1 Timote 4
4
Hɔ̀ ɓúo kɛ̀ránlɔ́ hɔ̀ mɛun sĩ́ hũn bòo
1Lè Mɛkɛ̃n-Sãanu ɛ́ den bie wìée nɛ hɔ mɛ́un sí hũn, ɛ̀ ɓɛ̀dɔ̀ ɛ́ ɓén fùansí hɔ́ ńdɛsĩ̀nlɔ́ ǹ, ɛ̀ ɓɛ̀ ɛ́ khíi vɛ wé ɓɛ́ nì-khɛ̃̀níkɛriè hɛciri àá ɓɛ́ ńɲíkĩ́nìɛ kɛ̀ránlɔ́ iè pe ɛ́ ɓɛ́ ɛ́ bè máahṹ. 2Ɓɛ̀ wóo ɓén fùansí ɓɛ́te ǹ ɛ́ ɓɛ́ ɲɛ-bĩníkɛriè àá ɓɛ́ lɛ́kɛ-ɓúukɛriè ɛ́ khɛ̃̀ní ɛ́ yínin. Peɓɛ̀ hũn nùnlé ɛ́ hɛ̀ lɔn fúu ɛ́ van minɛ kɛ̀a ie dìɛ lɛ ɓɛ́ cĩ̀niɛ àá lé hɛ̃nlɔ́ lɛ ɛ́ tɛ̃un bɔn hɔ̀ dũń hũń bòosí. 3Ɓàasiè ɛ́ wóò kɛ̀rán ɓɛ́ nìnbirìe nɛ ɓɛ yí fɔ́ɓán ɛ̀ ɓɛ̀ wóo yɛ, ɛ̀ ɓɛ̀ lò yí fɔ́ɓán ɛ̀ ɓɛ̀ wóo dí hɔ́ díe dɔ̀ wɛ̀. Hɔ́rɔsí kɛ́ Dɔfĩn ɛ́ lò den te hɔ́pe díe sɔ ɛ́ mɛ́ ɛ́ nɛ ɓɛpe ńdɛsĩ̀riè lɛ ɛ́ dũ hɔ bɔ̀berà ɛ̀ wóo dí kɛ́ ɓɛ́ ɛ́ mí bɛrikɛ ɛ̀ dé. 4Ɛ́ hɔ́ bòo lɛ ɛ́ Dɔfĩn ɛ́ mɛ́ míkùi ɛ́ den sãa, ɛ́ bòo dɔ̀ bòo ɛ́ yí fɔ́ɓán ɛ̀ hɔ̀ ɛ̀ pĩ́ wɛ̀; kɛ́ hɔ́ den fɔ́ɓán ɛ̀ hɔ̀ wóò mìí àá Dɔfĩn bɛrikɛ dénlɔ́, 5iè hɔ̀ lɛ ɛ́ Dɔfĩn bienù àá Dɔfĩn hɛ̃nnɛ̀ ɛ́ wóò lɛ́ ɛ̀ hɔ̀ bòo míkùi bòo ɛ̀ tĩìní hɔ́pe Dɔfĩn.
Yiezu Kirisa tɔntɛ́ tente bòo
6Ɛ́ kɔ́ ɓen zɛ̃́niɛ hɔ̀pe bòo sɔ sí ɛ́ lɛ́ ɓɛ́ ńdɛsĩ̀riè ǹ, ɛ̀ kɔ̀ den iè Yiezu Kirisa tɔntɛ́ tente. Hɔ́rɔsí ɛ̀ kɔ̀ den ɛ́ zɛ̃́ní kɛ́ kɔ́ wóò díiní kɔ́te àá hɔ́ ńdɛsĩ̀nlɔ́ biehĩ́ ɛ̀ khíi páa hɔ́pe bɔ̀berà kɛ̀ranlɔ́ lɛ ɛ́ kɔ́ yú lɔ̀n, hɔ̀pe lɛ ɛ́ kɔ́ ɛ̀ vɛ bènin sãa sãa. 7Kɛ́ kɔ́ den pĩ́ hɔ́ ɓáǹyíe bòo bierɔ́ lɛ yí ɓáa ɓán àá hɔ́ ńdɛsĩ̀nlɔ́, àá ɓɛ́ hɛ̃́kĩ́ihɛ̃ wũ̀a tĩirɔ́ ǹ, kɛ́ kɔ́ wé hɔ́ bòo lɛ ɛ́ lɛ́ ɛ́ kɔ́ ɛ́ cɛɓán àá Dɔfĩn ɛ́ kɔ́ kennin.
8Hɔ̀ ńwóo kení hɔ́ tɛkɛ̀a àá hɔ́ pànkɛ́ bòo wénlɔ́ ɛ́ pe wo ɛ́ wóò yíiní-ɛ́ nìnbírɔ bòo bɔ̀nbɔ̀ yiɛní dɔ̀ hũn. Kɛ́ hɔ́ ńcɛdìń Dɔfĩn ɛ́ pe wóò yíiní-ɛ nìnbírɔ bòo míkùi hũn, iè hɔ̀ lɛ ɛ́ hɔ́ wóò lɛ́ ɛ̀ kè dũń kɛ́ ké ɓén wé ké mɛkɛ̃nì hũn hɔ̀ zoòni, kɛ́ yírí ɛ̀ kè lò yí lé mɛkɛ̃nì lɛ ɛ́ yá vé. 9Ɛ́ lépe bienù sɔ sí ɛ́ den iè benbíi àá bɔ̀bín lɛ ɛ́ ɓɛ́ nìnbirìe ɓɛ́kùi ɛ́ sãawi ɛ̀ ɓɛ̀ tɛ̀ bòo. 10Ɛ́ ké ɓen ɛ́ hɔ̀ tɔnlɔ́ ɛ̀ tɛ́ lɔ̀n ɛ̀ be ɛ̀ kè lò ɛ́ hɔ̀ sɛrɔ́ ɛ̀ sɛ, ɛ̀ hɔ̀ iè hɔ̀ lɛ ɛ́ ké ɛ́ bɔ̀ kè tĩɛ̀ hɔ̀ Dɔfĩn lɛ ɛ́ yìe wi lɔ̀n, Hɔ̀pe lɛ ɛ́ iè ɓɛ̀ nìnbirìe ɓɛ́kùi fuenírɔ, ɛ̀ pɔní hɔ́ míkùi ɓɛ̀ nìɛ lɛ ɛ́ dũmuasɛ̃̀ hɔ̀ ǹ fuenírɔ.
11Ɛ́ sí den iè hɔ̀pe bòo lɛ ɛ́ kɔ́ sãawi ɛ̀ kɔ̀ wóo bie nɛ ɓɛ nìnbirìe ɛ̀ wé, ɛ̀ kɔ̀ ɛ̀ kɛ̀rán ɓɛ́ àá hɔ́. 12Ɛ́ kɔ́ bí lɛ́ nɛ nìnbírɔ dɔ̀ ɛ̀ cíwìní kɔ̀ ǹ iè hɔ̀ lɛ ɛ́ kɔ́ iè zĩncáahɔ́ wɛ̀. Kɛ́ kɔ́ den wé nìnbírɔ lɛ mii zɛ̃́ní lé wṹn ɓɛ̀ ńdɛsĩ̀riè ǹ kɔ̀ biehĩ́ bierɔ́ hũn, kɔ̀ te dàarɔ́ hũn, kɔ̀ nìnbirìe wɛnírɔ́ hũn, kɔ̀ ńdɛsĩ̀nlɔ́ hũn, àá kɔ́ hũn ceremú hũn. 13Ɛ́ kɔ́ cɛ kɔ kuò ɛ̀ wóo kɛ̀rán lé Dɔfĩn bienù ɓɛ̀ ńdɛsĩ̀riè tĩ́ihṹ, ɛ̀ lɛ́ hɔ́ bénlɔ́ ɓà ǹ, ɛ̀ kɛ̀rán ɓɛ́ kɛ́ ń vaá-ɓen. 14Ɛ́ kɔ́ bí cíwiní lé Mɛkɛ̃n-Sãanu hɛ̃mù bòo lɛ ɛ́ wi kɔ̀ ǹ, hɔ̀pe lɛ ɛ́ kɔ́ hàarí yú kɛ̀a bòo ɛ́ ɓɛ́ Dɔfĩn bɔ̀háaníriè ɛ́ dàa hàarí bie hɔ̀, ɛ̀ ɓɛ̀ nìkĩ́ɛ ɛ́ dàa hàarí bɔ̀ ɓɛ́ níhĩ́ kɔ̀ lɔ̀n ɛ́ hɛ̃nnɛ Dɔfĩn ɛ́ lɛ́ kɔ ǹ. 15Ɛ́ kɔ́ cɛ kɔ kuò hɔ̀pe sí míkùi hũn, ɛ̀ kɔ̀ lɛ́ kɔ́te míkùi hɔ̀pe tɔnlɔ́ sɔ sí ǹ; ɛ́ kɛ̀amu ɛ́ ɓɛ́ nìnbirìe ɓɛ́kùi ɛ́ wo ɛ́ mi kɛ́ kɔ́ ɛ́ vɛ àá híɛhɔ́. 16Ɛ́ kɔ́ vɛ àá híɛhɔ́ ɛ̀ pɛ kɔte bòo, ɛ̀ kɔ̀ piɛní kɔ́ yiè hɔ̀ bòo lɛ ɛ́ kɔ́ ɛ́ kɛ̀rán àá ɓɛ́ nìnbirìe lɔ̀n. Iè hɔ̀ lɛ ɛ́ kɔ́ den ɓen ɛ́ wé kɛ̀amu, ɛ́ kɔ́ ɓén fuení kɔ́te ǹ ɛ̀ kɔ̀ lò ɛ́ fuení ɓɛ́ lɛ ɛ́ wóò tɛ́ ɓɛ́ ɲɛkɛ̃̀a ɛ̀ ɓɛ̀ ɲí hɔ́ bòo lɛ ɛ́ kɔ́ ɛ́ bie.
Currently Selected:
1 Timote 4: bwj
Highlight
Copy
Compare
Share
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation
