ pɛ́ yá tè wɛ̀. Kè tĩɛ̀ ɛ́ hɛ̀ yáa kɛ́ ké den pɛ́ dàa tĩì bènlén. 9Ɓɛ̀ bɔ̀ kè máahṹ ɛ́ ɲɛkɛ̃̀a ɛ̀ vɛ́ kɛ́ Dɔfĩn ɛ́ yí fùansí kiè ǹ wɛ̀; ɛ̀ ɓɛ̀ han kie ɛ́ daaníkɛasí lé sṹsùnù, kɛ́ ké yí hí wɛ̀. 10Àá sítĩnlɔ́, ɛ̀ ɓɛ̀ wóò cɛ̀ ɛ̀ ɓɛ̀ ɛ̀ ɓé kie kɛ̀a bòo lɛ ɛ́ ɓɛ́ dàa hàarí ɓɔ́ ápe Yiezu. Kɛ́ ké den pɛ́wi yìe wi, ɛ́ ké mɛkɛ̃nì iè pe wo ɛ́ zɛ̃́ní kɛ́ ápe Yiezu ɛ́ yìe wi. 11Ɛ́ ké wi le mɛkɛ̃nì hũn, kɛ́ ké den wóò mi hɔ́ húmú fúu Yiezu yènsénín, bòo lɛ ɛ́ wé ɛ̀ piè mɛkɛ̃nì ɛ̀ ɓiɛ̀ dàá zɛ̃́ní míte kè tɛkɛ̀a lɛ wóò hí hũn. 12Ɛ́ kɛ̀amu ɛ́ hɔ́ húmú ɛ́ mí núnú ɛ̀ zɛ̃́ní kiè ǹ, bòo lɛ ɛ́ wé ɛ̀ lè mɛkɛ̃nì ɛ̀ ɓiɛ̀ dàá tɛ́ mí tɔnlɔ́ mìpe mì lɔ̀n. 13Hɔ̀ ɛ́ wɛ̃́ lé Dɔfĩn bienù vɛ̃hṹ hũn ɛ́ nɛ làa: «Ń dũmuasɛ̃̀, ɛ́ sí iè pe temu lɛ́ ɛ́ ń dàa bie». Ɛ́ hɔ́ lɛ ɛ́ képe ɛ́ ɓiɛ̀ dàa hɔpe ńdɛsĩ̀nlɔ́ dìcóoní sɔ mɛkɛ̃nì, ɛ́ sí iè pe temu lɛ́ ɛ́ ké dàa ɓiɛ̀ ɛ́ bie. 14Ɛ́ ké dũ kɛ́ hɔ́pe Dɔfĩn lɛ ɛ́ vìeniɛ ɔ̀ Ɲunsɔ Yiezu ɛ́ ɓiɛ̀ ɓén vìení kie àá ɔ́pe Yiezu, ɛ̀ Hɔ̀ ɓén lɛ́ ɛ́ képe àá mípe ɛ́ ɓén páaní dìń pehɔ̀ híɛhɔ́. 15Ɛ́ hɔ́pe bòo sí kè wé nin míkùi ɛ́ iè mìpe bòo hũn. Ɛ́ kɛ̀amu, ɛ́ ɓɛ́ nìnbirìe lɛ ɛ́ Dɔfĩn ɛ́ wé àá mí hiì ɛ́ buòní buònírɔ́, ɛ́ hɔ́pe bòo lɛ ɛ́ ɓɛ́ nìnbirìe ɛ́ wóò dàá dé Dɔfĩn bɛrikɛ ɛ̀ dàá ɓàaní Hɔ̀ ǹ ɛ́ ɓiɛ̀ yòó buò.

Ńwé lé mɛkɛ̃nì hũn àá ńdɛsĩ̀nlɔ́

16Ɛ́ sí iè hɔ̀pe ɛ́ ké dàa yá kè bàanì ɛ̀ tìení wɛ̀. Hɛ̀rí kɛ́ ké tɛkɛ̀a lɛ ɛ́ pe ɓen ɛ́ yaa cɔ́ fĩ́i fĩ́i, ɛ̀ kè mɛkɛ̃nì ɛ́ pe wóò yí hɔ́ zɛ̀nírɔ́ sítĩnlɔ́ àá sítĩnlɔ́. 17Ɛ́ lépe lɔ̀nbiè lɛ ɛ́ ké ɛ́ yí ɛ́ den ɛ́ mìniɛ cɛ̃̀un, lɛ kɛ́ ké dàa ɓen ɛ́ lè màaní àá hɔ́pe miikɛ ɓàarɔ́ bɔ̀bɛhɔ́ lɛ yá vé lɛ ɛ́ ké ɓén yí, hɔ̀pe ɓàarɔ́ lɛ ɛ́ lepe lɔ̀nbiè sɔ ɛ́ te ɛ́ sɛ́sɛ́ ké bòo hũn. 18Ɛ́ hɔ́ wo iè hɔ̀ bòo lɛ ɛ́ yí loo àá yìe viì ɛ́ ké ɛ́ húi, kɛ́ ké yá húi àá hɔ́lɛ ɛ́ loo àá yìe viì wɛ̀. Iè hɔ̀ lɛ ɛ́ hɔ́ bòo lɛ ɛ́ loo àá yìe ɛ́ iè bòo lɛ yáà míi, kɛ́ hɔ́lɛ ɛ́ yí loo àá yìe ɛ́ pe wóò wé yán pɛ̃̀hṹ lɛ ɛ́ yá vé hũn.

Currently Selected:

2 Korɛnte Siè 4: bwj

Highlight

Copy

Compare