1 Timote 3
3
Dɔfĩn zũnù hándíe bòo
1Lèpe bienù lɛ ɛ́ iè benbíi àá bɔ̀bín: kɛ́ nìnbírɔ ɛ́ cɛ̀ à wé Dɔfĩn zũnù hándí, ɛ̀ hɔ̀ iè tɔnlɔ́ lɛ sãa à ɛ́ cɛ̀ mii tɛ́. 2Á Dɔfĩn zũnù hándí ɛ́ fɔ́ɓán à wé nìnbírɔ lɛ ɛ́ bɔ̀koohɔ́ dɔ̀ ɛ́ yá mi nin wɛ̀. À fɔ́ɓán à wé hṹnu wìcóoní ɓàasɔ, à lò fɔ́ɓán à wé nìnbírɔ lɛ ɛ́ dɛ̀ míte wóò ɓaà, nìnbírɔ lɛ ɛ́ wóò wé hɔ́ bòo lɛ ɛ́ te mí yiè, nìnbírɔ lɛ ɛ́ wóò pen ɓɛ̀ nɛ̀hãà ǹ, nìnbírɔ lɛ ɛ́ dɛ̀ nìnbirìe wóò kɛ̀rán. 3À yí fɔ́ɓán à wé ɲɛkĩɛbɛ̃́ tàá nìnbírɔ lɛ núnú sɔ wɛ̀. Kɛ́ á fɔ́ɓán à wé nìnbírɔ lɛ ɛ́ wuawi, nìnbírɔ lɛ yáà cɛ̀ furɔ́ wɛ̀. À yí fɔ́ɓán à wé nìnbírɔ lɛ ɛ́ wɛ màa cɛ̃̀un wɛ̀. 4À fɔ́ɓán à dàń mí kùrú zũnù ɛ̀ dàá sãàní, à fɔ̀ɓán à dàń lɛ́ nɛ mí zĩncãahɛ̃ ɛ̀ wóo ɲí mí bòo, ɛ̀ wóo mɛ̀ndɛ̃ mí sãa sãa. 5Iè hɔ̀ lɛ kɛ́ nìnbírɔ ɛ́ ɓen yí dɛ̀ mí kùrú zũnù ɛ́ yá dàá, á wo wiɛ dàa dɛ̀ Dɔfĩn zũnù nìɛ ɛ́ dàá ɛ́ sãàní? 6À yí fɔ́ɓán à wé nìnbírɔ lɛ ɛ́ ɓɛrɛ lɛ́ míte Dɔfĩn sáalɛ wɛ̀; kɛ́ dàa bòo mí ɛ́ wɔ́ khɔn á ɛ́ tí àá yèncànlè, á wo ɛ́ yáa kɛ̀a bòo lɛ ɛ́ wɔ́ á Sĩtũanɛ ǹ. 7Ɛ̀ fɔ́ɓán à wé nìnbírɔ lɛ ɛ́ ɓɛ́pe lɛ yí ɓɛ́ ńdɛsĩ̀rìe ɛ́ wóò mɛ̀ndɛ̃, bòo lɛ ɛ́ wé ɛ̀ nìnbírɔ dɔ̀ ɛ̀ bí cíwìní-ɛ̀ ǹ à dàá bí khíi vɛ vĩ mite à Sitũanɛ hurɔ́ hũn wɛ̀.
Dɔfĩn zũnù bòo yìe lenliè
8Ɛ́ ɓɛ́pe Dɔfĩn zũnù bòo yìe lenliè ɛ́ lò ɓiɛ̀ fɔ́ɓán ɛ̀ ɓɛ̀ wé nìɛ lɛ ɛ́ ɓɛ́ nìnbirìe ɛ́ wóò mɛ̀ndɛ̃, ɛ̀ ɓɛ̀ fɔ́ɓán ɛ̀ ɓɛ̀ wé ben-cóoní ɓàasiè, ɛ̀ ɓɛ̀ bí wé ɲɛkhĩɛbɛ̃́ɓɛ́, ɛ̀ ɓɛ̀ lò bí wé nìɛ lɛ ɛ́ hɛ̀ wɛ hɔ màa fúu ɛ́ ɓɛ́ wóò wé hɔ́ lùwiè bòo ɛ̀ dàa yí hɔ́ wɛ̀. 9Ɓɛ̀ fɔ́ɓán ɛ̀ ɓɛ̀ cɛ dìń hɔ̀ bɔ̀berà lɛ ɛ́ hɔ́ ńdɛsĩ̀nlɔ́ ɛ́ te zɛ̃́niɛ ɓà ǹ, ɛ̀ ɓɛ̀ ɛ̀ dàá hũn nùnlé lɛ ɛ́ ce. 10Ɛ̀ ɓɛ̀ iè nìɛ lɛ ɛ́ mí ɛ́ fɔ́ɓán ɛ̀ mì ɛ̀ hàaní vé, kɛ́ bòo dɔ̀ ɛ́ ɓen mí ɓà ǹ, ɛ́ ɓɛ́ den wo dɛ̀ ɛ́ tɛ́ kɛ̀a ie bòo yìe lenliè lè Dɔfĩn zũnù hũn. 11Ɛ̀ ɓɛ̀pe hã́a Dɔfĩn zũnù bòo yìe lenliè ɛ́ kùusɔ ɓiɛ̀ fɔ́ɓán ɛ̀ ɓɛ̀ wé hã́a lɛ ɛ́ ɓɛ́ ninbirìe ɛ́ wóò mɛ̀ndɛ̃, ɛ̀ ɓɛ̀ bí wé hã́a lɛ ɛ́ wóò wan ɓɛ̀ nìnbirìe, ɛ̀ ɓɛ̀ wé hã́a lɛ ɛ́ dɛ̀ ɓɛ́te ɛ́ wóò ɓaà, ɛ̀ ɓɛ̀ wé hã́a lɛ ɛ́ dɛ̀ ɛ́ dɛsĩ̀nin bòo míkùi hũn. 12Ɛ́ ɓɛ́pe Dɔfĩn zũnù bòo yìe lenliè ɛ́ fɔ́ɓán ɛ̀ ɓɛ̀ wé hɛ̃́-cóohɛ̃ cóohɛ̃ ɓàasiè, ɛ̀ fɔ́ɓán ɓɛ̀ wé nìɛ lɛ ɛ́ dɛ̀ ɓɛ́ zĩncã́ahɛ̃ àá ɓɛ́ zũnù míkùi ɛ́ wóò dàá sãàní. 13Ɛ́ ɓɛ́pe Dɔfĩn zũnù bòo yìe lenliè lɛ wóò tɛ́ ɓɛ́ tɔnlɔ́ ɛ̀ sãàní ɛ́ ɓɛ́ nìnbirìe ɓɛ́kùi ɛ́ wóò mɛ̀ndɛ̃, ɛ̀ ɓɛ̀ lò dɛ̀ hɔ̀ ńdɛsĩ̀nlɔ́ lɛ ɛ́ ké yú ó Yiezu Kirisa viì bòo ɛ́ wóò bie kɛ́ ɓɛ́ fɔnù tɛ́rɛ.
Hɔ̀ bòo bɔ̀bɛhɔ́ lɛ ɛ́ hṹn tànkɔ̀niɛ bòo
14Nín lèpe vɛ̃hṹ lɛ ɛ́ wĩ́ ɛ́ nín lɛ́ kɔ ǹ, kɛ́ ń lò den ɛ́ nùún ɛ̀ ǹ ɓen kɔ̀ vìi hũ̀nún àá bìcínbóo. 15Kɛ́ ń den ɓen míɛ kɛ́ ń yá ɓen, ɛ́ lépe vɛ̃hṹ sɔ lɛ ɛ́ lɛ́ ɛ́ kɔ́ ɛ́ dũń bòo lɛ ɛ́ ɓɛ́ nìnbirìe dàa fɔ́ɓán ɛ̀ ɓɛ̀ wóò dàá ɓɛ́te lè Dɔfĩn zũnù hũn, ɓɛ̀pe lɛ ɛ́ temu iè hɔ̀ Dɔfĩn lɛ yìe wi zunù, ɛ̀ ɓɛ̀ ɛ́ te hɔ bɔ̀berà ɛ́ tìe dàa dɛ̃̀ kɛ̀a bòo lɛ ɛ́ lé zũnù kiɛ́ ɛ́ dàa te lepe zũnù ɛ́ wóò tìé dàá dìń bòo sí. 16Ɛ́ hɔ́ bòo lɛ ɛ́ hũn tànkɔ̀niɛ kɛ́ Dɔfĩn ɛ́ zɛ̃́niɛ hɔ̀ ɛ́ kiè ǹ kè ńdɛsĩ̀nlɔ́ hũn ɛ́ pe hɛ̀ wo iè bɔ̀bɛhɔ́; ɛ́ nìnbírɔ dɔ̀ lɛ ɛ́ dɛ̀ hɔ̀ ɛ́ wũ̀aní ɛ́ mí wɛ̀. Ɛ́ hɔ́pe bòo sɔ ɛ́ den iè hɔ̀ lɛ:
À Kirisa ɛ́ wɔ́ nìnbírɔ
Ɛ́ dàa ɓɛrɛ zɛ̃́niɛ míte,
Ɛ́ lé Mɛkɛ̃n-Sãanu ɛ́ zɛ̃́niɛ
Kɛ́ á iè nùún lɛ ɛ́ cã̀aní,
Ɛ́ ɓɛ́ mɛlɛkɛɓɛ ɛ́ mɔn ɔ̀.
Ɛ̀ piè bòo ɛ́ bie hɔ̀ dàa míkùi nìɛ tĩ́ihṹ,
Ɛ̀ ɓɛ̀ nìnbirìe ɛ́ dũmuasɛ̃̀ à ǹ lè dímíɲɛ́ míkùi hũn,
Ɛ̀ Dɔfĩn ɛ́ mɔ̀ à ɛ́ yòó viɛniɛ hɔ̀ hóo hũn hɔ̀ ɓàarɔ́ hũn.
Currently Selected:
1 Timote 3: bwj
Highlight
Copy
Compare
Share
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation
