2 Korɛnte Siè 12

Hɔ̀ bòo lɛ ɛ́ Dɔfĩn ɛ́ zɛ̃́niɛ lɛ́ á Pooli ǹ bòo

1Ɛ́ ń sãawi ɛ̀ ɓàaní niǹte ǹ, hɛ̀rí kɛ́ pehɔ̀ ɲún ɛ́ yɛ̀rɛ́ mí. Kɛ́ hɔ́ yìnmirà bòo lɛ ɛ́ Dɔfĩn ɛ́ lɛ́ ɛ́ ń mɔn àá hɔ́ bɔ̀zɛ̃́níriè lɛ ɛ́ Hɔ́ lɛ́ ɛ́ ń dũnɛ iè pe bòo ɛ́ nin bie. 2Ń dũ ńdɛsĩ̀rɔ dɔ̀#12.2 À ńdɛsĩ̀rɔ́ sɔ iè ɔ̀pe Pooli kùusɔ. lɛ ɛ́ Dɔfĩn hàarí mɔ̀ ɛ́ dàa yòó van sɔ́n sɔ́n hɔ́ hóo hũn mì viì, lɛ iè pehɔ̀ lɔ́líe pírú àá bɔ̀nbɔ̀ nɛ́. Hɔ̀ ɓen iè ɔ̀pe kùusɔ ɛ́ temu hàarí mɔ̀ yòó van yán, tàá hɔ̀ iè bòo lɛ ɛ́ dɛ̃̀ kɛ̀a dɛ̀woò yée, ɛ̀ ǹpe wo yí dũ wɛ̀. Dɔfĩn mí dòonún ɛ́ te hɔ dũ. 3Ǹpe wo dũ kɛ́ Dɔfĩn ɛ́ hàarí mɔ̀ ɓàasɔ ɛ́ dàa yòó van hɔ̀ Hɛrɛcĩnɛ hũn. Ɛ́ ń den nɛ hɔ ɓen iè ɔ̀pe kùusɔ ɛ́ temu hàarí mɔ̀ yòó van yán, tàá hɔ̀ iè bòo lɛ dɛ̃̀ kɛ̀a dɛ̀woò yée, ɛ̀ ǹpe wo yí dũ, kɛ́ Dɔfĩn mí dòonún ɛ́ te hɔ dũ. 4Á van yòó ɲɛ́ biehĩ́ dɔ̀ lɛ ɛ́ nìnbirìe níi ɛ́ yí dɛ̀ yá khɛ́, ɛ̀ ɲunù lò ɛ́ yí lɛ́ nìnbírɔ dɔ̀ ǹ nɛ a khɛ́ hɔ́ wɛ̀. 5Ɛ́ nin ɓàaní niǹte ǹ ɓàasɔ bòo hũn. Kɛ́ hɔ́ ɓen kɛ́ ńpe, ɛ̀ nin ɓàaní niǹte ǹ niǹ pànkɛ́ lɛ mí bòo hũn mí dòonún. 6Kɛ́ ń yɛ̀rɛ́ hṹn wɛ ɛ́ nin ɓàaní niǹte ǹ, ɛ́ nìnbirìe ɛ́ hṹn yí dɛ̀ yá bie nɛ niǹ ɲún ɛ́ mí yán, iè hɔ̀ lɛ ɛ́ hɔ́ iè bɔ̀berà ɛ́ nín nunkɛ. Kɛ́ ń den yáà ɓàaní niǹte ǹ, iè hɔ̀ lɛ ɛ́ ń den yá cànkɛ nɛ ɓɛ nìnbirìe ɛ̀ wóò húi mi ɛ̀ pɔní hɔ́ bòo lɛ ɛ́ ɓɛ́ wóò mi kɛ́ nin wé àá hɔ́ lɛ ɛ́ ɓɛ́ wóò ɲí kɛ́ nin bie wɛ̀.

7Kɛ́ hɔ́pe sí míkùi hũn, ɛ́ bòo lɛ ɛ́ wé ɛ̀ ǹ dàá bí wé yèncɛ̀ hɔ̀pe yéréké yìnmira bòo lɛ ɛ́ ń mɔn bòo hũn, ɛ́ ń yú lé ńɓóonín dɔ̀ niǹ tɛkɛ̀a hũn, lɛ dɛ̃̀ kɛ̀a ie Sitũanɛ tɔnkɛrɔ dɔ̀ lɛ temu wóò ɓen biení niǹ lɔ̀n, bòo lɛ ɛ́ wé ɛ̀ ǹ dàá bí wóo cɛ lè yèrè wɛ̀. 8Ɛ́ fúu yìehɛ̃̀ tĩ ɛ́ ń hɛ̃nnɛ Dɔfĩn nɛ Hɔ leń mi ɛ̀ lé lépe sɛ̃́ɲíi sɔ hũn. 9Kɛ́ Hɔ́ den zɔn kɔ̃́nie mi ɛ́ nɛ làaa: «Niǹ hiì ɛ́ yí kɔ. Niǹ pànkɛ́ ɛ́ den wóò zɛ̃́ní míte kɔ̀pe kɔ̀ pànkɛ́ lɛ ɛ́ mí hũn.» Ɛ́ ńpe ɛ́ hɛ̀ wo tɛ̀ ɛ̀ ǹ ɓàaní niǹte ǹ niǹ pankɛ́ lɛ mí bòo hũn, bòo lɛ ɛ́ wé à Kirisa pànkɛ́ ɛ̀ dàá kań niǹ lɔ̀n. 10Ɛ́ sí iè hɔ̀pe ɛ́ ń dàa wóò wɛní niǹte niǹ pànkɛ́ lɛ mí bòo hũn. Hɛ̀rí kɛ́ ɓɛ́ wóò tòokɛ mi, hɛ̀rí kɛ́ ń wóò kań lé tĩyaarè hũn, hɛ̀rí kɛ́ ɓɛ́ wóò biení niǹ lɔ̀n, hɛ̀rí kɛ́ ń wóò kań hɔ́ hũn-yenkɛà hũn, ɛ̀ ǹ pɛ́wi ɛ́ wɛ niǹte iè hɔ̀ lɛ ɛ́ ń dũ kɛ́ niǹ lɔ̀n ɛ́ bi-e Kirisa bòo hũn. Ɛ́ pɛ̃̀hṹ lɛ kɛ́ niǹ pànkɛ́ ɛ́ ɓen van mí, hɔ́rɔsí à Kirisa pànkɛ́ ɛ́ den wi niǹ lɔ̀n cɛ̃̀un.

Pooli kuò ɛ́ hè ɓɛ̀ Korɛnte ńdɛsĩ̀riè bòo hũn

11Nín bie kɛ̀a bòo ɛ́ niǹ ɲún ɛ́ mí yán wɛ̀. Kɛ́ hɔ́ den iè mìpe temu wɔ́ ɛ́ ń dàa ɛ́ bie kɛ̀amu. Mìpe ɛ́ temu hṹn sãawi ɛ̀ mì teń niǹ ɲunù ɛ̀ sɛ. Iè hɔ̀ lɛ ɛ́ hɛ̀rí kɛ́ ń yɛ̀rɛ́ yí hṹn wìe dɔ̀ kɛ̀a ńɓùo, ɛ̀ ɓɛ̀pe lɛ ɛ́ mí wóò nɛ ɓɛ iè mì tɔnkɛriè nì-bɛ̃hɛ̃ ɛ́ bòo yí tṹ mi wɛ̀. 12Ɛ́ hɔ́ bòo lɛ ɛ́ zɛ̃́ní kɛ́ ń iè Dɔfĩn tɔnkɛrɔ ɛ́ lò wo wɔ́ mí tĩ́ihṹ ɛ́ mí mɔn: hɔ̀ hũn hĩ̀nlɔ́ hɔ̀ bòo míkùi hũn, hɔ̀ yéréké bòo, hɔ̀ bɔ̀bɛ̃hɛ̃ àá mí ɲúuhɛ̃ ɲúuhɛ̃. 13Ɛ́ hɔ́ iè ńɓùo ɛ́ hɔ́ Dɔfĩn zĩhĩ́ɛ ńkóoɓánlɔ̀n nìɛ lɛ kɛ́ ɛ́ yú kɛ́ mípe ɛ́ yí yí hɔ́, kɛ́ hɔ́ ɓen yí hɔ́pe lɛ ɛ́ ń pɛ̃́ nɛ mí yá tìé niǹ tìerɔ́ àá mi? Ɛ́ mí dé sɛ́wɛ́rí lɛ́ mi ǹ hɔ̀pe lɛ ɛ́ ń yí wé sãàní àá miɛ hɔ̀pe sí bòo hũn.

14Ń lɛ iè pe wo sɛ́sɛ́a niǹte vɔ́ ɛ́ vaá-ɓen mì viì kɛ̀a yìehɛ̃̀tĩlán. Ɛ́ ń lò yá ɓén wé tìerɔ́ mì lɔ̀n wɛ̀. Hɔ̀ iè mìpe ɛ́ nín cɛ̀ kɛ́ hɔ́ yí mí núnú hũn bòo wɛ̀. Iè hɔ̀ lɛ ɛ́ ɓɛ́ yí ɓɛ́ zĩncã́ahɛ̃ ɛ́ temu sãawi ɛ̀ ɓɛ̀ wóo cɛ̀ hɔ̀ yírɛ́ ɛ̀ kóo ɓánlɔ̀n ɛ̀ bìsí ɓá tenliè bòo hũn, kɛ́ ɓɛ́ iè ɓɛ̀pe tenliè ɛ́ temu sãawi ɛ̀ ɓɛ̀ wóo cɛ̀ hɔ̀ yírɛ́ ɛ̀ kóo ɓánlɔ̀n bìsí ɓɛ́ zĩncáahɛ̃ bòo hũn. 15Ɛ́ ńpe ɛ́ tɛ̀ ɛ́ nin yáakɛ niǹ núnú hũn bòo míkùi, ɛ̀ yɛ̀rɛ́ lɛ́ niǹte míkùi mìpe mì bòo hũn. Ɛ́ bòo kɛ́ ńpe ɛ́ ɓen wɛ miɛ cɛ̃̀un kɛ̀amu, ɛ́ mípe mì bòo lɛ ɛ́ mí dàa wɛ mi ɛ́ ɓén mìní mìnírɔ́?

16Ɛ́ mí lò wo dũ nɛ ń yí wé ɲún hũn tìerɔ́ mì lɔ̀n wɛ̀. Kɛ́ ɓɛ́dɔ̀ ɛ́ den pɛ́wi wóo nɛ niǹ ɲún yá cã̀aní, iè ń khɛ̃̀niɛ miɛ ɛ́ yú nin àá niǹ hɛ́cín-bòo. 17Ɛ́ mí húi lò, bòo ɛ́ ɓɛ́pe lɛ ɛ́ ń tɔrɛ ɛ́ ɓɛ́ ɓɛrɛ mì viì ádɔ̀ ɛ́ ɓɛrɛ khɛ̃̀niɛ miɛ ɛ́ fɔ́ bòo ɛ́ ɓɛrɛ lɛ́ mi ǹ? 18Ń hɛ̃nnɛ à Tiite ǹ nɛ a ɓen mì viì, ɛ̀ ǹ lò tɔrɛ àpe kìe zuú lɛ ɛ́ mí dũ bòo á bɔ̀ɓán àá ɔ́. Ɛ́ bòo á Tiite ɛ́ ɓɛrɛ khɛ̃niɛ miɛ ɛ́ fɔ́ bòo? Ɛ́ bòo ɛ́ ńpe àá ɔ́pe kè bòo lɛ ɛ́ ké wɔ́ ɛ́ sũǹ yí wé àá nùnlé dìcóoní ɛ̀ kè sũǹ yí páaní yí vɛ be wṹn dìcóoní?

19Wɔ́ khɔn yée kɛ́ mí ɛ́ nùún mí tĩɛ̀ hũn hàarí nɛ ké iè bìe ɛ́ kè ɲunù ɛ̀ sɛ mí híɛhɔ́ ɛ̀ dàá lɛ́ bɔ̀tĩɛ̀ kète ǹ. Ńɓùé dɛ́! Ké den iè bìe lɛ ɛ́ canɓán àá Kirisa ɛ́ ké dàa ɛ́ bie kɛ̀amu Dɔfĩn híɛhɔ́. Ɛ́ mípe kìe pàáɓɛ́, ké den ɛ́ hɔ̀pe sí míkùi ɛ̀ bie lɛ́ miɛ ǹ bòo lɛ ɛ́ wé ɛ̀ mì vɛ vanlɔ́ àá híɛhɔ́ hɔ̀ ńdɛsĩ̀nlɔ́ hũn. 20Niǹ hũn ɛ́ hɛ̀ yerɛ nɛ pɛ̃̀hṹ lɛ kɛ́ ń ɓɛrɛ dɛ̃un mì viì, ɛ̀ ɓuɔ́ ɛ̀ ǹ bí ɓen tɛ̀rɛ́ miɛ kɛ́ mí te dàarɔ́ ɛ́ yí hɔ́pe lɛ ɛ́ wɛ, ɛ̀ mìpe ɛ̀ lò ɓiɛ̀ bí mi kɛ́ niǹte dàarɔ́ ɛ́ yí hɔ́pe lɛ ɛ́ mí wɛ wɛ̀. Niǹ hũn ɛ́ den yerɛ nɛ ɓuɔ́ ɛ̀ ǹ bí ɓen yí kɛ́ hɔ́ fuò àá lé yanlienú àá lé tĩcĩ̀nín àá lé ńbíyaanún àá hɔ́ nìtòokɛà àá hɔ́ nìwɛrɛ̀ àá lé yèncànlè àá hɔ́ ńwékɛkũn ɛ́ wi mi tĩ́ihṹ wɛ̀. 21Niǹ hũn ɛ́ den hɛ̀ yerɛ nɛ pɛ̃̀hṹ lɛ kɛ́ ń ɓɛrɛ dɛ̃un mì viì, ɛ̀ ɓuɔ́ ɛ̀ kè Ɲunsɔ Dɔfĩn ɛ̀ bí fùansí ɛ̀ lùwiè ɛ̀ dí mi mì bòo hũn, ɛ̀ ǹ dàá yí wírí ɓɛ́ nì-kuì dɔ̀ bòo hũn wɛ̀; ɓɛ̀pe lɛ ɛ́ pɛ́wi ɛ́ hɔ̀ bɔ̀koohɛ̃ ɛ̀ wé kɛ̀a ɓɛ́ hàarí bòo, kɛ́ ɓɛ́ den yí tɛ̀ ɛ́ yí zɛ̀ní ɓɛ́ tĩɛ̀ ɛ̀ ɓɛ̀ fùansí hɔ́ bòo lɛ lɔn wénlɔ́ ǹ, àá hɔ́ ńdaaníkɛɓánkũǹ àá hɔ́ ńwékɛkũǹ wɛ̀.

Currently Selected:

2 Korɛnte Siè 12: bwj

Highlight

Copy

Compare