1 Timote 2
2
Hɔ̀ bérɛ́ lɛ ɛ́ lɛ́ Dɔfĩn hɛ̃nnɛ̀ bòo hũn
1Ɛ́ hɔ́ bòo míkùi híɛhɔ́, ɛ́ ń den ɛ́ bie nɛ ɓɛ nìnbirìe ɛ̀ wóo hɛ̃un hɔ̀ bòo lɛ ɛ́ ɓɛ́ ɛ́ cɛ̀ Dɔfĩn viì, ɛ̀ ɓɛ̀ wóo hɛ̃un hɔ̀pe Dɔfĩn sãa sãa, ɛ̀ ɓɔ́nɓɔ́nikɛ Hɔ̀ ǹ, ɛ̀ ɓɛ̀ lò wóo dé pehɔ̀ bɛrikɛ ɓɛ̀ nìnbirìe ɓɛ́kùi bòo hũn. 2Ɛ̀ ɓɛ̀ wóo hɛ̃un Dɔfĩn ɛ̀ lɛ́ ɓɛ́ bɛ́zɛ̀ɓɛ̀ àá ɓɛ́ pànkɛ́ ɓàasiè ɓɛ́kùi ǹ bòo lɛ ɛ́ wé ɛ̀ kè dàá kansí hũn-wiɛ̀ àá tɛkɛ-wiɛ̀ àá mɛ̀ndɛ̃rɔ́ hũn kè mɛkɛ̃nì hũn, ɛ̀ kè dàá cɛ dĩń Dɔfĩn sãaní. 3Ɛ́ sí den iè hɔ̀ bòo lɛ sãa ɛ̀ hɔ̀ lò tĩ ke Dɔfĩn, Hɔ̀pe lɛ ɛ́ iè kè fuenírɔ. 4Dɔfĩn ɛ́ den wɛ nɛ ɓɛ nìnbiriè ɓɛ́kùi ɛ̀ fuen, ɛ̀ ɓɛ̀ lò dũń hɔ́ bɔ̀berà. 5Ɛ́ Dɔfĩn lɛ wi ɛ́ iè dìcóoní mí dòonú ɛ̀ yankɛrɔ nìcóoní mí dòonú ɛ́ lò ɓiɛ̀ temu wi hɔpe Dɔfĩn àá ɓɛ́ nìnbirìe tĩ́ihṹ; à iè ɔ̀ Yiezu Kirisa lɛ ɛ́ wɔ́ á nìnbírɔ. 6Àpe ɛ́ temu lɛ́ mí mɛkɛ̃nì ɛ́ dàa yɛ̀ ɓɛ̀ nìnbiriè ɓɛ́kùi ɲún. Á iè pe wo ɛ́ zɛ̃́ní kɛ̀amu kɛ́ Dɔfĩn ɛ́ wɛ mii fuení ɓɛ́ nìnbirìe ǹ lè pɛ̃̀hṹ lɛ ɛ́ hɔ́pe Dɔfĩn ɛ́ lerɛ hũn. 7Ɛ́ sí den iè pe hɔ̀ bòo hũn ɛ́ Dɔfĩn dàa lerɛ mi nɛ n wé mí benbierɔ àá mí tɔnkɛrɔ, ɛ̀ ǹ wóo kɛ̀rán ɓɛ́lɛ yí ɓɛ́ Zuifuɓɛ àá hɔ́ ńdɛsĩ̀nlɔ́ àá hɔ́ bɔ̀berà. Ɛ́ hɔ́ yí ɓúo ɛ́ nín ɓúukɛ kɛ́ hɔ́ iè bɔ̀berà ɛ́ ní munkɛ.
8Ɛ́ ń den wɛ nɛ ɓɛ báa ɛ̀ wóo hɛ̃un Dɔfĩn viì míkùi kɛ́ ɓɛ́ ɛ́ hóoniɛ ɓɛ́ níhĩ́ ɛ́ yòó viɛniɛ àá hóohũn. Ɛ́ ɓɛ́ sãawi ɛ̀ ɓɛ̀ wóo wé hɔ́ àá hũn ceremú lɛ kɛ́ tĩcĩ̀nín àá mí ńwũ̀anín ɛ́ bòo mí yán wɛ̀.
9Ɛ̀ ɓɛ̀ hã́a ɛ́ ń lò ɓiɛ̀ ɛ́ wɛ nɛ ɓɛ wóo cɛ ɓɛ́te sãàní. Ɓɛ̀ sãawi ɛ̀ ɓɛ̀ wóo cɛ ɓɛ́te àá te síɛnírɔ́, ɛ̀ ɓɛ̀ wóo zɔ hɔ tĩ̀ɛ lɛ ɛ́ híɛ peɓɛ̀ tɛkɛ̀a míkùi ǹ, ɛ̀ ɓɛ̀ bí wóo wé lé yèncànlè ɲúuhɛ̃ ɛ̀ ɓɛ̀ ɛ̀ pɛ́kɛ, ɛ̀ ɓɛ̀ bí wóo wé hɔ́ líɛrɔ́ lɛ yaamu hie hie ɛ̀ ɓɛ̀ kóokɛ, ɛ̀ ɓɛ̀ lò bí wóo wé hɔ́ tĩ̀ɛ lɛ yaamu hie hie ɛ̀ ɓɛ̀ ɛ̀ zɔkɛ wɛ̀. 10Kɛ́ ɓɛ́ den sãawi ɛ̀ ɓɛ̀ wóo zɛ̃́ní ɓɛ́ sãàrɔ́ ɓɛ́ bɔ̀tente wénlɔ́ hũn. Sí den iè hɔ̀ bòo lɛ ɛ́ ɓɛ́ hã́a lɛ wóò bie nɛ ɓɛ́ Dɔfĩn ɛ̀ mɛ̀ndɛ̃ ɛ́ fɔ́ɓán ɛ̀ ɓɛ̀ wóo wé. 11Ɓɛ̀ hã́a ɛ́ sãawi ɛ̀ ɓɛ̀ wóo hĩì, ɛ̀ ɓɛ̀ síɛní ɓɛ́te ǹ ɛ̀ ɓɛ̀ tɛ́ ɓɛ́ ɲɛkɛ̃̀a ɛ̀ ɲí hɔ́ bérɛ́ lɛ ɛ́ lɛ́ lé Dɔfĩn zũnù hũn. 12Ń yí lɛ́ ɲunù hṹnu ǹ nɛ á wóo kɛ̀rán nìnbirìe tàá nɛ a dàá ɲunù bɛ́rɔ lɔ̀n wɛ̀. Kɛ́ á den sãawi à wóo tĩn mí bín. 13Iè hɔ̀ lɛ ɛ́ Dɔfĩn ɛ́ pɛ̃̀hṹ iè Hɛdɛmɛ á mɛ́ hɔ́ híɛhɔ́ ɛ́ pehɔ̀ máahṹ ɛ̀ Hɔ̀ den mɛ́ á Hɛwan. 14À lò yí Hɛdɛmɛ á Sitũanɛ ɛ́ pɛ̃̀hṹ khɛ̃̀niɛ yú nin, kɛ́ á iè ɔ̀ hṹnu ɛ́ temu pɛ̃̀hṹ lɛ́ míte á Sitũanɛ ɛ́ khɛ̃̀niɛ yú nin. Ápe ɛ́ wo temu pɛ̃̀hṹ pɛ̃́ hɔ́ Dɔfĩn ɲunù tɛmu. 15Kɛ́ ɓɛ́ hã́a ɛ́ den wóo ɓén te ɓɛ zɛ̀ɓɛ̀ ɛ́ Dɔfĩn ɛ́ dàá fuení ɓà ǹ, lɛ kɛ́ ɓɛ́ dàa ɓen wi hɔ ńdɛsĩ̀nlɔ́ hũn àá mí wanminu hũn àá mí ceremú hũn àá mí te síɛnírɔ́ hũn.
Currently Selected:
1 Timote 2: bwj
Highlight
Copy
Compare
Share
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation
