1 Tesaloniike Siè 3
3
1Ɛ́ hɔ́ lɛ ɛ́ ké hɛ̀ hìe tan kɛ́ ké yá mì bòo ɛ̀ ɲí nin, ɛ́ ké wo nɛ hɔ sãa ɛ̀ kèpe ɛ̀ kansí hɔ́ Atɛɛnɛ lóo hũn kè-dòonún, 2ɛ́ ké dàa tɔrɛ à kìe zuú Timote lɛ ɛ́ hɔ̀ Dɔfĩn tɔnlɔ́ ɛ̀ tɛ́ àá kie à Kirisa Bentĩnu buierɔ́ hũn nɛ a ɓen mì viì, ɛ̀ ɓen dé cũ̀kṹ mì ńdɛsĩ̀nlɔ́ ǹ à lɛ́ tĩhiè miɛ ǹ, 3bòo lɛ ɛ́ wé ɛ̀ hɛ̀rí nìnbírɔ mì tĩ́ihṹ ɛ̀ dàá bàanì bí tè hɔ̀pe zoòni sɛ̃́ɲíi sɔ lɛ hũn wɛ̀. Mí lò wo dũ kɛ́ ké sãawi ɛ̀ kè zɔ lepe sɛ̃́ɲíi sɔ hũn. 4Pɛ̃̀hṹ lɛ ɛ́ ké dàa hàarí wi mi viì, ɛ́ ké sɛ̃̀nɛ́hã̀ khɛ́ hɔ́ lɛ́ miɛ ǹ nɛ ké sãawi ɛ̀ kè yí lé sɛ̃́-ɲíi; ɛ́ hɔ́ lò ɓiɛ̀ iè hɔ̀pe temu wɔ́ ɛ́ mí dũ. 5Ɛ́ hɔ́ lɛ ɛ́ ń hɛ̀ wo hìe tan kɛ́ ń yá mì bòo ɛ̀ ɲí nin, ɛ́ ń dàa tɔrɛ á Timote nɛ a ɓen mi mi ńdɛsĩ̀nlɔ́ dĩ̀nlɔ́ iè hɔ̀ lɛ ɛ́ niǹ hũn den hṹn yerɛ nɛ ɓuɔ́ à Situanɛ ɛ̀ bí khɛ̃̀ní miɛ ɛ̀ yínin ɛ̀ kè tɔnlɔ́ ɛ̀ wo vɛ ɲumu wɛ̀.
6Kɛ́ kɛ̀a sáalɛ á Timote ɛ́ lɔ́ mí viì ɛ́ khũ̀a ɓɛrɛ dɛ̃un kè vii; á ɓɛrɛ lɛ́ tɛmu lɛ tĩ kie ǹ mì ńdɛsĩ̀nlɔ́ àá mí wanminu bòo hũn. À ɛ́ bie lɛ́ kie ǹ nɛ mí wóò nùún ké bòo fúu àá wanminu, ɛ̀ mì ɛ́ wɛ ɛ́ mi bĩní khũ̀á mi kie kɛ̀a bòo lɛ ɛ́ képe kùusɔ ɛ́ ɓiɛ̀ ɛ́ wɛ ɛ́ ke bĩní khũ̀á mi miɛ. 7Ɛ́ kɛ̀amu mìpe kìe zɛ̀ɓɛ̀, ɛ́ ké tĩyaarè àá ké sɛ̃́ɲíi hũn ɛ́ ké hɛ̀ yòó yú lé tĩhiè mì ńdɛsĩ̀nlɔ́ bòo hũn. 8Ɛ́ kɛ̀a sáalɛ ɛ́ ké den hɛ̀ yìe ɛ́ wóokɛa yòó wi àá bɔ̀bín iè hɔ̀ lɛ ɛ́ mí hɛ̀ can mì kuò sãaniɛ ɔ̀ Ɲunsɔ bòo hũn. 9Ɛ́ hɔ́ wo iè ńɓùo ɛ́ ké dɛ̀ ɛ́ wé ɛ́ dàá dé Dɔfĩn bɛrikɛ mì bòo hũn lèpe miikɛ tĩwiɛ̀ lɛ ɛ́ ké yú pehɔ̀ híɛhɔ́ mìpe bòo hũn? 10Sṹnúhṹ àá wiɛhɔ́, ɛ̀ kè wóò hɛ̃un hɔ̀pe Dɔfĩn ɛ̀ ɓɔ́nɓɔ́ní Hɔ̀ ǹ nɛ Hɔ lɛ́ ɛ̀ kè bĩní khũ̀á mi miɛ bòo lɛ ɛ́ wé ɛ̀ hɔ̀ bòo lɛ ɛ́ yèrɛ́ miɛ ǹ mì ńdɛsĩ̀nlɔ́ hũn ɛ́ ké ɛ̀ tíiní ɲunù.
11Nɛ kìe Yàá Dɔfĩn míte ǹ àá ké Ɲunsɔ Yiezu ɛ̀ hán lé wṹn lɛ́ kie ǹ ɛ̀ kè dàá ɓen dɛ̃ miɛ! 12Nɛ Ɲunsɔ ɛ̀ lɛ́ ɛ̀ lè wanminu lɛ ɛ́ mí dàa ɓán tĩ́ihṹ àá lé lɛ ɛ́ mí dàa àá ɓɛ́ nìnbirìe ɓɛ́kùi ɛ̀ wookɛ ɓàaní ɓàarɔ́ ɛ̀ wé kɛ̀a lepe wanminu lɛ ɛ́ képe ɓiɛ̀ dàa àá miɛ! 13Nɛ a lɛ́ pànkɛ́ miɛ ǹ bòo lɛ ɛ́ wé ɛ̀ mì ɛ̀ wé nìɛ lɛ ɛ́ ce, lɛ ɛ́ ńwékhemù dɔ̀ ɛ́ yá mi nin kìe Yàá Dɔfĩn híɛhɔ́, pɛ̃̀hṹ lɛ kɛ́ ké Ɲunsɔ Yiezu ɛ́ khũ̀a vaá-ɓen àá ɓɛ́lɛ bòo sɛ̃̀ à ǹ ɓɛ́kùi! Amiina!
Currently Selected:
1 Tesaloniike Siè 3: bwj
Highlight
Copy
Compare
Share
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation
