2 Korɛnte Siè 11

Pooli àá ɓɛ́ ɓúo tɔnkɛriè bòo

1Ɛ́ kɛ̀a sáalɛ ɛ́ ń den nin bie kɛ̀a ie khíerɔ, kɛ́ mí lò hĩ̀ mì hũn àá mi. Ũun nín mì hɛ̃nnin nɛ mi hĩ̀ mì hũn àá mi. 2Ɛ́ ń den ɛ́ yanlienú ɛ̀ dí mí bòo hũn, kɛ́ lé iè yanlienú lɛ ɛ́ lé àá Dɔfĩn viì, iè hɔ̀ lɛ ɛ́ ń den yù miɛ ɛ́ lɛ́ bɛ́-cóoní ǹ lɛ iè ɔ̀ Kirisa. Ɛ́ ń den wo wɛ ɛ́ nin dàá miɛ ɛ̀ dàá vɛ piè viì kɛ̀a ie yentí lɛ ɛ́ ce, lɛ ɲɛùn yí dṹ bɛ́rɔ. 3Ɛ́ kɛ̀a bòo lɛ á hóonú ɛ́ dàa hàarí khɛ̀niɛ ɔ̀ Hɛwan ɛ́ yúnin àá lé lɛ́khíɛ bienù, ɛ́ ń den ɛ́ zán nɛ ɓuɔ́ àdɔ̀ ɛ̀ bí lɛ́ ɛ̀ mì nùnlé ɛ̀ ɓiɛ̀ yaa, ɛ̀ hɔ̀ fán miɛ ɛ̀ mì viì vɛ niìní àá ɔ́ Kirisa, àpe lɛ ɛ́ mí can dɛ̃̀ nin àá ɲún cã̀anírɔ́ àá hũn ceremú. 4Iè hɔ̀ lɛ kɛ́ nìnbírɔ́ dɔ̀ ɛ́ ɓen ɓɛrɛ bie Yiezu ɓùɛ dɔ̀ bòo àá miɛ lɛ wi mí dòonún àá ɔ́lɛ ɛ́ képe ɛ́ bie bòo àá miɛ, tàá kɛ́ ɓɛ́ ɓɛrɛ lɛ́ mɛkɛ̃nì dɛ̀ɓuɛ̀ dɔ̀ miɛ ǹ lɛ wi mí dòonún àá lé Mɛkɛ̃n-Sãanu lɛ ɛ́ mí yú, tàá kɛ́ ɓɛ́ ɓɛrɛ bie Bentĩnu dɛ̀ɓuɛ̀ dɔ̀ ɛ́ lɛ́ miɛ ǹ kɛ́ lé wi mí dòonún àá lé lɛ ɛ́ mí tɛ̀ bòo, ɛ̀ mì den pɛ́wi ɛ́ wóo hĩ̀ mì hũn àá ɓàasiè sãàní.

5Ɛ́ ń den ɛ́ líi ɛ̀ ǹ nɛ bòo lɛ ɛ́ ɓɛ́pe mì tɔnkɛriè bìbɛ̃hɛ̃ ɛ́ dàa bòo tṹ mi ɛ́ den mí wɛ̀! 6Ɛ́ hɛ̀rí kɛ́ ń yɛ̀rɛ́ ɛ́ yí dũ hɔ biehĩ́ bierɔ́ sãàniɛ, ɛ̀ Dɔfĩn bòo dũnlɔ́ viì ɛ́ ń ɓiɛ̀ dũ bòo cɛ̃̀un. Ɛ́ ké yú hɔ́ zɛ̃́niɛ sãa sãa ɛ́ lɛ́ miɛ ǹ yìe cɛ̀rìɛɛ hɔ̀ bòo míkùi hũn.

7Ɛ́ pɛ̃̀hṹ lɛ ɛ́ ń dàa khɛ́ Dɔfĩn Bentĩnu ɛ́ lɛ́ miɛ ǹ, ɛ́ ń wɔ́ hɔ́ kã́amáà. Ń hàarí síɛniɛ niǹte ǹ, bòo lɛ ɛ́ wé ɛ̀ mìpe ɛ̀ wé nì-bɛ̃hɛ̃. Ɛ́ bòo ɛ́ hɔ́pe sí iè bɔ̀koohɔ́ ɛ́ ń wɔ́? 8Ń tɛ̀ ɛ́ fɔ́ ńdɛ̃sĩ̀riè bìɓuà dɔ̀ núnú hũn bòo ɛ́ wɔ́ àá niǹ sàanín ɛ́ dàa ɓɛrɛ buie lè Bentĩnu mì viì. 9Ɛ́ pɛ̃̀hṹ lɛ ɛ́ ń dàa hàarí ɓɛrɛ wi mi viì, ɛ́ ń yí wé ɲún hũn tìerɔ́ nìnbírɔ́ dɔ̀ lɔ̀n, hɛ̀rí kɛ́ bòo ɛ́ hṹn ɓen van ɛ́ pɔ mi. Iè hɔ̀ lɛ ɛ́ kìe zɛ̀ɓɛ̀ lɛ ɛ́ lɔ́ hɔ́ Maseduanɛ ɛ́ hàarí ɓɛrɛ lɛ́ hɔ́ bòo lɛ ɛ́ niǹ mɛ̀kóo ɛ́ wi nin. Ɛ́ ń yí tɛ̀ ɛ́ wé tìerɔ́ mì ɲún hũn hɛ̀rí bòo dɔ̀ hũn wɛ̀. Ɛ́ sí iè pe ɛ́ ń den nin wé kɛ̀amu ɛ̀ dàá lan. 10À Kirisa bɔ̀berà lɛ ɛ́ wi mi ǹ yènsénín, ɛ́ ń den dɛ̀ ɛ́ bie nɛ nìnbírɔ dɔ̀ ɛ́ yí dɛ̀ mi ɛ́ yá si nɛ n bí ɓàaní niǹte hɔ̀pe sí hũn hɔ̀pe Akayi pɛ̃̀hɛ̃ míkùi hũn wɛ̀. 11Ɛ́ hɔ́ iè ńɓùo ɛ́ ń dàa ɛ́ bie kɛ̀amu? Hɔ́ bòo ɛ́ ń yí wɛ̀ miɛ yée? Ńɓùé dɛ̀! Dɔfĩn ɛ́ dũ kɛ́ ń den wɛ miɛ.

12Ɛ́ hɔ́pe lɛ ɛ́ nín wé iè pe ɛ́ ń den nín bĩní wé, bòo lɛ ɛ́ wé ɛ̀ ɓɛ̀pe lɛ ɛ́ cɛ̀ ɛ̀ ɓɛ̀ ɓàaní ɓɛ́te ǹ ɛ̀ bie nɛ ɓɛ́pe àá képe ɛ́ iè tɔn-cóoní ɛ́ ké tɛ́, ɛ́ ké bí lɛ́ wṹn nin ɛ̀ ɓɛ̀ dàń hɔ́ ɛ̀ wé wɛ̀. 13Ɓàasiè ɛ́ iè ɓúo tɔnkɛriè, ɓɛ̀ iè tɔntɛ́riè nì-fĩiníkɛriè lɛ wóò zɛ̀ní ɓɛ́te ɛ̀ wé àá Kirisa tɔnkɛriè. 14Ɛ́ hɔ́pe sí ɛ́ yí dɛ̀ nìnbírɔ dɔ̀ lɔ̀n ɛ́ yá yòokɛ, iè hɔ̀ lɛ ápe Sĩtũanɛ míte ǹ ɛ́ kùusɔ́ wóò zɛ̀ní míte ɛ̀ wé àá ńpiemu mɛlɛkɛ. 15Ɛ́ hɔ́ ɓiɛ̀ yí bòo lɛ ɛ́ yòokɛa ke lɔ̀n ɛ̀ ɓɛ̀pe tɔntɛ́riè sɔ sí ɛ̀ zɛ̀ní ɓɛ́te ɛ̀ wé àá Dɔfĩn lɛ ɛ́ cã̀aní tɔntɛ́riè wɛ̀. Kɛ́ peɓɛ̀ víenírɔ́ ɛ́ ɓiɛ̀ ɓén ɓáaɓán àá hɔ́pe bòo lɛ ɛ́ ɓɛ́ wɔ́.

Hɔ̀ lɔ̀nbuò lɛ yú Pooli piè tɔnlɔ́ hũn bòo

16Ɛ́ nín tĩ̀iní hɔ́ ɛ̀ khɛ́ lɛ́ miɛ ǹ nɛ nìnbírɔ dɔ̀ ɛ̀ bí líi mi àá khíerɔ́ wɛ̀. Kɛ́ ɓɛ́dɔ̀ ɛ́ ɓen ɛ́ hɔ̀ lieníkɛ, ɛ̀ mì wo tɛ̀ ɛ̀ wé mi àá ɔ́pe khíerɔ, bòo lɛ ɛ́ wé ɛ̀ ǹ ɓiɛ̀ yí niǹte ɛ̀ ɓàanínin bìcínbóo. 17Ɛ́ kɛ́ ń ɓen ɛ́ niǹte ɛ̀ ɓàanínin, ɛ̀ ǹ yá bie kɛ̀a ie Ɲunsɔ bòo lɛ á wɛ nɛ ń wóo bie, kɛ́ ń den ɛ́ khɛ́ kɛ̀a ie nìnbírɔ lɛ ɲún mí yán wɛ̀. 18Ɛ́ hɔ́ lɛ ɛ́ nìnbirìe bìkuì ɛ́ wóò ɓàaní ɓɛ́te ǹ hɔ̀ nìnbí-yáamu hũn, ɛ́ ńpe kùusɔ ɛ́ ɓiɛ̀ nin ɓàaní niǹte ǹ. 19Ɛ́ mípe lɛ ie ɓɛ̀ bɔ̀dũmunù ɓàasiè, ɛ́ hɔ́ iè ńɓuò ɛ́ mí dàa wóo tɛ̀ hĩ̀ mì hũn àá ɓɛ́pe nìɛ lɛ ɲúuhɛ̃ mí yán fùa fùa kɛ̀amu? 20Ɓɛ̀ wóò wé miɛ àá ɓɛ́ wɔ́hĩ́, ɛ̀ ɓɛ̀ khɛ̃̀níkɛ miɛ ɛ̀ fé bòo, ɛ̀ ɓɛ̀ kɛ̃̀mɛ́kɛ hɔ bòo lɛ ɛ́ mí dàa míkùi, ɛ̀ ɓɛ̀ yìe yá miɛ, ɛ̀ ɓɛ̀ láakɛ miɛ, kɛ́ mí lò den wóò hĩ̀ mì hũn hɔ̀pe sí míkùi hũn. 21Ɛ́ pehɔ̀ bierɔ́ ɛ́ yɛ̀rɛ́ wo lùwiè mi ǹ: ké hɛ̀ hàarí wɔ́ kéte àá nìnbirìe lɛ cũ̀kṹ mí wɛ̀.

Ɛ́ hɔ́pe sí míkùi hũn, kɛ́ ɓɛ́dɔ̀ ɛ́ ɓen wóò hĩ̀ ɓɛ́ tĩɛ̀ ɛ̀ ɓɛ̀ ɓàaní ɓɛ́te ǹ bòo dɔ̀ hũn, ɛ́ ńpe ɛ́ ɓiɛ̀ ɛ́ hĩ̀ niǹ tĩì ɛ̀ nin wé hɔ́. Ń den pɛ́wi ɛ́ bie kɛ̀a ie nìnbírɔ lɛ ɲún ɛ́ mí yán wɛ̀. 22Ɛ́ ɓɛ́ wóo nɛ ɓɛ́pe ɛ́ iè Hebereɓɛ? Ɛ́ ńpe kùusɔ ɛ́ iè Hebere lò. Ɛ̀ ɓɛ̀ wóo nɛ ɓɛ́pe ɛ́ iè Yizarayɛɛle nìɛ? Ɛ́ ńpe kùusɔ ɛ́ iè Yizarayɛɛle nùún lò. Ɛ̀ ɓɛ̀ wóo nɛ ɓɛ́pe ɛ́ iè Abarahaamu hũn nìɛ? Ɛ́ ńpe kùusɔ ɛ́ iè Abarahaamu hũn yɛ̀nù lò. 23Ɛ̀ ɓɛ̀ wóò nɛ ɓɛ́pe ɛ́ iè Kirisa tɔntɛ́riè? Ɛ́ ńpe ɛ́ iè Kirisa tɔntɛ́ ɛ́ pɔ ɓɛ lò. Ń den iè wiè ɛ́ bie kɛ̀a ie nìnbírɔ lɛ ɲún mí yán wɛ̀. Ń tɛ́ hɔ́ tɔnlɔ́ ɛ́ lɔ̀n bɔn pɔ ɓɛ́, ɛ̀ ǹ zɔn lè kɛ̀sí yìe cɛ̀rìɛɛ ɛ́ pɔ ɓɛ, ɛ̀ ɓɛ̀ han mi cɛ̃̀un ɛ́ pɔ́ ɓɛ, ɛ̀ ǹ kɛrɛ hɔ̀ húmú mɛ̀rɔ́ hũn yìe cɛ̀rìɛɛ. 24Fúu yìe hùanú kɛ́ ɓɛ́ Zuifuɓɛ ɛ́ wóò lɛ́ ńhùiehĩ́ yìe dɛ̀wɛ́ dìcóoní mí mi ǹ. 25Ɛ̀ ɓɛ̀ Rɔmu siè ɛ́ han mi àá hɔ́ ńhùiehĩ́ yìehɛ̃̀ tĩ, ɛ̀ sí-cóoní ɛ́ ɓɛ́ taa mi àá hɔ́ sɛ̃̀nlɛ̀a ɛ́ hṹn ɓɛ ɓé, ɛ̀ yìehɛ̃̀ tĩ kɛ́ lé ɲumu wiè dɛ̀bɛhɔ́ ɛ́ wóo zɔ yaa àá mi hɔ̀ ɲumu hũn, ɛ̀ sí-cóoní ɛ́ ń wɔ́ wũ-kùi àá mí sṹnúhṹn dɛ̀kùi hɔ̀ ɲun-bɛhɔ́ tĩ́ihṹ. 26Niǹ wṹn lɔ̀n viɛnù yìe bɔ̀kuì hũn, ɛ́ ń mɔn hɔ̀ mɛ̀rɔ́ bòo bɔ̀kuì: hɔ̀ vṹuhɛ̃ lɛ wóò tí tí ɛ̀ cáa yée, ɓɛ̀ kɛ̃̀múa lɛ wóò sĩ hɔ wṹuhɛ̃ yée, ɓɛ̀ kìe nìɛ Zuifuɓɛ àá ɓɛ́pe lɛ yí ɓɛ́ Zuifuɓɛ lɛ ɛ́ wóò cɛ̀ ɛ́ ɓɛ ɓé mi yée, lè lóo hũn mɛ̀rɔ́ àá lé ńɲiherà hũn mɛ̀rɔ́ yée, hɔ̀ ɲún-bɛhɔ́ mɛ̀rɔ́ àá hɔ́ mɛ̀rɔ́ lɛ wóò lé àá ɓɛ́ ɓúo ńdɛsĩ̀riè viì. 27Ń tɛ́ hɔ́ tɔnlɔ́ ɛ́ lɔ̀n bɔn cɛ̃̀un, ɛ̀ hɔ̀ dɔ̀ ɛ̀ ǹ yɛ̀rɛ́ yá yí hɔ́ dɛmu ɛ̀ dɛ, ɛ̀ hɔ̀ hĩni àá hɔ́ ɲɛ-hĩni ɛ́ ɓɔ́ mi, ɛ̀ hɔ̀ dɔ̀ ɛ̀ ǹ wóò wé tɛ ɛ̀ ǹ lì niǹ ɲunù, ɛ̀ hɔ̀ tìɛní ɛ́ ɓɔ́ mi, ɛ̀ ǹ lò hàarí yí dàa tĩ̀ɛ lɛ ɛ́ zɔ wɛ̀. 28Ɛ́ hɔ́ bòo bɔ̀ɓuà dɔ̀ ɛ́ bĩniɛ wi yán lɛ ɛ́ niǹ ɲunù ɛ́ yí mii dɛ̃, kɛ́ lé niǹ kuò lɛ wóo hè fúu hɔ̀ Dɔfĩn zĩhĩ́ɛ ńkóoɓánlɔ̀n nìɛ ɓɛ́kùi bòo hũn ɛ́ bòo ɛ́ mí. 29Á iè wieni ɛ́ temu pànkɛ́ ɛ́ ɓen va yèrɛ, ɛ̀ ǹpe ɛ̀ ɓiɛ̀ yá mi kɛ́ niǹ pànkɛ́ ɛ́ yèrɛ? À iè wieni temu ɓen khũ̀a lɔ́ hɔ́ ńdɛsĩ̀nlɔ́ hũn ɛ̀ hɔ̀ hɛ̀ yá ɲí mi ǹ ɓɔ́kɔ́kɔ́?

30Kɛ́ ń ɓen sãawi ɛ̀ ǹ ɓàaní niǹte ǹ, ɛ́ nín ɓàaní niǹte niǹ pànkɛ́ lɛ mí bòo hũn. 31Dɔfĩn lɛ iè kè Ɲunsɔ Yiezu Kirisa ɓà Yàá ɛ́ dũ kɛ́ hɔ́ yí ɓúo ɛ́ nín ɓúukɛ wɛ̀. Nɛ pehɔ̀ yèrè ɛ̀ ɓàaní pɛ̃hṹ lɛ ɛ́ yá vé hũn. 32Ɛ́ pɛ̃̀hṹ lɛ ɛ́ ń dàa hàarí ɛ́ wi hɔ Damaasi lóo hũn, á Kuvɛrɛnɛɛre lɛ hàarí wi yán à bɛ́zuú Aretaasi pɛ̃̀hṹ hũn, ɛ́ hàarí bɔ̀sí ɓɛ́ sɛ̃̀nɛ̀dɔ́síɓɛ́ lè lóo zĩínù ɲunù nɛ kɛ́ ń ɓen nin lé, ɛ̀ ɓɛ̀ ɓaà mi. 33Kɛ́ ɓɛ́ ńdɛsĩ̀riè ɛ́ den hàarí khie dɔ́ mi lè sìkí dɛ̀bɛhɔ́ dɔ̀ hũn ɛ́ can àá lé hurɔ́ ɛ́ lieniɛ àá lé bɔnkhĩì dɔ̀ lɛ wi le toohɔ́ lɛ kíríkɛa lèpe lóo ǹ, ɛ́ van síɛniɛ. Ɛ́ sí iè pe ɛ́ ń dàa yú fuerɛ piè núnú hũn ɛ́ cɔ́.

Currently Selected:

2 Korɛnte Siè 11: bwj

Highlight

Copy

Compare