1 Timote 5
5
Hɔ̀ bénlɔ́ lɛ ɛ́ lɛ́ ɓɛ́ ńdɛsĩ̀riè ɓɛ́kùi
1Ɛ́ kɔ́ ɓen kɔ ɛ̀ lɛ́ bénlɔ́ nìkĩ́ihṹ ǹ, ɛ̀ kɔ̀ bí lɛ̀ hiɛ̀ àá ɔ́ wɛ̀. Kɛ́ kɔ́ den khɛ́ àá ɔ́ kɛ̀a bòo á iè mì yàá. Ɛ̀ ɓɛ̀ zɛ̀fùa ɛ́ kɔ́ wóo bé kɛ̀a ie mì zɛ̀ɓɛ̀, 2ɛ̀ ɓɛ̀ hɛ̃́kĩ́ihɛ̃ ɛ́ kɔ́ wóo bé kɛ̀a ie mì nínɓɛ́, ɛ̀ ɓɛ̀ hɛ̃́fùa ɛ́ kɔ́ wóo bé kɛ̀a ie mì hĩ́ini hɔ̀ ceremú míkùi hũn.
3Ɓɛ̀ mɛ-hã́a lɛ nìnbírɔ dɔ̀ mí ɛ́ kɔ́ wóo húi bòo sãàní. 4Kɛ́ mɛ-hṹnu dɔ̀ ɛ́ dàa nìɛ tàá hũn nìɛ, ɛ̀ ɓɛ̀ ɛ́ sãawi ɛ̀ ɓɛ̀ dũń kɛ́ hɔ́ iè ɓɛ̀pe ɛ́ temu fɔ́ɓán ɛ̀ ɓɛ̀ dí hɔ́ híɛhɔ́ ɛ̀ húi ɓá tenliè sɔ bòo. Ɛ́ kɛ̀amu, hɔ́rɔsí ɛ̀ hɔ̀ iè hɔ̀ bòo lɛ ɛ́ ɓɛ́ ɛ́ yú ɓá tenliè sɔ viì ɛ́ ɓɛ́ khũ̀a ɛ́ lɛ́ ɓà ǹ. Ɛ́ sí den iè hɔ̀ bòo lɛ ɛ́ Dɔfĩn ɛ́ wɛ. 5À mɛ-hṹnu lɛ iè ɔ̀pe mí dòonún, lɛ yí dàa nìnbírɔ dɔ̀ lɛ ɛ́ mii húi piè bòo, ɛ́ den iè Dɔfĩn á bɔ̀ mí tĩì lɔ̀n. Á den wóò hɛ̃un hɔ̀pe Dɔfĩn fúu sṹnúhṹn àá wiɛhɔ́ nɛ Hɔ sĩiní mí. 6À mɛ-hṹnu lɛ ɛ́ wɔ́ hɔ́ bòo lɛ ɛ́ tĩ-ɛ̀ ǹ á wóo wé ɛ́ tan iè wìe lɛ ɛ́ húrun, hɛ̀rí kɛ́ piè yìe ɛ́ wi wúaní. 7Ɛ́ sí iè hɔ̀ bòo lɛ ɛ́ kɔ́ sãawi ɛ̀ kɔ̀ ɛ̀ bie lɛ́ ɓà ǹ nɛ ɓɛ wóo wé, bòo lɛ ɛ́ wé ɛ̀ ńwékhemù dɔ̀ ɛ́ bí mi ɓà ǹ wɛ̀. 8Kɛ́ nìnbírɔ dɔ̀ yá ɓà nìɛ bòo ɛ̀ húi, ɛ̀ pɔní hɔ́ míkùi, kɛ́ á yá ɓá kùrú tenliè bòo ɛ̀ húi, hɔ́rɔsí à pɛ̃́ hɔ́ ńdɛsĩ̀nlɔ́, à iè nì-làahṹ ɛ́ pɔ a nìnbírɔ lɛ ɛ́ yí ńdɛsĩ̀rɔ.
9À mɛ-hṹnu lɛ yèrè ɛ́ dɛ̀ ɛ́ wĩ́ ɓɛ́ mɛ-hã́a yèhĩ́ wĩ́nlén vɛ̃hṹ hũn peɓɛ̀ sĩinírɔ bòo hũn ɛ́ fɔ́ɓán à wé mɛ-hṹnu lɛ lɔ́líe ɛ́ dɛ̃un ɓaàtĩ, à lò fɔ́ɓán à wé hṹnu lɛ ɛ́ hṹn iè bɛ́-cóoní á yan, 10à fɔ́ɓán à wé hṹnu lɛ bɔ̀tente wénlɔ́ bòo ɛ́ dũ: à wé hṹnu lɛ ɛ́ dàa mí nìɛ sãàniɛ, hṹnu lɛ ɛ́ hṹn wóò pen ɓɛ̀ nɛ̀hãà ǹ sãàní, hṹnu lɛ ɛ́ hṹn wóò tiɛ ɓɛ ńdɛsĩ̀rìe laahĩ́ à sĩiní ɓɛ́ nìɛ lɛ ɛ́ wi le tĩyaarè hũn, à fɔ́ɓán à wé hṹnu lɛ ɛ́ hṹn wóò wé hɔ́ bɔ̀tente àá mí ɲúuhɛ̃ míkùi.
11Kɛ́ ɓɛ́ mɛ-hɛ̃́fùa ɛ́ kɔ́ bí wĩ́ yèhĩ́ ɓɛ̀pe mɛ-hã́a yèhĩ́ wĩ́nlén vɛ̃hṹ hũn wɛ̀. Iè hɔ̀ lɛ kɛ́ báa bòo ɛ́ ɓen wi peɓɛ̀ tĩɛ̀ hũn, ɛ́ hɔ́ ɛ́ lɛ́ ɛ́ ɓɛ́ ɛ́ fùansí-e Kirisa wṹn ɛ̀ ɓɛ̀ ɛ́ khíi cànkɛ ɛ̀ ɓɛ̀ bĩní khũ̀á yɛ. 12Ɛ́ kɛ́ ɓɛ́ wɔ́ kɛ̀amu, hɔ́rɔsí ɛ̀ ɓɛ̀ den wɔ́ khɔn iè hɔ̀ lɛ ɛ́ ɓɛ́ yí mɛ̀ndɛ̃ ɓɛ́ ɲunù lɛ ɛ́ ɓɛ́ zɔǹ sɛ̃̀nɛ́hã̀ lɛ́ wɛ̀. 13Ɛ̀ bĩní páa yán, hɛ̀rí kɛ́ ɓɛ́ yí bĩní khũ̀á yɛ, kɛ́ kɔ́ wɛ̃́ peɓɛ̀ yèhĩ́ lèpe vɛ̃hṹ sɔ hũn, ɛ́ ɓɛ́ ɛ́ wé pàariè, ɛ́ wo yá wóo bĩní ɛ́ wé bòo dɔ̀ wɛ̀. Ɛ́ ɓɛ́ wo wóo hĩ́ní ɛ́ wé ɓɛ́ nìnbirìe zĩhĩ́ɛ ɛ́ ɓɛ́ ɛ́ bènin. Kɛ́ hɔ́ lò den yá wé paahĩ́ mí dòonún, kɛ́ peɓɛ̀ ɲihĩ́ɛ ɛ̀ lò den bĩniɛ yá wóo ɓén híɛ wɛ̀; ɓɛ̀ den wóo ɓén bie fúu ɛ́ khíi vɛ kóo ɓɛ́ ɲihĩ́ɛ hɔ̀ bòo lɛ ɛ́ yí cɛrɛkɛa ɓɛ̀ hũn. 14Ɛ́ ń den ɛ́ cɛ̀ nɛ ɓɛ mɛ-hɛ̃́fùa ɛ̀ bĩní khũ̀á yɛkɛ, ɛ̀ yí ɓɛ́ zĩncã́ahɛ̃ ɛ̀ wóo húi ɓɛ́ zĩhĩ́ɛ bòo, bòo lɛ ɛ́ wé ɛ̀ ɓɛ̀ bí lɛ́ wṹn ɓɛ̀ kìe ńbíyanliè ǹ nɛ ɓɛ ɛ̀ yí ké yèrè ɛ̀ yáa wɛ̀. 15Ɛ́ ɓɛ́ mɛ-hã́a nìɛ ɓɛ̀ yìɛní dɔ̀ ɛ́ zĩ̀níkɛa khũ̀á lɔ́ lé wṹ-tente lɔ̀n ɛ́ khie van bɔ̀ à Sitũanɛ máahṹ. 16Kɛ́ ńdɛsĩ̀nlɔ́ hṹnu dɔ̀ ɛ́ dàa ɓá ńnáaɓɛ̀ dɔ̀ lɛ ɛ́ iè mɛ-hã́a, à sãawi à húi peɓɛ̀ bòo, kɛ́ á bí fùansí ɓà ǹ ɛ̀ tìení àá lé Dɔfĩn zũnù wɛ̀; bòo lɛ ɛ́ wé ɛ̀ lè Dɔfĩn zũnù ɛ̀ wé ɓɛ́ mɛ́-hã́a lɛ ɓà nìnbírɔ dɔ̀ ɛ́ mí ɛ̀ lè ɛ̀ húi bòo.
17Ɛ̀ hɔ̀ Dɔfĩn zũnù nìkĩ́ihɛ̃ lɛ ɛ́ dú ɓɛ́ ńdɛsĩ̀riè híɛhɔ́ sãàniɛ ɛ́ mí sãawi ɛ̀ mì wóo ɓàanínin cɛ̃̀un ɛ̀ húi bòo; sankɛ́ ɓɛ́pe lɛ ɛ́ wóò tɛ̀ ɛ́ ɓɛ́ lɛ́ ɓɛ́te ɛ̀ ɓɛ̀ bie le Dɔfĩn bienù ɛ̀ ɓɛ̀ kɛ̀rán ɓɛ́ nìnbirìe ɛ́ mí hɛ̀ wóo wookɛ ɓàanínin cɛ̃̀un. 18Ɛ́ hɔ́ ɛ́ wɛ̃́ lé Dɔfĩn bienù vɛ̃hṹ hũn ɛ́ nɛ: «À nàa lɛ ɛ́ hɔ̀ sìe hũn ɛ̀ vɛ̀ ɛ́ kɔ́ bí cɛ ɲunù wɛ̀.» Ɛ̀ hɔ̀ bĩniɛ wɛ̃́ ɛ́ nɛ: «À tɔntɛ́ ɛ́ fɔ́ɓán àá mí sàanín.»#5.18 Vɛ húi 1Ko 9.9; Matiye 10.10; Lik 10.7. 19Kɛ́ nìnbírɔ dɔ̀ ɛ́ ɓɛrɛ nɛ Dɔfĩn zũnù nìkĩ́ihṹ dɔ̀ ɛ́ wɔ́ bɔ̀koohɔ́ dɔ̀, ɛ̀ kɔ̀ bí dɛsĩ̀ ɓàasɔ ǹ wɛ̀; kɛ́ yí bòo ɛ́ nìɛ ɓɛ̀ ɲu tàá nìɛ ɓɛ̀ tĩ dɔ̀ ɛ́ ɓɛrɛ bie sĩiniɛ nɛ ɓɛ́ mɔn ɔ̀ kɛ́ á wɔ́ hɔ́. 20Ɛ̀ ɓɛ̀lɛ ɛ́ wɔ́ hɔ́ bɔ̀koohɔ́ ɛ́ kɔ́ dàá fĩ ɓɛ nìnbirìe yìe hũn, bòo lɛ ɛ́ wé ɛ̀ ɓɛ̀lɛ kɛ́ ɛ́ ɓìɛ zán hɔ́ bɔ̀koohɔ́ wénlɔ́.
21Ɛ́ nín kɔ̀ hɛ̃nnin Dɔfĩn híɛhɔ́ àá Yiezu Kirisa híɛhɔ́ àá Dɔfĩn mɛlɛkɛɓɛ híɛhɔ́ nɛ kɔ mɛ̀ndɛ̃ hɔpe bérɛ sí ɛ́ ń lɛ́ kɔ̀ ǹ míkùi àá mí híɛhɔ́ kɛ́ kɔ́ bí wiekɛ ɓɛ nìnbirìe wɛ̀. 22Bí wóo zɛ̀ ɛ̀ bè kɔ̀ níhĩ́ nìnbírɔ dɔ̀ lɔ̀n ɛ̀ dé tɔnlɔ́ dɔ̀ piè núnú hũn lè Dɔfĩn zũnù hũn, ɛ̀ kɔ̀ lò bí lɛ́ nɛ kɔ núnú ɛ̀ kań ɔ́dɔ̀ bɔ̀koohɔ́ lɛ á wɔ́ hũn, kɛ́ kɔ́ dàá kɔ́te àá ceremú.
23Bí wóo wé hɔ́ ɲumu mí dòonún ɛ̀ kɔ̀ ɲu fúu wɛ̀; kɛ́ kɔ́ wóo ɲu hɔ divɛ̃n bìcínbóo kɔ̀ tɛ̃́hĩ́ bòo hũn, iè hɔ̀ lɛ ɛ́ hɔ́ tan wóò sookɛ fúu.
24Ɓɛ̀ nìnbirìe dɔ̀ wi yán bɔ̀koohɔ́ lɛ ɛ́ ɓɛ́ wɔ́ ɛ́ wóò mi hɔ́ yíe hɛ̀rí kɛ́ ɓàasiè lìe ɛ́ ɲɛùn yí lè wɛ̀. Ɛ̀ ɓɛ̀dɔ̀ ɓiɛ̀ wi yán bòo ɓen mii mi iè máahṹ lɔ̀n. 25Ɛ́ kɛ̀amu, ɛ́ hɔ́ bɔ̀tente wénlɔ́ ɛ́ ɓiɛ̀ wóò mi hɔ yíe wìée. Ɛ̀ hɛ̀rí hɔ̀pe lɛ ɛ́ yáà mi yíe fùa fùa ɛ́ yí dɛ̀ yá tànkɔ̀ní ɛ́ kansí fúu wɛ̀.
Currently Selected:
1 Timote 5: bwj
Highlight
Copy
Compare
Share
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation
