1 Tesaloniike Siè 2
2
Pooli tɔnlɔ́ lɛ á tɛ́ hɔ́ Tesaloniike lóo hũn bòo
1Kìe zɛ̀ɓɛ̀, mìpe mìte ǹ ɛ́ lò wo dũ sãàniɛ kɛ́ ké yí ɓen mì viì kã́amáa wɛ̀. 2Ɓɛ̀ hàarí tòokɛa kie ɛ̀ ɓɛ̀ ɲínkɛa kie hɔ̀ Filiipu lóo hũn lɛ kɛ́ ké ɲɛ̀un yí ɓen dɛ̃ mi vìi, kɛ̀a bòo lɛ ɛ́ mí dàa dũ hɔ. Kɛ́ Dɔfĩn ɛ́ den lɛ́ lé tĩhiè kie ǹ nɛ ke ɓen bie le Bentĩnu ɛ̀ lɛ́ miɛ ǹ hɛ̀rí àá bòo lɛ ɛ́ ɓɛ́ nìnbirìe dàa yí tɛ̀ kè bòo míkùi. 3Ɛ́ lépe kè bérɛ́ bienù lɛ ɛ́ ké den ɛ́ bie ɛ̀ lɛ́ ɓɛ́ nìnbirìe ǹ ɛ́ den yí nìnbirìe lɛ fɛ̃un bienù, ɛ̀ lè yí hũn lenlɔ́ bienù, ɛ̀ lè lò yí nì-khɛ̃̀níkɛà bienù wɛ̀. 4Kɛ́ ké den wóò bie fúu kɛ̀a bòo lɛ ɛ́ Dɔfĩn ɛ́ wɛ nɛ ke wóo bie, iè hɔ̀ lɛ ɛ́ hɔ́pe Dɔfĩn ɛ́ hàaniɛ kie mɔn ɛ̀ Hɔ̀ dɔ́ mí Bentĩnu bierɔ́ bòo kè núnú hũn. Ɛ́ ké wo yá cɛ̀ nɛ ke bòo ɛ̀ tĩìní ɓɛ́ nìnbirìe ǹ, kɛ́ hɔ́pe Dɔfĩn lɛ dũ ɓɛ nìnbirìe tĩɛ̀ bòo iè pe ɛ́ ké ɛ́ cɛ̀ nɛ ke bòo ɛ̀ tĩìnínin. 5Mí dũ sãaniɛ kɛ́ ké yí bie nì-khɛ̃̀níkɛà biehĩ́ ɛ́ yí mi, ɛ̀ kè lò yí píɛsí yí mi ɛ̀ khɛ̃̀ní nìnbírɔ dɔ̀ ɛ̀ fé bòo dí wɛ̀. Dɔfĩn kùusɔ ɛ́ dũ kɛ́ hɔ́pe bòo lɛ ɛ́ nín bie ɛ́ bɔn. 6Ké den yí cɛ̀ nɛ nìnbírɔ dɔ̀ ɛ̀ ɓàaní kie ǹ wɛ̀; ké yí cɛ̀ mìpe mì ńɓàanín, ɛ̀ kè lò yí cɛ̀ nìnbí-ɓuà dɔ̀ ńɓàanín wɛ̀. 7Hɔ́rɔsí kɛ́ ké lò den hṹn dɛ̀ kè pànkɛ́ ɛ́ ɲì mì lɔ̀n kɛ̀a hɔ lɛ ɛ́ ké iè ɔ̀ Kirisa tɔnkɛriè. Kɛ́ ké den yí wé hɔ́pe sí wɛ̀; ké den wuawiniɛ kète mì tĩ́ihṹ kɛ̀a bòo lɛ ɛ́ zĩncãahɛ̃ ɓà nín ɛ́ dàa wóò wuawiní míte ɛ̀ dàá húi mí zĩncãahɛ̃ bòo. 8Ké hɛ̀ wɛniɛ miɛ cɛ̃̀un fúu ɛ́ ké hṹn yí wɛ nɛ le wé Dɔfĩn Bentĩnu mí dòonún ɛ̀ kè lɛ́ miɛ ǹ, kɛ́ ké den hṹn wɛ ke bĩní lɛ́ ké kùrú mɛkɛ̃nɛ̀a miɛ ǹ ɛ̀ sĩiní, iè bòo lɛ ɛ́ mí bòo dàa hie kie ǹ. 9Kìe zɛ̀ɓɛ̀, mí lò wo hũn ɛ́ yí ɓé ké tɔnlɔ́ lɛ ɛ́ ké tɛ́ lɔ̀n bɔn bòo ǹ; ké tɛ́ sṹnúhṹn àá wiɛhɔ́ míkùi pɛ̃̀hṹ lɛ ɛ́ ké dàa ɛ́ lè Bentĩnu ɛ̀ buie lɛ́ miɛ ǹ, bòo lɛ ɛ́ wé ɛ̀ kè bí wé ɲún hũn tìerɔ́ àdɔ̀ lɔ̀n mì tĩ́ihṹ wɛ̀. 10Hɔ̀pe bòo lɛ ɛ́ ké ɛ́ wɔ́ ɛ́ mípe mìte ǹ lò wo mɔn, ɛ̀ Dɔfĩn ɛ́ lò ɓiɛ ɛ́ mɔn kɛ́ ké te dàarɔ́ àá mípe ńdɛsĩ̀riè ɛ́ wɔ́ ceremú àá cã̀anírɔ́ hũn, ɛ́ nìnbírɔ dɔ̀ ɛ́ yí dɛ̀ ńwékhemù dɔ̀ ɛ́ yá mí kie ǹ ɛ́ bie bòo wɛ̀. 11Ɛ̀ mì lò dũ sãaniɛ nɛ hɔ bòo lɛ ɛ́ ké ɛ́ wɔ́ àá mípe mì nì-coohɛ̃ ɛ́ iè hɔ̀pe lɛ á yàá ɛ́ wóò wé àá mí zĩncãahɛ̃. 12Ké ɛ́ lɛ́ hɔ́ bérɛ́ miɛ ǹ ɛ̀ kè hĩ̀iníkɛa mì tĩɛ̀, ɛ̀ kè ɓɔ́nɓɔ́niɛ miɛ ǹ cɛ̃̀un nɛ mi dàá míte kɛ̀a bòo lɛ ɛ́ Dɔfĩn ɛ́ wɛ, hɔ̀pe Dɔfĩn lɛ ɛ́ mì ve nɛ mi ɓen zɔ mí bɛ́záanú àá mí ɓàarɔ́ hũn.
13Ɛ́ lɛ bĩniɛ iè hɔ̀ bòo lɛ temu lɛ́ ɛ́ ké dàa wóò dé Dɔfĩn bɛrikɛ fúu: hɔ̀ lɛ ɛ́ ké ɛ́ bie lè Dɔfĩn Bienù ɛ́ lɛ́ miɛ ǹ, ɛ́ mí ɛ́ hɛ́rɛ mì hũn ɛ̀ mì fɔ́ lé; mí yí wé lé àá nìnbírɔ bienù, kɛ́ mí tɛ̀ lè bòo kɛ̀a Dɔfĩn Bienù, ɛ́ lé lò den iè lèpe Dɔfĩn Bienù àá bɔ̀bín. Ɛ́ kɛ̀amu, ɛ́ lé wo ɛ́ mí tɔnlɔ́ ɛ̀ tɛ́ mípe ńdɛsĩ̀riè lɔ̀n. 14Kìe zɛ̀ɓɛ̀, hɔ̀ Zudee pɛ̃̀hɛ̃ Dɔfĩn zĩhĩ́ɛ nìɛ lɛ dũmuasɛ̃̀ à Yiezu ǹ bɔ̀werà ɓà ńmàa iè pe ɛ́ mí wɔ́, iè hɔ̀ lɛ ɛ́ mí lɔ̀n ɛ́ ɓiɛ̀ bɔn mì lóo nìɛ núnú hũn kɛ̀a bòo lɛ ɛ́ ɓɛ́pe dàa lɔ̀n bɔn ɓɛ̀ Zuifuɓɛ núnú hũn. 15Ɓɛ̀pe Zuifuɓɛ ɛ́ ti-e Ɲunsɔ Yiezu ɛ́ ɓɔ́, ɛ̀ ɓɛ̀ te ɓɛ Dɔfĩn bɔ̀háaníriè ɛ́ ɓɔ́kɛ, ɛ̀ ɓɛ̀ lò te kepe ɲɛkɛ̃̀a ɛ́ vɛ́. Peɓɛ̀ bòo ɛ́ yí tĩ Dɔfĩn wɛ̀, ɛ̀ ɓɛ̀ iè ɓɛ̀ nìnbirìe ɓɛ́kùi ɓà ńbíyanliè. 16Ɓɛ̀ ɛ́ kè si nɛ ke bí bie le Bentĩnu ɛ̀ lɛ́ ɓɛ́lɛ yí ɓɛ́ Zuifuɓɛ ǹ ɛ̀ ɓɛ̀ fuen wɛ̀. Ɛ́ ɓɛ́ iè pe ɛ́ wo wookɛa ɛ́ hɔ́ bɔ̀koohɔ́ ɛ́ wé kɛ̀amu ɛ̀ tíiní ɓɛ́ bɔ̀koohɛ̃ ɲunù. Kɛ́ Dɔfĩn tĩcĩ̀nín ɛ́ wɔ́ fúu van síɛ peɓɛ̀ lɔ̀n.
Tesaloniike lóo ńdɛsĩ̀riè pɔnù ɛ́ Pooli ɛ̀ ɓé
17Ɛ́ hɔ́ ɓen kɛ́ képe, mìpe kìe zɛ̀ɓɛ̀, ɛ̀ kèpe wo mí ɓánlɔ̀n àá miɛ pɛ̃̀hṹ dɔ̀ hũn, kèpe wo yìe ɛ́ viì ni ɓán kɛ́ ké tĩɛ̀ ɛ́ pe wi ɓánlɔ̀n; ɛ́ ké hɛ̀ wɔ́ hɔ́ bòo míkùi bòo lɛ ɛ́ wé ɛ̀ kè bĩní khũ̀á mi miɛ iè hɔ̀ lɛ ɛ́ mí pɔnù ɛ́ hɛ̀ ɛ́ kìe ɓé cɛ̃̀un. 18Ɛ́ sí iè hɔ̀pe ɛ́ ké dàa ɛ́ hṹn cɛ̀ ɛ̀ kè ɓen khí miɛ ǹ. Àá yìe cɛ̀rìɛɛ kɛ́ ńpe Pooli ɛ́ hṹn cɛ̀ ɛ́ ǹ ɓen khí miɛ ǹ, kɛ́ á Sitũanɛ ɛ́ sun mi ɛ́ ń yí dàń hɔ́ ɛ́ yí wé wɛ̀. 19Ɛ́ ɓɛ́ wo iè ɓɛ̀ bɛ́sɔ́ ɛ́ temu iè kè tĩì bènlén àá ké tĩwiɛ̀ àá ké te ɓàanílán bɛ́záanú múnséré kè Ɲunsɔ Yiezu híɛhɔ́ piè khũ̀á ɓenlɔ́ yìi hũn kɛ́ mípe ɛ́ ɓen bòo mí? 20Ũun, mìpe ɛ́ temu iè kè te ɓàanílán àá ké tĩwiɛ̀ ɲún.
Currently Selected:
1 Tesaloniike Siè 2: bwj
Highlight
Copy
Compare
Share
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation
